Khalani Wakukonzeka Pomwe Ntsiku ya Yahova Ikubwera

1. N’ciyani comwe tin’funika kucita kuti tidzapulumuke pa ntsiku ya Yahova?

BIBLIYA likambalewa bza “ntsiku ya Yahova,” limbakhala likufotokoza bza nthawe yomwe Yahova an’dzapfudza wanthu omwe ambacita bzinthu bzakuipa acipulumusa wanthu wace. Mu nthawe za m’Bibliya, Yahova adalanga mitundu mizinji ya wanthu. (Zaiya 13:1, 6; Ezekiyeli 13:5; Zefaniya 1:8) Mu nthawe yathu ino, “ntsiku ya Yahova” in’dzayamba na kupfudzidwa kwa Babiloniya Mkulu, yomwe ni magereja yakunama ndipo pakumalizira pace pan’dzacitika nkhondo ya Armagedo. Kuti tidzapulumuke pa “ntsiku” imweyi, tin’funika kukonzekereratu tsapano. Jezu adalewa kuti tin’funika lini kundokonzekera kubwera kwa “citsautso cikulu,” koma tin’funikambo ‘kukhala tidakonzekera’ kubwera kwa ntsikuyo. — Mateu 24:21; Luka 12:40.

2. Kodi mafala ya pa 1 Atesalonika yangatithandize tani?

² Mu tsamba lakuyamba lomwe mpostolo Paulo adanembera Akristau wa ku Tesalonika, iye adalewa bzinthu bzakusiyana-siyana bzomwe bzimbatithandiza kukonzekera kubwera kwa ntsiku ya Yahova. Paulo akhadziwa kuti ntsiku ya Yahova ingadabwera lini pa nthawe imweyire. (2 Atesalonika 2:1-3) Napo bziri tenepo, iye adalimbikisa abale wacewo kukhala wakukonzeka aciwona ninga kuti ntsikuyo ingadafika pa nthawe imweyire. Ifepano tin’funikambo kuphatisa basa malango ya Pauloya. Mbaticezeraneni bzinthu bzitatu ibzi: (1) momwe ntsiku ya Yahova in’dzafikira, (2) wanthu omwe an’dzapulumuka lini pa ntsiku imweyi na (3) momwe ifepano tingakonzekerere kuti tidzapulumuke.

KODI NTSIKU YA YAHOVA IN’DZABWERA TANI?

3. Kodi ntsiku ya Yahova in’dzabwera ninga ciyani? (Onani cithunzi-thunzi.)

³ “Ninga mbava usiku.” (1 Atesalonika 5:2) Yamweya ni mafala yakuyambirira pa mafala matatu yomwe yadaphatisidwa basa pakulewa bza kubwera kwa ntsiku ya Yahova. Mbava zimbaba mwakamfulumize ndipo zimbafuna kucita bzimwebzi usiku pa mdima. Ntsiku ya Yahova in’dzafikambo pa nthawe yakusaya kudikhiririka, pa nthawe yomwe wanthu azinji an’dzakhala akudikhirira lini. Napo Akristau wacadidi an’dzadabwambo akadzawona momwe bzinthu bzin’dzacitikira mwakamfulumize pa ntsiku imweyi. Tsono pa ntsiku imweyi wanthu omwe ambacita bzinthu bzakuipa an’dzapfudzidwa, koma ifepano tin’dzapfudzidwa lini.

4. Thangwe ranyi ntsiku ya Yahova imbandendemezeredwa na mkazi omwe ana pathupi?

⁴ “Ninga kuwawa komwe mkazi ambabva pakubereka.” (1 Atesalonika 5:3) Mkazi ambadziwa lini kuti ni nthawe iponi yomwe iye angabereke. Napo kuti akudziwa lini bwino-bwino ntsiku yace yakubereka, iye ambakhulupira kuti an’dzabereka. Ntsiku yakuti aberekeyo ikafika, imbakhala yakusaya kudikhiririka na yakuwawa kwene-kwene. Mwakundendemerana na bzimwebzi, timbadziwa lini nthawe ne ora ya kubwera kwa ntsiku ya Yahova. Koma timbadziwa kuti ntsikuyo iri pafupi ndipo kupfudzidwa kwa wanthu wakuipa kun’dzacitika mwakusaya kudikhiririka na mwakusaya kuthawika.

