NKHANI YAKUPFUNZA 13
NYIMBO 4 “Yahova ni M’busa Wangu”
Boko la Yahova Ndifupi Lini
“Kodi boko langu ine Yahova ndifupi?” — NUMERO 11:23.
CAKULINGA CA NKHANIYI
Nkhani ino in’tithandiza kupitiriza kukhulupira kuti Yahova nthawe zentse an’dzatipasa bzomwe tikufunikira kuti tipitirize kukhala na moyo.
1. Kodi Mozeji adalatiza tani kuti akhathemba Yahova pomwe akhatsogolera Ajirayeri kucoka ku Edjipito?
BUKHU la Ahebereu limbafotokoza bza wanthu azinji omwe akhakhulupira Yahova, m’bodzi mwa iwo akhali Mozeji. Iye akhana cikhulupiro cakulimba kwene-kwene. (Ahebereu 3:2-5; 11:23-25) Iye adalatiza cikhulupiro pomwe adatsogolera Ajirayeri kuti acoke ku Edjipito. Iye alibe kubvuma kugopswedwa na Farawo pabodzi na acikunda wace. Iye adalatiza kuti akhathemba Yahova mwa kutsogolera Ajirayeri pa Nyanza Ifuira patsogolo pace mu dambo. (Ahebereu 11:27-29) Ajirayeri azinji adasiya kukhulupira kuti Yahova angadawasamalira, tsono Mozeji adapitiriza kuthemba Mulungu wace. Pakuti Mozeji adathemba Yahova, Yahovayo adapasa Ajirayeri cakudya na madzi kuti apitirize kukhala na moyo.a — Ekisodo 15:22-25; Salimo 78:23-25.
2. Thangwe ranyi Yahova adabvunza Mozeji kuti: “Kodi boko langu ine Yahova ndifupi”? (Numero 11:21-23)
2 Napo kuti Mozeji akhana cikhulupiro cakulimba, pomwe padapita gole libodzi pambuyo pa Yahova kutsudzula Ajirayeri ku Edjipito, iye adayamba kupenukira penu Yahova angadakwanisa kuwapasa nyama ninga momwe akhadalewera. Ajirayeri akhalipo azinji kwene-kwene mu dambomo mwakuti kupambula akazi na wana, amuna akhalipo 600 000 ndipo mu dambomo mukhalibe cakudya. Tsono Yahova adabvunza Mozeji kuti: “Kodi boko langu ine Yahova ndifupi?” (Werengani Numero 11:21-23.) Fala lakuti “boko la Yahova” limbathandauza mzimu wa Mulungu ayai mphanvu yomwe iye ambaiphatisa basa kuti acite bzomwe iye ambafuna. Kulewa kwinango, Yahova akhabvunza Mozeji kuti: ‘Kodi iwepo ukukumbuka kuti inepano ningacite lini bzomwe ndalewa?’
3. Thangwe ranyi tin’funika kumbakumbukira bzomwe bzidacitikira Mozeji na Ajirayeri?
3 Pinango imwepo mudacita kale thupo penu Yahova an’dzakupasani bzomwe imwepo na banja lanu mukufunikira kuti mupitirize kukhala na moyo. Tsono kumbakumbukira bzomwe bzidacitikira Mozeji na Ajirayeri kungatithandize kwene-kwene. Ndipopa mu nkhani ino tiniwona kuti n’thangwe ranyi Mozeji na Ajirayeri alibe kukhulupira kuti Yahova angadawapasa bzomwe akhafunikira. Ndipo tiniwonambo mavesi yanango ya m’Bibliya yomwe yan’dzalimbisa cikhulupiro cathu cakuti boko la Yahova ndifupi lini.
