NKHANI YAKUPFUNZA 20
NYIMBO 7 Yahova ni Mphanvu Yathu
Yahova An’dzakutsangalazani
“Atumbizidwe . . . Baba wa ntsisi kwene-kwene na Mulungu omwe ambatsangalaza wanthu mu njira iri-yentse.” — 2 AKOLINTO 1:3.
CAKULINGA CA NKHANIYI
Mu nkhani ino, tiniwona bzomwe tingapfunze na momwe Yahova adatsangalazira Adjuda omwe akhali akapolo ku Babiloniya.
1. Kodi moyo wa Adjuda ukhali tani pomwe akhali akapolo ku Babiloniya?
NDOKUMBUKIRANI momwe Adjuda omwe akhali akapolo ku Babiloniya akhabvera. Yahova adalekerera kuti Ababiloniya apfudze mzinda wawo na kuwatenga kuti akakhale akapolo thangwe ra pikado zawo na pikado za abereki wawo. Kodi moyo wawo ukhali tani ku Babiloniya? (2 Nkhani 36:15, 16, 20, 21) N’cadidi kuti ku Babiloniya, Adjuda akhana ufulu bwa kucita bzinthu bzomwe iwo akhafuna ntsiku na ntsiku. (Jeremiya 29:4-7) Napo bziri tenepo, moyo wawo ukhali wakunesa kwene-kwene ku Babiloniyako. Ndipo bzingadakhala kuti iwo akhana ufulu bwakusankhula, angadasankhula lini kukhala ku Babiloniyako. Kodi iwo akhabzibva tani thangwe ra kukhala kumweko? Onani bzomwe m’bodzi wa iwo adalewa. Iye adati: “Pomwe tikhadakhala pafupi na mikulo ya ku Babiloniya, ifepano tidalira kwene-kwene pomwe tidakumbukira Ziyoni.” (Salimo 137:1) Adjudawo akhadasunama kwene-kwene ndipo akhafunikira kutsangalazidwa. Tsono n’kuponi komwe iwo angadagumana mtsangalazo?
2-3. (a) N’ciyani comwe Yahova adacita kuti athandize Adjuda omwe akhali ku Babiloniya? (b) Kodi tin’pfunza ciyani mu nkhani ino?
2 Yahova ni “Mulungu omwe ambatsangalaza” wanthu. (2 Akolinto 1:3) Yahova ambawafuna kwene-kwene atumiki wace, ndipopa iye ambakomedwa kutsangalaza wentse omwe akufuna kukhala naye pa uxamwali. Yahova akhadziwa kuti Adjuda winango omwe akhali ku Babiloniya angadazindikira kuphonya kwawo ndipo angadacinja acimutumikira mu njira yomwe iye ambakomedwa nayo. (Zaiya 59:20) Ndipopa iye adafulizira mprofeta Zaiya kuti anembere Adjudawo bukhu lomwe limbadziwika na dzina lace pomwe pakhadasala magole yakupitirira 100 kuti iwo ayendesedwe ku ukapolo ku Babiloniya. Tsono thangwe ranyi Yahova adacita bzimwebzi? Zaiya adalewa kuti: “‘Tsangalazani, tsangalazani wanthu wangu,’ walewa tenepo Mulungu wanu.” (Zaiya 40:1) Yahova adaphatisa basa maprofesiya yomwe Zaiya adanemba kuti atsangalaze Adjuda omwe adadzakhala akapolo.
3 Ninga Adjuda wale, ifepano nthawe zinango timbafunikirambo kutsangalazidwa. Mu nkhani ino, tiniwona njira zitatu zomwe Yahova adaziphatisa basa kuti atsangalaze Adjuda: (1) Iye adapicira kuti angadalekerera wale omwe angadakungula, (2) adapasa cidikhiro wanthu wace ndipo (3) adawathandiza kuti aleke kucita mantha. Pomwe tikucezerana njira zitatuzi, onani momwe ifepanombo tingagumanire phindu na mafala ya Yahovaya.
YAHOVA NGWANTSISI NDIPO AMBATILEKERERA
4. Kodi Yahova adalatiza tani kuti ni Mulungu wantsisi? (Zaiya 55:7)
4 Yahova ni “Baba wa ntsisi kwene-kwene.” (2 Akolinto 1:3) Iye adalatiza ntsisi pomwe adapicira kulekerera Adjuda omwe angadakungula. (Werengani Zaiya 55:7.) Iye adalewa kuti: “Na lufoyi lacadidi lakusaya kumala, nin’dzakubvera ntsisi.” (Zaiya 54:8) Kodi Yahova adalatiza tani kuti ngwantsisi? Napo kuti Adjuda akhagumana na mabvuto thangwe ra bzinthu bzomwe iwo adacita, Yahova adapicira kuti Adjudawo angadakhala lini ku Babiloniya mpaka kale-kale. Na kupita kwa nthawe, iwo angadacoka ku Babiloniyako. (Zaiya 40:2) Kulewa cadidi, mafala ya Zaiyaya yadatsangalaza Adjuda omwe akhadakungula!
