Kodi Mungaphatise Tani Basa Mavidiyo Yomwe Yambafotokoza bza Pfunziro la Bibliya?

Tina mavidiyo manai yomwe yambafotokoza bza pfunziro la Bibliya. Vidiyo iri-yentse ina basa lace.

• 

  Thangwe Ranyi Tin’funika Kupfunza Bibliya? — Vidiyo Yense. Vidiyo imweyi idakonzedwa kuti icitise munthu kufuna kudziwa bzomwe Bibliya limbapfunzisa, napo penu ambayenda kale ku gereja. Iyo imbacitisa munthu kufuna kunyang’ana mitawiro ya mibvunzo yace m’Bibliya ndipo imbalatizambo bzinthu bzinango bzomwe munthuyo angapfunze m’Bibliya. Imbafotokozambo kuti munthu angakumbire tani pfunziro la Bibliya.

• 

  Thangwe Ranyi Tin’funika Kupfunza Bibliya? (vidiyo ifupi). Vidiyo imweyi idandendemerana na yakuyamba ire, tsono kusiyana kwace n’kwakuti imweyi njifupi. Vidiyo imweyi njakuthandiza kwene-kwene m’madziko yomwe wanthu ambafuna lini kumala nthawe ikulu akuceza na munthu omwe animudziwa lini.

• 

  Kodi Pfunziro la Bibliya Limbacitidwa Tani? Vidiyo imweyi idakonzedwa kuti icitise munthu kufuna kupfunza Bibliya ndipo imbatawirambo mibvunzo yomwe munthu angakhale nayo pa nkhani ya kupfunza Bibliya. Ndipo imbafotokozambo kuti munthu angakumbire tani pfunziro la Bibliya.

• 

  Mukutambiridwa ku Pfunziro la Bibliya. Vidiyo imweyi idakonzedwa kuti imbalatizidwe kwa anyakupfunza wa Bibliya. Napo kuti vidiyo imweyi iri pa tsamba 2 mu bukhu lakuti Khalani na Moyo Wakukondwa Mpaka Kale-kale!, iyo ingawonesedwembo kwa munthu pomwe mukadapfunza naye broxura lakuti Khalani na Moyo Wakukondwa Mpaka Kale-kale!. Vidiyoyi imbafotokoza nfundo zomwe munthuyo an’pfunza mu bukhuli na kumuthandizambo kudziwa kuti pfunzirolo lin’dzafamba tani.

Napo kuti vidiyo iri-yentse ina basa lace, iyo ingalatizidwe ayai kutumiziridwa kwa wanthu. Apalizi wentse an’funika kuyadziwa bwino mavidiyoya na kuyaphatisa bwino basa mu utumiki.