Mafala ya m'nyantsi

a 1 Wamambo 17:17 Pambuyo pa bzimwebzi, mwana wacimuna wa mkazi omwe akhali mwenekaciro wa nyumbayo, adayamba kuduwala ndipo matendayo yadakula, acifa. 18 Bzitacitika bzimwebzi, mkaziyo adati kwa Eliya: “Imwe munthu wa Mulungu wacadidi, kodi munande ciyani? Kodi mwabwera pa mui pangu pano kuti mudzandikumbuse bzakuphonya bzangu nakuti mudzaphe mwana wangu?” 19 Koma Eliya adati kwa mkaziyo: “Ndipase kuno mwanayo.” Tenepo, adatenga mwanayo m’manja mwa mkaziyo, aciyenda naye ku cipinda capadzulu, cipinda comwe Eliyayo akhakhala ndipo adamugonesa pa kama yace. 20 Tenepo, iye adadandaulira Yahova aciti: “Imwe Yahova Mulungu wangu, kodi munkubweresera tsoka mkazi mansiwa omwe ndikukhala pa mui paceyu, mwa kupha mwana wace?” 21 Patsogolo pace, adakumbatira mwanayo katatu kense acidadandaulira Yahova kuti: “Imwe Yahova Mulungu wangu, ndaphata minyendo, citisani kuti moyo wa mwanayu ubwerere pomwe mwa iye.” 22 Tenepo, Yahova adabva mkumbiro wa Eliya, ndipo moyo wa mwanayo udabwerera mwa iye, acikhala pomwe na moyo. 23 Eliya adatenga mwanayo acibuluka naye m’cipinda capadzulu ca nyumbayo, aciyenda kukamupereka kwa mai wace. Ndipo iye adati kwa maiyo: “Ona, mwana wako ana moyo.” 24 Mkaziyo atawona bzimwebzi adati kwa Eliyayo: “Tsapano ndazindikira kuti imwepo ndimwedi munthu wa Mulungu ndipo mafala ya Yahova yomwe mumbalewa njacadidi.”