Bibliya limbalewa kuti moyo wa wanthu “ngufupi ndipo ngwakudzala na mabvuto.” (Djobi 14:1) Kodi umweyu ni moyo omwe Mulungu akhafuna kuna ifepano? Penu ne, tsono n’ciyani comwe Mulungu an’funa kuna ifepano? Kodi bzomwe Mulungu an’funabzo bzin’dzakwanisika? Mbatiwoneni mitawiro yakutsangalaza ya m’Bibliya.

1.Kodi Yahova akhafuna kuti moyo wathu ukhale tani?

Yahova akhafuna kuti tikhale na moyo wabwino kwene-kwene. Pomwe adalenga wanthu wakuyamba, Adamu na Eva, iye adawaikha mu paraizo wakudeka wakucemeredwa zunde la Edeni. “Ndipo Mulungu adawasimba, aciwauza kuti: ‘Balanani, muwande, mudzaze dziko la pantsi, mucirinyang’anira.’” (Genesesi 1:28) Yahova akhafuna kuti iwo akhale na wana, acitise dziko lentse la pantsi kukhala paraizo acisamalira bzirombo. Iye akhafuna kuti wanthu wentse akhale na thanzi labwino acikhalambo na moyo wakusaya kumala.

Napo kuti bzinthu bziri lini ninga momwe Mulungu akhafunira,a koma bzomwe iye akhafuna kuna wanthufe bziribe kucinja. (Zaiya 46:10, 11) Iye akadafuna kuti wanthu wakubvera akhale na moyo wabwino na wakusaya kumala. — Werengani Apokalipse 21:3, 4.

2.Kodi tingakhale tani na moyo wa thandauzo ntsiku zino?

Yahova adatilenga na mtima wa kufuna “kutsogoleredwa” naye, bzomwe ni cikhumbo cakufuna kumudziwa na kumunamata. (Werengani Mateu 5:3-6.) Iye an’funa kuti tikhale pa uxamwali bwakulimba na iye, “kufamba m’njira zace, kumufuna” na kumutumikira “na mtima [wathu] wentse.” (Deuteronomiyo 10:12; Salimo 25:14) Tikacita tenepoyo, tin’dzakhala wakukondwa napo kuti tikugumana na mabvuto. Kunamata Yahova kumbacitisa moyo wathu kukhala na thandauzo, thangwe timbakhala na moyo mwakubverana na kufuna kwa Mulungu.

3. Yahova an’funa kuti wanthu akhale na moyo wabwino

Onani VIDIYO, ndipo mukamala cezeranani mbvunzo wakutewerayu.

VIDIYO: Thangwe Ranyi Mulungu Adalenga Dziko la Pantsi? — Cipande (1:41)

• Thangwe ranyi Mulungu adalenga dziko lakudekali?

Werengani Mpalizi 3:11, ndipo mukamala cezeranani mbvunzo wakutewerayu:

• Kodi bzimwebzi bzikukupfunzisani ciyani pakulewa bza Yahova?

4. Bzomwe Mulungu an’funa kuna wanthu bziribe kucinja?

Werengani Salimo 37:11, 29 na Zaiya 55:11, ndipo mukamala cezeranani mbvunzo wakutewerayu:

• Kodi timbadziwa tani kuti bzomwe Mulungu an’funa kuna ifepano bziribe kucinja?

5. Kunamata Yahova kumbacitisa moyo wathu kukhala na thandauzo

VIDIYO: Ndidadziwa Thangwe Ranyi Ndina Moyo (5:03)

• Kodi Terumi adagumana phindu liponi thangwe ra kudziwa cakulinga ca moyo?

Werengani Mpalizi 12:13, ndipo mukamala cezeranani mbvunzo wakutewerayu:

• Kodi tingalatize tani kutenda Yahova thangwe ra bzinthu bzomwe adaticitira?

KODI MWAPFUNZA CIYANI?

Yahova an’funa kuti tikhale na moyo wakukondwa na wabwino pa dziko la pantsi pano. Tikamunamata na mtima wathu wentse moyo wathu umbakhala na thandauzo.

Mibvunzo yakubwerezera

• Kodi Yahova akhafuna kuti Adamu na Eva akhale na moyo uponi pomwe adawalenga?

• Kodi timbadziwa tani kuti bzomwe Mulungu ambafuna kuna wanthu bziribe kucinja?

