NKHANI YAKUPFUNZA 14
NYIMBO 8 Yahova ni Pakuthawira Pathu
“Sankhulani Lero Omwe Mun’funa Kutumikira”
“Tsono inepano na wa pa mui pangu tin’tumikira Yahova.” — DJOSWA 24:15.
CAKULINGA CA NKHANIYI
Mu nkhani ino, tin’kumbusidwa bza mathangwe yomwe yambaticitisa kusankhula kutumikira Yahova.
1. Kuti tikhale wakukondwa, n’ciyani comwe tin’funika kucita ndipo n’thangwe ranyi? (Zaiya 48:17, 18)
BABA wathu wakudzulu ambatifuna kwene-kwene ndipo ambafunambo kuti timbakomedwe na moyo kuyambira tsapano mpaka kale-kale. (Mpalizi 3:12, 13) Iye adatilenga na luso lakuti timbakwanise kucita bzinthu bzizinji, tsono iye alibe kutilenga na luso la kubzitonga tekha ayai lakuti timbabzisankhulire tekha bzabwino na bzakuipa. (Mpalizi 8:9; Jeremiya 10:23) Iye ambadziwa kuti ifepano tikhale wakukondwa tin’funika kumutumikira na kukhalambo na moyo mwakubverana na mitemo yace. — Werengani Zaiya 48:17, 18.
2. N’ciyani comwe Sathani ambafuna kuti tikhulupire ndipo n’ciyani comwe Yahova adacita?
2 Sathani akufuna kuti ifepano timbakhulupire kuti tingakhale wakukondwa mwakusaya kuthandizidwa na Yahova ayai kuti wanthu bzinthu bzingawafambire bwino akabzitonga okha. (Genesesi 3:4, 5) Pakufuna kulatiza kuti Sathani ngwakunama, Yahova adalekerera kuti wanthu abzitonge okha mu kanthawe kakucepa. Ifepano timbakwanisa kuwona bzinthu bzakuipa bzomwe bzimbacitika wanthu akambabzitonga okha. Tsono Bibliya limbalewa bza amuna na akazi omwe adakhala wakukondwa thangwe ra kutumikira Yahova. M’bodzi mwa wanthu amwewa ni Jezu Kristu. Mu nkhani ino, tin’cezerana mathangwe yomwe yadamucitisa kuti asankhule kutumikira Yahova. Ndipo tin’cezeranambo thangwe lomwe limbacitisa Baba wathu wakudzulu kuthemera kunamatidwa. Pakumalizira, tin’cezeranambo mathangwe manango yomwe yambaticitisa kusankhula kutumikira Yahova.
THANGWE RANYI JEZU ADASANKHULA KUTUMIKIRA YAHOVA?
3. N’ciyani comwe Sathani akhafuna kupasa Jezu ndipo Jezuyo adamutawira tani?
3 Pomwe Jezu akhali pantsi pano, iye akhafunika kusankhula kuti angadatumikira yani. Pambuyo pa kubatizidwa, Sathani adamuuza kuti angadamupasa maumambo yentse ya pa dziko la pantsi penu Jezuyo angadamunamata kabodzi kokha basi. Tsono Jezu adamutawira kuti: “Coka Sathani! Pakuti bzidanembedwa kuti: ‘Yahova Mulungu wako, ndiye omwe un’funika kumunamata, ndipo ndiye yekha omwe un’funika kumutumikira.’” (Mateu 4:8-10) Thangwe ranyi Jezu adasankhula kunamata Yahova? Mbatiwoneni mathangwe yomwe yadamucitisa.
4-5. Kodi ni mathangwe yaponi yomwe yadacitisa Jezu kusankhula kutumikira Yahova?
4 Thangwe likulu lomwe lidacitisa Jezu kusankhula kutumikira Yahova ni lufoyi. Iye ambafuna kwene-kwene Pai wace. (Juwau 14:31) Kuthumizira bzimwebzi, Jezu ambatumikira Yahova thangwe iye ambadziwa kuti cimweci ni cinthu cabwino comwe iye akufunika kucita. (Juwau 8:28, 29; Apokalipse 4:11) Iye ambadziwa kuti Yahova ndiye omwe adatipasa moyo ndipo tin’funikambo kumuthemba thangwe ambatipasa bzinthu bzizinji bzabwino. (Salimo 33:4; 36:9; Tiyago 1:17) Yahova nthawe zentse akhauza Jezu cadidi ndipo akhamupasambo bzomwe iye akhafunikira. (Juwau 1:14) Sathani ngwakusiyana kwene-kwene na Yahova thangwe iye adacitisa kuti wanthu akhale na pikado ndipo ambafe. Iye ngwakunama ndipo ambabzifuna yekha. (Juwau 8:44) Bzimwebzi ndibzo bzomwe bzidacitisa Jezu kulamba kutewezera Sathani na kulambambo kupandukira Yahova. — Afilipi 2:5-8.
