NKHANI YAKUPFUNZA 30
Kulisani Lufoyi Lanu kwa Yahova na kwa Anzanu
“Tikule m’bzinthu bzentse mwalufoyi.” — AEFEZO 4:15.
NYIMBO 2 Dzina Lanu Ndimwe Yahova
BZOMWE TIN’PFUNZAa
1. Kodi ni bzinthu bziponi bzomwe mudadziwa pomwe mudayamba kupfunza Bibliya?
KODI imwepo mukukumbukira pomwe mudayamba kupfunza Bibliya? Imwepo mudadabwa pomwe mudadziwa kuti Mulungu ana dzina. Pinango mudabva bwino pomwe mudadziwa kuti Mulungu ambacontha lini wanthu ku moto. Ndipo pinango imwepo mudakomedwa pomwe mudadziwa kuti mun’dzawonana pomwe na abale wanu omwe adasaika ndipo mun’dzakhala nawo pabodzi m’paraizo pa dziko la pantsi pano.
2. Kodi ni bzinthu bzinango bziponi bzomwe imwepo mudacita pomwe mukhapfunza Bibliya? (Aefezo 5:1, 2)
2 Pomwe imwepo mukhapitiriza kupfunza Fala la Mulungu, Bibliya, lufoyi lanu kwa Yahova lidakula kwene-kwene. Lufoyi limweri lidakucitisani kuti muphatise basa bzomwe mukhapfunzabzo. Imwepo mudayamba kumbacita bzinthu mwanzeru ndipo mukhaphatisa basa nfundo za m’Bibliya pomwe mukhafuna kucita cakusankhula pa moyo wanu. Imwepo mudacinja makhalidwe yanu thangwe mukhafuna kukondwesa Mulungu. Imwepo mukhatewezera Baba wanu wakudzulu ninga momwe mwana ambatewezerera pai wace. — Werengani Aefezo 5:1, 2.
3. Kodi ni mibvunzo iponi yomwe tingabzicite?
3 Imwepo mungabzibvunze kuti: ‘Kodi lufoyi langu kwa Yahova ndamphanvu kusiyana na momwe likhaliri pomwe ndidakhala Mkristau? Kucokera pomwe ndidabatizidwa, kodi makumbukidwe yangu na bzomwe nimbacita nimbatewezera momwe Yahova ambacitira bzinthu mwa kulatiza lufoyi kwa abale na mpfumakazi zangu?’ Penu ‘lufoyi lomwe mukhanalo pakuyamba’ ladjedjera, lekani kuwofoka. Bzimwebzi bzidacitikirambo Akristau wakuyambirira. Jezu alibe kuwalamba thangwe ra bzomwe iwo adacitabzo ndipo iye an’dzacitambo bzibodzi-bodzibzi kwa ifepano. (Apokalipse 2:4, 7) Iye ambadziwa kuti tingakhale pomwe na lufoyi ninga lomwe tikhanalo pomwe tidayamba kupfunza cadidi.
4. Kodi tin’pfunza ciyani mu nkhani ino?
4 Nkhani ino in’tithandiza kuwona bzomwe tingacite kuti tipitirize kukulisa lufoyi lomwe tinalo kwa Yahova na kwa anzathu. Tikamala tin’dzawona bzisimbo bzomwe tingakhale nabzo na bzomwe anzathumbo angatambire tikakulisa lufoyi lathu kwa iwo.
KULISANI LUFOYI LANU KWA YAHOVA
5-6. Kodi ni mabvuto yaponi yomwe mpostolo Paulo adagumana nayo pomwe akhacita utumiki bwace, ndipo n’ciyani comwe cidamupasa mphanvu kuti apitirize kutumikira Yahova?