5. Thangwe ranyi tingalewe kuti citsautso cikulu ciri ninga mdima?

⁵ Ninga mdima. Pa mafala yacitatu yakuyezezera yomwe Paulo adaphatisa basa, iye adalewa kuti mbava zimbaba usiku. Tsono pa nthawe imweyi, Paulo akhayezezera ntsiku ya Yahova na mdima. (1 Atesalonika 5:4) Mbava zikakhala zikuba usiku zimbakhala zakutanganidwa kwene-kwene ndipo zimbakwanisa lini kuwona nthawe, mwakuti kungangwerewere izo ziciphatidwa. Citsautso cikulu cin’dzacitambo bzibodzi-bodzibzi na wale omwe ali ninga mbava, omwe akupitiriza kucita bzinthu bzomwe Mulungu ambakomedwa lini nabzo. Mwakusiyana na iwo, ifepano tingakhale wakukonzeka mwa kutcenkha kucita bzinthu bzomwe Mulungu ambakomedwa lini nabzo na kupitiriza kucita “ubwino bwentse, cirungamo na cadidi.” (Aefezo 5:8-12) Tsapano, mbatiwoneni bzinthu bzomwe Paulo adaphatisa basa pakulewa bza wale omwe an’dzapulumuka lini.

KODI MBANI OMWE AN’DZAPULUMUKA LINI PA NTSIKU YA YAHOVA?

6. Kodi n’ciyani cikulatiza kuti wanthu azinji ntsiku zino akugona mwauzimu? (1 Atesalonika 5:6, 7)

⁶ “Wale omwe ambagona.” (Werengani 1 Atesalonika 5:6, 7.) Mpostolo Paulo adandendemezera wale omwe an’dzapulumuka lini pa ntsiku ya Yahova na wanthu omwe akugona. Iwo ambadziwa lini bzomwe bzimbakhala bzikucitika. Iwo ambakhala akudziwa lini kuti ni nthawe iponi yomwe bzinthu bzakufunika bzingacitike ndipo n’ciyani comwe iwo angacite. Wanthu azinji ntsiku zino akugona mwauzimu. (Aroma 11:8) Iwo ambakhulupira lini kuti tikukhala mu “ntsiku zakumalizira” ndipo citsautso cikulu cin’fika tsapanopapa. Tsono winango akawona bzinthu bzikucinja mu dzikoli, ambafunisisa kubva mafala ya Umambo. Bzakupasa ntsisi mpsakuti, winango akabva mafalayo, ambapitiriza kukhala adagona, m’mbuto mwa kumuka. Napo wale omwe ambakhulupira bza ntsiku imweyi, ambakumbuka kuti bzingacitike lini tsapanopa. (2 Pedru 3:3, 4) Koma ifepano tin’funika kupitiriza kukhala tidapenya ntsiku zentse.

7. Kodi wale omwe an’dzapfudzidwa na Mulungu mbakundendemerana na yani, ndipo thangwe ranyi?

⁷ “Wale omwe ambaledzera.” Mpostolo Paulo adayezezera wale omwe an’dzapfudzidwa na aledzeri. Wanthu omwe adaledzera ambakhala alibe nabzo basa bzomwe bzikucitika ndipo ambacita lini bzakusankhula bza nzeru. Mpsibodzi-bodzimbo na wanthu wakuipa. Iwo ambakhala alibe basa na mcenjezo omwe Mulungu akupereka. Iwo ambasankhula kucita bzinthu bzomwe bzin’dzawacitisa kuti apfudzidwe. Koma Akristau wacadidi adauzidwa kuti apitirize kukhala tceru na wakukumbuka bwino. (1 Atesalonika 5:6) Mdziwi munango wa nkhani za m’Bibliya adalewa kuti “munthu omwe ambapitiriza kukhala tceru ambakhala wakuderekha, ndipo bzimwebzi bzimbamucitisa kuti acite bzakusankhula bza bwino.” Thangwe ranyi tin’funika kupitiriza kukhala wakuderekha na wakusaya kutekenyeka? Tin’funika kucita bzimwebzi kuti tileke kupitira nkhani za ndale na bzomwe bzikucitika mu dzikoli. Kuyezedwa kuti ticite mbali pa nkhani zimwezi kukuthimizirika kwene-kwene pomwe ntsiku ya Yahova ikufendera. Tsono tin’funika lini kucita thupo kuti tin’dzacita ciyani tikadzayezedwa. Mzimu wa Yahova un’dzatithandiza kuti tikhale wakuderekha na kucita bzakusankhula bzabwino. — Luka 12:11, 12.