5 Thangwe linango lomwe lidacitisa Jezu kusankhula kutumikira Yahova ni kukumbukira bzinthu bzabwino bzomwe bzingadadzacitika iye angadapitiriza kutumikira Yahovayo. (Ahebereu 12:2) Iye akhadziwa kuti angadapitiriza kukhala wakukhulupirika angadacenesa dzina la Baba wace ndipo angadacitisambo kuti pikado na infa bzipfudzidwe.
THANGWE RANYI YAHOVA AN’THEMERA KUNAMATIDWA?
6-7. Thangwe ranyi wanthu azinji ntsiku zino ambatumikira lini Yahova, ndipo thangwe ranyi Yahovayo an’themera kunamatidwa nafe?
6 Wanthu azinji ntsiku zino ambatumikira lini Yahova thangwe ambadziwa lini makhalidwe yabwino yomwe iye anayo ndipo ambadziwambo lini bzinthu bzabwino bzomwe iye adawacitira. Wanthu amwewa mbakundendemerana na wanthu omwe Paulo adawapalizira ku Atena. Iwo akhadziwambo lini Mulungu. — Mabasa 17:19, 20, 30, 34.
7 Paulo adauza wanthu wa ku Atena kuti Mulungu wacadidi “ndiye omwe ambapasa moyo wanthu wentse, mphuwe pabodzi na bzinthu bzentse.” Iye adalewa pomwe kuti: “Thangwe ra iye, ifepano tina moyo, timbafamba ndipo tiripo.” Pakuti Mulungu ni Mulengi omwe “adakonza mitundu yentse ya wanthu kucokera kwa munthu m’bodzi,” ndipopa ndiye yekha omwe an’themera kunamatidwa. — Mabasa 17:25, 26, 28.
8. N’ciyani comwe Yahova an’dzacita lini? Fotokozani.
8 Pakuti Yahova ni Mulengi Mkululetu, iye angadafuna angadangingimiza wanthu kuti amutumikire. Tsono Yahova cipo acidzacita bzimwebzo. M’mbuto mwace, iye adatipasa bzinthu bzomwe bzimbalatiza kuti iye alipo nakuti ambafuna kwene-kwene m’bodzi na bodzi wa ifepano. Iye akhafuna kuti wanthu azinji akhale axamwali wace mpaka kale-kale. (1 Timotio 2:3, 4) Kuti bzimwebzi bzikwanisike, Yahova adatipfunzisa momwe tingapfunzisirembo winango bza cakulinga cace kuphatanidzambo bzinthu bzabwino bzomwe iye an’dzacitira wanthu kutsogoloku. (Mateu 10:11-13; 28:19, 20) Iye adatipasa gwere kuti timbamunamate nakuti timbatambirembo thandizo la akulu. — Mabasa 20:28.
9. Kodi Yahova ambalatiza tani kuti ambafuna wanthu wentse?
9 Yahova ambalatiza lufoyi lace kwa wale omwe ambakhulupira lini kuti iye alipo mwa kuwapasambo bzinthu bzabwino. Kumbukirani ibzi: Kwa magole mazinji, wanthu azinji adasankhula kukhala na moyo mwakubverana na bzomwe iwo akhafuna pakulewa bza bzinthu bzabwino na bzakuipa m’mbuto mwa kubvera Yahova. Napo bziri tenepo, Yahova mwakudeka mtima adawapasa bzomwe akhafunikira kuti akhale na moyo wakukondwa. (Mateu 5:44, 45; Mabasa 14:16, 17) Iye adawapasa nzeru ya momwe angakhalire na axamwali wabwino, momwe angasamalirire banja na momwe angagumanirembo phindu na basa lawo. (Salimo 127:3; Mpalizi 2:24) Bzimwebzi bzikulatiziratu padeca kuti Baba wathu wakudzulu ambafuna wanthu wentse. (Ekisodo 34:6) Tsapano mbaticezeraneni mathangwe yanango yomwe yambaticitisa kutumikira Yahova na momwe iye ambasimbira wale omwe ambasankhula kumutumikira.
