KUKHALA NA MOYO WACIKRISTAU
Momwe Tingakhalire wa Nyongo pa Kupfunza Bibliya
Kodi imwepo mun’funambo kukhala wakukhulupirika pa mayezo ninga mpolofeta Danyeri? Danyeri akhacita nyongo ya kupfunza Fala la Mulungu kuphatanidzambo mapolofesiya yakuzika. (Dan 9:2) Kupfunza Bibliya mwa nyongo kungakuthandizeni kupitiriza kukhala wakukhulupirika. Mwa njira iponi? Kupfunzako kungakulise cikhulupiro canu pa mapiciro ya Yahova yomwe yan’dzakwanisikadi. (Djos 23:14) Kungakuthandizenimbo kuthumizira lufoyi lanu kwa Mulungu, bzomwe bzin’dzakuthandizani kumbacita bzinthu bzabwino. (Psal 97:10) Kodi mungayambire paponi? Mbatiwoneni njira zinango.
Kodi ndingapfunze bza ciyani? Ndondomeko yabwino imbaphatanidzambo kukonzekera mitsonkhano. Mungagumane phindu, mukambafufudza nfundo zomwe munkubvesesa lini pakuwerenga Bibliya. Ndipo winango ambasankhula kupfunza mapolofesiya, makhalidwe ya mzimu wa Mulungu, maulendo ya umisiyonariyo ya mpostolo Paulo ayai cirengedwe ca Yahova. Mukakumbuka bza mbvunzo unango wa m’Bibliya, unembeni kuti mudzafufudze mtawiro wace pomwe mun’dzacita pfunziro lanu.
Kodi nkhani zomwe ndingapfunze ndingazigumane kuponi? Onani vidiyo yakuti: Bzinthu Bzomwe Bzingakuthandizeni Kufufudza Cuma Cauzimu kuti mugumane njira zinango. Yezerani kufufudza bza umambo bwa mphanvu bwa pa dziko lense bomwe bumbaimiridwa na bzirombo bza m’bukhu la Danyeri kapitulo 7.
Kodi ndin’funika kupfunza kangasi na kumala nthawe zingasi? Kupfunza mwakukhazikika kumbaticitisa kukhala na thanzi labwino la uzimu. Mungayambe na kupfunza m’mphindi zakucepa, ndipo mungathumizire mphindizo pang’ono-pang’ono. Kupfunza Fala la Mulungu kuli ninga kucera cuma cakubisika; mukacera kwene-kwene ni pomwe mun’dzagumanambo cuma cizinji! (Mim 2:3-6) Cikhumbo canu pa Fala la Mulungu cin’dzathumizirika, ndipo kupfunza Bibliya kun’dzakhala mbali ya moyo wanu.—1Pe 2:2.
KODI BZIROMBO BZAKUFOTOKOZEDWA MU KAPITULO 7 YA DANYERI BZIMBAIMIRA CIYANI?
MBVUNZO WAKUTHUMIZIRA:
Kodi Danyeri 7:8, 24 akwanirisidwa tani?
PFUNZIRO LAKUTEWERA:
Kodi bzirombo bzakufotokozedwa mu kapitulo 13 ya Cibvumbulutso bzimbaimira ciyani?