BZOMWE TINGAPFUNZE NA MOZEJI NA AJIRAYERI
4. Kodi n’ciyani comwe cidacitisa wanthu azinji kupenukira kuti Yahova angadawapasa bzomwe iwo akhafunikira?
4 Thangwe ranyi Ajirayeri azinji adayamba kupenukira kuti Yahova angadawapasa bzomwe akhafunikira? Mtundu wa Ajirayeri na “wanthu winango azinji omwe akhali lini” Ajirayeri adamala nthawe itali akuyenda ku Dziko Lakupiciridwa. (Ekisodo 12:38; Deuteronomiyo 8:15) Wanthu azinji omwe akhali lini Ajirayeri pabodzi na Ajirayeriwo adayamba kung’ung’udzika acimbalewa kuti aneta kudya mana. (Numero 11:4-6) Wanthuwo adayamba kulewa kuti akhafuna kudya nyama na bzakudya bzinango bzomwe bzikhalipo ku Edjipito. Pakuti wanthuwo akhadandaulira Mozeji, iye adakumbuka kuti ndiye omwe akhafunika kunyang’ana nyama kuti apase wanthuwo tsono akhadziwa lini kuti n’kuponi komwe angadakagumana nyamayo. Bzimwebzi bzikulatiziratu padeca kuti iwo akhapenukira kuti Yahova angadawapasa bzomwe akhafunikira. — Numero 11:13, 14.
5-6. Kodi tingapfunze ciyani na momwe Ajirayeri adatewezerera wanthu omwe akhali lini Ajirayeri?
5 Pakuti wale omwe akhali lini Ajirayeri akhatenda lini bzinthu bzentse bzomwe Yahova akhadawacitira, Ajirayeri adayambambo kumbakumbuka ninga iwo. Pinango ifepano tingayambembo kutewezera wale omwe ana mzimu wakusaya kutenda ticiyambambo kuleka kumbatenda bzomwe Yahova ambatipasa. Bzimwebzi bzingacitike tikayamba kumbakumbukira bzinthu bzomwe tikhanabzo m’mbuyo ayai tikayamba kumbacitira njiru bzinthu bzomwe anango anabzo. Tsono tin’dzakhala wakukondwa tikambawona kuti bzinthu bzomwe tinabzo mpsakukwanira, bziribe basa momwe bzinthu bzingakhalire pa moyo wathu.
6 Ajirayeri akhafunika kukumbukira bzomwe Yahova akhadawapicira. Iye akhadawauza kuti angadawapasa bzinthu bzizinji bzabwino mu Dziko Lakupiciridwa. Piciro limweri lingadakakwanisika mu Dziko Lakupiciridwa sikuti pomwe iwo akhali mu dambo. Mwa njira ibodzi-bodziyi, m’mbuto mwa kumbakumbukira bzinthu bzomwe tingakhale lini nabzo m’dzikoli bzingakhale bwino kumbakumbukira bzomwe Yahova adapicira kudzatipasa m’dziko lipsa ndipo tingambakumbukirembo mavesi ya m’Bibliya yomwe yangatithandize kulimbisa cikhulupiro cathu kwa Yahova.
7. Thangwe ranyi tingakhale na citsimikizo cakuti boko la Yahova ndifupi lini?
7 Pinango imwepo mungabzibvunze kuti, thangwe ranyi Yahova adabvunza Mozeji kuti: “Kodi boko langu ine Yahova ndifupi?” Pomwe Yahova adacita Mozeji mbvunzo umweyu, iye akhafuna kuti Mozejiyo akumbukire bzinthu bziwiri ibzi. Cakuyamba, mphanvu ya Yahova iribe malire. Na caciwiri, iye angaphatise basa mphanvu yaceyo ku mbuto iri-yentse. Mulungu angadapasa Ajirayeri nyama izinji kwene-kwene napo kuti iwo akhali mu dambo. Yahova adalatiza mphanvu yace na “boko lace lamphanvu na lakufuthuka.” (Salimo 136:11, 12) Na tenepo tikakhala kuti tikugumana na mabvuto tingakhale na citsimikizo cakuti Yahova an’dzathandiza m’bodzi na m’bodzi wa ifepano bziribe basa ku mbuto komwe tiri. — Salimo 138:6, 7.
8. Kodi n’ciyani comwe tingacite kuti titcenkhe kuphonya ninga momwe azinji omwe akhali mu dambo adacitira? (Onanimbo cithunzi-thunzi.)
