Kukulisa Luso Lathu mu Utumiki​—Kupalizira Mwakuphatisa basa Mikrofoni ya Pamsuwo

Thangwe Ranyi Mpsakufunika: Upalizi bwakuphatisa basa mikrofoni ya pamsuwo bungakhale bwakupasa thupo. Koti tingatcenkhe tani thupo limweri kuti lireke kucepesa nyongo yathu pa mabasa yabwino? Mbakumbukirani kuti upalizi bwakuphatisa basa mikrofoni ya pamsuwo bungakhale njira ibodzi yokha yakufikira wanthu winango na bzipsa bzabwino. (War. 10:14) Bzomwe winango adacita bzingalatize kuti upalizi bwakupasa phindu bungacitidwe mwakuphatisa basa njira imweyi. (Onani Bukhu Lapachaka la 2011, masa. 65-66, na Bukhu Lapachaka la 2000, tsa. 54, ndi. 3.) Onani nfundo zinkutewerazi:

Momwe Mungacitire:

• Konzekerani ciratizo cacigwatho, ndipo nembani bzimwebzo pambali kuti mumbacite kuwerengeratu bzimwebzo kuna mweneciro nyumba mwa kuphatisa basa mikrofoni ya pamsuwo. Bzimwebzi bzingakuze kukhwimika kwanu. Pakuyamba, fotokozani thangwe lakumuzungira kwanuko. Phatisani basa dzina la mweneciro mui penu lidanembedwa pamwepo. Malizani mwa kugawira (ayai kusiya pamsuwo pa munthuyo) tumatsamba ayai marevista yomwe yan’dzamupasa nfundo zakuthumizira.

• Pitirizani kumbawona mu njira yakuthemera. Mbamwetukirani na kuphatisa basa manja ninga kuti munkulewalewa maso na maso na munthuyo.

• Khalani wakutsudzuka na wakucezeka. Lewalewani mwakubveka bwino muciphatisa basa mphanvu yabwino ya mafala. Lekani kumbandogwatiza-gwatiza mafala, ndipo lekanimbo kumbalewalewa mwakuthamanga kwene-kwene.

• Phatisani basa nzeru. Mu nyumba za nsanza zikulu-zikulu, mungakhale na mikrofoni zizinji zapamsuwo. Pinango imwepo mungasankhule kuliza kampainya, kunemba pomwe mwalekezera mucibwerera kumui. Wanthu wakukhala mu nsanzayo angagope tikakhalisa kwene-kwene ticimbaliza mikrofoni iri-yense.

Yezerani Kucita Bzimwebzi Mkati mwa Mwezi Wathunthu:

• Pakunamata ninga banja mbaezezani bzimwebzi ndipo anyakucitawo akhale mwakusaya kunyang’anisana.