THANGWE LOMWE LIMBATICITISA KUSANKHULA KUTUMIKIRA YAHOVA
10. (a) Kodi n’ciyani comwe cimbaticitisa kuti titumikire Yahova? (Mateu 22:37) (b) Kodi ni phindu liponi lomwe imwepo mwagumana thangwe ra kupirira kwa Yahova? (Salimo 103:13, 14)
10 Ninga Jezu, ifepano timbatumikira Yahova thangwe rakuti timbamufuna kwene-kwene. (Werengani Mateu 22:37.) Tikambapfunza bza makhalidwe ya Yahova timbafuna kukhala pa uxamwali na iye. Onani momwe Yahova ambalatizira kuti ambapirira nafe. Pomwe Ajirayeri alibe kubvera Yahova, Yahovayo adawadandaulira kuti: “Ndaphata minyendo, siyani njira zanu zakuipa.” (Jeremiya 18:11) Yahova ambakumbukira kuti ndife mpfumbi. (Werengani Salimo 103:13, 14.) Kodi imwepo mukakumbukira bza makhalidwe yomwe Yahova anayo na kupirira komwe iye ambakulatiza, bzimwebzi bzimbakucitisani lini kufuna kumutumikira mpaka kale-kale?
11. Kodi ni mathangwe yanango yaponi yomwe yambaticitisa kusankhula kutumikira Baba wathu wa kudzulu?
11 Ifepano timbatumikira Yahova thangwe timbadziwa kuti cimweci ni cinthu comwe tin’funikira kucita. (Mateu 4:10) Kuthumizira bzimwebzi, timbadziwambo kuti tikapitiriza kukhala wakukhulupirika kwa Yahova tin’dzagumana phindu. Tikatumikira Yahova mwakukhulupirika timbathandizira kucenesa dzina lace, timbalatiza kuti Sathani ngwakunama ndipo timbakondwesambo mtima wa Baba wathu, Yahova. Ifepano tikasankhula kutumikira Yahova ntsiku zino, tin’dzakhalambo na mwayi wakumutumikira mpaka kale-kale! — Juwau 17:3.
12-13. N’ciyani comwe tapfunza na bzomwe bzidacitikira Jane na Pam?
12 Pomwe tikali maswaka, tingapfunze kufuna Yahova ndipo lufoyi lathulo lingapitirize kukula. Bzimwebzi ndibzo bzomwe bzidacitikira atsikana awiri omwe akhali ubale bwawo wakucemeredwa Jane na Pam.a Pomwe iwo adayamba kupfunza Bibliya, Jane akhana magole 11 ndipo Pam akhana magole 10. Napo kuti abereki wawo akhafuna lini kupfunza Bibliya, iwo adabvumiza Jane na Pam kuti ambapfunze Bibliya na Mboni za Yahova koma kuphampha kwa sumana acimbayenda nawo ku gereja kwawo. Jane adati: “Bzomwe ndidapfunza na Mboni za Yahova bzidandithandiza kutcenkha kuphatisa basa mankhwala yakudzungulumwisa msolo na kucita upombo ninga momwe anzangu azinji wa ku xikola akhacitira.”
13 Na kupita kwa nthawe, atsikana awiriwa adadzabatizidwa. Patsogolo pace, iwo adadzayamba kucita upainiya pomwe akhasamalira abereki wawo omwe akhadakalamba. Pakulewa bza momwe Yahova adawathandizira pa moyo wawo, Jane adalewa kuti: “Ndidapfunza kuti Yahova ambasamalira mwakukhulupirika atumiki wace ndipo pa 2 Timotio 2:19 pambalewa kuti: ‘Yahova ambadziwa wanthu wace.’” Kulewa cadidi, Yahova ambasamalira wale omwe ambasankhula kumufuna na kumutumikira!
