NKHANI YAKUPFUNZA 33
NYIMBO 4 ‘Yahova ni M’busa Wangu’
Khulupirani Kuti Yahova Ambakufunani
“Ndakukwewera kwa ine ndicikhala wakukhulupirika kwa iwepo.” — JEREMIYA 31:3.
CAKULINGA CA NKHANIYI
Mu nkhani ino, tiniwona kuti thangwe ranyi mpsakufunika kukhulupira kuti Yahova ambatifuna na bzomwe tingacite kuti titsimikizire kuti iye ambatifunadi.
1. Thangwe ranyi imwepo mudabzipereka kwa Yahova? (Onanimbo cithunzi-thunzi.)
KODI imwepo mukukumbukira ntsiku omwe mudabzipereka kwa Yahova? Imwepo mudacita bzimwebzi thangwe rakuti mudamudziwa bwino Yahovayo ndipo mudayamba kumufuna kwene-kwene. Imwepo mudamupicira kuti mungadaikha kufuna kwace pa mbuto yakuyamba pa moyo wanu nakuti nthawe zentse mungadamufuna na mtima wentse, moyo wentse, nzeru zentse na mphanvu zentse. (Marko 12:30) Kuyambira pa nthawe imweyo lufoyi lanu kwa iye likupitiriza kukula. Tsono kodi imwepo mungatawire tani munthu acikubvunzani kuti: “Mumbamufunadi Yahova?” Imwepo mungamutawire na citsimikizo centse kuti: “Inepano nimbamufuna Yahova kuposa cinthu ciri-centse ayai munthu ali-wentse!”
Kodi imwepo mukukumbukira bza lufoyi lomwe mukhanalo kwa Yahova pomwe mudabzipereka kwa iye mucibatizidwa? (Onani ndime 1)
2-3. Kodi Yahova akufuna kuti mutsimikizire ciyani, ndipo tin’cezerana ciyani mu nkhani ino? (Jeremiya 31:3)
2 Tsono imwepo mungatawire tani munthu acikubvunzani kuti: “Kodi muna citsimikizo cakuti Yahova ambakufunani?” Kodi imwepo pinango mungazeze kutawira thangwe ra kukumbuka kuti mun’themera lini kufunidwa na Yahova? Mpfumakazi inango yomwe ikhabzibva kuti ikhafunidwa lini pomwe ikhali mwana, idalewa kuti: “Inepano nimbadziwa kuti nimbafuna Yahova ndipo nimbatsimikizira bzimwebzo. Tsono kazinji kentse nimbabzibvunza penu Yahova ambandifuna.” N’ciyani comwe cingakuthandizeni kutsimikizira momwe Yahova ambakuwonerani?
3 Yahova akufuna kuti imwepo mukhale na citsimikizo centse cakuti ambakufunani. (Werengani Jeremiya 31:3.) Yahova caiyeyo ndiye omwe adakukwewerani kwa iye. Pomwe mudabatizidwa, iye adakupasani mphaso yabwino kwene-kwene yomwe ni lufoyi lace lacadidi. Pakuti Yahova ana lufoyi lacadidi na atumiki wace wakukhulupirika, iye ambawawona ninga cuma cace cakupambulika. Ndipo imwepo ndimwembo ‘wakupambulika’ kwene-kwene kwa iye. (Malakiya 3:17) Yahova akufuna kuti imwepo mubzibve ninga momwe mpostolo Paulo adabvera. Iye akhana citsimikizo centse cakuti Yahova akhamufuna, ndipopa adanemba kuti: “Ndatsimikiza kuti ne infa, ne moyo, ne anjo, ne atongi, ne bzinthu bzomwe bziripo tsapano, ne bzinthu bzomwe bzikubwera, ne mphanvu, ne bzinthu bzakudzulu, ne bza pantsi, ne cakulengedwa cinango ciri-centse cingatilekanise na lufoyi la Mulungu.” (Aroma 8:38, 39) Mu nkhani ino, tin’cezerana kuti thangwe ranyi mpsakufunika kutsimikizira kuti Yahova ambatifuna na bzomwe tingacite kuti titsimikizire bzimwebzo.
