Kupfunza Bibliya n’cinthu cabwino kwene-kwene. Tsono nthawe zinango bzimbakhala bzakunesa kucita bzimwebzi. Nthawe zinango, mungawone kuti mungakwanise lini kupitiriza kupfunza Bibliya. Thangwe ranyi mpsakufunika kucita nyongo kuti mupitirize kupfunza Bibliya? N’ciyani comwe cingakuthandizeni kupirira napo mukugumana na mabvuto?

1. Thangwe ranyi kupfunza Bibliya n’kwakufunika?

“Fala la Mulungu ndamoyo na lamphanvu.” (Ahebereu 4:12) Bibliya ndakufunika kwene-kwene thangwe limbatiuza makumbukidwe ya Mulungu na momwe iye ambatiwonera. Bibliyalo limbandokuthandizani lini kukhala na cidziwiso koma limbakuthandizanimbo kukhala na nzeru na cidikhiro. Ndipo cinthu cakufunika kwene-kwene n’cakuti iro lingakuthandizeni kukhala xamwali wa Yahova. Mukambapfunza Bibliya, mumbakhala mukubvuma kuti mphanvu yace iphate basa kwa imwepo.

2. Thangwe ranyi mpsakufunika kuzindikira kufunika kwa cadidi ca m’Bibliya?

Cadidi ca m’Bibliya ni cuma cakufunika kwene-kwene. Ndipopa Bibliya limbatilimbikisa kuti “gula cadidi ndipo leka kucigulisa.” (Mimwani 23:23) Tikambakumbukira kufunika kwa cadidi ca m’Bibliya, tin’dzacita nyongo yakupitiriza kupfunza cadidico napo pomwe tagumana na mabvuto.—Werengani Mimwani 2:4, 5.

3. Kodi Yahova angakuthandizeni tani kuti mupitirize kupfunza Bibliya?

Pakuti Yahova ni Mulengi wa mphanvu-zentse na Xamwali wanu, iye an’funa kukuthandizani kuti mumudziwe. Iye angakupaseni “mphanvu na cikhumbo kuti mucite bzomwe iye akufuna.” (Werengani Afilipi 2:13.) Tenepo, penu nthawe zinango mungafunikire kulimbikisidwa kuti mupitirize kupfunza ayai muphatise basa bzomwe mukupfunza, Yahova angakuthandizeni. Ndipo penu mukufunikira mphanvu kuti mupirire mabvuto ayai mayezo iye angakupaseni. Nthawe zentse mbakumbirani Yahova mu mpembo kuti akuthandizeni kupitiriza kupfunza Bibliya.—1 Atesalonika 5:17.

FUFUDZANI BZINANGO

4. Tsimikizirani kuti kupfunza Bibliya n’kwakufunika kwene-kwene kwa imwepo

Nthawe zinango timbakhala wakutanganidwa kwene-kwene mwakuti tingawone kuti tiribe nthawe yakupfunza Bibliya. Kodi n’ciyani cingakuthandizeni? Werengani Afilipi 1:10, ndipo mukamala cezeranani mibvunzo yakutewerayi:

• Kodi imwepo mumbawona kuti “mpsiponi bzinthu bzomwe mpsakufunika kwene-kwene” pa moyo wanu?

• Kodi mungacite ciyani kuti kupfunza Bibliya kukhale cinthu cakuyamba pa moyo wanu?

1. Imwepo mucitenga baldi muciikha mataka ndipo muciikhambo minyala, minyalayo ingakwane lini

2. Imwepo muciyamba kuikha minyala m’baldimo, mungakhale na mbuto yakuikha mataka mazinji. Mwakundendemerana na bzimwebzi, mukaikha bzinthu bzakufunika kwene-kwene pa mbuto yakuyamba pa moyo wanu, mun’dzakwanisa kubzicita ndipo mun’dzakhalambo na nthawe yakucita bzinthu bzinango

Tikambapfunza Bibliya timbakhala tikubzidyesa mwauzimu ndipo timbakhala tikuzindikira kuti tin’funika kudziwa Mulungu na kumunamata. Werengani Mateu 5:3, ndipo mukamala cezeranani mbvunzo wakutewerayu:

• Kodi tin’dzagumana phindu liponi tikaikha pa mbuto yakuyamba kupfunza Bibliya?