14. Kodi tingakhotcerere tani dzina la Yahova? (Onanimbo bzithunzi-thunzi.)
14 Tikufuna kuthandizira kucenesa dzina la Yahova pa bzinthu bzentse bzomwe iye ambanamiziridwa. Tiyezezere kuti imwepo muna xamwali wanu omwe ngwakudeka mtima, wakupasa na wakulekerera. Tsono ntsiku inango, imwepo mukubva munthu akulewa kuti xamwali wanuyo ngwakuipa na wakusaya kukhulupirika. N’ciyani comwe imwepo mungacite? Imwepo mungamukhotcerere xamwali wanuyo. Mwa njira ibodzi-bodziyi, ifepano tikambabva wanthu akulewa kuipa Yahova timbamukhotcerera mwa kulewa cadidi pakulewa bza iye. (Salimo 34:1; Zaiya 43:10) Ifepano timbalatiza kuti tikufuna kutumikira Yahova na mtima wathu wentse mwa m’mafala na bzicito bzathu.
Kodi imwepo mun’dzathandizira kukhotcerera dzina la Yahova? (Onani ndime 14)b
15. Kodi ni phindu liponi lomwe Paulo adagumana thangwe ra kucinja bzinthu pa moyo wace? (Afilipi 3:7, 8)
15 Timbakhala wakukonzeka kucinja bzinthu pa moyo wathu kuti tikondwese Yahova nakuti ticitembo bzizinji pakumutumikira. Mpostolo Paulo akhana udindo bwapadzulu mu gereja ya Cidjuda. Tsono iye adabvuma kusiya bzimwebzi kuti akhale mteweri wa Kristu nakuti atumikirembo Yahova. (Agalatiya 1:14) Bzimwebzi bzidacitisa kuti iye akhale na moyo wabwino ndipo adakhalambo na mwayi wa kukatonga pabodzi na Kristu kudzulu. Iye alibe kukhumbula thangwe ra kusankhula kutumikira Yahova ndipo ifepanombo tin’dzakhumbula lini. — Werengani Afilipi 3:7, 8.
16. Kodi n’ciyani comwe tapfunza na bzomwe bzidacitikira Julia? (Onanimbo bzithunzi-thunzi.)
16 Tikawona kutumikira Yahova kukhala cinthu cakufunika kwene-kwene pa moyo wathu tin’dzakhala na moyo wabwino kuyambira tsapano mpaka kutsogolo. Onani bzomwe bzidacitikira mpfumakazi inango yakucemeredwa Julia. Pomwe iyo ikhanati kupfunza Bibliya, ikhambaimba ku gereja kwace kuyambira pomwe ikhali mwana. Pakuti iyo ikhaimba bwino idapfunzisidwa kuti ikhale muimbi wa luso. Na kupita kwa nthawe, mpfumakaziyo idakhala yakubvekera ndipo ikhambayendambo m’mbuto zakubvekera kuti ikaimbe. Pomwe iyo ikhambapfunza ku xikola yomwe ikhambapfunzisa kuimba, mwanzace m’bodzi wa ku xikolayo adayamba kumuuza bza Mulungu ndipo adamuuzambo kuti Mulungu ana dzina lomwe ni Yahova. Pomwe padandopita nthawe pang’ono, Julia adayamba kupfunza Bibliya kawiri pa sumana. Na kupita kwa nthawe, iyo idawona kuti bzikhali bwino kumala nthawe yace na mphanvu zace pakutumikira Yahova m’mbuto mwa kukhala muimbi. Kucita bzimwebzi kulibe kukhala kwakupusa. Iyo idati: “Wanthu azinji akhandiuza kuti n’kusaya nzeru kusiya kuimba kuti nditumikire Yahova, tsono inepano ndikhafunisisa kuphatisa basa moyo wangu kuti nditumikire Yahovayo.” Kodi tsapano mpfumakaziyo imbabzibva tani thangwe ra kusankhula kutumikira Yahova pambuyo pakupita magole 30? Iyo idati: “Ndina mtendere wa mu mtima ndipo nimbakhulupira kuti Yahova an’dzandipasa bzomwe mtima wangu umbafuna kutsogolo.” — Salimo 145:16.
Tikambawona kutumikira Yahova kukhala cinthu cakufunika kwene-kwene pa moyo wathu timbakhala na moyo wabwino (Onani ndime 16)c
PITIRIZANI KUTUMIKIRA YAHOVA!
17. Kudziwa kuti tikukhala kuphampha kwa dzikoli, kumbathandiza tani wale omwe asankhula kale kutumikira Mulungu na wale omwe akanati?