THANGWE RANYI MPSAKUFUNIKA KUKHULUPIRA KUTI YAHOVA AMBATIFUNA?
4. Kodi n’ciyani comwe tingacite kuti tilimbane na mapumpso ya Sathani?
4 Tikakhulupira kuti Yahova ambatifuna, timbakwanisa kukhala wakulimba “pa mapumpso” ya Dyabu. (Aefezo 6:11) Sathani an’dzacita ciri-centse comwe angakwanise kuti aticitise kusiya kutumikira Yahova. Njira ibodzi yomwe iye ambaiphatisa basa ni kuyezera kuticitisa kukumbuka kuti Yahova ambatifuna lini. Tsono limweri ni gunkha lakuipa kwene-kwene. Bibliya limbandendemezera Sathani na mphondolo. (1 Pedru 5:8, 9) Mphondolo zimbafuna kuphata bzirombo bzomwe bziribe mphanvu na bzomwe bzingakwanise lini kubzikhotcerera. Mwa njira ibodzi-bodziyi, Sathani kazinji-kazinji ambatiyeza tikakhala tiribe mphanvu, tidaneta ayai tidasunama thangwe ra bzinthu bzakuipa bzomwe bzidaticitikira m’mbuyo, mabvuto yomwe tikugumana nayo tsapano ayai tikakhala tina mantha na bzomwe bzingadzaticitikire kutsogolo. (Mimwani 24:10) Pa nthawe ninga zimwezi, Sathani ambayezera kuticitisa kusiya kutumikira Yahova. Tsono tikapitiriza kulimbisa cikhulupiro cathu cakuti Yahova ambatifuna tin’dzakwanisa “kugaza” Sathani na mapumpso yace. — Tiyago 4:7.
5. Thangwe ranyi mpsakufunika kwa imwepo kubzibva kuti Yahova ambakufunani nakuti ambakuwonani kuti ndimwe wakufunika?
5 Tikakhulupira kuti Yahova ambatifuna, timbalimbisa uxamwali bwathu na iye. Mbatiwoneni thangwe lomwe likuticitisa kulewa bzimwebzi. Yahova adalenga wanthu kuti ambalatize lufoyi kwa winango na kubzibvambo kuti ambafunidwa na iwo. Munthu akatilatiza lufoyi, bzimwebzi bzimbacitisa kuti timulatizembo lufoyiro. Ndipopa ifepano tikabzibva kuti ndife wakufunidwa nakuti timbawonedwa kuti ndife wakufunika na Yahova bzimwebzi bzin’dzacitisa kuti timufunembo kwene-kwene. (1 Juwau 4:19) Ndipo tikakulisa lufoyi lathu kwa iye, iyembo an’dzakulisa lufoyi lace kwa ifepano. Bibliya limbafotokoza mwakubveka bwino kuti: “Fendererani Mulungu ndipo iye an’dzakufendereranimbo.” (Tiyago 4:8) Tsono n’ciyani comwe tingacite kuti titsimikizire kuti Yahova ambatifunadi?
N’CIYANI COMWE CINGATITHANDIZE KUKHULUPIRA KUTI YAHOVA AMBATIFUNA?
