Mibvunzo Yakucokera kwa Anyakuwerenga

Kodi anyakupfunza 70 omwe Jezu adawatuma kuti akapalizire akhali kuponi pomwe iye adayambisa Cilaliro ca Mbuya? Kodi iwo akhadasiya kutewera Jezu?

N’cadidi kuti anyakupfunza 70 wale pakhalibe pomwe Jezu adayambisa Cilaliro ca Mbuya. Tsono bzimwebzi bzin’funa lini kulewa kuti iwo akhadasiya kumutewera ayai kuti Jezuyo akhakomedwa lini nawo. Jezu akhandofuna kukhala na apostolo wace 12 wale pa nthawe imweyo.

Apostolo 12 wale pabodzi na anyakupfunza 70 wentse Jezu akhakomedwa nawo, thangwe akhali anyakupfunza wace. Cakuyamba, Jezu adasankhula amuna 12 pakati pa anyakupfunza azinji omwe iye akhanawo, ndipo adawacemera kuti apostolo. (Luka 6:12-16) Iye akhali ku Galileya pomwe “adacemera apostolo wace 12” ndipo “adawatuma kuti akapalizire bza Umambo bwa Mulungu na kupoza wanthu.” (Luka 9:1-6) Patsogolo pace, pomwe Jezu akhali ku Djudeya iye “adasankhula anyakupfunza winango wakukwana 70 aciwatumiza awiri-awiri.” (Luka 9:51; 10:1) Bzimwebzi bzikulatiza kuti Jezu akhana ateweri ku mbuto zakusiyana-siyana komwe mafala yabwino ya Umambo yakhapaliziridwa.

Adjuda omwe adakhala anyakupfunza wa Jezu akhafunika kucita msinda wa Paskwa omwe ukhacitika gole liri-lentse ndipo pinango iwo akhacita bzimwebzi pabodzi na mabanja yawo. (Ekisodo 12:6-11, 17-20) Pomwe Jezu akhadasala pang’ono kufa, iye na apostolo wace adayenda ku Jeruzalemu. Tsono Jezu alibe kucemera anyakupfunza wace wentse wa ku Djudeya, Galileya na wa ku Pereya kuti adzacitire pabodzi msinda ukulu wa Paskwa. Bzimwebzi bzikulatiza kuti Jezu akhandofuna kukhala na apostolo wacewo basi pa nthawe imweyo. Iye adawauza kuti: “Ndikhafunisisa kudya namwe Paskwayi pomwe ndikanati kubonera.” — Luka 22:15.

Jezu akhana mathangwe yakubveka yomwe yadamucitisa kucita bzimwebzi. Thangwe mwakusaya kucedwa, iye angadaphedwa ninga “Mwana wa Bira wa Mulungu omwe an’cosa pikado pa dziko la pantsi.” (Juwau 1:29) Jezu angadafera ku Jeruzalemu komwe kukhaperekedwa ntsembe kwa Mulungu kuyambira kale-kale. Paskwa ikhakumbusa Ajirayeri bzomwe Yahova adacita kuti awatsudzule ku Edjipito. Tsono ntsembe ya Jezu ingadakhala ikulu kwene-kwene thangwe iye angadapulumusa wanthu wentse ku pikado na infa. (1 Akolinto 5:7, 8) Kufa kwa Jezu kudacitisa kuti apostolo 12 wale akhale aliserse ya gwere lacikristau. (Aefezo 2:20-22) Bzakudabwisa mpsakuti mzinda wakucena omwe ni Jeruzalemu ana “aliserse yakumangidwa na minyala 12” yomwe idanembedwa “madzina 12 ya apostolo 12 wa Mwana wa Bira.” (Apokalipse 21:10-14) Bzimwebzi bzikulatiza kuti apostolo wakukhulupirikawo angadadzakhala na udindo bwakufunika kwene-kwene bwakucitisa kuti cakulinga ca Mulungu cikwanisike. Ndipopa tikukwanisa kuwona thangwe ranyi Jezu akhafunika kukhala nawo pabodzi pakucita Paskwa yace yakumalizira na kucitambo Cilaliro ca Mbuya comwe adadzaciyambisa patsogolo pace.

Anyakupfunza 70 wa Jezu wale pabodzi na anyakupfunza wace winango akhali lini pabodzi naye usiku bumwebule. Napo bziri tenepo, anyakupfunza wentse wakukhulupirika angadakwanisa kugumana phindu na Cilaliro ca Mbuya. Anyakupfunza wentse omwe adadzakhala Akristau wakudzozedwa angadacitambo mbali ya mpangano wa umambo omwe Jezu adaufotokoza kwa apostolo wace usiku bwakumalizira bule. — Luka 22:29, 30.