5. Thangwe ranyi ifepano tingakhale na citsimikizo cakuposa Adjuda cakuti Yahova ambalekerera pikado zathu?
5 Kodi tikupfunza ciyani? Yahova ngwakukonzeka kulekerera atumiki wace na mtima wentse. Ndipo ntsiku zino, ifepano tina mathangwe mazinji kuti titende kulekerera kwa Yahova. Thangwe ranyi? Thangwe timbakwanisa kubvesesa thangwe lomwe limbacitisa Yahova kulekerera pikado zathu. Magole mazinji pambuyo pa Zaiya kunemba profesiya yace, Yahova adatumiza Mwana wace wakufunidwa pa dziko la pantsi kuti adzapereke moyo wace ninga cakulombolera kwa wanthu wentse omwe an’kungula. Thangwe ra bzomwe Jezu adacitabzi, Yahova ‘angapfudze’ ayai kutilekerera na mtima wentse. (Mabasa 3:19; Zaiya 1:18; Aefezo 1:7) Kulewa cadidi, timbatumikira Mulungu omwe ngwantsisi kwene-kwene!
6. Kodi kukumbukira bza ntsisi za Yahova kumbatipasa citsimikizo ciponi? (Onanimbo cithunzi-thunzi.)
6 Penu imwepo mukubzipasa mulandu thangwe ra pikado yomwe mudacita m’mbuyo, mafala yomwe Yahova adafulizira Zaiya yomwe yali pa Zaiya 55:7 yangakutsangalazeni. Winango wa ifepano timbabzipasa mulandu thangwe ra pikado yomwe tidacita m’mbuyo napo kuti tidakungula, maka-maka tikakhala tikugumana na mabvuto thangwe ra pikado yathuyo. Tsono penu imwepo mudazimbula kale pikado yanuyo ndipo mudasiya kucita bzinthu bzakuipa mungakhale na citsimikizo cakuti Yahova adakulekererani. Yahova akalekerera iye ambasankhula kuleka kuikumbukira pomwe pikadoyo. (Ndendemezerani na Jeremiya 31:34.) Tsono penu Yahova ambakumbukira lini pikado zomwe tidacita m’mbuyo, ifepano tin’funikambo lini kuzikumbukira. Kwa Yahova bzakufunika kwene-kwene ni bzomwe tikucita tsapano sikuti pikado zomwe tidacita m’mbuyo. (Ezekiyeli 33:14-16) Ndipo tsapanopali Baba wathu omwe ngwantsisi kwene-kwene an’dzacosa mabvuto yentse yomwe ifepano timbagumana nayo thangwe ra pikado zomwe tidacita m’mbuyo.
Bzakufunika kwa Yahova ni pikado lini zomwe tidacita m’mbuyo koma bzomwe tikucita tsapano (Onani ndime 6)
7. N’ciyani comwe cingatithandize kukumbira thandizo akulu tikacita pikado ikulu?
7 N’ciyani comwe tingacite penu tidasunama ndipo cikumbu-mtima cathu cikutinesa thangwe rakuti tikubisa pikado ikulu? Bibliya limbalewa kuti tin’funika kukumbira thandizo kwa akulu. (Tiyago 5:14, 15) N’cadidi kuti bzingakhale bzakunesa kuwauza bzomwe ifepano tidacita. Koma cinthu comwe cingatithandize n’kukumbukira kuti Yahova adaikha amuna amwewa kuti atithandize nakuti iwo an’dzatilatiza lufoyi na ntsisi ninga momwe Yahova ambacitira. Tikakumbukira bzimwebzi ticikungula bzin’dzakhala bzakupusa kufotokozera akulu. Mbatiwoneni ciratizo ca m’bale munango wakucemeredwa Arthur.a Cikumbu-mtima cace cikhamunesa thangwe ra pikado yomwe akhadacita, tsono iye adatsangalazidwa na ntsisi za Yahova. Iye adati: “Ndidawona pornografia kwa pafupi-fupi gole libodzi. Tsono pambuyo pa kutetekera nkhani yomwe ikhalewa bza cikumbu-mtima, ndidauza mkazangu pabodzi na akulu bzomwe ndikhadacita. Pomwe ndidacita bzimwebzo, ndidabzibva bwino. Tsono ndikhapitiriza kubzipasa mulandu pa bzomwe ndikhadacitabzo. Akulu adandikumbusa kuti Yahova akadafuna kukhala xamwali wangu. Iye adandilanga thangwe rakuti ambandifuna. Mafala yomwe akuluwo adalewa yadandilimbikisa kwene-kwene ndipo yadandithandiza kuwona kuti Yahova akhadandilekereradi.” Tsapano, Arthur akutumikira ninga mpainiya ndipo ni m’mtumiki wakuthandiza. Mpsabwino kwene-kwene kudziwa kuti Yahova ambatilekerera tikakungula!
