Momwe Yahova Ambatithandizira Kupirira

1. Thangwe ranyi wanthu wa Yahova an’funika kupirira, ndipo ni thandizo liponi lomwe tinalo? (1 Pedru 5:10)

MU NTSIKU zakunesa na zakumalizira zino, wanthu wa Yahova an’funika kupirira. Winango akubonera na matenda kwa nthawe itali, winango akubonera thangwe ra kufedwa munthu omwe ambamufuna ndipo winango akutsutsidwa na adzinza wawo ayai na boma. (Mateu 10:18, 36, 37) Tsono napo bziri tenepo, khalani na citsimikizo cakuti bziribe basa mabvuto yomwe mukugumana nayo, Yahova angakuthandizeni kupirira. — Werengani 1 Pedru 5:10.

2. Mbani omwe ambatithandiza kuti tikwanise kupirira?

² Kupirira kumbathandauza kupitiriza kukhala wakukhulupirika kwa Yahova na kumutumikira mwakukondwa napo kuti tikugumana na mabvuto, kuzunzidwa ayai kuyezedwa kuti ticite pikado. Kuti tipirire tin’funika kukhulupirambo kuti bzinthu bzin’dzakhala bwino. Ifepano timbakwanisa lini kupirira thangwe ra mphanvu zathu, m’mbuto mwace Yahova ndiye omwe ambatithandiza kupirira na kutipasa “mphanvu yakuposa yacibadwa.” (2 Akolinto 4:7) Mu nkhani ino, tin’cezerana bzinthu bzinai bzomwe Yahova adatipasa kuti atithandize kupirira. Ndipo tin’cezeranambo momwe tingagumanire phindu na bzinthu bzimwebzi.

MPEMBO

3. Thangwe ranyi mpembo ni cinthu cakudabwisa?

³ Yahova adatipasa cinthu cakudabwisa kwene-kwene comwe cingatithandize kupirira. Iye adacitisa kuti bzikhale bzakukwanisika kuti timbalewelewe naye napo kuti ndife wanthu wakuperewera. (Ahebereu 4:16) Kumbukirani ibzi: Ifepano tingapembe kwa Yahova pa nthawe iri-yentse ndipo tingamuuze nkhani iri-yentse. Iye angatitetekere mu cirewedwe ciri-centse na ku mbuto iri-yentse napo ticikhala tiri patekha ayai m’kawoko. (Djona 2:1, 2; Mabasa 16:25, 26) Ifepano tikacita thupo kwene-kwene ticitazira kudziwa bzomwe tingamuuze, Yahovayo ambadziwa bzomwe tikhafuna kumuuzabzo. (Aroma 8:26, 27) Kulewa cadidi, mpembo ni cinthu cakudabwisa!

4. Thangwe ranyi tingalewe kuti mipembo yathu yakukumbira kuti tipirire njakubverana na kufuna kwa Yahova?

⁴ Yahova ambatitsimikizira mu Fala lace kuti “bziribe basa bzomwe tikumbirebzo, tikakumbira mwakubverana na kufuna kwace, iye an’dzatibva.” (1 Juwau 5:14) Kodi ifepano tingakumbire thandizo la Yahova kuti tipirire? Inde tingakumbire! Kucita bzimwebzi kumbabverana na kufuna kwace. Thangwe ranyi tingalewe tenepoyo? Thangwe tikapirira pa mabvuto bzimbacitisa kuti Yahova atawire nyamadulanthaka wace Sathani Dyabu. (Mimwani 27:11) Kuthumizira bzimwebzi, Bibliya limbalewa kuti Yahova akufunisisa “[kulatiza] mphanvu zace kwa wale omwe mtima wawo ngwakusaya kugawanika.” (2 Nkhani 16:9) Na tenepo, tingakhale na citsimikizo cakuti Yahova ana mphanvu ndipo akufunisisa kutithandiza kupirira. — Zaiya 30:18; 41:10; Luka 11:13.

