Limbisani Wale Omwe Adadjedjera Mwauzimu

Pa Cipiri, 11 Abril, Akristau azinji omwe adadjedjera mwauzimu an’dzabwera pa Cikumbuso. Pakuyamba wanthuwa akhali wakulimba mwauzimu, tsono thangwe ra mphitca zakusiyana-siyana ninga zomwe zimbafotokozedwa m’broxura lakuti Bwererani kwa Yahova, iwo adadzadjedjera mwauzimu. (Waheb 12:1) Tsono napo wathuwa mbakudjedjera mwauzimu, Yahova ambawafuna kwene-kwene, thangwe adawagula na mulopa wa Mwana wace. (Mab 20:28; 1Pe 1:18, 19) Tsono tingawathandize tani kuti abwerere m’gwere la Yahova?

Ninga momwe m’busa ambapsagira bira omwe wasocera, akulu wa m’gwere ambanyang’ana na kuthandiza Akristau omwe adadjedjera mwauzimu. (Lu 15:4-7) Ndipo bzimwebzi n’ciratizo ca lufoyi lomwe Yahova nalo kwa iwo. (Jer 23:3, 4) Tsono, tensenefe tingalimbise Akristau amwewa, sikuti akulu okha. Yahova ambadekedwa tikambacita nyongo yakulatiza lufoyi kwa abale na mpfumakazi zathu, ndipo angatisimbe. (Mim 19:17; Mab 20:35) Tenepo, lekani kucedwa kulimbisa wanthu omwe ankufunikira thandizo lanu!

ONANI VIDIYO YAKUTI LIMBISANI WALE OMWE ADADJEDJERA MWAUZIMU NDIPO PATSOGOLO PACE TAWIRANI MIBVUNZO IYI:

• Kodi n’ciyani comwe Abbey adacita pomwe adagumana na Mboni ibodzi yomwe akhanati kudziwana nayo?

• Tikafuna kuthandiza munthu omwe adadjedjera mwauzimu, thangwe ranyi mpsabwino kudziwisa akulu?

• Pomwe Abbey adayenda kukawona Lura ulendo bwa ciwiri, kodi n’ciyani comwe iye adacita?

• Kodi Abbey adalatiza tani nyongo, kudeka mtima na lufoyi pomwe akhafuna kuthandiza Laura?

• Kodi tingapfunze ciyani pa there la Jezu lakugumanika pa Luka 15:8-10?

• Kodi ni bzisimbo bziponi bzomwe bzidabwera thangwe ra kucita nyongo yakuthandiza Laura?