YAHOVA AMBATIPASA CIDIKHIRO
8. (a) Kodi n’cidikhiro ciponi comwe Yahova adapasa Adjuda? (b) Mwakubverana na Zaiya 40:29-31, kodi cidikhiroco cidathandiza tani Adjuda?
8 Mu kawonedwe ka wanthu, bzikhawoneka ninga kuti Adjuda angadakwanisa lini pomwe kubwerera ku mui kwawo. Ababiloniya akhatsudzula lini akapolo wawo. (Zaiya 14:17) Tsono Yahova adapasa cidikhiro wanthu wace. Iye adawapicira kuti angadawatsudzula ndipo pakhalibe comwe cingadamutazisa kucita bzimwebzi. (Zaiya 44:26; 55:12) Kwa Yahova mzinda wa Babiloniya ukhali ninga pfumbi. (Zaiya 40:15) Mwa kundolifuliza pang’ono pfumbiro lingadamaliratu. Kodi cidikhiro cimweci cidathandiza tani Adjuda? Ico cidawatsangalaza. M’mbuto mwa kundowatsangalaza basi, cidikhiroco cidawathandizambo mu njira inango. Zaiya adanemba kuti: “Wale omwe an’dikhirira Yahova, an’dzakhala pomwe na mphanvu.” (Werengani Zaiya 40:29-31.) Cidikhiro cidacitisa kuti Adjuda akhale na mphanvu. Iwo adabzibva ninga ‘akumbuluka ninga ana matenga ya mphungu.’
9. Kodi ni mathangwe yaponi yomwe Adjuda akhanayo yakukhulupira Yahova?
9 Yahova adapasambo Adjuda wale mathangwe yakuti akhulupire mapiciro yace. Mwa njira iponi? Kumbukirani bza mapiciro yomwe Adjuda akhadayawona kale yakukwanisika. Iwo akhadawona kale Asiriya akukunda utongi bwa ku norte bwa Jirayeri na kutenga wanthu aciyenda nawo ku ukapolo. (Zaiya 8:4) Iwo adawonambo Ababiloniya akuwatenga aciyenda nawo ku ukapolo pambuyo pakupfudza mzinda wa Jeruzalemu. (Zaiya 39:5-7) Ndipo iwo adawonambo pomwe mambo wa ku Babiloniya adacitisa kuti Mambo Zedekiya akhale zimola mwa kumudzonga maso yace na kumuyendesa ku ukapolo. (Jeremiya 39:7; Ezekiyeli 12:12, 13) Bzentse bzidacitika ninga momwe Yahova akhadalewera. (Zaiya 42:9; 46:10) Kukumbukira bzentsenebzi kudalimbisa cikhulupiro ca Adjuda cakuti bzomwe Yahova akhadawapicira bzingadakwanisikambo!
10. N’ciyani comwe cingatithandize kupitiriza kukhala na cidikhiro mu ntsiku zakumalizira zino?
10 Kodi tikupfunza ciyani? Tikasunama, cidikhiro cingatitsangalaze na kutithandiza kukhala pomwe na mphanvu. Ifepano tikukhala mu ntsiku zakunesa ndipo tina anyamadulanthaka wa mphanvu. Tsono tileke kugopa, thangwe Yahova adatipasa cidikhiro cabwino ca moyo wakusaya kumala wa mtendere na mkhomeko. Tin’funika kumbakumbukira kwene-kwene bza cidikhiroco. Tikasaya kucita bzimwebzi, cidikhiro cathu cin’dzandendemerana na mbuto yakudeka yomwe tingaiwone ninga kuti idaipa thangwe tikuiwona na pa janera yomwe idapswipa. Kodi “tingapukute tani janera” ayai kulimbisa cidikhiro cathu? Tingambapambule nthawe kuti tikumbukire momwe moyo un’dzakhalira wabwino kwene-kwene m’dziko lipsa. Tingambawerenge nkhani, kuwona vidiyo na kubvesera nyimbo zomwe zimbalewa bza cidikhiro cathu. Ndipo tingamuuzembo Yahova bza mapiciro yomwe tikufunisisa kudzayawona yakukwanisika.