5. Kodi mpembo ungatithandize tani kukhala na mtendere? (Zaiya 26:3)

⁵ Bibliya limbalewa kuti mukambapemba kwa Yahova, “Mulungu an’dzakupasani mtendere wace omwe wanthu angaubvesese lini, ndipo mwa njira imweyi, Mulunguyo an’dzakhotcerera mitima [yathu] pabodzi na makumbukidwe [yathu].” (Afilipi 4:7) Timbatenda kwene-kwene bzimwebzi. Wanthu omwe ambatumikira lini Yahova ambagumanambo na mabvuto. Azinji wa iwo ambayezera kucita bzinthu bzakusiyana-siyana kuti akhale wakugwa mpfuwa ayai kuti ayebwe mabvuto yawo. Wanthu winango ambacita masenzeka ya m’makumbukidwe na cakulinga cakuti ayebwe bzomwe akukumbuka. Tsono iwo akacita bzimwebzi angacitise kuti makumbukidwe yawoyo yaphatisidwe basa na madimonyo. (Ndendemezerani na Mateu 12:43-45.) Napo kuti wanthu amwewa angabzibve bwino pambuyo pakucita bzimwebzi, iwo ambagumana lini mtendere wacadidi omwe umbacokera kwa Yahova omwe ngwabwino kwene-kwene. Tikambapemba kwa Yahova, timbalatiza kuti timbamuthemba na mtima wentse ndipo iye an’dzatipasa “mtendere wakusaya kumala.” (Werengani Zaiya 26:3.) Njira ibodzi yomwe Yahova ambacitira bzimwebzi ndiyo kutithandiza kukumbukira cadidi comwe cimbatitsangalaza comwe timbaciwerenga m’Fala lace. Cadidi cimweci cimbatsangalaza makumbukidwe yathu na mtima wathu thangwe timbadziwa kuti Yahova ambacita nafe thupo ndipo akufuna kuti bzinthu bzitifambire bwino. — Salimo 62:1, 2.

6. Kodi mungaphatise tani basa bwino mphaso ya mpembo? (Onanimbo cithunzi-thunzi.)

⁶ Bzomwe mungacite. Mukakhala mukugumana na mabvuto, muuzeni Yahova momwe mukubvera ‘perekani thupo lanu kwa Yahova’ ndipo mukumbireni kuti akupaseni mtendere wace. (Salimo 55:22) Ndipo mukumbirenimbo kuti akupaseni nzeru kuti mukwanise kulimbana na mabvuto yanu. (Mimwani 2:10, 11) Ndipo lekani kumbayebwa kumutenda m’mipembo yanu. (Afilipi 4:6) Kumbukirani bzinthu bzomwe bzikulatiza kuti Yahova akukuthandizani pa mabvuto yanu ndipo mutendeni thangwe ra thandizo na bzinthu bzabwino bzomwe ambakupasani. Lekani kulekerera kuti mabvuto yanu yakutaziseni kuwona bzisimbo bzomwe Yahova adakupasani kale. — Salimo 16:5, 6.

FALA LA MULUNGU

7. Kodi kupfunza Bibliya kungatithandize tani kupirira?

⁷ Yahova adatipasa Fala lace kuti litithandize kupirira. M’Bibliya muna nkhani zizinji zomwe zimbatitsimikizira kuti Yahova angatithandize. Onani ciratizoci. Mateu 6:8 ambati: “Baba wanu wakudzulu ambadziwa bzomwe mun’funikira, napo pomwe mukanati kumukumbira.” Jezu ndiye omwe adalewa mafala yamweya ndipo iye ambamudziwa bwino Yahova kuposa munthu ali-wentse. Na tenepo, tingakhale na citsimikizo centse cakuti penu tikugumana na mabvuto, Yahova ambadziwa bzomwe tikufunikira ndipo an’dzatithandiza. M’Bibliya muna mapiciro mazinji yabwino ya Yahova yomwe yangatipase mphanvu zomwe tikufunikira kuti tikwanise kupirira mabvuto yomwe tikugumana nayo. — Salimo 94:19.

8. (a) Lewani vesi libodzi la m’Bibliya lomwe lingatithandize kupirira. (b) N’ciyani comwe cingatithandize kukumbukira mitemo ya m’Bibliya pomwe tikufuna kuiphatisa basa?