5. Mumbapirire mukakhala mukugumana na mabvuto

VIDIYO: Adasimbidwa Thangwe ra Kupirira (5:22)

• Mu vidiyoyi, kodi axamwali na adzinza wa Francesco acita ciyani pomwe iye awauza bzomwe ambapfunza?

• Kodi iye adasimbidwa tani thangwe ra kupirira?

Werengani 2 Timotio 2:24, 25, ndipo mukamala cezeranani mibvunzo yakutewerayi:

• Kodi adzinza na axamwali wanu ambakuwonani tani thangwe ra kupfunza Bibliya?

• Mwakubverana na mavesiya, kodi imwepo mungatawire tani munthu omwe akukomedwa lini kukuwonani mukupfunza Bibliya? Thangwe ranyi?

6. Khulupirani kuti Yahova ankuthandizani

VIDIYO: Yahova Ambatithandiza Kuti Ticinje (3:56)

• Mu vidiyoyi, kodi n’ciyani comwe Jim wacinja kuti akondwese Yahova?

• Kodi n’ciyani comwe mwapfunza na ciratizo cace?

Werengani Ahebereu 11:6, ndipo mukamala cezeranani mibvunzo yakutewerayi:

• N’ciyani comwe Yahova an’dzacita kwa “wanthu omwe ambamulinga na mtima wentse” ayai wale omwe ambacita nyongo kuti amudziwe na kufuna kumukondwesa?

• Kodi imwepo mumbabzibva tani thangwe ra kudziwa kuti Yahova ambawona nyongo yomwe mumbacita kuti mupfunze Bibliya?

KODI MWAPFUNZA CIYANI?

Napo kuti mpsakunesa, kupfunza Bibliya kungakuthandizeni kukhala na moyo wakukondwa mpaka kale-kale. Pitirizani kukhulupira Yahova ndipo iye an’dzakusimbani.

Mibvunzo yakubwerezera

• Thangwe ranyi cadidi ca m’Bibliya n’cakufunika kwa imwepo?

• Kodi imwepo mumbawona kuti “mpsiponi bzinthu bzomwe mpsakufunika kwene-kwene” pa moyo wanu?

• Thangwe ranyi mun’funika kukumbira Yahova kuti akuthandizeni kupitiriza kupfunza Bibliya?

ONANI POMWE IBZI

Onani bzinthu bzinai bzomwe bzidathandiza wanthu azinji kuphatisa basa bwino nthawe yawo.

“Kodi Mungaphatise Tani Basa Bwino Nthawe Yanu?” (Mukani!, Fevereiro 2014)

Onani momwe Yahova adathandizira mkazi munango omwe mwamuna wace akhabvesesa lini thangwe lomwe mkaziyo akhacitira nyongo kuti akondwese Mulungu.

Yahova Ambatithandiza Kupirira Mabvuto (5:05)

Onani momwe mwamuna munango adagumanira phindu thangwe ra kupirira kwa mkazi wace.

Ndikhalamba Cadidi ca m’Bibliya (6:30)

Mboni za Yahova zimbalewedwa kuti zimbapfudza ubale. Kodi bzimwebzi mpsacadidi?

“Kodi Mboni za Yahova Zimbapfudza Mabanja ayai Zimbayamangiridza?” (Nkhani ya pa jw.org)

Tentsenefe timbafunika kusankhula bzakucita. Pa bzizinji bzomwe tingasankhulebzo bzingakhale bzabwino ayai bzakuipa kwa ifepano na kwa Yahova. Mwa ciratizo, tin’funika kusankhula komwe tingakakhale, bzomwe tingacite pa moyo wathu penu tinilowola ayai tinilowodwa. Tikacita bzinthu mwanzeru, tin’dzakhala wakukondwa ticikondwesambo Yahova.

1. Kodi mungaphatise tani basa Bibliya kuti mumbacite bzinthu mwanzeru?

Mukanati kucita cinthu ciri-centse, mbapembani kwa Yahova kuti akuthandizeni ndipo fufudzani m’Bibliya kuti muwone momwe iye ambaiwonera nkhaniyo. (Werengani Mimwani 2:3-6.) Pa nkhani zinango, Yahova ambaperekeratu lamulo lakusaya kunesa kubvesesa. Bzikakhala bziri tenepo, kubvera lamulolo cingakhale cinthu canzeru kucita.

