Kodi Tingathandize Tani Anzathu Pakacitika Malengwa ya Pantsi?

Malengwa ya pantsi yakucitika kawiri-kawiri ntsiku zino. Malengwaya yakacitika pambaperekedwa thandizo. Tsono kuti basa lakupereka thandizolo lifambe bwino limbafunika kulinganizidwa. Kuti bzimwebzi bzikwanisike, Bungwe Lakutonga lidaikha Depatimenti Yakuthandizira Pakacitika Malengwa ya Pantsi pa mthambi iri-yentse.

Abale wa m’depatimentiyi akabva kuti ku mbuto inango kwacitika malengwa ya pantsi, iwo ambacezeratu na akulu wa kumweko kuti adziwe thandizo lomwe apalizi akufunikira. Bzikakhala kuti malengwayo yadzonga bzinthu bzizinji kwene-kwene mwakuti apaliziwo angakwanise lini kuthandizana okha-okha, mthambi imbasankhula abale kuti atsogolere basa la kupereka thandizo. Abale amwewa angakumbire abale anango kuti adzathandizire ayai angakumbire kuti paperekedwe bzinthu bzinango. Ndipo pinango iwo angagule na kugawanisa bzinthu abale omwe agwedwa na malengwawo.

Mpsabwino kwene-kwene kumbacita bzinthu mwakulinganizika tenepayi. Thangwe timbatcenkha kundowanza basa, kucitisa kuti abale azunguzike ayai kundodzonga kobiri fovolo. Bzimwebzi bzingacitike abale akandoyamba kupereka thandizo mwakusaya kuuzidwa.

Abale omwe asankhulidwa na mthambi ndiwo angalewe kuti pakufunika kobiri zingasi ndipo mbanthu angasi omwe akufunika pakupereka thandizolo. Ndipo iwo angacezembo na akulu-akulu wa boma omwe nthawe zinango angatithandize kupereka thandizolo mwakamfulumize. Wanthu an’funika lini kuuza anzawo kuti acose kobiri ayai bzinthu kuti iwo akapereke komwe kwacitika malengwayo uko alibe kuuzidwa kuti acite bzimwebzo.

Napo bziri tenepo, ifepano tikufuna kuthandiza anzathu pakacitika malengwa ya pantsi. (Ahe 13:16) Ifepano timbafuna abale wathu. Tsono tingawathandize tani? Cinthu cakufunika kwene-kwene comwe tingacite ni kuwapempherera na kupemphererambo abale omwe akupereka thandizo. Ndipo tingacitembo bzakupereka kuti bzithandizire basa la pa dziko lentse la pantsi. Bungwe Lakutonga limbapereka malango kwa mthambi ndipo mthambizo zimbadziwa bwino momwe zingaphatisire basa kobiri zomwe timbapereka. Penu tikufuna kuthandizira basa la kupereka thandizo kwa omwe akubonera na malengwa ya pantsi, tingapreencher Petição para voluntário do departamento local de desenho/ construção (DC-50).

ONANI VIDIYO YA MSOLO WAKUTI CHEIA CIDADZONGA BZINTHU KU BRASIL, MUKAMALA BVUNZANI ABVESERI KUTI:

N’ciyani comwe mwakomedwa naco pa bzomwe Mboni za Yahova zidacita pomwe ku Brasil kudacitika cheia mu 2020?