⁸ Mitemo ya m’Bibliya ingatithandize kupirira. Mitemo imweyi ingatipase nzeru zomwe tikufunikira kuti ticite bzinthu bzabwino. (Mimwani 2:6, 7) Bibliya limbatiuza kuti tin’funika lini kucita thupo na bzinthu bzomwe bzin’dzacitika kutsogolo, m’mbuto mwace tin’funika kuthemba Yahova ntsiku iri-yentse. (Mateu 6:34) Tikambawerenga Bibliya ntsiku zentse na kumbakumbukira bzomwe tawerengabzo, bzin’dzakhala bzakupusa kukumbukira mitemo ya m’Bibliya pomwe tikufuna kusankhula kucita cinthu ayai tikafuna kudziwa momwe tingapiririre bvuto lomwe tikugumana nalo.

9. Kodi nkhani za m’Bibliya zingatithandize tani kuthemba thandizo la Yahova?

⁹ M’Bibliya muna bziratizo bza wanthu ninga ifepano omwe adathemba Yahova ndipo adathandizidwa na iye. (Ahebereu 11:32-34; Tiyago 5:17) Tikambakumbukira bziratizo bzimwebzi, ifepano timbathumizira cikhulupiro cathu cakuti Yahova ni “mbuto yathu yakuthawira na mphanvu yathu, ni thandizo lomwe timbaligumana mwakusaya kunesa pa nthawe za mabvuto.” (Salimo 46:1) Ndipo tikambakumbukira momwe atumiki wa Yahova adalatizira cikhulupiro cawo kwa iye na kupitiriza kumutumikira pa nthawe zakunesa bzimwebzi bzimbaticitisa kuti ticitembo bzibodzi-bodzibzo. — Tiyago 5:10, 11.

10. Kodi imwepo mungaphatise tani basa bwino Fala la Mulungu?

¹⁰ Bzomwe mungacite. Mbawerengani Bibliya ntsiku zentse ndipo mbakonzani lista ya mavesi yomwe mukuwona kuti yambakuthandizani. Azinji ambawerenga vesi na mafala ya mu bukhu lakuti Kupfunza Mavesi Ntsiku na Ntsiku ku macibese. Bzimwebzi bzimbacitisa kuti iwo akhale na makumbukidwe ya m’Bibliya ntsiku yentse. Mpfumakazi yakucemeredwa Mariea idazindikira kuti bzimwebzi bzikhali bzacadidi pomwe abereki wace adauzidwa kuti akhana matenda ya kankro. Kodi n’ciyani comwe cidaithandiza kupirira pomwe akhawasamalira kuphampha kwa minyezi yawo yakumalizira? Iyo idati: “Macibese yali-yentse ndikhambawerenga vesi la mu bukhu lakuti Kupfunza Mavesi Ntsiku na Ntsiku ndipo ndikhambakumbukira bzomwe ndawerengabzo. Bzimwebzi bzidandithandiza kumbakumbukira Yahova ntsiku zentse na bzinthu bzabwino bzomwe iye ambatipfunzisa m’Fala lace m’mbuto mwa kumbakumbukira mabvuto yomwe inepano ndikhanayo.” — Salimo 61:2.

ABALE WATHU WACIKRISTAU

11. Thangwe ranyi mpsakulimbisa kudziwa kuti tiri lini tekha pomwe tikugumana na mabvuto?

¹¹ Yahova adatipasa abale na mpfumakazi wa pa dziko lentse la pantsi kuti ambatithandize kupirira. Kudziwa kuti “abale [wathu] pa dziko lentse la pantsi, akugumanambo na mabvuto mabodzi-bodziya” kumbatitsimikizira kuti tiri lini tekha. (1 Pedru 5:9) Kulewa cadidi, ifepano tingatsimikize kuti bziribe basa mabvuto yomwe tingagumane nayo, wanthu winango omwe adagumanambo na mabvuto mabodzi-bodziya adapirira. Bzimwebzi bzikuthandauza kuti ifepanombo tingakwanise kupirira! — Mabasa 14:22.