11. Kodi n’ciyani comwe cimbathandiza mpfumakazi yakucemeredwa Joy kukhala na mphanvu?
11 Onani momwe cidikhiro cidalimbisira na kupasira mphanvu mpfumakazi yakucemeredwa Joy, yomwe ina bvuto la thanzi. Iyo idati: “Mabvuto yakandiwandira, nimbamuuza Yahova momwe ndikubvera, ndipo ndikudziwa kuti iye ambandibvesesa. Pa nthawe imweyi, nimbabzibva kuti Yahova akundipasa ‘mphanvu yakuposa yacibadwa.’” (2 Akolinto 4:7) Mpfumakazi Joy imbakumbukirambo momwe moyo wace un’dzakhalira m’dziko lipsa, pomwe “palibe munthu omwe an’dzakhala m’dzikomo an’dzalewa kuti: ‘Ndikuduwala.’” (Zaiya 33:24) Ifepano tingakhalembo na mphanvu tikapemba kwa Yahova ticimbakumbukira bza cidikhiro cathu.
12. Kodi ni mathangwe yaponi yomwe tinayo yakukhulupira mapiciro ya Yahova? (Onanimbo cithunzi-thunzi.)
12 Ninga momwe Yahova adacitira na Adjuda, iye ambatipasambo mathangwe mazinji yomwe yambaticitisa kukhulupira mapiciro yace. Kumbukirani bza maprofesiya yomwe yakukwanisika ntsiku zino. Tikukwanisa kuwona utongi bwa mphanvu bwa pa dziko lentse bomwe ‘n’bwakulimba ndipo pa nthawe ibodzi-bodziyo n’bwakusaya kulimba.’ (Daniyeli 2:42, 43) Timbabvambo nkhani zakulewa bza “bziteke-teke ku mbuto zakusiyana-siyana,” ndipo timbapalizira wanthu wa “mitundu yentse.” (Mateu 24:7, 14) Maprofesiya yamweya pabodzi na manango yambalimbisa cikhulupiro cathu cakuti mapiciro ya Yahova yan’dzakwanisika.
Maprofesiya yomwe yakukwanisika ntsiku zino yakutipasa mathangwe yakukhulupira mapiciro ya Yahova (Onani ndime 12)
YAHOVA AMBATITHANDIZA KUTI TILEKE KUCITA MANTHA
13. (a) Kodi ni mabvuto yaponi yomwe Adjuda angadagumana nayo pomwe akhanati kutsudzulidwa? (b) Mwakubverana na Zaiya 41:10-13, kodi Yahova adatsangalaza tani Adjuda?
13 Napo kuti Yahova adatsangalaza Adjuda na cidikhiro cabwino, iye akhadziwa kuti angadagumana na mabvuto pakucoka ku Babiloniyako. Yahova akhadziwa kuti kuphampha kwa ukapolo bwawo, mambo munango angadadzacita nkhondo na mitundu yomwe ikhali pafupi na Babiloniya ndipo pakumalizira angadadzacita nkhondo na mzinda wa Babiloniyayo. (Zaiya 41:2-5) Kodi Adjuda akhafunikira kucita thupo? Ne, thangwe Yahova akhadatsangalaza kale wanthu wace mwakuwauza kuti: “Leka kugopa, pakuti ndinawe. Leka kukhala na thupo, thangwe ine ndine Mulungu wako.” (Werengani Zaiya 41:10-13.) Kodi Yahova akhathandauza ciyani pomwe adalewa kuti “ine ndine Mulungu wako”? Iye akhakumbusa lini Adjuda kuti akhafunika kumunamata thangwe iwo akhadziwa kale bzimwebzo. Pamwepa Yahova akhakumbusa Adjuda kuti iye akhali ku mbali yawo. — Salimo 118:6.
14. Kodi n’ciyani comwe Yahova adacita kuti athandize Adjuda kuti aleke kucita mantha?
14 Yahova adatsangalazambo Adjuda omwe akhana mantha mwa kuwakumbusa bza mphanvu na nzeru zakusaya malire zomwe iye anazo. Iye adakumbira Adjuda kuti anyang’anisise kudzulu komwe kuna nyenyezi. Iye adawauza kuti kuthumizira pakulenga nyenyezi, iye ambadziwa madzina ya nyenyezi iri-yentse. (Zaiya 40:25-28) Penu Yahova ambadziwa madzina ya nyenyezi zentse, bzimwebzi bzikulatiza kuti iye ambadziwambo madzina ya atumiki wace wentse! Penu Yahova adakwanisa kulenga nyenyezi, iye angakwanisembo kuthandiza atumiki wace. Kulewa cadidi, Adjuda wale akhalibe mathangwe yakukhalira na thupo ayai mantha.