6. Kuti tikhulupire kuti Yahova ambatifuna, n’ciyani comwe tin’funika kukumbira mu mpembo?
6 Pitirizani kumbapemba kwa Yahova kuti akuthandizeni kubvesesa thangwe lomwe limbamucitisa kukufunani. (Luka 18:1; Aroma 12:12) Kumbirani Yahova kuti akuthandizeni kumbabziwona ninga momwe iye ambakuwonerani. Bzikafunikira mbacitani bzimwebzi kazinji kentse. Nthawe zinango, imwepo mungasuname thangwe ra momwe mumbabziwonera nakuti bzingakhale bzakunesa kwene-kwene kukhulupira kuti Yahova ambakufunani. Tsono kumbukirani kuti Yahova ni mkulu kuposa mtima wanu. (1 Juwau 3:19, 20) Iye ambakudziwani bwino kuposa momwe imwepo mumbabzidziwira ndipo ambakwanisa kuwona makhalidwe yabwino yomwe munayo napo kuti imwepo mungakwanise lini kuzindikira kuti munayo. (1 Samuyeli 16:7; 2 Nkhani 6:30) Ndipopa mufotokozereni momwe mukubvera ndipo mukumbireni kuti akuthandizeni kukhulupira kuti ambakufunani. (Salimo 62:8) Pambuyo pa kupemba, pana bzinthu bzinango bzakufunika bzomwe mun’funika kucita. Mbatiwoneni bzinthubzo.
7-8. Kodi bukhu la Masalimo limbalatiza tani kuti Yahova ambatifuna?
7 Mbakhulupirani bzomwe Yahova ambalewa. Yahova adafulizira anembi wa Bibliya kuti afotokoze momwe iye aliri. Onani momwe Davide adafotokozera momwe Yahova ambacitira thupo na ifepano. Iye adati: “Yahova ali pafupi na wale omwe adasweka mtima; Iye ambapulumusa wale omwe adawofoka.” (Salimo 34:18) Imwepo mukakhala mudasunama mungakumbuke kuti palibe omwe angabvesese momwe mukubvera ayai omwe angakuthandizeni. Tsono pa nthawe zimwezi, Yahova akupicira kuti an’dzakhala pafupi na imwepo kuti akuthandizeni thangwe akudziwa kuti mukufunikira thandizo lace. Pa salimo linango, Davide adanemba kuti: “Ikhani misozi yangu mu nthawa yanu.” (Salimo 56:8) Yahova ambakuwonani mukakhala mudasunama na pomwe mukubva kuwawa. Iye ambacita namwe thupo kwene-kwene ndipo bzimbamuwawa akakuwonani mukubonera. Ninga momwe madzi njakufunikira kwene-kwene kwa munthu omwe akucita ulendo mu dambo, misozi yathu njakufunikambo kwene-kwene kwa Yahova. Salimo 139:3 ambalewa kuti: “[Imwe Yahova] njira zangu zentse mumbazidziwa bwino.” Yahova ambawona bzentse bzomwe imwepo mumbacita, tsono iye ambawonesesa bzinthu bzabwino bzomwe imwepo mumbacita. (Ahebereu 6:10) Thangwe ranyi? Thangwe iye ambawona kuti bzinthu bzentse bzomwe imwepo mumbacita kuti mumukondwese mpsakufunika.a
8 Mwakuphatisa basa mavesi ya m’Bibliya yakutsangalazaya, bziri ninga Yahova akulewa kuti: “Ndikufuna kuti iwepo udziwe kuti nimbakufuna kwene-kwene ndipo nimbacita nawe thupo.” Tsono ninga momwe tawonera Sathani akufuna kuti imwepo mukumbuke kuti Yahova ambakufunani lini. Na tenepo, penu nthawe zinango mumbakumbuka kuti Yahova ambakufunani lini, imwepo mungakumbukire omwe mukufuna kumukhulupira. Bzibvunzeni kuti: ‘Kodi ndikufuna kukhulupira Sathani omwe “ni baba wakunama” ayai ndikufuna kukhulupira Yahova omwe ni “Mulungu wacadidi”?’ — Juwau 8:44; Salimo 31:5.
