Kufunika kwa Batismo
‘Batismo in’kupulumusanimbo tsapano.’—1 PEDRU 3:21.
1, 2. (a) Kodi ni mibvunzo iponi yomwe abereki winango ambabzibvunza wana wawo akafuna kubatizidwa? (b) N’thangwe ranyi omwe akufuna kubatizidwa an’funika kubzibvunza penu abzipereka kale kwa Yahova? (Onani cithunzi-thunzi pa tsamba lino.)
POMWE Maria pabodzi na anzace akhadaima kuti abatizidwe, abereki wace adamunyang’anisisa kwene-kwene. Mfotokozi wa nkhani ya batismo adawabvunza mibvunzo miwiri, ndipo Maria adatawira mibvunzoyo mwakukuwa na mwakubveka bwino. Patsogolo pace, iye adabatizidwa.
2 Pomwe Maria adabzipereka kwa Yahova acibatizidwa, abereki wace adakomedwa kwene-kwene. Koma pomwe akhanati kubatizidwa, mai wace akhana thupo ndipo akhabzibvunza kuti: ‘Kodi Maria ana msinkhu wakuti angabatizidwe? Kodi iye ambadziwa thandauzo la kubzipereka kwa Yahova? Kodi iye an’funika lini kudikhira pang’ono kuti adzabatizidwe kutsogolo?’ Abereki azinji ambabzibvunzambo mibvunzo imweyi akauzidwa na wana wawo kuti an’funa kubatizidwa. (Mpalizi 5:5) Cakusankhula cakufunika kwene-kwene comwe munthu ali-wense angacite, ni kubzipereka kwa Yahova na kubatizidwa.—Onani kwadru yakuti: “Kodi Mwabzipereka Kale kwa Yahova?”
3, 4. (a) Kodi n’ciyani comwe tingapfunze na mafala ya Pedru yakulewa bza batismo? (b) N’thangwe ranyi Pedru adandendemeza batismo na basa lakumanga cingalawa lomwe Nowe adalicita?
3 Mpostolo Pedru adandendemeza batismo na cingalawa ca Nowe. Iye adati: ‘Batismo in’kupulumusanimbo tsapano ninga cingalawaco.’ (Werengani 1 Pedru 3:20, 21.)a Cingalawa cidapereka umboni kwa wanthu wense bwakuti Nowe akhafuna kutumikira Mulungu na mtima wense ndipo iye adacita basa lomwe Yahova adamupasa kuti alicite mwakukhulupirika. Ndipo thangwe ra kukhulupirika kwaceko, Yahova adamupulumusa pabodzi na banja lace pa Cigumula ca Madzi. Kodi n’ciyani comwe tingapfunze na mafala ya Pedru yakulewa bza batismo?
4 Pomwe wanthu adawona cingalawa, iwo adadziwiratu kuti Nowe akhakhulupira Mulungu. Mpsibodzi-bodzimbo na nsiku zino, wanthu akawona munthu ankubatizidwa, iwo ambadziwiratu kuti iye wabzipereka kwa Mulungu thangwe rakuti ankukhulupira Kristu omwe adalamusidwa kwa anyakufa. Ndipo ninga Nowe, wale omwe adabatizidwa ambabvera Mulungu ndipo ambacita basa lomwe Mulunguyo ambapasa atumiki wace kuti alicite. Ninga momwe Yahova adapulumusira Nowe pa Cigumula ca Madzi, iye an’dzapulumusambo atumiki wace wakukhulupirika omwe adabatizidwa akadzapfudza dziko lakuipali. (Marko 13:10; Cibvumbulutso 7:9, 10) Bzimwebzi bzinkulatiziratu padeca kuti mpsakufunika kwene-kwene kwa ifepano kuti tibzipereke kwa Yahova, ticibatizidwa. Kulewa cadidi, munthu akacedwa kubatizidwa, angaluze mwayi wakudzakhala na moyo wakusaya kumala.
5. Kodi ni mibvunzo iponi yomwe tin’cezerana mu nkhani ino?
5 Pakuti tsapano tadziwa bza kufunika kwa batismo, tin’funika kudziwambo mitawiro ya mibvunzo mitatuyi: Kodi Bibliya limbalewa ciyani pa nkhani ya batismo? Kodi n’ciyani comwe munthu an’funika kucita anati wabatizidwa? N’thangwe ranyi nthawe zense mpsakufunika kumbafotokoza bza kufunika kwa batismo pomwe tinkupfunzisa wana wathu ayai anyakupfunza Bibliya?