15. Kodi Yahova adakonzekeresa tani Adjuda pa bzomwe angadagumana nabzo kutsogolo?
15 Yahova adauzambo wanthu wace bzinthu bzomwe bzingadadzacitika kutsogolo. Mbali yakuyambirira m’bukhu la Zaiya, Yahova adauza wanthu wace kuti: “Ndokoni mukapite m’bzipinda bzanu bza mkati mucikafunga misuwo. Mukabisale kwa kanthawe mpaka ukali butapita.” (Zaiya 26:20) Pinango mafala yamweya yadakwanisika kakuyamba pomwe mzinda wa Babiloniya udakundidwa na Mambo Siro. Nyakunemba nkhani munango wa Cigerego, adalewa kuti: “Pomwe Siro adapita mu mzinda wa Babiloniya, iye adapereka lamulo kwa acikunda wace kuti akhafunika kupha wanthu wentse omwe angadawagumana panja.” Pinango wanthu omwe akhakhala ku Babiloniya adabva mantha kwene-kwene pomwe adadziwa bzimwebzi! Koma Adjuda adapulumuka thangwe adabvera malango ya Yahova.
16. Thangwe ranyi tin’funika lini kucita thupo na bzinthu bzomwe bzin’dzacitika kutsogoloku? (Onanimbo cithunzi-thunzi.)
16 Kodi tikupfunza ciyani? Kutsogoloku tin’gumana na citsautso cikulu comwe cikanati kucitika kale. Ico cikadzayamba wanthu m’dzikoli an’dzacita mantha ndipo an’dzasaya bzakucita. Koma wanthu wa Yahova an’dzacita lini mantha. Thangwe tikudziwa kuti Yahova ni Mulungu wathu. Ifepano tin’dzapitiriza kukhala wakukhulupirika thangwe tin’dzadziwa kuti “cipulumuso [cathu] cafendera.” (Luka 21:28) Napo kuti ciphatano ca mitundu ya wanthu cin’dzafuna kutipha, ifepano tin’dzakhala wakulimba ticipitiriza kuthemba Yahova. Yahova an’dzaphatisa basa anjo kuti atikhotcerere ndipo an’dzatipasambo malango yomwe yan’dzapulumusa moyo wathu. Kodi tin’dzayatambira tani malangoyo? Tin’dzabziwona pa nthaweyo. Pinango-pentse tingadzatambire malangoyo kucokera m’gwere. Pinango magwereyo yan’dzakhala ninga “bzipinda bza mkati” momwe tin’dzakhala wakukhotcerereka. Kodi tingakonzekere tani pomwe tikudikhirira kuti bzimwebzi bzicitike? Tin’funika kukhala wakubverana na abale na mpfumakazi zathu, kubvera malango yomwe timbatambira mu gulu la Yahova na kukhulupira na mtima wentse kuti Yahova akutsogolera gulu lace. — Ahebereu 10:24, 25; 13:17.
Kukhulupira kuti Yahova ana mphanvu ya kutipulumusa kun’dzatithandiza kuti tileke kudzacita thupo pa citsautso cikulu (Onani ndime 16)b
17. Kodi n’ciyani comwe imwepo mungacite kuti Yahova akutsangalazeni?
17 Napo kuti moyo ukhali wakunesa kwa Adjuda pomwe akhali ku Babiloniya, Yahova adawapasa mtsangalazo omwe iwo akhafunikira. Ndipo iye an’dzacitambo bzibodzi-bodzibzi na ifepano. Ndipopa, bziribe basa bzomwe bzicitike kutsogoloku. Pitirizani kuthawira kwa Yahova kuti akutsangalazeni. Thembani ntsisi zace. Pitirizani kulimbisa cidikhiro canu. Ndipo kumbukirani kuti mun’funika lini kucita mantha thangwe Yahova ni Mulungu wanu.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
a Madzina yanango yacinjidwa.
b BZOMWE BZIKUCITIKA PA CITHUNZI-THUNZI: Kagrupo ka abale katsonkhana pabodzi. Ndipo iwo ana citsimikizo centse cakuti Yahova ana mphanvu yakukhotcerera wanthu wace bziribe basa komwe iwo ambakhala.