12. Kodi abale wacikristau angatithandize tani, ndipo ifepano tingawathandizembo tani? (2 Akolinto 1:3, 4)

¹² Abale na mpfumakazi zathu angatithandize kupirira na bzomwe ambalewa na kuticitira. Mpostolo Paulo adakwanisa kuwona kuti bzimwebzi mpsacadidi. Iye adalatiza kutenda kwace wale omwe adamuthandiza pomwe akhali m’kawoko mwakucita kumbawaguma madzina yawo m’matsamba yomwe iye akhayanemba. Iwo adamutsangalaza, kumulimbikisa na kumupasa bzomwe iye akhafunikira. (Afilipi 2:25, 29, 30; Akolose 4:10, 11) Bzimwebzi bzingaticitikirembo ntsiku zino. Tikafunikira thandizo, abale na mpfumakazi zathu mbakukonzeka kutithandiza; ndipo iwo akafunikirambo thandizo ndife wakukonzeka kuwathandiza. — Werengani 2 Akolinto 1:3, 4.

13. N’ciyani cidathandiza mpfumakazi Maya kupirira?

¹³ Mu gole la 2020, mapolisiya ya ku Rússia mwadzidzi yadapita m’nyumba ya mpfumakazi yakucemeredwa Maya ndipo yadayamba kufufudza bzinthu m’nyumbamo. Na tenepo, iyo idafunikira kuyenda ku nyumba ya mphala kuti ikafotokoze bza cikhulupiro cace. Mpfumakazi Maya idalewa kuti abale na mpfumakazi adaithandiza kwene-kwene pa nthawe yakunesa ire. Iyo idati: “Pa nthawe imweyire inepano ndikhadaneta, ndikhacita thupo ndipo ndikhadasunama, tsono abale na mpfumakazi akhambandiligaliri ndipo winango akhambandinembera mensaje na matsamba. Iwo adanditsimikizira kuti ambandifuna kwene-kwene. Inepano ndikhadziwa kale kuti abale na mpfumakazi ambandifuna ndipo ni banja langu. Tsono kuyambira mu 2020, inepano ndidatsimikiziriratu bzimwebzi.”

14. N’ciyani comwe tingacite kuti tigumane phindu na abale na mpfumakazi? (Onanimbo cithunzi-thunzi.)

¹⁴ Bzomwe mungacite. Pomwe mukupirira mabvuto, mpsabwino kwene-kwene kumbaceza na abale na mpfumakazi na kumbamala nthawe muli pabodzi na iwo. Lekani kumbazeza kukumbira thandizo akulu wa gwere. Iwo angakhale “mbuto yakuthawira conzi na mbuto yakubisalikira nvula yamphanvu.” (Zaiya 32:2) Ndipo kumbukiranimbo kuti abale na mpfumakazi zanu akugumanambo na mabvuto. Imwepo mukacitira cinthu munthu munango omwe akufunikira mwa kudeka mtima, mun’dzakhala wakukondwa ndipo bzimwebzi bzin’dzakuthandizani kupirira mabvuto yanu. — Mabasa 20:35.

CIDIKHIRO CATHU

15. Kodi cidikhiro cidathandiza tani Jezu, ndipo cingatithandizembo tani? (Ahebereu 12:2)

¹⁵ Yahova adatipasa cidikhiro kuti atithandize kupirira. (Aroma 15:13) Kumbukirani momwe cidikhiro cidathandizira Jezu kupirira pa ntsiku yakunesa kwene-kwene pa moyo wace pa dziko la pantsi. (Werengani Ahebereu 12:2.) Jezu akhadziwa kuti kukhulupirika kwace kungadacitisa kuti dzina la Yahova licenesedwe. Jezu akhafunisisa kukagumana pomwe na Baba wace ndipo na kupita kwa nthawe acidzatumikirambo na abale wace mu Umambo bwakudzulu. Mwa njira ibodzi-bodziyi, cidikhiro cathu cakudzakhala na moyo mu dziko lipsa cimbatithandiza kupirira mabvuto yali-yentse yomwe timbagumana nayo mu dziko la Sathaniri.

16. Kodi cidikhiro cimbathandiza tani mpfumakazi inango kupirira, ndipo n’ciyani comwe mungapfunze na bzomwe iyo idalewa?