BZOMWE BIBLIYA LIMBALEWA PA NKHANI YA BATISMO
6, 7. (a) Kodi thangwe ranyi wanthu akhayenda kuna Juwau Batista kuti akabatizidwe? (b) Kodi ni batismo iponi yomwe ikhali yakusiyana na batismo zense, ndipo thangwe ranyi?
6 Bibliya limbalatiza kuti Juwau Batista adakhala munthu wakuyamba kubatiza wanthu. (Mateu 3:1-6) Kodi thangwe ranyi wanthu akhayenda kuna iye kuti akabatizidwe? Iwo akhacita bzimwebzo pakufuna kulatiza kuti akhadakungula bzakuphonya bzawo na mtima wense, nakuti akhabvuma kusaya kubvera kwawo Cakutonga ca Mozeji. Tsono Juwau adadzacita batismo inango yomwe ikhali yakufunika kwene-kwene ndipo ikhana thandauzo lakusiyana na batismo zinango zense zomwe iye akhadacita. Batismo imweyo nja Jezu ndipo Juwau adalatiza ulemu bukulu kwene-kwene pomwe akhabatiza Jezu, Mwana wakulungama wa Mulungu. (Mateu 3:13-17) Jezu akhalibe pikado ndipo iye akhafunika lini kukungula. (1 Pedru 2:22) Tsono n’thangwe ranyi Jezu adabatizidwa? Iye adabatizidwa thangwe akhafuna kulatiza kuti akhadakonzeka kuphatisa basa moyo wace kuti acite kufuna kwa Mulungu.—Wahebereu 10:7.
7 Pomwe Jezu adayamba kupalizira, anyakupfunza wace adayambambo kubatiza wanthu winango. (Juwau 3:22; 4:1, 2) Wanthuwo akhabatizidwa thangwe rakuti akhadakungulambo bzakuphonya bzawo nakuti akhabvuma kusaya kubvera kwawo Cakutonga ca Mozeji. Koma mwakusiyana na wanthu amwewa, pomwe Jezu adafa acilamusidwa, wale omwe akhafuna kukhala ateweri wace akhafunika kubatizidwa na thangwe linango.
8. (a) Kodi n’ciyani comwe Jezu adalewa pambuyo pakulamusidwa kwa anyakufa? (b) N’thangwe ranyi Akristau an’funika kubatizidwa?
8 Zitandopita nsiku zakucepa Jezu atalamusidwa mu gole la 33, iye adalewalewa na amuna, akazi pabodzi na wana wakupitirira 500. Bzinkuwoneka kuti pa nsiku imweyi ni pomwe iye adalewa mafala yakuti: ‘Ndokoni mukapfunzise wanthu wa mitundu yense, muciwabatiza m’dzina la Baba, na la Mwana, na la mzimu wakucena na kuwapfunzisa kusunga bzinthu bzense bzomwe ndidakuuzani.’ (Mateu 28:19, 20; 1 Wakolinto 15:6) Jezu adauza ateweri wace kuti apfunzise wanthu. Ndipo munthu ali-wense omwe an’funa kukhala nyakupfunza wa Jezuyo ayai an’funa kunyamula ‘djoki’ lace, an’funika kubatizidwa. (Mateu 11:29, 30) Kuti munthu atumikire Mulungu mu njira yakumukondwesa, iye an’funika kubvuma kuti Mulunguyo ambaphatisa basa Jezu kuti akwanise cakulinga cace. Patsogolo pace, munthuyo angabatizidwe, acibvumidwa na Mulungu. Ndipo Bibliya limbatipasa umboni buzinji bwakulatiza kuti anyakupfunza wakuyambirira wa Jezu akhadziwa kufunika kwa batismo, mwakuti iwo akhakumbuka lini kuti akhafunika kudikhira kuti adzabatizidwe kutsogolo.—Mabasa 2:41; 9:18; 16:14, 15, 32, 33.
LEKANI KUCEDWA KUBATIZIDWA
9, 10. Kodi tingapfunze ciyani na kubatizidwa kwa mwamuna wa ku Etiopiya na Saulo?
