Bzomwe Mungacite Kuti Pfunziro Lanu la Bibliya Likhale la Phindu na Lakudekeza

Djosuwe ankuwerenga cakutonga ca Mulungu; mpanda wa Jeriko unkugwa koma nyumba ya Rahabe idaima, Djosuwe wamusa manja yace m’dzulu ndipo ankucita mpembo

DJOSUWE akhana udindo bukulu kwene-kwene bwakutsogolera mtundu wa Jirayeri mpaka kukapita m’Dziko Lakupiciridwa. Tsono kuti akwanise udindo bwacebo, Yahova adamulimbisa mwa kumuuza kuti: ‘Khwimika ucikhala wakulimba.’ Ndipo Yahova adauzambo Djosuwe kuti ambawerenge na kubvera Cakutonga cace kuti akwanise kumbacita bzinthu mwanzeru nakuti bzinthu bzimufambire bwino.—Djosuwe 1:7, 8.

Tinkukhala mu ‘nthawe zakunesa,’ bzomwe bzinkucitisa kuti moyo wathu ukhalembo wakunesa kwene-kwene. (2 Timotio 3:1) Tsono kuti bzinthu bzitifambire bwino ninga Djosuwe, tin’funika kumbateweza malango yomwe Yahova adamupasa. Ndipo ninga Djosuwe, tin’funikambo kumbawerenga Bibliya nsiku zense, ticimbaphatisa basa bzomwe timbawerengadzo kuti timbacite bzakusankhula mwanzeru.

Tsono winango wa ifepano pinango ambadziwa lini momwe angacitire pfunzirolo, ayai pinango ambafuna lini kupfunza. Napo bziri tenepo, kupfunza Bibliya n’kwakufunika kwene-kwene. Tenepo kuti mugumane phindu mucikomedwa na pfunziro lanu la Bibliya, onani kwadru yakuti: “Yezerani Kuphatisa Basa Malango Aya.”

Nyakunemba bukhu la Psalymo adaimba kuti: ‘Nditsogolereni mu njira ya bzakutonga bzanu, pakuti ndadekedwa nayo.’ (Psalymo 119:35) Ninga nyakunemba Psalymoyu, imwepo mungadekedwembo na pfunziro lanu la Bibliya, ndipo mun’dzagumana bzinthu bzizinji bzomwe bzin’dzakuthandizani kupitiriza kupfunza Bibliyalo.

N’cadidi kuti imwepo munkutsogolera lini gulu la wanthu ninga Djosuwe, koma mumbagumana na mabvuto yakusiyana-siyana pa moyo wanu. Tsono ninga Djosuwe, pitirizani kupfunza na kubvera Fala la Mulungu. Ndipo mukacita bzimwebzi, mun’dzakwanisa kucita bzakusankhula mwanzeru ndipo bzinthu bzin’dzakufambirani bwino.

YEZERANI KUPHATISA BASA MALANGO AYA

Mbacitani mpembo mukanati kuyamba pfunziro lanu. M’Bibliya muna nzeru za Yahova zomwe zimbatithandiza pa moyo wathu. Tenepo, mukambawerenga Bibliya mbakumbirani Yahova kuti akuthandizeni kubvesesa na kumbakumbukira bzomwe mwawerengabzo, mucimbabziphatisa basa pakucita bzakusankhula bzanzeru pa moyo wanu.—Ezara 7:10.
Mbacitani mibvunzo. Pomwe munkuwerenga Bibliya ayai mabukhu manango mbacitani mibvunzo. Mwa ciratizo, mbabzibvunzani kuti: ‘Kodi bzomwe ndinkuwerengabzi bzinkundipfunzisa ciyani pakulewa bza Yahova? Kodi bzimwebzi bzinkubverana tani na nfundo ikulu ya m’Bibliya? Kodi ndingaphatise tani basa nfundo zimwezi kuti ndithandizembo winango?’
Mbakumbukirani bzomwe munkupfunzabzo. Pomwe munkupfunza, mbaimani pang’ono kuti mukumbukire bzomwe munkuwerengabzo. Patsogolo pace, mbabzibvunzani kuti: ‘Kodi ndinkubva tani na bzomwe ndinkuwerengabzi? Ndipo n’thangwe ranyi ndinkubva tenepa? Kodi bzimwebzi bzinkubverana tani na bzomwe bzidandicitikira kale m’mbuyomu ndipo bzinkubveranambo tani na bzomwe bzinkundicitikira tsapano ayai na bzomwe bzin’dzandicitikira kutsogoloku? Kodi ndingaphatise tani basa malango ya m’Bibliyaya pa moyo wangu?’ (Djobi 23:5; Psalymo 49:3) Mukambakumbukira mbawonani penu mungakwanise kufotokoza bza thangwe lomwe limbacitisa Yahova kuletsa atumiki wace kumbacita bzinthu bzinango. Ayai penu munkuwerenga nkhani ya munthu munango m’Bibliya, mbakumbukirani bzomwe bzingadacitikira munthuyo, bzingadakhala kuti iye adacita bzinthu mwakusiyana na momwe adacitiramo.—Bzakutonga 32:28, 29.
Mbaphatisani basa luso lanu lakukumbuka pomwe munkuwerenga. Mwa ciratizo, kodi mungakwanise kukumbukira momwe bzinthu bzikhaliri pomwe azibale wace wa Zuze adamugulisa kwa Ajimayeri? (Ciyambo 37:18-28) Ndipo pomwe munkuwerenga, kodi munkukwanisa kuwona, kubva ayai kubva mnunci wa cinthu ciri-cense? Bziyezezereni kuti mulipombo pa cakucitikaci. Kodi n’ciyani comwe wanthuwo akhakumbuka ndipo akhabva tani? Mukambaphatisa basa luso lanu lakukumbuka pomwe munkupfunza, pfunziro lanu lin’dzakhala la phindu.
Mbaphatisani basa bzinthu bzakufufudzira nkhani bzomwe gulu lathu limbatipasa ndipo bzimwebzi bzin’dzacitisa kuti pfunziro lanu likhale la phindu. Tenepo, pfunzani momwe mungaphatisire basa bzinthu bzakufufudzira bzomwe bziripo m’cirewedwe canu pa interneti ayai bzakudindidwa. Ndipo lekani kuzeza kukumbira thandizo kwa winango kuti akuthandizeni momwe mungabziphatisire basa. Mwa ciratizo, Índice das Publicações da Torre de Vigia ayai Guia de Pesquisa para Testemunhas de Jeová, bzingakuthanidzeni kugumana nkhani zinango zomwe munkuzifuna pabodzi na mavesi manango ya m’Bibliya. Ndipo mungaphatisembo basa apêndice ya Tradução do Novo Mundo da Bíblia Sagrada penu linkugumanika m’cirewedwe comwe mumbakwanisa kuwerenga. Apêndice imweyi ina mapa zakulatiza komwe kukhakhala mbuto zinango zakufotokozedwa m’Bibliya pabodzi na bzinthu bzinango.
Bwerezerani nfundo zikulu-zikulu zomwe mwapfunza. Kucita bzimwebzi kun’dzakuthandizani kumbakumbukira bzomwe mwapfunzabzo, ndipo mbauzanimbo winango. Kodi pana nfundo inango yomwe mwapfunza yomwe mungaiphatise basa mu utumiki bwakumunda? Mukacita bzimwebzi, imwepo mun’dzakwanisa kumbakumbukira nfundo zakufunika kwene-kwene ndipo winango an’dzagumanambo phindu na pfunziro lanulo.