5 Mpostolo Paulo akhakomedwa kwene-kwene pomwe akhatumikira Yahova, tsono iye akhagumanambo na mabvuto. Paulo akhambacita ulendo pafupi-pafupi ndipo ulendobo nthawe zinango bukhakhala bwakunesa. Pa maulendo yamweya nthawe zinango Paulo akhakhala pa “ngozi za m’mikulo” na “ngozi za akambowa.” Ndipo nthawe zinango iye akhamenyedwa. (2 Akolinto 11:23-27) Ndipombo nthawe zinango abale wace wacikristau akhatenda lini nyongo yomwe iye akhacita. — 2 Akolinto 10:10; Afilipi 4:15.
6 N’ciyani comwe cidathandiza Paulo kupitiriza kutumikira Yahova? Paulo adadziwa bwino bza makhalidwe ya Yahova mwa kuwerenga Fala lace na kuwonambo bzomwe bzikhamucitikira pa moyo wace. Bzimwebzi bzidamutsimikizira kuti Yahova Mulungu akhamufuna kwene-kwene. (Aroma 8:38, 39; Aefezo 2:4,5) Ndipo iye adayambambo kumbamufuna kwene-kwene Yahova. Paulo adalatiza lufoyi lace kwa Yahova ‘mwakutumikira anyakukhulupira anzace’. — Ahebereu 6:10.
7. Kodi n’ciyani comwe tingacite kuti tikulise lufoyi lathu kwa Yahova?
7 Kuti ifepano tikulise lufoyi lathu kwa Mulungu, tin’funika kumbapfunza Bibliya mwa nyongo. Mukakhala mukuwerenga Bibliya mbayezerani kuwona kuti nkhani yomwe mukuwerengayo ikukupfunzisani ciyani pakulewa bza Yahova. Mbabzibvunzani kuti: ‘Kodi nkhaniyi ikulatiza tani kuti Yahova ambandifuna? Kodi n’ciyani comwe cikundicitisa kuti ndifunembo Yahova?’
8. Kodi n’ciyani cinango comwe cingatithandize kukulisa lufoyi lathu kwa Mulungu?
8 Cinthu cinango comwe tingacite kuti tikulise lufoyi lathu kwa Yahova ndico kumbapemba kwa iye na mtima wentse. (Salimo 25:4,5) Tikacita bzimwebzi, Yahova an’dzatawira mipembo yathu. (1 Juwau 3:21, 22) Mpfumakazi inango ya ku Ásia, yakucemeredwa Khanh, idalewa kuti: “Inepano ndikhafuna Yahova thangwe ra bzinthu bzomwe ndikhadziwa pakulewa bza iye, tsono lufoyi langulo lidakula kwene-kwene pomwe ndikhawona momwe iye akhatawirira mipembo yangu. Bzimwebzi bzidandicitisa kuti nimbafune kucita bzinthu bzomwe iye ambakomedwa nabzo.”b
KULISANI LUFOYI LANU KWA ANZANU
9. Kodi n’ciyani comwe cikulatiza kuti Timotio akhacita nyongo kuti alatize lufoyi?
9 Pomwe padapita magole kucokera pomwe Paulo adakhala Mkristau, iye adadziwana na tswaka lakucemeredwa Timotio. Timotio akhafuna Yahova ndipo akhafunambo wanthu. Paulo adanembera abale wa ku Afilipi kuti: “Ndiribe munthu munango wakubzipereka ninga [Timotio] omwe angakusamalireni na mtima wentse.” (Afilipi 2:20) Pamwepa Paulo akhalewa lini bza luso lomwe Timotio akhanalo lakucita bzinthu ayai kufotokoza kwace bwino nkhani, koma iye akhalewa bza lufoyi lomwe Timotio akhanalo kwa abale na mpfumakazi zace. Abale wa m’magwere yomwe Timotio akhazungira akhakomedwa kwene-kwene akabva kuti iye aniwazungira. — 1 Akolinto 4:17.