Tsono tani penu palibe lamulo lomwe likuleweratu bzomwe mun’funika kucita? Yahova an’dzapitiriza kukutsogolerani “mu njira yomwe mun’funika kufamba.” (Zaiya 48:17) Kodi iye an’dzacita tani bzimwebzo? Pana mitemo yomwe ingakutsogolereni. Mitemo ya m’Bibliya ni cadidi comwe cimbatilatiza makumbukidwe ya Mulungu na momwe iye ambabvera. Kawiri-kawiri timbadziwa momwe Yahova ambabvera tikambawerenga m’Bibliya nkhani yomwe idacitika kale. Tikadziwa momwe Yahova ambabvera pa nkhani zakusiyana-siyana, tin’dzakwanisa kucita bzinthu bzomwe bzimbamukondwesa.

2. Kodi n’ciyani comwe mun’funika kukumbukira pomwe mukanati kucita cinthu ciri-centse?

Bibliya limbati: “Nyakucenjera ambawona bwino komwe akuyenda.” (Mimwani 14:15) Bzimwebzi bzikuthandauza kuti pomwe tikanati kucita cinthu ciri-centse, tin’funika kukhala na nthawe ya kukumbukira bzomwe tin’funa kucitabzo. Pomwe mukukumbukirapo mbabzibvunzani kuti: ‘Kodi ni mitemo iponi ya m’Bibliya yomwe ningaiphatise basa? Kodi ni mtemo uponi omwe ungandithandize kukhala na mtendere wa mu mtima? Kodi wanthu winango angabziwone tani bzomwe ningasankhulebzo? Cakufunika pa bzentse, kodi Yahova an’dzakomedwa nabzo?’ — Deuteronomiyo 32:29.

Yahova anabo ugo bwakutiuza bzomwe mpsabwino na bzomwe mpsakuipa. Tikadziwa bwino malamulo ya Yahova ticitsimikiza kucita bzinthu mwakubverana na malamuloyo, tin’dzapfunzisa mtima wathu. Mtima omwe ukulewedwa pamwepayu ni unthu bwathu bwamkati bomwe bumbatithandiza kudziwa cinthu cabwino na cakuipa. (Aroma 2:14, 15) Tikapfunzisa bwino mtima wathu un’dzatithandiza kucita bzinthu mwanzeru.

FUFUDZANI BZINANGO

3. Bvumani kuti Bibliya likutsogolereni

VIDIYO: Mbaphatisani Basa Mitemo ya m’Bibliya Kuti Ikutsogolereni (5:54)

• Kodi ufulu bwa kusankhula n’ciyani?

• Thangwe ranyi Yahova adatipasa ufulu bwa kusankhula?

• N’ciyani comwe Yahova watipasa kuti cimbatithandize kuphatisa bwino basa ufulu bwathu bwa kusankhula?

Kuti muwone ciratizo cibodzi ca mtemo wa m’Bibliya, werengani Aefezo 5:15, 16. Ndipo mukamala onani momwe mungaphatisire “bwino basa nthawe yanu” . . .

• pomwe mukuwerenga Bibliya ntsiku zentse.

• kuti mukhale mwamuna ayai mkazi wabwino, m’bereki wabwino na mwana wabwino.

• kuti mumbagumanike pa mitsonkhano ya gwere.

4. Pfunzisani mtima wanu kuti mumbacite bzinthu mwanzeru

VIDIYO: “Pitirizani Kukhala na Cikumbu-mtima Cabwino” (5:13)

• Mu vidiyoyi, kodi n’ciyani comwe mpfumakaziyi yacita kuti ipfunzise mtima wace na kucita bzinthu mwanzeru kuti ikondwese Yahova?

Thangwe ranyi tin’funika lini kubvunza winango bzomwe iwo angadacita bzingadakhala kuti akugumana na bvuto ninga lathulo? Werengani Ahebereu 5:14, ndipo mukamala cezeranani mibvunzo ikutewerayi:

• Napo bziciwoneka ninga mpsakupusa kukumbira winango kuti atiuze bzakucita, tsono n’ciyani comwe ali-wentse an’funika kusiyanisa?

