Konzekeresani Mtima Wanu

Tikakhala tikupfunza Bibliya, tin’funika kucita ciri-centse kuti tibvesese makumbukidwe ya Yahova. Ezara adapereka ciratizo cabwino pa nkhani imweyi. Iye “akhadakonzekeresa mtima wace kuti apfunze Cakutonga ca Yahova.” (Ezara 7:10) Kodi tingakonzekerese tani mtima wathu?

Mpembo. Mbacitani mpembo mukanati kuyamba kupfunza. Kumbirani Yahova kuti akuthandizeni kubvesesa na kuphatisa basa bzomwe mukupfunza. — Salimo 119:18, 34.

Khalani wakubzicepesa. Mulungu ambabisira cadidi wanthu wakubzikuza omwe ambathemba nzeru zawo. (Luka 10:21) Mbatcenkhani kupfunza na cakulinga cakufuna kubziwonesera kuti mumbadziwa bzinthu. Pomwe tikupfunza, tikazindikira kuti pana bzinthu bzomwe tin’funika kucinja, tikhale wakubzicepesa ticicinja bzinthubzo.

Mbabveserani nyimbo za Umambo. Nyimbo zina mphanvu yakukonzekeresa mtima wathu pomwe tikufuna kunamata Yahova. Kubvesera nyimbo za Umambo pomwe mukanati kuyamba kupfunza, kungakuthandizeni kukonzekeresa mtima wanu.