KODI TINGAKONZEKERE TANI KUBWERA KWA NTSIKU YA YAHOVA?

8. Kodi pa 1 Atesalonika 5:8 pambalewa kuti ni makhalidwe yaponi yomwe yangatithandize kupitiriza kukhala tidapenya? (Onani cithunzi-thunzi.)

⁸ ‘Bvalani cakukhotcera pa nkhombe na kapaseti.’ Mpostolo Paulo adatiyezezera na acikunda omwe ambakhala tceru na wakukonzeka kuyenda ku nkhondo. (Werengani 1 Atesalonika 5:8.) Nthawe zentse, mcikunda ambafunika kukhala wakukonzeka kumenya nkhondo. Mpsibodzi-bodzimbo na ifepano. Pomwe ntsiku ya Yahova ikufendera, tin’funika kupitiriza kukhala wakukonzeka mwa kubvala pa nkhombe cakukhotcerera pa cifuwa ca cikhulupiro na lufoyi ndipo tibvalembo cidikhiro ninga kapaseti. Makhalidwe yamweya ndiyo yangatithandize.

9. Kodi cikhulupiro cathu cimbatikhotcerera tani?

⁹ Cakukhotcerera pa nkhombe cikhakhotcerera mtima wa mcikunda. Cikhulupiro na lufoyi bzimbakhotcerera mtima wathu wakuyezezera. Bzimwebzi bzin’dzatithandiza kuti tipitirize kutumikira Yahova na kutewera Jezu. Cikhulupiro cimbaticitisa kuti tikhulupire kuti Mulungu an’dzatisimba tikamutumikira na mtima wentse. (Ahebereu 11:6) Bzimwebzi bzin’dzatithandiza kuti tipitirize kukhala wakukhulupirika kwa Mtsogoleri wathu, Jezu, napo kuti tingagumane na mabvuto. Tingalimbise cikhulupiro cathu kuti tikwanise kulimbana na mabvuto yomwe tikugumana nayo pa moyo wathu. Tingacite bzimwebzi mwa kumbawona bziratizo bza abale wathu omwe adapitiriza kukhala wakukhulupirika napo kuti akhazunzidwa na kugumana na mabvuto ya kusaya kobiri. Ndipo tingatcenkhembo kufuna kukhala na bzinthu bzizinji bza m’dzikoli mwakutewezera wale omwe adakhala na moyo wakusaya kufuna bzizinji kuti aikhe Umambo bwa Mulungu pa mbuto yakuyamba.b

10. Kodi lufoyi lathu kwa Yahova na kwa wanthu limbatithandiza tani kuti tipirire?

¹⁰ Lufoyi ndakufunika kuti tipitirize kukhala tceru na wakupenya. (Mateu 22:37-39) Lufoyi lathu kwa Yahova limbatithandiza kuti tipitirize kucita basa la kupalizira napo kuti bzimwebzi bzingaticitise kuti tigumane na mabvuto. (2 Timotio 1:7, 8) Pakuti timbafuna wanthu, timbapitiriza kupalizira mwa nyongo m’gawo lathu, pa telefoni na mwakunemba makarta. Ifepano timbakhulupira kuti wanthu winango an’dzacinja aciyamba kucita bzinthu bzabwino. — Ezekiyeli 18:27, 28.