8 Yahova adacita bzomwe akhadawapicira; iye adapasa wanthuwo nyama ya ntsenzetsi. Tsono Ajirayeri alibe kutenda Yahova thangwe ra cakudabwisaci. M’mbuto mwace, azinji wa iwo adayamba kukhala na mtima wakufuna kukhala na bzizinji. Iwo akhambaphata ntsenzetsizo usiku na masikati. Yahova adakalipa kwene-kwene na wale omwe adalatiza “cikhumbo cakuipa” cakufuna cakudya ndipo adawalanga. (Numero 11:31-34) Tingapfunze bzinthu bzizinji na nkhani imweyi. Tin’funika kucita mphole kuti tileke kufuna kumbakhala na bzinthu kwene-kwene! Penu ndife wakudala ayai wakusauka, tin’funika “kugwezeka cuma cathu kudzulu” mwa kulimbisa cikhulupiro cathu kwa Yahova pabodzi na Jezu. (Mateu 6:19, 20; Luka 16:9) Tikacita bzimwebzo, tingakhale na citsimikizo cakuti Yahova an’dzatipasa bzomwe tikufunikira.
Kodi n’ciyani comwe wanthu azinji adacita pomwe Yahova adawapasa nyama ya ntsenzetsi ndipo tikupfunza ciyani na bzimwebzi? (Onani ndime 8)
9. Pakulewa bza thandizo la Yahova, ni citsimikizo ciponi comwe tin’funika kukhala naco?
9 Yahova ngwakukonzeka kuthandiza wanthu wace ntsiku zino. Tsono bzimwebzi bzin’funa lini kulewa kuti tin’dzaluza lini bzinthu bzakuthupi ayai kuti tin’dzakhala lini tiribe cakudya.b Tsono tingakhale na citsimikizo cakuti nthawe zentse Yahova an’dzatithandiza. Iye an’dzatipasa mphanvu kuti tikwanise kupirira mabvuto yomwe tin’dzakhala tikugumana nayo. Kuti tibvesese bwino bzimwebzi, mbatiwoneni nfundo ziwiri za momwe tingalatizire kuti timbakhulupira kuti Yahova nthawe zentse an’dzatipasa bzomwe tikufunikira; (1) pomwe tikugumana na bvuto lakusaya kobiri (2) na pomwe tikucita thupo na bzinthu bzakutsogolo.
POMWE TIKUGUMANA NA BVUTO LAKUSAYA KOBIRI
10. Kodi ni mabvuto yaponi yomwe tingagumane nayo?
10 Pomwe kuphampha kwa dziko lakuipali kukufendera tingadikhirirembo kuthumizirika kwa mabvuto yomwe yambacitisidwa na boma, nkhondo, malengwa ya pantsi ayai matenda. Tingaluze basa, bzinthu bzomwe tinabzo ayai tingafunikire kucoka ku mbuto komwe timbakhala ndipo bzimwebzi bzingacitise kuti bzikhale bzakunesa kugumana bzinthu bzomwe tikufunikira. Tingafunikire kugumana basa linango ayai tingakumbuke bzakucoka na banja lathu kuti tiyende kukakhala ku mbuto inango kuti tikwanise kulisamalira. N’ciyani comwe cingatithandize kuti tisankhule bzinthu bzomwe bzinilatiza kuti timbathemba thandizo la Yahova?
11. N’ciyani comwe cingakuthandizeni kukunda bvuto lakusaya kobiri? (Luka 12:29-31)
11 Cinthu cakuyamba comwe mungacite ndico kuuza Yahova bza thupo lanu. (Mimwani 16:3) Mukumbireni nzeru zomwe mukufunikira kuti musankhule bwino bzakucita mucimukumbirambo kuti akuthandizeni kukhala wakuderekha kuti mutcenkhe kucita “thupo lakunyanyira” pa mabvuto yomwe mukugumana nayo. (Werengani Luka 12:29-31.) Mukumbireni kuti akuthandizeni kumbakomedwa na bzinthu bzomwe munabzo pa moyo wanu. (1 Timotio 6:7, 8) Fufudzani m’mabukhu yathu nkhani zomwe zingakuthandizeni kudziwa bzomwe mungacite mukakhala mukugumana na bvuto lakusaya kobiri. Wanthu azinji adagumana phindu likulu kwene-kwene pomwe adawerenga mu jw.org nkhani zomwe zimbafotokoza bzinthu bzomwe tingacite tikakhala tikugumana na bvuto lakusaya kobiri.