10. Kodi Anna na bayace adalatiza tani lufoyi kuna abale na mpfumakazi zawo?
10 Ifepano tin’funikambo kunyang’ana njira za kuti tithandize abale na mpfumakazi zathu. (Ahebereu 13:16) Onani bzomwe Anna omwe adafotokozedwa mu nkhani yomwe idapitayi adacita. Pomwe conzi camphanvu cidamala kucitika, iye na bayace adayenda kukazungira banja libodzi la Mboni ndipo iwo adawona kuti ntsodzi ya nyumba yawo ikhadadzongeka. Ndipo thangwe ra bzimwebzi, bzakubvala bzawo bzentse bzikhadapswipa. Anna adalewa kuti: “Tidatenga bzakubvala bzawobzo ticikabzifula na kubziyengomari ndipo patsogolo pace tidakawapasira. Bzomwe tidacitabzi bzikhali lini bzikulu, tsono ibzo bzidatithandiza kuti tikhale pa uxamwali bwakulimba na iwo.” Lufoyi lomwe Anna na bayace akhanalo kwa abale na mpfumakazi zawo ndiro lomwe lidawacitisa kuti awathandize. — 1 Juwau 3:17, 18.
11. (a) Kodi wanthu winango ambabva tani tikawalatiza lufoyi? (b) Mwakubverana na Mimwani 19:17, kodi Yahova an’dzaticitira ciyani tikambalatiza lufoyi kwa anzathu?
11 Tikambalatiza lufoyi kwa anzathu, iwo ambakwanisa kuwona kuti tikucita nyongo yakutewezera Yahova. Ndipo bzimwebzi bzimbacitisa kuti iwo atitende mu njira yomwe ifepano tikhaidikhirira lini. Khanh, omwe afotokozedwa kale ule, ambakumbukira bza abale omwe adamuthandiza. Iye adati: “Inepano nimbatenda kwene-kwene mpfumakazi zomwe zidacita nyongo ya kumbanditenga acimbayenda nande mu upalizi. Iwo akhambabwera kudzanditenga pa mui aciyenda nande kukadya ndipo acimbadzandisiya pa mui. Tsapano nimbazindikira kuti bzomwe akhacitabzo bzikhali lini bzakupusa. Ndipo iwo akhacita bzimwebzi thangwe ra lufoyi.” N’cadidi kuti mbanthu lini wentse omwe angatitende tikawacitira bzabwino. Pakulewa bza wanthu omwe akhamuthandiza, Khanh adalewa kuti: “Ningadafuna kuti ndiwabwezere bzinthu bzabwino bzomwe iwo akhandicitira, tsono nin’dziwa lini komwe iwo ambakhala tsapano. Tsono nimbadziwa kuti Yahova an’dzawabwezera ndipo nimbapemba kuti iye awacitire bzimwebzo.” Bzomwe Khanh adalewabzi mpsacadidi. Yahova ambawona bzinthu bzabwino bzomwe timbacitira anzathu napo bzicikhala bzakucepa. Iye ambawona bzimwebzi ninga ntsembe zakufunika ndipo an’dzatibwezera pa bzabwino bzomwe timbacitabzo. — Werengani Mimwani 19:17.
Munthu akakhala akuyenda patsogolo mwauzimu, iye ambanyang’ana njira za momwe angathandizire anzace (Onani ndime 12)
12. Kodi m’bale angalatize tani lufoyi m’gwere? (Onani cithunzi-thunzi.)
12 Penu imwepo ndimwe m’bale, kodi mungalatize tani lufoyi kwa anzanu na kucita nyongo kuti muwathandize? M’bale wakucemeredwa Jordan omwe ni tswaka adabvunza mkulu wa gwere kuti ni ciyani comwe iye angacite kuti athandize gwere. Mkulu wa gwereyo adamutenda thangwe ra nyongo yomwe iye akhacita ya kuyenda patsogolo ndipo patsogolo pace adamupasa malango ya bzinthu bzinango bzomwe iye akhafunikira kucita. Mkulu wa gwereyo adalewa kuti Jordan angambafike kamangu pa Nyumba ya Umambo kuti ambamuse abale, ambacitembo mbali pa mitsonkhanoyo, ambapalizire kawiri-kawiri na grupo lace la upalizi na kunyang’ana njira za momwe angathandizire abale. Pomwe Jordan adaphatisa basa malangoya, iye alibe kundopfunza bzinthu bzinango bzomwe akhafunika kucita, koma akhakulisa lufoyi lace kuna abale na mpfumakazi. Jordan adapfunza kuti m’bale akaikhidwa kuti akhale mtumiki wakuthandiza, iye ambayamba lini kuthandiza wanthu winango, koma ambapitiriza kuwathandiza. — 1 Timotio 3:8-10, 13.
