Apostolo adabvera lamulo la Jezu lakuti apalizire bzipsa bzabwino pa dziko lense la pansi. Mu gole la 47 EC, Akristau wa ku Antiyokiya adatumiza Paulo na Barnaba kuti akapalizire ku mbuto zakusiyana-siyana. Amuna awiriwa adakapalizira na nyongo ku mizinda yense ya ku dziko la Ásia Menor, ninga ku Derbe, Listra na Ikoniyo.

Paulo na Barnaba akhambapalizira wanthu wense kuyambira anyakusauka, anyakudala, akulu-akulu na wana. Wanthu azinji adakhulupira mafala yakulewa bza Jezu Kristu. Pomwe Paulo na Barnaba akhapalizira Serjio Paulo, mtongi wa ku Chipre, nyamatsenga munango adayezera kuwaphingiza. Tsono Paulo adati kwa nyamatsengayo: ‘Yahova akulange.’ Ndipo pa nthawe ibodzi-bodziyo, nyamatsengayo adakhala zimola. Pomwe Serjio Paulo adawona bzimwebzo, iye adakhaliratu mteweri wa Kristu.

Paulo na Barnaba akhambapalizira ku mbuto iri-yense, ninga m’misika, m’miseu, nyumba na nyumba na m’masinagoga. Mu mzinda wa Listra, iwo adapoza munthu omwe akhafamba lini thangwe ra kupunduka minyendo. Wanthu wense omwe adawona bzimwebzo, adakumbuka kuti iwo akhali mirungu, ndipo adayamba kuwanamata. Tsono Paulo na Barnaba adawaletsa, aciwauza kuti: ‘Namatani Mulungu yekha! Ifepano ndifembo wanthu ninga imwepo.’ Patsogolo pace, adabwera Ajuda winango omwe adauza wanthuwo bzinthu bzomwe bzidacitisa kuti iwo aipidwe na Paulo. Tenepo, wanthuwo adamuboma na minyala, ndipo adamukwekweta, acikamusiya kunja kwa mzindayo thangwe akhakumbuka kuti iye wafa. Tsono Paulo akhalibe kufa! Akristau anzace adakamutenga, aciyenda naye kumui kwawo mu mzindamo. Patsogolo pace, Paulo adadzabwerera ku Antiyokiya.

Mu gole la 49 EC, Paulo adacita pomwe ulendo bwakukapalizira ku mbuto zinango. Ndipo, atamala kuwona abale wa ku dziko la Ásia Menor, iye adayendambo kapalizira ku dziko la Europa. Iye adafika m’mizinda ya Atena, Efezo, Firipo, Tesalonika na mbuto zinango. Ndipo Paulo adacita ulendobo pabodzi na Sila, Luka na Timotio. Iwo adamanga pabodzi magwere, aciyalimbisa. Ndipo Paulo adamala gole libodzi na meya mu mzinda wa Kolinto kuti alimbise abale. Ku Kolintoko iye akhapalizira, kupfunzisa na kumbanembera matsamba magwere yakusiyana-siyana, ndipo adaphatambo basa lakumbakonza matendi. Na kupita kwa nthawe, Paulo adadzabwerera pomwe ku Antiyokiya.

Mu gole la 52 EC, Paulo adadzayenda pomwe kacitatu ku dziko la Ásia Menor kuti akapalizire. Iye adafika ku mzinda wa Firipo na Kolinto. Patsogolo pace, iye adamala magole mazinji mu mzinda wa Efezo, acimbapalizira, kupoza atenda na kuthandiza magwere ya kumweko. Iyembo akhambapalizira nsiku zense m’bwalo la nyumba ibodzi ya mapfunziro, ndipo wanthu azinji adamutetekera, acicinja makhalidwe yawo. Atamala kupalizira bzipsa bzabwino m’madziko mazinji, Paulo adadzayenda ku Jeruzalemu.

Ku mzinda wa Firipo, mtsikana munango akhana cimzimu comwe cikhamuvimisa bzakutsogolo. Ndipo wanthu winango akhamuphatisa basa kuti ambadye naye, acigumana kobiri zizinji. Pomwe Paulo na Sila adayenda ku Firipoko, mtsikanayo mwakutsogoleredwa na cimzimuco, akhambawatewera nsiku zense, acimbakuwa kuti: ‘Amunawa, mbakapolo wa Mulungu mkululetu!’ Tsono, Paulo adauza cimzimuco kuti: ‘Mu dzina la Jezu, coka mwa mtsikanayu!’ Ndipo cimzimuco cidacokadi.

