Phatisani Basa Bibliya Ninga Supedyo

Nyakupfunza Tiyago adandendemezera Bibliya ninga supedyo thangwe iro limbatithandiza kuwona momwe unthu bwathu bwa mkati buliri. (Tiyago 1:22-25) Kodi tingaphatise tani basa Bibliya mwakuthemera ninga supedyo?

Mbakhalani tceru pomwe mukuwerenga. Tikambabziwona pa supedyo mwakuthamanga, pinango tingakwanise lini kuwona cinthu comwe ciri lini bwino kwa ifepano. Mwa njira ibodzi-bodziyi, tikambawerenga Bibliya mwakuthamanga tin’dzakwanisa lini kuzindikira bzinthu bzomwe tin’funikira kucinja. Ndipopa tin’funika kumbakhala tceru pomwe tikuwerenga Bibliya.

Mbazindikirani bzomwe imwepo mun’funikira kucinja sikuti kumbawona bza winango. Nthawe zinango tikambabziwona pa supedyo timbakwanisambo kuwona wanthu winango pa supedyoyo ndipo tingayambe kukhala tceru na momwe iwo akuwonekera. Mwakundendemerana na bzimwebzi, pomwe tikuwerenga Bibliya pinango tingambakumbukire bzinthu bzomwe wanthu winango an’funikira kucinja. Tsono kucita bzimwebzi, kun’dzatithandiza lini kuzindikira bzinthu bzomwe ifepano tin’funikira kucinja.

Mbakhalani wacikati-kati. Tikambabziwona pa supedyo ndipo ticimbandokhalira kuwona bzinthu bzomwe tikukomedwa lini nabzo, tingasuname. Ndipopa, tin’funika kukhala wanthu wacikati-kati pomwe tikuwerenga Fala la Mulungu, Bibliya, mwakuleka kumbadikhirira kuti ticite bzinthu bzizinji kuposa momwe Yahova ambatiwonera. — Tiyago 3:17.