13. Thangwe ranyi m’bale Christian adabvuma kukhala pomwe mkulu wa gwere?
13 Tsono tani penu kale-kale imwepo mudatumikira ninga mtumiki wakuthandiza ayai mkulu wa gwere? Yahova ambakumbukira basa lomwe mudacita m’mbuyo na lufoyi lomwe likhakucitisani kucita bzimwebzo. (1 Akolinto 15:58) Ndipo iye ambawonambo lufoyi lomwe mukupitiriza kulilatiza. M’bale munango wakucemeredwa Christian adasunama kwene-kwene pomwe adasiya kutumikira ninga mkulu. Napo bziri tenepo, iye adalewa kuti: “Ndidawona kuti bziri bwino kupitiriza kutumikira Yahova thangwe ra kumufuna bziribe basa penu ndina udindo m’gwere ayai ndiribe.” Pomwe padapita nthawe, iye adadzaikhidwa pomwe kukhala mkulu. Christian adalewa kuti: “Pomwe ndidauzidwa kuti ndikhale pomwe mkulu ndidasaya cakucita thangwe ndikhadikhirira lini mwayi umweyu. Tsono, ndidawona kuti penu Yahova mwa ntsisi zace akundibvuma kuti ndikhale pomwe mkulu, inepano ndikhafunika kucita bzimwebzo kuti ndilatize kuti nimbafuna abale na mpfumakazi zangu.”
14. Kodi mwapfunza ciyani na bzomwe mpfumakazi ya ku Geórgia idalewa?
14 Atumiki wa Yahova ambalatizambo lufoyi kuna anzawo. (Mateu 22:37-39) Mwa ciratizo, mpfumakazi Elena yomwe imbakhala ku Geórgia, idalewa kuti: “Pakuyamba cinthu comwe cikhandicitisa kuti ndipalizire ni lufoyi lomwe ndikhanalo kwa Yahova. Tsono pomwe lufoyi lomwe ndikhanalo kwa Baba wangu wakudzulu lidakula, lufoyi lomwe ndikhanalo kwa wanthu lidakulambo. Ndidayamba kumbakumbukira bza mabvuto yomwe wanthu akhagumana nayo na nkhani zomwe iwo angakomedwe nazo kuzibva. Ndikambakumbukira kwene-kwene bza iwo bzikhandicitisa kuti ndifune kuwathandiza.” — Aroma 10:13-15.
YAHOVA AN’DZATISIMBA TIKAMBALATIZA LUFOYI KWA ANZATHU
Lufoyi lomwe tingalatize kwa munthu m’bodzi lingacitise kuti wanthu azinji asimbidwe (Onani ndime 15-16)
15-16. Ninga momwe tikuwona pa bzithunzi-thunzi bzakuyezezerabzi, kodi ni bzisimbo bziponi bzomwe timbakhala nabzo tikambalatiza lufoyi?
15 Tikambalatiza lufoyi kuna abale wathu ndiwo lini wokha omwe ambagumana phindu na bzimwebzi. Pomwe matenda ya COVID-19 yadayamba, m’bale wakucemeredwa Paolo pabodzi na mkazi wace adathandiza mpfumakazi zizinji zacikulire kudziwa momwe zingaphatisire basa telefoni na komputadori zawo kuti acite upalizi. Mpfumakazi inango yomwe ikhatazira kuphatisa basa telefoni yace idadzakwanisa kucita bzimwebzo. Iyo idakwanisa kuphatisa basa telefoniyo kuti icemere adzinza wace kuti abwere ku Cikumbuso. Bzimwebzi bzidacitisa kuti adzinza wace wakukwana 60 akwanise kucita Cikumbuso mwakuphatisa basa Vidiyokonferensiya! Mpfumakaziyo pabodzi na adzinza wace adagumana phindu thangwe ra nyongo yomwe Paolo na mkazace adacita. Patsogolo pace, mpfumakaziyo idanembera tsamba Paolo ndipo idamuuza kuti: “Ndikukutendani kwene-kwene thangwe ra kupfunzisa mpfumakazi zacikulire. Nin’dzayebwa lini thupo lomwe Yahova adandilatiza na nyongo yomwe imwepo mudaicita.”