9 Werengani Mabasa 8:35, 36.b Mwamuna munango wa ku Etiopiya omwe akhadabvuma cipfunziso cacijuda, akhadayenda ku Jeruzalemu kukapemba mu templo. Tsono pomwe akhabwerera ku mui kwace, wanjo wa Yahova adatumiza Filipi kuti akamupalizire, ndipo Filipi adamupfunzisa ‘bzipsa bzabwino pakulewa bza Jezu.’ Kodi n’ciyani comwe mwamuna wa ku Etiopiyayo adacita? Iye adabvesesa kufunika kwa kubvuma Jezu ninga Mbuya, ndipo adafuna kucita bzomwe Yahova ambafuna kuti Akristau acite. Ndipo mwakusaya kucedwa iye adabatizidwa.
10 Ciratizo cinango pa nkhaniyi n’ca mwamuna munango wacijuda wakucemeredwa Saulo. Mtundu wense wa Ajuda ukhali wakubzipereka kwa Mulungu, koma Yahova adadzaulamba thangwe iwo akhamubvera lini. Tsono Saulo akhakumbuka kuti Ajudawo akhapitiriza kutumikira Mulungu mu njira yakuthemera, tenepo iye akhazunza Akristau. Koma nsiku inango, Jezu wakulamusidwa kwa anyakufa, omwe Saulo akhakumbuka kuti adafa, adalewalewa na Sauloyo kucokera kudzulu. Kodi n’ciyani comwe iye adacita? Iye adabvuma thandizo la Ananiya, omwe akhali mteweri wa Jezu, ndipo Bibliya limbalewa kuti ‘iye adatizidwa.’ (Mabasa 9:17, 18; Wagalata 1:14) Na kupita kwa nthawe, Saulo adadzakhala mpostolo Paulo. Onani kuti pomwe Saulo adabva kuti Mulungu akhaphatisa basa Jezu kuti akwanirise cakulinga cace, iye adabatizidwa pa nthawe imweyoletu.—Werengani Mabasa 22:12-16.c
Anyakupfunza wa Bibliya ambatenda cadidi comwe ambapfunza ndipo ambacita nyongo yakuti abatizidwe
11. (a) Kodi n’ciyani comwe cimbacitisa anyakupfunza Bibliya kufuna kubatizidwa? (b) Kodi imwepo mumbabva tani mukawona munthu ankubatizidwa?
11 Nsiku zinombo, anyakupfunza Bibliya azinji, maswaka na acikulire ankucitambo bzibodzi-bodzibzi. Iwo ambacita nyongo yakubzipereka kwa Yahova na kubatizidwa thangwe ambafuna na kukhulupira bzomwe Bibliya limbalewa. Kulewa cadidi, nthawe ya nkhani ya batismo imbakhala yakupambulika kwene-kwene pa mtsonkhano wa dera na wacigawo. Mboni za Yahova zimbakomedwa kwene-kwene anyakupfunza Bibliya akabvuma cadidi ca m’Bibliya, acikhala na cikhumbo ca kubatizidwa. Ndipo abereki ambakomedwambo kwene-kwene wana wawo akacita cakusankhula cimweci. Mu gole la basa la 2017, wanthu wakupitirira 284.000 adabzipereka kwa Yahova, acibatizidwa. (Mabasa 13:48) Bzimwebzi bzinkulatiza kuti iwo adabvesesa kuti munthu akhale Mkristau ambafunika kubatizidwa. Tsono n’ciyani comwe iwo adacita anati kubatizidwa?
12. Kodi n’ciyani comwe anyakupfunza Bibliya an’funika kucita anati kubatizidwa?
12 Akanati kubatizidwa, anyakupfunza Bibliya an’funika kudziwa cadidi cakulewa bza Mulungu, cakulinga comwe iye anaco na wanthu pabodzi na dziko la pansi na bzomwe iye adacita kuti apulumuse wanthu. (1 Timotio 2:3-6) Patsogolo pace, iwo an’funika kukulisa cikhulupiro cawo, comwe cin’dzawathandiza kubvera malamulo ya Mulungu na kusiya kumbacita bzinthu bzomwe iye ambabziwenga. (Mabasa 3:19) Bzimwebzi mpsakufunika kwene-kwene thangwe Yahova ambabvuma lini kubzipereka kwa munthu omwe ambapitiriza kucita bzinthu bzomwe Iye ambabziwenga. (1 Wakolinto 6:9, 10) Koma pana bzinthu bzinango bzomwe iwo an’funika kucita. Wale omwe an’funa kubzipereka kwa Yahova, an’funika kumbagumanika pa mitsonkhano ya gwere, kupalizira bzipsa bzabwino na kupfunzisa winango. Bzimwebzi mpsakufunika kwa munthu ali-wense omwe an’funa kutewera Kristu. (Mabasa 1:8) Tenepo, penu nyakupfunzayo ankucita kale bzinthu bzomwe bzafotokozedwabzi, iye angacite mpembo wakubzipereka kwa Yahova, acibatizidwa.