• Kodi mungagumane kuponi thandauzo la moyo?

ONANI POMWE IBZI

Pfunzani kuti mudziwe thangwe ranyi tingakhale na citsimikizo cakuti zunde la Edeni likhalipodi.

“Kodi Kunalidi Munda wa Edeni?” (Nsanja ya Olonda ya 1 Janeiro, 2011)

Pfunzani thangwe ranyi tingatsimikizire kuti dziko la pantsi lin’dzakhala mpaka kale-kale.

“Kodi Dzikoli Lin’dzapfudzidwa?” (Nkhani ya pa jw.org)

Onani bzomwe Bibliya limbalewa pa nkhani ya kudziwa thandauzo la moyo wanu.

“Thangwe Ranyi Tina Moyo?” (Nkhani ya pa jw.org)

Onani momwe munthu omwe akhakumbuka kuti akhana bzentse pa moyo adazindikira kuti pakhana cinthu comwe cikhasala.

Tsapano Ndina Moyo wa Thandauzo (3:55)

2. Kodi mbani omwe an’dzatonga pabodzi na Jezu?

Jezu an’dzatonga lini yekha. Iye an’dzatonga pabodzi na wanthu wakucokera ku “dzinza liri-lentse, cirewedwe ciri-centse, mtundu uli-wentse . . . ndipo iwo an’dzakhala amambo acidzatonga dziko la pantsi.” (Apokalipse 5:9, 10) Kodi mbangasi omwe an’dzatonga pabodzi na Kristu? Kuyambira pomwe Jezu adabwera pa dziko la pantsi, Akristau azinji akukhala ateweri wace. Kodi ni wentse omwe an’dzatonga naye? Ne, koma ni Akristau wakukwana 144 000 okha basi. (Werengani Apokalipse 14:1-4.) Ndipo Akristau wentse omwe an’dzayenda lini kudzulu an’dzakhala mzika za Umambobo pa dziko la pantsi pano. — Salimo 37:29.

Umambo bwa Mulungu bukutonga kale. Ndipo tsapanopapa bunicinja bzinthu pa dziko la pantsi. Mbaticezeraneni bzinthu bzabwino bzomwe bzin’dzacitika pomwe Umambobo bun’dzakhala bukutonga pa dziko la pantsi.

1. Kodi Umambo bwa Mulungu bun’dzabweresa tani mtendere na cirungamo pa dziko la pantsi?

Jezu omwe ni Mambo wa Umambo bwa Mulungu, an’dzapha wanthu wakuipa na kupfudza maboma ya wanthu pa nkhondo ya Armagedo. (Apokalipse 16:14, 16) Pa nthaweyo in’dzakwanirisidwa polofesiya ya m’Bibliya yakuti: “Kandosala ka nthawe pang’ono, ndipo anyakuipa an’dzawoneka lini pomwe.” (Salimo 37:10) Jezu an’dzaphatisa basa Umambo kuti atsimikizire kuti dziko lentse lina mtendere na cirungamo. — Werengani Zaiya 11:4.

2. Kodi moyo un’dzakhala tani Mulungu akadzakwanirisa cakulinga cace pa dziko la pantsi?

Mu utongi bwa Umambo bwa Mulungu, “anyakulungama an’dzatambira dziko la pantsi, acidzakhala m’mwemo mpaka kale-kale.” (Salimo 37:29) Kumbukirani kukhala m’dziko lomwe munthu ali-wentse ambacita bzinthu bzabwino, ambafuna Yahova na anzace. Palibe omwe an’dzaduwala ndipo munthu ali-wentse an’dzakhala mpaka muyaya.

3. Kodi n’ciyani comwe Umambo bwa Mulungu bun’dzacita bukadzamala kupha wanthu wakuipa?

Pambuyo pakupha wanthu wakuipa, Jezu an’dzatonga magole 1000 ninga Mambo. M’magole yamweya, iye na wa 144 000 omwe an’dzatonga naye pabodzi an’dzathandiza wanthu kukhala wakulungama pa dziko la pantsi. Kuphampha kwa magole 1000, dziko lentse lin’dzakhala paraizo wakudeka ndipo wanthu wentse an’dzakhala wakukondwa thangwe iwo an’dzakhala akubvera malamulo ya Yahova. Yakadzamala magole 1000 Jezu an’dzapereka Umambobo kwa pai wace, Yahova. Pa nthawe imweyo, dzina la Yahova “[lin’dzacenesedwa.]” (Mateu 6:9, 10) Bzimwebzi bzikadzacitika bzin’dzalatiza kuti Yahova ni mtongi wabwino omwe ambasamalira wanthu wace. Yahova an’dzapha Sathani, madimonyo na munthu ali-wentse omwe an’dzapandukira utongi bwace. (Apokalipse 20:7-10) Bzinthu bzabwino bzomwe Umambo bwa Mulungu bun’dzacita bzin’dzakhala mpaka muyaya.