17 Ifepano tiri kuphampha kwa dziko lakuipali. Mpostolo Paulo adanemba kuti: “Pakuti ‘kwasala kanthawe kakucepa,’ ndipo ‘ule omwe akubwera an’fikadi ndipo an’cedwa lini.’” (Ahebereu 10:37) Kodi bzimwebzi bzin’funa kulewanyi? Bzimwebzi bzin’funa kulewa kuti nthawe yomwe yasala kuti wanthu asankhule kutumikira Yahova njing’ono-ng’ono. (1 Akolinto 7:29) Ndipo penu tasankhula kale kutumikira Mulungu timbadziwa kuti napo kuti tingafunikire kupirira mayezo, koma tin’dzandopirira mayezoyo mu “kanthawe kakucepa.”
18. Kodi Jezu na Yahova ambatilimbikisa kuti ticite ciyani?
18 Jezu alibe kundolimbikisa anyakupfunza wace kuti ayambe kumutewera koma adawalimbikisambo kuti apitirize kumutewera. (Mateu 16:24) Penu ifepano tikutumikira kale Yahova kwa magole mazinji, mbatikhaleni wakutsimikiza kupitiriza kumutumikira. Tin’funika kucita nyongo kuti tipitirize kutumikira Yahova. Napo kucita bzimwebzi kungakhale lini kwakupusa koma tingasimbidwe na kukhalambo wakukondwa napo tsapano! — Salimo 35:27.
19. Kodi ciyani comwe tapfunza na bzomwe bzidacitikira Gene?
19 Wanthu winango ambakumbuka kuti kutumikira Yahova kungawacitise kuti aluze bzinthu bzinango. Penu imwepo ndimwe tswaka, kodi mukukumbuka kuti mungaluze bzinthu bzinango thangwe ra kutumikira Yahova? M’bale munango wacitswaka wakucemeredwa Gene adalewa kuti: “Inepano ndikhawona kuti kukhala Mboni ya Yahova kungadanditazisa kupfatsa. Wana azinji omwe ndidakula nawo pabodzi akhambafuna kuyenda ku mafesta, kukhala pa umakhadzi ayai kumbacita masenzeka ya vidiyo-geime yakuipa pomwe ine ndikhambandomalira nthawe yangu ku mitsonkhano na mu utumiki.” Kodi bzimwebzi bzidacitisa kuti Gene acite ciyani? Iye adati: “Ndidayamba kumbacita bzinthu bzinango bzakuipa bzomwe maswaka manango yakhacita. Ningalewe kuti ndidapfatsa kwa kanthawe kakucepa tsono bzimwebzi bziribe kundicitisa kuti ndikhale wakukondwa. Ndidayamba kukumbukira bza phindu lomwe limbakhala liripo tikambabvera bzomwe Bibliya limbalewa ndipo ndidayambambo kuwona kuti bzikhali bwino kutumikira Yahova na mtima wangu wentse. Kucokera pa nthawe imweyire ndikuwona kuti Yahova adatawira mipembo yangu yentse.”
20. Kodi tin’funika kutsimikiza kucita ciyani?
20 Nyakunemba Salimo adaimbira Yahova kuti: “Wakukondwa ngule omwe mwamusankhula mucimubweresa pafupi na imwepo kuti akhale panja pa nyumba yanu.” (Salimo 65:4) Na tenepo, mbatikhaleni wakutsimikiza kupitiriza kutumikira Yahova ninga Djoswa ticilewa kuti: “Inepano na wa pa mui pangu tin’tumikira Yahova.” — Djoswa 24:15.
NYIMBO 28 Kukhala Xamwali wa Yahova
a Madzina manango yacinjidwa.
b BZOMWE BZIKUCITIKA PA CITHUNZI-THUNZI: Pambuyo pa mkazi munango kubva nkhani zakunama pakulewa bza gulu lathu pafupi na mbuto yakucitira mitsonkhano mikulu-mikulu, iye akufendera pomwe pana kangolo ka mabukhu ndipo akubva mafala yacadidi.
c BZOMWE BZIKUCITIKA PA CITHUNZI-THUNZI: Bzithunzi-thunzi bzakuyezezera bzikulatiza kucinja komwe Julia adacita kuti atumikire Yahova.