THANDIZANI ANYAKUPFUNZA WANU WA BIBLIYA KUKHALA NA CIKHUMBO CA KUBATIZIDWA
Mukambapfunzisa winango Bibliya, kodi mumbanyang’ana mipata yakuwathandiza kubvesesa kufunika kwa batismo? (Onani ndime 13)
13. Kodi n’ciyani comwe tin’funika lini kuyebwa tikambapfunzisa winango Bibliya?
13 Tikambathandiza wana wathu na anyakupfunza Bibliya kucita bzinthu bzomwe tacezeranabzi, tin’funika lini kuyebwa kuti wale omwe an’funa kukhala ateweri wa Jezu an’funika kubatizidwa. Ndipo bzimwebzi bzin’dzatithandiza kuleka kucita mantha kuwafotokozera kufunika kwa kubzipereka kwa Mulungu na kubatizidwa. Timbafuna kuti wana wathu na anyakupfunza Bibliya apitirize kuyenda patsogolo mwauzimu acibatizidwa!
14. N’thangwe ranyi tin’funika lini kungingimiza munthu kuti abatizidwe?
14 Yahova ambatingingimiza lini kuti timutumikire, ndipopa palibe munthu omwe an’funika kungingimiza mwana ayai nyakupfunza Bibliya kuti abatizidwe. (1 Juwau 4:8) Tikambapfunzisa winango Bibliya, tin’funika kuwathandiza kuwona phindu la kukhala pa uxamwali na Yahova. Patsogolo pace, penu nyakupfunza Bibliyayo ankudekedwa thangwe ra kudziwa cadidi cakulewa bza Mulungu ndipo ankufunisisa kucita cinthu ciri-cense comwe Akristau wacadidi an’funika kucita, iye angabatizidwe.—2 Wakolinto 5:14, 15.
15, 16. (a) Kodi munthu angabatizidwe na magole mangasi? Fotokozani. (b) N’thangwe ranyi nyakupfunza Bibliya an’funika kubatizidwa ninga Mboni ya Yahova napo kuti iye adabatizidwa kale m’cipembedzo cinango?
15 Kodi munthu angabatizidwe na magole mangasi? Munthu ali-wense ngwakusiyana na mwanzace. Mwa ciratizo, anyakupfunza Bibliya winango ambayenda patsogolo mwauzimu mwakamfulumize kusiyana na anzawo. Ndipo wanthu azinji ambabatizidwa akali maswaka, acipitiriza kukhala wakukhulupirika kwa Yahova mpaka kudzakalamba. Winango ambapfunza cadidi ca m’Bibliya na kubatizidwa pomwe mbacikulire, ndipo winango wa iwo ambabatizidwa na magole yakupitirira 100!
16 Mkazi munango akhadabatizidwa kale mu bzipembedzo bzakusiyana-siyana pomwe adapfunza Bibliya. Tenepo, iye adabvunza mpfumakazi yomwe ikhamupfunzisa Bibliya penu bzikhali bzakufunika kuti iye abatizidwe pomwe. Mpfumakaziyo idamulatiza mavesi manango ya m’Bibliya yomwe yadatawira mbvunzo wace. Pomwe mkaziyo adabvesesa bzomwe Bibliya limbapfunzisa, iye adabatizidwa napo kuti akhana magole yakupitirira 80. Kodi tingapfunze ciyani na ciratizoci? Yahova an’dzabvuma batismo yathu kokha tikadziwa cadidi cakulewa bza iye. Tenepo, napo penu tidabatizidwa kale m’cipembedzo cinango, tin’funika kubatizidwa ninga Mboni ya Yahova.—Werengani Mabasa 19:3-5.d