11. Kodi lufoyi kwa abale wathu wacikristau limbatithandiza tani? (1 Atesalonika 5:11)

¹¹ Cinthu cinango comwe tingacite kuti tilatize kuti tina lufoyi na anzathu ndico kufunambo abale wathu wacikristau. Ifepano timbalatiza kuti timbawafuna mwa kupitiriza “kumbalimbikisana na kumbapasana mphanvu.” (Werengani 1 Atesalonika 5:11.) Ninga acikunda omwe ambathandizana pa kumenya nkhondo, ifepano timbalimbikisana. N’cadidi kuti mcikunda angapweteke mwanzace pa nkhondo, tsono iye angacite lini bzimwebzi utowa. Ifepano tingasunamise lini abale na mpfumakazi zathu utowa ayai kuwabwezera cakuipa na cakuipa. (1 Atesalonika 5:13, 15) Ndipo timbalatizambo kuti tina lufoyi tikambalemekeza abale omwe ambatsogolera mu gwere. (1 Atesalonika 5:12) Pomwe Paulo adanemba tsamba limweri, gwere la ku Tesalonika likhanati kukwanisa gole libodzi. Abale omwe akhana udindo akhanati kudziwa bzinthu bzizinji ndipo akhaphonyesa bzinthu bzinango. Napo bziri tenepo, iwo akhafunika kulemekezedwa. Pomwe citsautso cikulu cikufendera, tin’funika kuthemba malango yomwe akulu wa gwere ambatipasa. Pinango bzingakhale bzakunesa kutambira malango kucokera ku likulu lathu ayai ku mthambi. Ndipopa tin’funika kuyambiratu tsapano kumbafuna na kulemekeza akulu wa m’gwere mwathu. Tipitirize kukhala tceru ticileka kumbandowona bzakuphonya bzawo ticizindikira kuti Yahova akuphatisa basa Mwana wace kuti atsogolere amuna wakukhulupirikawa.

12. Kodi cidikhiro cathu cimbakhotcerera tani nzeru zathu?

¹² Ninga momwe kapaseti imbakhotcererera msolo wa mcikunda, cidikhiro cathu cimbakhotcerera nzeru zathu. Cidikhiro cimweci cimbatithandiza kuzindikira kuti bzomwe dzikoli limbapereka mpsakusaya phindu. (Afilipi 3:8) Ndipo cidikhiroco cimbatithandizambo kuti tikhale wakuderekha na wakusaya kutekenyeka. Bzimwebzi ndibzo bzomwe bzidacitikira Wallace na Laurinda, omwe akutumikira ku África. Iwo adafedwa abereki wawo mkati mwa sumana zitatu. Ndipo thangwe ra matenda ya COVID-19, iwo alibe kukwanisa kuyenda kukatsangalaza famidya zawo. Wallace adalewa kuti: “Cidikhiro ca kulamusidwa kwa anyakufa cimbandithandiza kuwakumbukira, sikuti momwe iwo akhaliri pomwe akhanati kufa, koma momwe iwo an’dzakhalira akadzalamusidwa mu dziko lipsa. Bzimwebzi bzimbandithandiza kuti ndikhale wakuderekha ndikakhala ndidasunama ayai ndikubzibva kuti ndiri ndekha.”

13. N’ciyani comwe tin’funika kucita kuti titambire mzimu wakucena?

¹³ “Lekani kuthima moto wa mzimu wa Mulungu.” (1 Atesalonika 5:19) Mpostolo Paulo adayezezera mzimu wakucena na moto omwe uli mkati mwa thupi lathu. Mzimu wakucena wa Mulungu umbatipasa mphanvu kuti tiphate basa na nyongo ticicita bzinthu bzomwe bzimbakondwesa Yahova. (Aroma 12:11) N’ciyani comwe tin’funika kucita kuti titambire mzimu wakucena? Kuti titambire mzimu wakucena, tin’funika kucita mpembo, kuwerenga Fala la Mulungu, Bibliya, na kupitiriza kukhala mu gulu lace lomwe limbatsogoleredwa na mzimu wakucena. Bzimwebzi bzin’dzatithandiza kulatiza makhalidwe yomwe “mzimu wakucena umbabala.” — Agalatiya 5:22, 23.

14. Kodi ni bzinthu bziponi bzomwe tin’funika kutcenkha penu tikufuna kupitiriza kutambira mzimu wa Mulungu? (Onani cithunzi-thunzi.)

