KUKHALA NA MOYO WACIKRISTAU
Mphole kuti Muleke Kumwaza Magunkha
Ntsiku zino, nkhani ingamwazidwe mwakamfuluze mwakuphatisa basa jornale, rádio, TV na interneti. Tsono wale omwe ambanamata ‘Mulungu wa cadidi’ an’funika lini kumwaza nkhani zakunama, napo mwakusaya kuzindikira. (Psal 31:5; Kuf 23:1) Kumwaza nkhani zakunama kungapweteke wanthu winango. Tenepo penu mukupenukira kuti nkhani yomwe mukufuna kulewayo njacadidi ayai ne, bzibvunzeni kuti:
Omwe alewa nkhaniyi ni munthu wakukhulupirika? Pinango munthu omwe alewa nkhaniyo akudziwa lini bzinthu bzentse. Ndipo dziwani kuti nkhani yomwe imbapita m’manja mwa wanthu wakusiyana-siyana imbacinja. Tenepo, khalani wakucenjera na nkhani yomwe mukudziwa lini kuti mbani aiyambisa. Abale omwe ana udindo m’gwere an’funika kucenjera kwene-kwene kuti aleke kuuza winango nkhani yomwe iribe umboni, thangwe abale ambawakhulupira
Kodi nkhaniyi ininyazisa munthu munango? Penu nkhani yomwe mwabvayo ininyazisa munthu munango, ni bwino kuleka kuuza munthu ali-wentse.—Mim 18:8; Waf 4:8
Kodi nkhaniyi njacadidi? Cenjerani, mukambabva nkhani zakunyanyirira
ONANI VIDIYO YA MSOLO WAKUTI KODI NINGACITE TANI KUTI NDILEKE KUCITA MAGUNKHA? NDIPO MUKAMALA CITANI MIBVUNZO YAKUTEWERAYI:
Mwakubverana na cinembo ca Mimwani 12:18, kodi mafala yathu yangandendemezeredwe na ciyani?
Kodi cinembo ca Wafiripo 2:4 cingatithandize tani kusankhula bzomwe tingalewe pomwe tikuceza bza wanthu winango?
Kodi n’ciyani comwe tingacite penu wanthu ayamba kulewa kuipa munthu munango pomwe tikuceza?
Kodi tin’funika kubzibvunza ciyani pomwe tayamba kulewa bza wanthu winango?