‘Kulekerera Pikado Zomwe Zidacitidwa m’Mbuyo’

Ifepano tingalekereredwe pikado zathu pokha-pokha na ntsembe ya cakulombolera yomwe Jezu Kristu adapereka mwakuphatisa basa mulopa wace. (Aefezo 1:7) Tsono, Bibliya limbalewa kuti: “Mulungu adacita bzimwebzi kuti . . . alekerere pikado zomwe zidacitidwa m’mbuyo,” ayai pikado zomwe zidacitika pomwe Jezu akhanati kupereka cakulombolera. (Aroma 3:25) Kodi Yahova angadalekerera tani pikado pomwe cakulombolera cikhanati kuperekedwa ndipo pa nthawe ibodzi-bodziyo acipitiriza kukhala Mulungu wacirungamo?

Yahova adapicira kuti pangadadzakhala na “mbadwa” yomwe ingadadzapulumusa wanthu omwe angadamukhulupira na kukhulupirambo mapiciro yace. Pomwe Yahova adacita piciro limweri bzidakhala ninga kuti cakulomboleraco caperekedwa kale. (Genesesi 3:15; 22:18) Mulungu akhadziwa kuti Mwana wace angadapereka cakulombolera mwakufuna yekha pa nthawe yomwe Mulunguyo angadafuna kuti iye acite bzimwebzo. (Agalatiya 4:4; Ahebereu 10:7-10) Pomwe Jezu akhali pa dziko la pantsi, Yahova adamupasa mphanvu kuti ambalekerere pikado napo kuti cakulombolera cikhanati kuperekedwa. Jezu adalekerera pikado za wale omwe akhana cikhulupiro thangwe akhadziwa kuti cakulombolera comwe iye angadapereka cingadamalisa pikado zawo. — Mateu 9:2-6.