Pomwe wanthu omwe akhadya na mtsikanayo adawona kuti iye akhakwanisa lini pomwe kumbavima bzakutsogolo, iwo adakalipa kwene-kwene thangwe akhaluza kobiri. Tenepo, iwo adaphata Paulo na Sila, aciyenda nawo kwa akulu-akulu wa boma, acikalewa kuti: ‘Amunawa ankubvera lini boma, ndipo ankubweresa phiringu mu mzinda muno!’ Tenepo, akulu-akuluwo adatonga kuti Paulo na Sila amenyedwe, acifungiridwa m’kawoko. Ndipo mulindiri wa m’kawokomo adamangirira minyendo yawo ku cimuti, aciwaikha m’kawoko momwe mukhana mdima wadzawoneni.

Paulo na Sila adayamba kuimba nyimbo za kutumbiza Yahova, ndipo wanthu wense omwe akhali m’kawokomo akhabva nyimbozo. Mwadzidzi, pakati pa usiku, pansi padatekenyeka mwakuti misuwo ya m’kawokomo idafunguka, ndipo unyolo bomwe akhadamangira nabo anyam’kawokowo budabwedzeka. Mulindiri wa m’kawokomo adathamanga kuti akawone bzomwe bzikhadacitikabzo. Atafika kumweko, adawona kuti misuwo yense ikhadafunguka. Tenepo, iye adapfuwa mphanga yace kuti abziphe thangwe akhakumbuka kuti anyam’kawowo akhadathawa.

Tsono Paulo adakuwa, aciti: ‘Leka kubzipha! Tense tiri muno!’ Ndipo mulindiri wa m’kawokoyo adakagodamira Paulo na Sila, aciwabvunza kuti: ‘Kodi ndin’funika kucita ciyani kuti ndidzapulumuke?’ Iwo adamuuza kuti: ‘Iwepo na banja lako mun’funika kukhulupira Jezu.’ Ndipo Paulo na Sila adauza mulindiri wa m’kawokoyo mafala ya Yahova, ndipo iye na banja lace lense adabatizidwa.

Timotio akhatumikira m’gwere la mzinda wa Listra. Pai wace akhali Mgerego, tsono mai wace akhali Mjuda. Pomwe akhali mwana, Timotioyo adapfunzisidwa bza Yahova na mai wace, a Eunise pabodzi na yavu wace wacikazi, a Loide.

Pomwe Paulo adakazungira mzinda wa Listra kaciwiri Timotio akhali tswaka, ndipo Pauloyo adawona kuti iye akhana lufoyi na abale, ndipo akhafuna kuwathandiza. Tenepo, Pauloyo adauza Timotio kuti ayende naye pabodzi pa ulendo bwacebo. Na nthawe, Paulo adathandiza Timotio kupalizira bzipsa bzabwino na kupfunzisa bwino wanthu.

Yahova akhaphatisa basa mzimu wace wakucena kuti alatize Paulo na Timotio komwe iwo akhafunikira kuyenda. Nsiku inango, usiku, Paulo adawonesedwa na Yahova munthu omwe akhamuuza kuti ayende ku Masedoniya kuti akawathandize. Tenepo, Paulo, Timotio, Sila na Luka adayenda kumweko kuti akapalizire, ndipo adamangambo magwere.

Tesalonika ukhali mzinda wa dziko la Masedoniya, ndipo wanthu azinji adakhala Akristau kumweko. Tsono Ajuda winango akhawenga Paulo na anzacewo. Tenepo, iwo adapangana, aciphata Paulo na anzacewo. Ndipo adayenda nawo kwa atongi wa Aroma, acikalewa kuti: ‘Amunawa mba anyamadulanthaka wa boma la Roma!’ Paulo na Timotio adawona kuti akhali pa ngozi. Tenepo, usiku iwo adathawa, aciyenda ku mzinda wa Bereya.

