Kukulisa Luso Lathu mu Utumiki—Thandizani Anyakupfunza Bibliya kuti Wakulise Cizolowezi Cabwino ca Kupfunza
Thangwe Ranyi Mpsakufunika: Kuti anyakupfunza Bibliya wakule mwauzimu, iwo wan’funika kudyesa nzeru na mitima yawo sikuti na cipfunziso cakuyambirira ca Fala la Mulungu cokha ne koma kumbaphatanidzambo bzizinji. (Waheb. 5:12–6:1) Kupfunza kumbafuna nyongo. Bzimwebzi bzimbaphatanidza kulewa-lewa nfundo zomwe tsapano tinkuzidziwa na kumbakumbukira phindu lace. (Mim. 2:1-6) Kupfunzisa anyakupfunza kuti wambafufudze wokha kun’dzawathandiza kuti wambatawire mibvunzo ya nkhani za m’Bibliya mwakuphatisa basa mabukhu yathu yacikristau. Kucita nyongo yakuphatisa basa bzomwe wankupfunza kun’dzawathandiza kulimbana na mayezo yomwe wangagumane nayo ninga mkristau.—Lu. 6:47, 48.
Momwe Mungacitire:
• Tsindikani kufunika kwa kukumbira thandizo la Yahova mwa kucita mpembo pomwe akanati kuyamba kucita pfunziro liri-lense.—Ju. 14:26; 1 Wak. 2:10.
• Kuyambira pakutoma, mulimbiseni nyakupfunza wanu kuti ambakonzekereretu pfunziro lace la Bibliya. Mulatizeni bukhu lanu lomwe munkuphatisa basa ndipo mupfunziseni kuti ambanembe mizere kunsi ayai kwa mafala yomwe yana nfundo zakufunika kwene-kwene.
• Muthandizeni nyakupfunza wanu kuti ambatawire na mafala yace-yace. Tcenkhani kucitisa pfunzirolo kukhala lakunesa ninga mbali ya mibvunzo na mitawiro yomwe nyakupfunza ambandotawire mwakucita kuwerenga mu bukhu lace.
• Limbisani nyakupfunza wanu kuti ambawerenge mbali ibodzi ya Fala la Mulungu nsiku na nsiku. Mulatizeni ndondomeko ya kuwerenga Bibliya yomwe imbagumanika pa jw.org ayai mu Nsanja ya Olonda ya 1 Agosto, 2009 matsa. 15-18 yomwe ni njira yabwino yakuthandiza. Bzimbafunika kukhala wakutsimikiza kuti munthu akulise cizolowezi ca kuwerenga Bibliya nsiku na nsiku, koma kucita nyongo kungakhale kwakuthandiza.—Psal. 1:2, 3.
• Latizani nyakupfunza wanuyo momwe iye angagumanire mitawiro ya m’Bibliya mwakuphatisa basa Watchtower Library, BIBLIOTEKA YA PA INTERNETI ya Watchtower ayai mungaphatise basa Buku Lofufuzira Nkhani. Muthandizeni iye kudziwa bzizindikiro bzomwe bzimbaimira mabukhu yomwe yambaphatisidwa basa kawiri-kawiri pa mitsonkhano ya gwere; mwa ciratizo, cizindikiro ca fg cimbaimira broxura la Bzipsa Bzabwino Bzakucokera kwa Mulungu!
Yezerani Kucita Bzimwebzi Mkati mwa Mwezi Wathunthu:
• Mukamaliza pfunziro liri-lense, kumbirani nyakupfunza wanu wa Bibliya kuti afotokoze mu mafala mang’ono-ng’ono bzomwe iye wapfunza. Penu mulibe nyakupfunza, zolowerani kumbabwerezera m’mafala mang’ono-ng’ono mbali za m’Bibliya ayai ndime za mu Nsanza ya Mulindiri kuti mutsimikize penu mwabvesesa bzomwe mwawerengabzo.