Phatisani Basa Nkhani za m’Bukhu la Bibliya Limbapfuzisa Ciyani mwa Kuphata Mtima

Nyakupfunza Bibliya akapfunza bzomwe Bibliya limbapfunzisadi maka-maka, aciphatisa basa bzomwe ankupfunzabzo, iye ambakula mwauzimu acibala bzisapo. (Psal. 1:1-3) Tingathandize anyakupfunza wathu kukula mwauzimu mwa kuphatisa bwino basa nkhani za m’bukhu la Bibliya Limbapfunzisa Ciyani.

Mibvunzo Yomwe iri Kumayambiriro kwa Msolo: Msolo uli-wense umbayamba na mibvunzo yomwe imbatawiridwa mkati mwa pfunziro. Mungabvunze mibvunzoyi kuti nyakupfunza abzitawire yekha mu mtima mwace na cakulinga ca kukuza mtima wace wakufunisisa kupfunza pa nkhani yomwe muti mucezeraneyo. Ayai mungamukumbire kuti iye atawire mwacigwatho bzomwe ankukumbuka pa mbvunzo uli-wense. Penu iye an’tawira mwakuphonyeka, lekani kumulungamiziratu nthawe imweyo. Bzomwe iye an’tawira bzinkuthandizani kuzindikira nfundo zomwe iye angafunikire kuzibvesesa mucizitsindika.​—Mim. 16:23; 18:13.

Mafala Yakuthumizira: Nyakupfunza akabvesesa acibvuma nfundo za m’pfunzirolo, mungandomulimbise kuti adzawerenge yekha nfundo za ku mbali ya mafala yakuthumizira. Pa pfunziro la patsogolo pace, mungakhale na tumphindi tung’ono-ng’ono kuti mutsimikize penu iye adabvesesa. Na tenepo, penu mpsaphindu kuna iye mungasankhule nthawe mkati mwa pfunzirolo kuti mucezerane mbali za ku mafala yakuthumizira mwa kuwerenga ndime na kucita mibvunzo yomwe imwepo mukhadakonzekera kale.

Kwadru ya Nfundo Zakubwerezera: Kwadru ya nfundo zakubwerezera yomwe imbagumanika kwakumalizira kwa msolo uli-wense imbatawira mibvunzo yomwe iri kwakuyambirira kwa pfunzirolo. Mungaphatise basa nfundo zimwezi kuti mutsimikize penu nyakupfunzayo ankubvesesa na penu angakwanise kufotokoza bzomwe ankupfunzabzo. Werengani nfundo iri-yense muciwerenga mavesi yace. Kumbirani nyakupfunza wanuyo kuti aphatise basa mavesi kuti afotokoze thangwe ranyi nfundoyo njacadidi.​—Mab. 17:2, 3.