9. Kodi n’citsimikizo ciponi comwe Yahova ambapasa wanthu wentse omwe ambamufuna? (Ekisodo 20:5, 6)
9 Kumbukirani momwe Yahova ambawonera wale omwe ambamufuna. Onani bzomwe Yahova adauza Mozeji na Ajirayeri. (Werengani Ekisodo 20:5, 6.) Yahova akupicira kuti an’dzapitiriza kulatiza lufoyi lacadidi kwa wale omwe ambamufuna. Mafala yamweya yakutitsimikizira kuti Yahova an’dzaleka lini kufuna wale omwe ambamufuna. (Nehemiya 1:5) Na tenepo, imwepo mukayamba kukumbuka kuti Yahova ambakufunani lini, bzibvunzeni kuti: ‘Kodi inepano nimbafuna Yahova?’ Patsogolo pace, kumbukirani ibzi: Penu imwepo mumbafuna Yahova ndipo mukucita bzomwe mungakwanise kuti mumukondwese, iye akukutsimikizirani kuti ambakufunanimbo kwene-kwene. (Daniyeli 9:4; 1 Akolinto 8:3) Kulewa kunango, penu imwepo mumbapenukira lini kuti mumbafuna Yahova, thangwe ranyi mukupenukira kuti Yahovayo ambakufunani? Imwepo mungakhale na citsimikizo centse cakuti iye nthawe zentse an’dzakufunani ndipo an’dzakusiyani lini.
10-11. Kodi Yahova akufuna kuti mumbaiwone tani ntsembe ya cakulombolera? (Agalatiya 2:20)
10 Mbakumbukirani bza cakulombolera. Ntsembe ya cakulombolera ni mphaso ikulu kwene-kwene yomwe Yahova adapasa wanthu. (Juwau 3:16) Tsono kodi Yahova adatumiza Mwana wace kuti adzaferembo imwepo? Inde! Kumbukirani bzomwe bzidacitikira mpostolo Paulo. Iye akhadacita bzinthu bzizinji bzakuipa. Napo pomwe iye adakhala Mkristau akhafunika kucita nyongo kuti aleke kucita bzinthu bzakuipa. (Aroma 7:24, 25; 1 Timotio 1:12-14) Tsono iye akhawona cakulombolera ninga mphaso yomwe Yahova adamupasa iye. (Werengani Agalatiya 2:20.) Kumbukirani kuti ni Yahova omwe adafulizira Paulo kuti anembe mafala yamweya. Ndipo bzentse bzomwe bzidanembedwa m’Bibliya bzidanembedwa kuti bzitipfunzise. (Aroma 15:4) Na tenepo, mafala ya Paulo yakulatiza kuti Yahova an’funa kuti mumbawone cakulombolera ninga mphaso yomwe iye adapasa imwepo. Imwepo mukambawona cakulombolera mu njira imweyi mumbatsimikizira kuti Yahova ambakufunani pamwekha.
11 Ifepano timbatenda Yahova thangwe ra kutumiza Jezu kubwera pa dziko la pantsi kuti adzatifere. Tsono thangwe linango lomwe lidacitisa kuti Jezu abwere pa dziko la pantsi likhali kudzapfunzisa wanthu winango cadidi pakulewa bza Mulungu. (Juwau 18:37) Cadidi cimweci cimbaphatanidza lufoyi likulu lomwe Yahova analo kwa wana wace.
MOMWE JEZU AMBATITHANDIZIRA KUKHULUPIRA KUTI YAHOVA AMBATIFUNA
12. Thangwe ranyi tingakhulupire bzomwe Jezu adalewa pakulewa bza Yahova?
12 Pomwe Jezu akhali pa dziko la pantsi, iye akhakomedwa kuuza winango momwe Yahova aliri. (Luka 10:22) Ifepano tingakhulupire bzomwe Jezu adalewa pakulewa bza Yahova. Thangwe ranyi? Thangwe Jezu pomwe akhanati kubwera pa dziko la pantsi, adakhala magole mazinji pabodzi na Baba wace kudzulu. (Akolose 1:15) Jezu akhadziwa kuti Baba wace akhamufuna kwene-kwene ndipo iye adawonambo momwe Yahova ambafunira wana wace wakukhulupirika. Kodi Jezu ambathandiza tani winango kukhulupira kuti Yahova ambawafuna?