12. Kodi ni mibvunzo iponi yomwe ingathandize msolo wa banja kusankhula bwino bzomwe angacite na banja lace?
12 Wanthu azinji adayezedwa kuti abvume basa lomwe lingadawacitisa kukhala kutali na banja lawo, tsono bzimwebzi bzidawonekeratu kuti bzikhali bzakusaya nzeru. Pomwe mukanati kubvuma basa, lekani kumbandokumbukira kobiri zomwe mun’dzatambira koma mbakumbukiranimbo penu bzimwebzi bzin’dzakuthandizani na kuthandizambo banja lanu kukhala pa uxamwali bwakulimba na Yahova. (Luka 14:28) Bzibvunzeni kuti: ‘N’ciyani comwe cingacitike ndikakhala kutali na banja langu? Kodi nin’dzakwanisa kumbagumanika pa mitsonkhano yentse, kucoka mu upalizi na kumbamala nthawe ndiri pabodzi na abale na mpfumakazi?’ Penu muna wana, mun’funika kumbabzicita mbvunzo wakufunika wakuti: ‘Kodi wana wangu nin’dzakwanisa “kuwalanga na kuwapfunzisa mwakubverana na kufuna kwa Yahova”?’ (Aefezo 6:4) Bvumani kutsogoleredwa na makumbukidwe ya Mulungu sikuti na makumbukidwe ya wanthu wa m’banja mwanu ayai axamwali wanu omwe ambalemekeza lini malamulo ya m’Bibliya.c Tony, omwe ambakhala kumabvadzuwa kwa Ásia, adauzidwa kazinji-kentse kuti akaphate basa ku dziko linango. Tsono pambuyo pa kuipempherera nkhaniyo pabodzi na mkazace, adawona kuti bzikhali bwino kuleka kubvuma basalo. M’mbuto mwace, adakumbukira momwe angacinjire bzinthu pa moyo wawo kuti aleke kumbadzonga kobiri zizinji. Tony adadzalewa kuti: “Ndidadzakhala na mwayi wakuthandiza wanthu azinji kumudziwa Yahova ndipo wana wathu ambafuna kwene-kwene Yahova. Banja lathu lidapfunza kuti tikambacita bzinthu mwakubverana na Mateu 6:33, Yahova an’dzatisamalira.”
POMWE TIKUCITA THUPO NA BZINTHU BZAKUTSOGOLO
13. Kodi ni bzinthu bziponi bzomwe tingacite tsapano bzomwe bzingadzatithandize kukhala na bzomwe tingadzafunikire tikadzakalamba?
13 Kukhulupira kwathu Yahova kungayezedwe tikambakumbukira momwe moyo wathu un’dzakhalira tikadzakalamba. Bibliya limbatilimbikisa kuti timbaphate basa na nyongo kuti tidzakwanise kugumana bzinthu bzakufunikira kutsogolo. (Mimwani 6:6-11) Penu bzingakwanisike bzingakhale bwino kukoya kobiri yomwe ingadzakuthandizeni kutsogolo. N’cadidi kuti kobiri nthawe zinango ingatithandize kugumana bzinthu bzomwe tikufunikira. (Mpalizi 7:12) Tsono tin’funika lini kulekerera kuti kobiriyo ikhale cinthu cakufunika kwene-kwene pa moyo wathu.
14. Ahebereu 13:5 angatithandize tani kuti tileke kumbacita thupo kwene-kwene na bzinthu bzakutsogolo?
14 Jezu adafotokoza ciratizo ca munthu omwe ambakoya kobiri tsono kwa “Mulungu ngwakusauka.” (Luka 12:16-21) Palibe munthu omwe ambadziwa bzomwe bzin’dzacitika mangwana. (Mimwani 23:4, 5; Tiyago 4:13-15) Kuthumizira bzimwebzi, Jezu adalewambo kuti wentse omwe akufuna kukhala ateweri wace an’funika kukhala wakukonzeka “kusiya” bzinthu bzomwe anabzo. (Luka 14:33) Akristau wakuyambirira wa ku Djudeya adabvuma bzimwebzi mwakukondwa. (Ahebereu 10:34) Ntsiku zino, abale azinji ambabvuma kuluza bzinthu bzawo thangwe ra kulamba kuthandizira maboma ya m’dzikoli. (Apokalipse 13:16, 17) N’ciyani comwe cimbawathandiza kucita bzimwebzi? Iwo ambakhulupira piciro la Yahova lakuti: “Inepano nin’dzakusiya lini ndipo cipo ndicidzakuthawa.” (Werengani Ahebereu 13:5.) Timbacita bzomwe tingakwanise kuti tikonzekere bzinthu bzomwe bzingadzatithandize kutsogolo ndipo pakacitika cinthu cakusaya kudikhiririka timbathemba thandizo la Yahova.