Wanthu wa ku Bereya akhafunisisa kubva bzipsa bzabwino, ndipo Agerego pabodzi na Ajuda adakhala ateweri wa Kristu. Tsono Ajuda winango wa ku Tesalonika adayenda ku Bereyako, acikanyosera mabvuto Paulo. Tenepo, Paulo adathawa, aciyenda ku Atena. Tsono Timotio na Sila adasala ku Bereyako kuti alimbise abale. Na kupita kwa nthawe, Paulo adadzauza Timotio kuti ayende pomwe ku Tesalonika, acikathandiza abale omwe akhazunzidwa kwene-kwene kumweko. Patsogolo pace, Paulo adadzatumambo Timotio kuti akazungire magwere mazinji na kuyalimbisa.

Pauloyo adauza Timotio kuti: ‘Wale omwe an’funa kutumikira Yahova, an’dzazunzidwa.’ Ndipo Timotio adadzazunzidwa, acimangidwa thangwe ra cikhulupiro cace. Tsono iye adakomedwa kuphatisa basa mpata umweyo kuti alatize kukhulupirika kwace kwa Yahova.

Ndipo Paulo adauzambo Akristau wa ku Firipo kuti: ‘Ndinkukutumizirani Timotio. Ndipo iye an’dzakupfunzisani momwe mungakhalire na moyo wacikristau.’ Paulo akhadziwa kuti angadakhulupira Timotio thangwe iwo akhali axamwali wa ponde-mpondembo, ndipo adaphata basa pabodzi kwa magole mazinji.

Ulendo bwacitatu bwa upalizi bwa Paulo budamalizira ku Jeruzalemu. Kumweko iye adamangidwa, aciikhidwa m’kawoko. Nsiku inango, usiku, Jezu adabwerera Paulo ku tulo, acimuuza kuti: ‘Iwepo uniyenda ku Roma, ucikapalizira kumweko.’ Ndipo Pauloyo adatengedwa ku Jeruzalemuko, aciyendesedwa ku Kaesarea komwe adakamala magole mawiri m’kawoko. Atamala kuyeruzidwa na Festo, mtongi wa ku Kaesareako, Pauloyo adati: ‘Ndikukumbira kuti ndikayeruzidwembo na Sezare, ku Roma.’ Ndipo Festo adati: ‘Pakuti wakumbira kuti ukayeruzidwe na Sezare, bzin’khala tenepoyo.’ Tenepo, Paulo adapakizidwa mu ngalawa kuti ayende ku Romako, ndipo Luka na Aristako adayenda naye pabodzi.

Ali pakati pa ulendobo, kudacitika conzi camphanvu m’madzimo kwa nsiku zizinji, mwakuti wanthuwo akhakumbuka kuti angadafa. Tsono Paulo adawauza kuti: ‘Anjo wa Mulungu wandiuza ku tulo kuti: “Leka kugopa Paulo. Mwensenemwe munifika bwino-bwino ku Roma.” Tenepo, limbani mtima! Ifepano tin’fa lini.’

Conzi camphanvuco, cidapitiriza kwa nsiku 14. Patsogolo pace, iwo adawona nsuwa ya Malta na patali, ndipo adayamba kuyenda kumweko. Tsono atasala pan’gono kufika pa nsuwapo, ngalawa yawoyo idatcerera pa mcenga, iciyamba kubaduka-baduka thangwe ra mphanvu ya madzi. Tsono wanthu 276 omwe akhali m’mwemowo adapulumuka wense. Winango adacita kutcula mpaka pa nsuwapo, ndipo winango adaphatirira tubzipande twa ngalawayo. Wanthu omwe akhakhala pa nsuwapo adawasamalira bwino, ndipo adaphatiza moto kuti iwo awothe.

Patapita minyezi mitatu, Paulo adatengedwa na acikunda, aciyenda naye ku Roma na ngalawa inango. Pomwe iye adafika ku Romako, abale adayenda kawonana naye. Pomwe Pauloyo adawona abalewo, iye adalimbisidwa kwene-kwene, ndipo adatenda Yahova. Napo akhali nyam’kawoko, Paulo adabvumizidwa kukakhala m’nyumba ya aluge kwa magole mawiri pomwe akhadikhirira kutongedwa, ndipo akhalindiridwa na mcikunda m’bodzi. Wanthu akhayenda kukamuwona, ndipo iye akhambawapalizira bza Umambo bwa Mulungu na kuwapfunzisa bza Jezu. Paulo akhambanembambo matsamba, aciyatumiza ku magwere ya ku Ásia Menor na ku Judeya. Yahova adaphatisa basa Paulo mwakukwanira kuti apalizire bzipsa bzabwino kwa wanthu wa mitundu yense.