16 Paolo adapfunza cinthu cakufunika kwene-kwene na nkhani imweyi. Iye adapfunza kuti lufoyi ni cinthu cakufunika kwene-kwene kuposa kukhala na nzeru ayai luso. Iye adalewa kuti: “Inepano ndikhatumikira ninga nyakunyang’anira dera. Tsapano, ndazindikira kuti pinango apalizi winango adayebwa nkhani zomwe ndidafotokoza, tsono iwo akadakumbukira thandizo lomwe inepano ndidawapasa.”
17. Kodi mbani winango omwe ambagumana phindu tikambalatiza lufoyi?
17 Tikambalatiza lufoyi kuna anzathu, ifepano timbagumana phindu mu njira yomwe tikhaidikhirira lini. Jonathan omwe ambakhala ku Nova Zelândia, akutawiriza bzimwebzi. Ntsiku inango sabudu ku maulo, iye adawona mpainiya akhacita upalizi m’mphepete mwa mseu. Jonathan adawona kuti bzikhali bwino kuti ambapalizire na mpainiyayo sabudu iri-yentse ku maulo. Iye akhadziwa lini phindu lomwe angadakhala nalo thangwe ra kulatiza kudeka mtima kuna mpainiyayo. Jonathan adalewa kuti: “Kulewa cadidi, inepano ndikhakomedwa lini na basa lakupalizira. Tsono pomwe ndikhatetekera kapfunzisidwe ka mpainiya ule na kuwona momwe bzimwebzi bzikhamuthandizira kukhala na phindu pa basa lakupaliza, bzidandicitisa kuti ndiyambembo kumbafuna kwene-kwene basa la kupalizira. Ndipo cinango n’cakuti ndidakhala na xamwali omwe adandithandiza kuti ndiyende patsogolo mwauzimu, kukomedwa na basa lakupalizira na kukhala xamwali wa Yahova.”
18. Kodi Yahova akufuna kuti ticite ciyani?
18 Yahova akufuna kuti tentsenefe tikulise lufoyi lathu kwa iye na kwa anzathu. Mu nkhani ino, tapfunza kuti tingakulise lufoyi lathu kwa Yahova mwa kumbawerenga Bibliya, kukumbukira bzomwe tikuwerengabzo na kumbalalewa naye mu mpembo. Ndipo tingakulise lufoyi kwa abale na mpfumakazi zathu mwa kumbawathandiza pa ciri-centse comwe angafunikire. Lufoyi lathu likakula, ifepano tin’dzakhala pa uxamwali bwakulimba na Yahova ndipo tin’dzakhalambo pa uxamwali bwakulimba na abale na mpfumakazi zathu. Ndipo uxamwali bumwebo mun’dzamala lini!
NYIMBO 109 Lufoyi Lamphanvu Lakucokera mu Mtima
a Bziribe basa penu tadziwa tsapano cadidi ayai tikutumikira Yahova kuyambira kale-kale, tentsenefe tin’funika kupitiriza kuyenda patsogolo mwauzimu. Mu nkhani ino, tin’pfunza bzomwe tingacite kuti tipitirize kuyenda patsogolo pa nkhani ya kufuna Yahova na kufunambo anzathu. Pomwe mukucita bzimwebzi onani bzinthu bzomwe mwakwanisa kale kucita na bzomwe mungacite kuti mubzikwanirise.
b Madzina yanango yacinjidwa.