KUKHALA NA MOYO WACIKRISTAU
“Paulo Adatenda Mulungu Ndipo Adalimbisidwa”
Pomwe gwere la ku Roma lidabva kuti Paulo akhabwera, abale adacita ulendo bwa makilometro pafupi-fupi 64 kuti akagumane naye. Kodi bzomwe abalewa adacitabzi bzidatokonya tani Pauloyo? Pomwe ‘Paulo adawawona, adatenda Mulungu ndipo adalimbisidwa.’ (Mab 28:15) Napo kuti Paulo akhadziwika kuti akhalimbisa magwere, koma pa nthawe yomwe akhadamangidwayi iye ndiye adalimbisidwa.—2Wak 13:10.
Nsiku zinombo, anyakunyang’anira dera ambazungira magwere yakusiyana-siyana kuti alimbise abale na mpfumakazi. Ninga mtumiki ali-wense wa Mulungu, nthawe zinango iwo ambaneta, ambatepa ndipo ambakhalambo na thupo. Mukadzazungiridwa pomwe na nyakunyang’anira dera pabodzi na mkazace, kodi mungadzacite ciyani kuti mudzawathandize kukhala wakukhwimika na cakulinga cakuti mudzalimbisane?—War 1:11, 12.
Mbagumanikani pa mtsonkhano wa utumiki bwakumunda. Anyakunyang’anira dera ambalimbisidwa akawona kuti apalizi ankucita nyongo kuti agumane phindu na makonzedwe yense ya pa mdzinga wakupambulika. (1Wat 1:2, 3; 2:20) Mungakhale mpainiya wakuthandiza pa mwezi omwe munkuzungiridwa. Kodi mwakumbukambo kale bzakucita makonzedwe yakucoka mu utumiki bwakumunda na nyakunyang’anira dera pabodzi na mkazace, ayai kuyenda na m’bodzi wa iwo ku mapfunziro yanu ya Bibliya? Iwo ambakomedwa kuphata basa na apalizi wakusiyana-siyana, kuphatanidzambo apalizi apsa ayai omwe ana luso lakucepa mu utumiki.
Atambireni kumui kwanu. Kodi mungawapase mbuto yakugona ayai cakudya? Mukacita bzimwebzi nyakunyang’anira dera wanu pabodzi na mkazace an’dzawona kuti mumbawafuna. Iwo an’dzadikhirira lini kuti muwacitire bzinthu bzapadzulu ayai bzakupambulika.—Lu 10:38-42.
Tetekerani muciphatisa basa citsogozo na malango yawo. Nyakunyang’anira dera ambatithandiza kuwona momwe tingayendere patsogolo pa kutumikira kwathu Yahova. Nthawe zinango, iwo ambafunika kupereka malango yamphanvu. (1Wak 5:1-5) Iwo ambakomedwa akawona kuti tinkubvera malangoyo.—Waheb 13:17.
Atendeni. Uzani nyakung’anira dera pabodzi na mkazace momwe mumbagumanira phindu na nyongo yomwe iwo ambacita. Imwepo mungacite bzimwebzi mwa kuwauza maso na maso ayai mwakucita kuwanembera tsamba.—Wakol 3:15.