¹⁴ Mulungu akatipasa mzimu wace wakucena, tin’funika kucita mphole kuti ‘tireke kuthima moto wa mzimuyo.’ Mulungu ambapereka mzimu wace wakucena kwa wale omwe ana makumbukidwe yakucena na makhalidwe yakucena. Tikakhala na nzeru zakuipa na kucita bzinthu mwakubverana na nzeru zakuipazo, Mulungu angatipase lini mzimu wace wakucena. (1 Atesalonika 4:7, 8) Kuti tipitirize kutambira mzimu wakucena, tin’funika lini “kunyozera mafala ya polofesiya.” (1 Atesalonika 5:20) Mapolofesiya yambalewa bza nkhani zakusiyana-siyana zakukonzedwa na mzimu wakucena, kuphatanidzambo bza ntsiku ya Yahova na bzinthu bzomwe bzikucitika mu ntsiku zathu zino. Ifepano tin’funika lini kukumbuka kuti ntsiku ya Yahova in’bwera lini nthawe yathu ino, ayai pomwe ifepano tikana moyo. Koma tin’funika kumbaikumbukira ntsikuyi ticipitiriza kukhala na makhalidwe yabwino ticimbacita bzinthu bzomwe bzin’latiza kuti ndife wanthu “wakubzipereka kwa Mulungu” ntsiku zentse. — 2 Pedru 3:11, 12.

“ONESESANI BZINTHU BZENTSE”

15. Kodi tingacite tani kuti tileke kunamizidwa na mafala yakufuliziridwa na madimonyo? (1 Atesalonika 5:21)

¹⁵ Tsapanopapa, anyamadulanthaka wa Mulungu anilewa kuti: “Mtendere na mkhomeko!” (1 Atesalonika 5:3) Mafala yakufuliziridwa na madimonyoya yan’dzapumpsa wanthu azinji. (Apokalipse 16:13, 14) Tsono tani pakulewa bza ifepano? “[Tikawonesesa] bzinthu bzentse” tin’dzapumpsidwa lini. (Werengani 1 Atesalonika 5:21.) Fala la Cigerego lomwe lidasanduliziridwa kuti “onesesani” lidaphatisidwa basa pa kufotokoza bzomwe wanthu ambacita kuti awone penu bzinthu bzinango bziri bwino, ninga oro ayai prata. Ndipopa tin’funika kumbacita mphole na bzomwe timbabva pabodzi na bzomwe timbawona. Bzimwebzi bzikhali bzakufunika kwene-kwene kwa Akristau wa ku Tesalonika. Ndipo bzin’khala bzakufunikambo kwene-kwene kwa ifepano maka-maka pomwe citsautso cikulu cikufendera. Ifepano tin’dzafunika lini kukhulupira bzomwe wanthu ambalewa, koma tin’dzafunika kuphatisa basa luso lathu la kukumbuka kuti tidzasiyanise bzomwe timbawerenga na kubva na bzomwe Bibliya na gulu la Yahova limbalewa. Tikacita bzimwebzi, tin’dzanamizidwa lini na bzomwe madimonyo yan’dzalewa. — Mimwani 14:15; 1 Timotio 4:1.

16. Kodi ni cidikhiro ciponi cakutsimikizika comwe tinaco, ndipo cimbaticitisa kuti ticite ciyani?

¹⁶ Timbadziwa kuti atumiki wa Yahova an’dzapulumuka pa citsautso cikulu. Tsono palibe munthu omwe angadziwe bzomwe bzingamucitikire kutsogolo. (Tiyago 4:14) Ndipopa, penu tin’dzacita kupulumuka pa citsautso cikulu ayai tinifa pomwe citsautsoco cikanati kucitika, tikapitiriza kukhala wakukhulupirika, tin’dzasimbidwa na moyo wakusaya kumala. Anyakudzozedwa an’dzatonga pabodzi na Jezu kudzulu. Ndipo mabira manango yan’dzakhala m’paraizo pa dziko la pantsi pano. Ndipopa, tentsenefe tin’funika kupitiriza kumbakumbukira bza cidikhiro cathu ticipitiriza kukhala tidakonzekera kubwera kwa ntsiku ya Yahova!