FUFUDZANI BZINANGO

4. Umambo bwa Mulungu bun’dzapfudza maboma ya wanthu

“Munthu ambaboneresa mwanzace pakumutonga.” (Mpalizi 8:9) Yahova an’dzaphatisa basa Umambo bwace kuti amalise kusaya cirungamo.

Werengani Daniyeli 2:44 na 2 Atesalonika 1:6-8, ndipo mukamala cezeranani mibvunzo ikutewerayi:

• Kodi n’ciyani comwe Yahova na Mwana wace, an’dzacita na maboma ya wanthu pabodzi na omwe ambayathandizira?

• Kodi bzomwe mwapfunza pakulewa bza Yahova na Jezu bzimbakutsimikizani tani kuti bzomwe iwo anʼdzacita bzin’dzakhala bzacilungamo?

5. Jezu ni Mambo wabwino

Ninga Mambo wa Umambo bwa Mulungu, Jezu an’dzathandiza wanthu pa dziko la pantsi mu njira zakusiyana-siyana. Onani VIDIYO kuti muwone momwe Jezu adalatizira kuti ambafuna kuthandiza wanthu ndipo onanimbo momwe Mulungu adamupasira mphanvu kuti acite bzimwebzo.

VIDIYO: Jezu Adalatiza Bzomwe Umambo Bun’dzacita (1:13)

Pomwe Jezu akhali pantsi pano adalatiza bzomwe Umambo bun’dzacita. Kodi ni bzisimbo bziponi bzomwe mukuwona m’nyantsimu bzomwe mumbabzikumbukira? Werengani mavesi yakuteweraya kuti yakuthandize kudziwa bwino bzisimbobzi.

6. Umambo bwa Mulungu bun’dzabweresa tsogolo labwino

VIDIYO: Momwe Bzinthu Bzin’dzakhalira Kutsogolo (4:38)

Werengani Salimo 145:16, ndipo mukamala cezeranani mbvunzo wakutewerayu:

• Kodi imwepo mumbabva tani thangwe ra kudziwa kuti Yahova an’dzapasa ali-wentse comwe akufuna?

KODI MWAPFUNZA CIYANI?

Umambo bwa Mulungu bun’dzacita bzomwe Mulungu akufuna. Bun’dzasandusa dziko la pantsi kukhala paraizo, lomwe lin’dzakhala na wanthu wabwino omwe an’dzatumikira Yahova mpaka muyaya.

Mibvunzo yakubwerezera

• Kodi Umambo bwa Mulungu bun’dzacenesa tani dzina la Yahova?

• Kodi n’ciyani comwe cikutitsimikizira kuti Umambo bwa Mulungu bun’dzakwanirisa bzomwe Bibliya limbalewa?

• Kodi imwepo mukudikhirira kuti Umambo budzakucitireni ciyani?

ONANI POMWE IBZI

Onani kuti Armagedo n’ciyani.

“Kodi Nkhondo ya Armagedo n’Ciyani?” (Nkhani ya pa jw.org)

Werengani nkhani yakulewa bza bzinthu bzomwe bzinʼdzacitika pa nthawe yomwe Jezu adaicemera kuti “citsautso cikulu.” — Mateu 24:21.

“Kodi Citsautso Cikulu nʼCiyani?” (Nkhani ya pa jw.org)

Onani bzomwe mabanja yangacite kuti yambakumbukire pabodzi bzomwe Umambo bun’dzacita m’paraizo.

Bziyezezereni Kuti Muli m’Paraizo (1:50)

Mu nkhani yakuti “Ndikhana Mibvunzo Mizinji Koma Ndikhagumana Lini Mitawiro Yace,” onani momwe munthu munango wa ndale adagumanira mitawiro ya mibvunzo yace.

“Bibliya Limbacinja Moyo wa Wanthu” (Ntsanza ya Mulindiri ya 1 Janeiro, 2012)