13. Kodi Jezu akufuna kuti timbamuwone tani Yahova?
13 Jezu akufuna kuti timbamuwone Yahova ninga momwe iye ambamuwonera. M’mabukhu manai yomwe yambalewa bza moyo wace, iye adacemera Yahova kuti “Baba” maulendo yakupitirira 160. Pomwe akhaceza na ateweri wace, iye akhaphatisa basa mafala yakuti “Baba wanu” ayai “Baba wanu wakudzulu.” (Mateu 5:16; 6:26) Pomwe Jezu akhanati kubwera padziko la pantsi, atumiki wakukhulupirika wa Yahova akhambamucemera Yahovayo kuti ‘Wamphanvu-zentse,’ ‘Mkululetu,’ ‘Mulengi Mkululetu’ na madzina manango yakundendemerana na yamweya. Tsono kazinji-kazinji Jezu akhambacemera Yahova kuti Baba. Fala limweri likulatiza kuti Yahova akufuna kuti atumiki wace akhale wakufendererana na iye ninga momwe mwana ambakhalira wakufendererana na pai wace wa lufoyi. Bzikuwonekeratu padeca kuti Jezu akufuna kuti timbawone Yahova ninga momwe iye ambamuwonera ninga “Baba” omwe ambatifuna kwene-kwene. Mbatiwoneni bziratizo bziwiri bzomwe bzikulatiza momwe Jezu adaphatisira basa fala lakuti “Baba” pakulewa bza Yahova.
14. Kodi Jezu adalatiza tani kuti m’bodzi na m’bodzi wa ifepano ngwakufunika kwa Yahova? (Mateu 10:29-31) (Onanimbo cithunzi-thunzi.)
14 Cakuyamba, onani bzomwe Jezu adalewa pa Mateu 10:29-31. (Werengani.) Jezu adalewa kuti Baba wathu ambadziwa komwe ka mbalame kali-kentse kali. Tsono mbalame imbanamata lini Yahova ne kumufuna. Penu Yahova ambawona kambalame kang’ono kuti n’kakufunika, tingakhale na citsimikizo cakuti iye ambacita thupo kwene-kwene na m’bodzi na m’bodzi wa ifepano thangwe timbamufuna ndipo timbamutumikira! Jezu adalewambo kuti Baba wathu ‘ambadziwambo tsisi lomwe m’bodzi na m’bodzi wa ifepano analo mu msolo.’ Pakuti Yahova ambadziwa tubzinthu tung’ono-tung’ono pakulewa bza ifepano, tingakhale na citsimikizo cakuti iye ambacita nafe thupo kwene-kwene. Kulewa cadidi, Jezu akufuna kuti m’bodzi na m’bodzi wa ifepano atsimikizire kuti ni wakufunika kwene-kwene kwa Baba wathu wa kudzulu, Yahova.
Penu Yahova ambawona kambalame kang’ono kuti n’kakufunika, tingakhale na citsimikizo cakuti iye ambacita thupo kwene-kwene na m’bodzi na m’bodzi wa ifepano thangwe rakuti timbamufuna ndipo timbamutumikira! (Onani ndime 14)
15. Kodi mafala ya Jezu yomwe yali pa Juwau 6:44 yambakutsimikizirani ciyani pakulewa bza Baba wanu wakudzulu?
15 Onani ciratizo caciwiri comwe cikulatiza nthawe inango yomwe Jezu adaphatisa basa fala lakuti “Baba.” (Werengani Juwau 6:44.) Yahova caiyeyo thangwe ra lufoyi lace na kudeka mtima kwace, adakukwewerani m’cadidi. Thangwe ranyi iye adacita bzimwebzi? Thangwe iye adawona kuti muna mtima wabwino na makhalidwe yabwino. (Mabasa 13:48) Pomwe Jezu adalewa mafala yomwe yali pa Juwau 6:44 pinango iye akhalewa bza mafala ya Yahova yomwe yambagumanika pa Jeremiya 31:3. Pamwepa Yahova adauza wanthu wace kuti: “Ndakukwewera kwa ine ndicikhala wakukhulupirika kwa iwepo.” (Jeremiya 31:3; ndendemezerani na Ozeya 11:4.) Ndokumbukirani bzomwe mafala yamweya yakuthandauza. Baba wathu wakudzulu ambapitiriza kuwona makhalidwe yanu yabwino napo kuti imwepo mungakwanise lini kuwona bzimwebzi.