17. Kodi n’ciyani comwe munthu an’funika kukumbukira pa nsiku yomwe wabatizidwa?
17 Munthu ambakhala wakukondwa kwene-kwene pa nsiku yomwe wabatizidwa. Ndipo kwa munthuyo imweyi imbakhalambo nsiku yakukumbukira bza kubzipereka kwace kwa Mulungu na batismo, ndipo ambakumbukirambo bzomwe Mulungu ambafuna kuti Mkristau wacadidi acite. Anyakupfunza wa Jezu an’funika lini ‘kukhala na moyo wakubzikondwesa iwo wokha, koma akhale na moyo wakukondwesa ule omwe adawafera, acilamusidwa.’—2 Wakolinto 5:15; Mateu 16:24.
18. Kodi ni mibvunzo iponi yomwe tin’dzacezerana mu nkhani yakutewera?
18 Mu nkhani ino, tapfunza kuti kukhala Mkristau wacadidi ni cinthu lini camasenzeka. Ndipopa mai wace wa Maria adabzibvunza mibvunzo yomwe yafotokozedwa kumayambiriro kwa nkhani ino. Penu imwepo ndimwe m’bereki, pinango mudabzibvunza kale kuti: ‘Kodi mwananguyu adakonzekadi kuti abatizidwe? Kodi iye ambamudziwa bwino Yahova mwakuti angabzipereke kwa Yahovayo? Kodi iye an’funika kukhala na mapfunziro yapadzulu na basa labwino anati wabatizidwa? Tsono tani mwana wangu akadzacita pikado ikulu pambuyo pa kubatizidwa?’ Tin’dzacezerana mibvunzoyi mu nkhani yakutewera, ndipo tin’dzapfunzambo bzomwe abareki wacikristau angacite kuti ambawone batismo mu njira yakuthemera.
a 1 Pedru 3:20 Yomwe iribe kubvera, pomwe Mulungu akhadikhira mwakupirira mu nsiku za Nowe, pa nthawe yomwe cingalawa cikhamangidwa, momwe wanthu wakucepa wakukwana asere, adapulumukira pa madzi. 21 Batismo in’tipulumusambo lero ninga cingalawaco (batismoyo si kucosedwa kwa tsuzu m’thupi, koma n’kukumbira cikumbu-mtima cabwino kwa Mulungu,) mwa kulamusidwa kwa Jezu Kristu.
b Mabasa 8:35 Filipi adayamba kulewalewa, ndipo pakuyamba na cinemboci, iye adamufotokozera bzipsa bzabwino pakulewa bza Jezu. 36 Tenepo pakuti iwo akhafamba mu mseumo adapita na pomwe pakhana thawale la madzi, ndipo ndunayo idati: ‘Onani madziya! N’ciyani cin’ndiletsa kuti ndibatizidwe?’
c Mabasa 22:12 “Ndipo munthu munango wakucemeredwa Ananiya, omwe akhali wakukhulupirika mwakubverana na Cakutonga, omwe akhanambo mbiri yabwino pakati pa Ajuda wense wakukhala kumweko, 13 adabwera kuna ine. Iye adandifenderera, acindiuza kuti: ‘Saulo, m’bale wangu, yamba pomwe kuwona!’ Pa nthawe imweyoletu maso yangu yadafunguka, ndipo ndidamuwona mwamunayo. 14 Iye adati: ‘Mulungu wa abereki wathu wakusankhula kuti udziwe kufuna kwace, nakuti umuwone nyakulungamayo, ucibva mafala yakucokera pa mulomo pace, 15 pakuti iwepo un’dzakhala mboni yace kwa wanthu wense, pa bzinthu bzomwe wawona na kubva. 16 Tenepo, unkudikhira ciyani? Muka, ubatizidwe ndipo tsuka pikado zako mwakucemera dzina lace.’
d Mabasa 19:3 Tenepo iye adawabvunza kuti: “Kodi imwepo mudabatizidwa na batismo ya yani?” Iwo adatawira kuti: “Tadabatizidwa na batismo ya Juwau.” 4 Paulo adawauza kuti: “Juwau akhabatiza na batismo yomwe ikhali cizindikiro cakuti munthu wakungula, ndipo akhauza wanthu kuti ambakhulupire ule omwe angadadzabwera patsogolo pace, omwe ni Jezu.” 5 Pomwe adabva bzimwebzi, iwo adabatizidwa m’dzina la Mbuya Jezu.