Kukulisa Luso Lathu mu Utumiki—Kupalizira Munthu Omwe Ambalewalewa Cirewedwe Cinango
Thangwe Ranyi Mpsakufunika: Yahova ankufunisisa kuthandiza mwauzimu wanthu ‘wakucokera ku mtundu uli-wense.’ (Mabasa 10:34, 35) Na tenepo, Jezu adalatiza kuti bzipsa bzabwino bzingadadzapalizidwa ‘pa dziko lense komwe kuna wanthu’ ndipo ‘kwa mitundu yense.’ (Mat. 24:14) Zakariya adaleweratu kuti wanthu wa ‘bzirewedwe bzense bza wanthu wa mitundu’ wangadadzabvuma. (Zak. 8:23) Mwakubverana na masomphenya ya mpostolo Juwau, wale womwe an’dzapulumuka pa citsautso cikulu an’dzaphatanidza ‘wanthu wa mitundu, madzinza, mbumba na bzirewedwe bzense.’ (Cibv. 7:9, 13, 14) Mwakubverana na bzomwe bzafotokozedwa kale, tikagumana munthu mu gawo lathu omwe ambalewalewa cirewedwe cinango, tin’funika kuyezera kumupalizira.
Momwe Mungacitire:
• Khalani wakukonzeka. Pitirizani kuphatisa basa kabukhu kakuti Uthenga Wabwino wa Anthu a Mitundu Yonse pa kupalizira. Zolowerani malango yomwe yankugumanika kwakuyambirira kwa kabukhuko yomwe yana msolo wakuti “Mmene Mungathandizire Anthu Olankhula Chinenero China.” Mungakonzekereretu cirewedwe comwe mungakacigumane, ndipo mungacose vidiyo ayai bukhu la m’cirewedweco pa jw.org muciikha mu mtedwe wanu ayai mtcini wam’manja. Cezeranani mwakuphatisira basa JW Language kuti mupfunze tumafala tung’ono-ng’ono. Penu magwere ya bzirewedwe bzakusiyana-siyana yambapalizira mu magawo yabodzi-bodzi, tengani mabukhu kokha ya cirewedwe comwe gwere lanu limbaphatisa basa pomwe munkuyenda kukacita upalizi bwa nyumba na nyumba. Na tenepo, pakucita upalizi bwa padeca mu mbuto zomwe kumbagumanika wanthu wa bzirewedwe bzakusiyana-siyana, khalani na mabukhu ya cirewedwe ca wanthu womwe mungagumane nawo.
• Mukagumana na munthu omwe ambalewalewa lini cirewedwe canu, citani bzomwe mungakwanise kuti mugawane naye ‘bzakudabwisa bza Mulungu’ mu cirewedwe cace. (Mabasa 2:11) Muuzeni kuti apite pa jw.org kuti agumane nfundo zizinji mu cirewedwe cace. Penu iye ana mtima wakufunisisa, dzazaniletu formulario yakuti Muzungireni Munthuyu (S-43) mucipasa munembi wa gwere. Pitirizani kumbaceza naye mpaka pomwe an’dzagumana na mpalizi omwe ambalewalewa cirewedwe cace.
Yezerani Kucita Bzimwebzi Mkati mwa Mwezi Wathunthu:
• Pa kunamata kwanu ninga Banja kwakutewera, khalani na mbali yakuyezezera kupalizira munthu omwe ambalewalewa lini cirewedwe canu.