15. Kodi ni makumbukidwe yaponi yomwe abereki wacikristau an’funika kukhala nayo pakulewa bza wana wawo? (Onanimbo cithunzi-thunzi.)
15 M’bzikhalidwe bzinango, mabanja yambandofuna kukhala na wana na cakulinga cakuti wanawo adzawathandize aberekiwo akadzakalamba. Bibliya limbalewa kuti abereki an’funika kusamalira wana wawo. (2 Akolinto 12:14) N’cadidi kuti abereki akakalamba iwo angafune kuti wana wawo awathandize mwa kuwapasa kobiri ayai bzinthu bzinango, ndipo wana azinji ambakomedwa kucitira bzimwebzi abereki wawo. (1 Timotio 5:4) Tsono abereki omwe ambathemba Yahova ambazindikira kuti an’dzakhala wakukondwa kwene-kwene akathandiza wana wawo kutumikira Yahova m’mbuto mwa kuwapfunzisa na cakulinga cakuti kutsogolo adzagumane kobiri kuti adzawasamalire. — 3 Juwau 4.
Mwamuna na mkazi omwe ambakhulupira Yahova ambaphatisa basa malango ya m’Bibliya akafuna kusankhula kucita bzinthu (Onani ndime 15)d
16. Kodi abereki angakonzekerese tani wana wawo kuti adzakwanise kubzisamalira? (Aefezo 4:28)
16 Pomwe mukuthandiza wana wanu momwe angadzabzisamalirire kutsogolo, alatizeni kuti imwepo mumbathemba Yahova. Pomwe iwo akali ang’ono apfunziseni kufunika kwa kumbaphata basa na nyongo. (Mimwani 29:21; werengani Aefezo 4:28.) Pomwe akukula athandizeni kuti ambacite bwino bzinthu ku xikola. Abereki angafufudze nfundo za m’Bibliya zomwe zingathandize wana wawo kusankhula bwino mapfunziro yomwe angadzacite. Cakulinga ca abereki n’cakuthandiza wana wawo kuti adzakwanise kubzisamalira acikhalambo na nthawe yakupalizira ayai kukhala apainiya.
17. Kodi ni citsimikizo ciponi comwe tingakhale naco?
17 Wale omwe ambathemba Yahova angakhale na citsimikizo cakuti iye ali wakukonzeka kuwapasa bzomwe iwo akufunikira. Pomwe kuphampha kwa dziko lakuipali kukufendera, cikhulupiro cathu kwa Yahova cingayezedwe. Bziribe basa bzomwe bzicitikebzo, koma tin’funika kukhala wakutsimikiza kukhulupira kuti Yahova an’dzaphatisa basa mphanvu yace kuti atipase bzomwe tikufunikira pa moyo wathu. Tingakhale na citsimikizo cakuti Yahova nthawe zentse angatithandize bziribe basa komwe tiri.
NYIMBO 150 Lingani Yahova Kuti Mudzapulumuke
a Onani “Mibvunzo Yakucokera kwa Anyakuwerenga” mu Ntsanza ya Mulindiri ya Outubro 2023.
b Onani “Mafunso Ochokera kwa Owerenga” mu Ntsanza ya Mulindiri ya 15 Setembro 2014 (Chichewa).
c Onani nkhani yakuti “Simungatumikire Ambuye Awiri” mu Ntsanza ya Mulindiri ya 15 Abril 2014 (Chichewa).
d BZOMWE BZIKUCITIKA PA CITHUNZI-THUNZI: Banja lomwe limbathemba Yahova likuceza na mwana wawo omwe akuthandizira basa lakumanga Nyumba ya Umambo pabodzi na bayace.