16. (a) N’ciyani comwe Jezu adapfunzisa pakulewa bza Yahova, ndipo thangwe ranyi tin’funika kumukhulupira? (b) N’ciyani comwe mungacite kuti mutsimikizire kuti Yahova ni Baba wabwino kwene-kwene kwa imwepo? (Onanimbo kwadru yakuti “Baba Wabwino kwa Tentse.”)
16 Pomwe Jezu adalewa kuti Yahova ni Baba wathu, bzikhali ninga akulewa kuti: “Yahova ni Baba lini wangu ndekha koma ni Baba wanumbo. Inepano ndikukutsimikizirani kuti iye ambafuna m’bodzi na m’bodzi wa imwepo ndipo ambacita namwe thupo.” Na tenepo, imwepo nthawe zinango mukambakumbuka kuti Yahova ambakufunani lini, mbaimani pang’ono mucibzibvunza kuti: ‘Kodi bzingakhale lini bwino inepano kuthemba Jezu omwe ambalewa cadidi na omwe ambamudziwa bwino Baba wathu kuposa munthu ali-wentse?’ — 1 Pedru 2:22.
CITANI BZOMWE MUNGAKWANISE KUTI MUPITIRIZE KUKHULUPIRA KUTI YAHOVA AMBAKUFUNANI
17. Thangwe ranyi tin’funika kupitiriza kutsimikizira kuti Yahova ambatifuna?
17 Ifepano tin’funika kupitiriza kucita bzomwe tingakwanise kuti titsimikizire kuti Yahova ambatifuna. Ninga momwe tawonera mu nkhani ino, Sathani akucita ciri-centse kuti aticitise kusiya kutumikira Yahova. Iye akufuna kutiwofokesa ndipopa an’dzayezera kuticitisa kukhulupira kuti Yahova ambatifuna lini. Tin’funika lini kukhulupira magunkha ya Sathaniya! — Djobi 27:5.
18. N’ciyani comwe imwepo mungacite kuti mupitirize kukhulupira kuti Yahova ambakufunani?
18 Kuti mukhulupire kuti Yahova ambakufunani, pitirizani kupemba kwa iye kuti akuthandizeni kumbabziwona ninga momwe iye ambakuwonerani. Mbakumbukirani mavesi ya m’Bibliya yomwe yambalatiza lufoyi likulu la Yahova na thupo lomwe iye analo kwa wale omwe ambamufuna. Kumbukirani kuti Yahova nthawe zentse an’dzafuna munthu omwe ambamufunambo. Lekani kuyebwa kuti cakulombolera ni mphaso yomwe iye adapasa imwepo. Mbakhulupirani kuti Yahova ni Baba wanumbo ninga momwe Jezu adalewera. Na tenepo, munthu acikubvunzani kuti: “Kodi imwepo muna citsimikizo cakuti Yahova ambakufunani?” Imwepo mun’dzatawira na citsimikizo centse kuti: “Inde, iye ambandifuna! Ndipo ntsiku iri-yentse nimbacita bzomwe ningakwanise kuti ndimulatize kuti nimbamufunambo!”
NYIMBO 154 Lufoyi Limbamala Lini
a Kuti muwone mavesi yanango ya m’Bibliya yomwe yambatitsimikizira kuti Yahova ambatifuna, onani nkhani yakuti “Kudzikayikira” m’bukhu lakuti Malango Yakucokera m’Fala la Mulungu (Chichewa).