¹⁶ Onani momwe cidikhiro ca kudzakhala mu dziko lipsa cidathandizira mpfumakazi inango ya ku Rússia yakucemeredwa Alla. Bayace adamangidwa ndipo adaikhidwa m’kawoko pomwe akhadikhirira kutongedwa mulandu wace. Pomwe bzimwebzi bzidacitika, mpfumakazi Alla idati: “Inepano nimbapemba kwa Yahova bza cidikhiro comwe iye adandipasa ndipo kazinji kentse nimbakumbukira bza tsogolo limweri. Bzimwebzi bzimbandithandiza kuti ndileke kusunama. Inepano nimbadziwa kuti kumweku n’kumala lini kwa bzinthu bzentse. Yahova an’dzakunda anyamadulanthaka wace ndipo an’dzatisimba.”

17. Kodi tingalatize tani kuti timbatenda cidikhiro comwe Yahova adatipasa? (Onanimbo cithunzi-thunzi.)

¹⁷ Bzomwe mungacite. Mbapambulani nthawe kuti mumbakumbukire bza tsogolo labwino lomwe Yahova adakupicirani. Bziyezezereni kuti muli mu dziko lipsa ndipo mbakumbukirani bzisimbo bzomwe tin’dzakhala nabzo. Mabvuto yali-yentse yomwe timbagumana nayo tsapano “nja kanthawe” ndipo ni mang’ono tikayandendemezera na moyo wakusaya kumala omwe tin’dzakhala nawo m’paraizo. (2 Akolinto 4:17) Kuthumizira bzimwebzi, citani nyongo kuti mumbauzembo winango bza cikhulupiro canu. Mbakumbukirani momwe bzimbakhalira bzakunesa kwa iwo kulimbana na mabvuto mu dziko la Sathaniri mwa kusaya kudziwa bzinthu bzabwino bzomwe Mulungu adapicira. Napo kuti imwepo mungandolewe bzinthu bzing’ono-ng’ono kwa iwo, imwepo mungawacitise kufuna kudziwa bzizinji pakulewa bza Umambo bwa Yahova na mapiciro yace.

18. Thangwe ranyi tingathembe mapiciro ya Yahova?

¹⁸ Pambuyo pa Djobi kupirira mabvuto mazinji na kupitiriza kukhala wakukhulupirika, iye adauza Yahova kuti: “Ndazindikira kuti imwepo mumbakwanisa kucita bzinthu bzentse, ndipo palibe bzomwe imwepo mungatazire kucita.” (Djobi 42:2) Djobi adazindikira kuti palibe comwe cingatazise Yahova kucita bzomwe adapicira. Kudziwa bzimwebzi kungatipase mphanvu pomwe tikupirira. Tiyezezere ibzi, kumbukirani bza mkazi munango omwe akuduwala ndipo adasunama thangwe rakuti adotolo azinji atazira kumupoza matenda yace. Tsono iye wagumana na dotolo wabwino omwe akumuuza bzomwe bzacitisa kuti iye aduwale na momwe angamuthandizire kuti iye alimbe matenda yaceyo. Pa nthawe imweyo, iye akukomedwa napo pangatenge nthawe kuti alimbe. Tsapano iye angapirire thangwe akudziwa kuti ana cidikhiro cabwino comwe n’cakulimba matenda yaceyo. Mwa njira ibodzi-bodziyi, ifepano tingapitirize kupirira thangwe tina citsimikizo cakuti mapiciro ya Mulungu yakulewa bza Paraizo yan’dzakwanisikadi.

19. Kodi n’ciyani comwe tikufunikira kuti tipirire?

¹⁹ Ninga momwe tawonera, Yahova ambatithandiza kupirira mabvuto yathu mwakuphatisa basa mpembo, Fala lace, abale wathu wacikristau na cidikhiro cathu. Tikambacita bzomwe tingakwanise kuti timbaphatise basa bzinthu bzomwe Yahova adatipasabzi, Yahova an’dzatithandiza pa mabvuto yentse yomwe tin’dzagumana nayo mpaka pomwe mabvuto ya mu dziko la Sathaniri yan’dzagumanika lini pomwe. — Afilipi 4:13.