• Kodi n’ciyani comwe cingakuthandizeni kupfunzisa mtima wanu na kumbacita bzinthu mwanzeru?

5. Mbalemekezani bzomwe winango ambacita

Wanthu wakusiyana angacitembo bzinthu mwakusiyana. Kodi tingalemekeze tani bzomwe winango angacite? Onani bzakucitika bziwiri:

Cakucitika cakuyamba: mpfumakazi yomwe imbafuna kubvala kalasau pa kucita mabasa yakusiyana-siyana yafulukira ku gwere komwe kuna mpfumakazi zomwe zimbakomedwa lini kuwona mpfumakazi zidabvala makalasau.

Werengani Aroma 15:1 na 1 Akolinto 10:23, 24, ndipo mukamala cezeranani mibvunzo ikutewerayi:

• Mwakubverana na mavesiya, kodi n’ciyani comwe mpfumakaziyi ingacite? Kodi n’ciyani comwe mungacite mukakhala muli pabodzi na munthu omwe ambawona kuti cinthu cinango n’cakuphonyeka koma kwa imwepo n’cakuphonyeka lini?

Cakucitika caciwiri: M’bale akudziwa kuti Bibliya limbaletsa lini kumwa pangʼono, tsono iye wawona kuti bziri bwino kundolekeratu na kumwako. Tsono iye wacemeredwa kumui kwa m’bale munango kuti akadye pabodzi ndipo kumweko akuwona abale winango akumwa.

Werengani Mpalizi 7:16 na Aroma 14:1, 10, ndipo mukamala cezeranani mibvunzo ikutewerayi:

• Mwakubverana na mavesiya, kodi n’ciyani comwe m’baleyu an’funika kucita? Kodi n’ciyani comwe mungacite mukawona munthu akucita cinthu comwe imwepo mungacite lini?

Kodi n’ciyani comwe mungacite kuti mumbacite bzinthu mwanzeru?

1. Pembani kwa Yahova kuti akuthandizeni momwe mungacitire bzinthu mwanzeru. — Tiyago 1:5.

2. Fufudzani m’Bibliya na m’mabukhu yathu kuti mugumane mitemo yomwe ingakuthandizeni pa nkhaniyo. Ndipo mungabvunzembo Akristau wakukhwima mwauzimu.

3. Kumbukirani momwe winango angawonere bzomwe mukusankhula na momwe imwepo mungagumanire phindu na bzomwe mwasankhulabzo.

KODI MWAPFUNZA CIYANI?

Timbacita bzinthu mwanzeru tikadziwa momwe Yahova ambabvera na nkhaniyo ticiwonambo penu bzomwe tin’citabzo bzinithandiza ayai kusunamisa wanthu winango.

Mibvunzo yakubwerezera

• Kodi mungacite tani bzinthu bzomwe bzingakondwese Yahova?

• Kodi n’ciyani comwe cingakuthandizeni kupfunzisa mtima wanu?

• Kodi tingalemekeze tani bzomwe winango angacite?

ONANI POMWE IBZI

Kodi mungacite tani bzinthu bzomwe bzingalimbikise uxamwali bwanu na Mulungu?

“Citani Bzinthu Bzomwe Bzingalemekeze Mulungu”(Ntsanza ya Mulindiri ya 15 Abril, 2011)

Pfunzani bzinthu bzizinji bza momwe Yahova ambaperekera malango.

Yahova Ambatsogolera Wanthu Wace (9:50)

Onani bzomwe bzidathandiza mwamuna munango kucita bzinthu bzomwe bzikhali bzakunesa kwene-kwene.

Na Yahova, Bzinthu Bzabwino Mpsakutsimikizirika (5:46)

Pfunzani momwe mungakondwesere Yahova napo kuti iye alibe kupereka lamulo lomwe likuleweratu bzomwe mungacite.

“Kodi Nthawe Zentse Mumbafunikira Lamulo la m’Bibliya?”(Ntsanza ya Mulindiri ya 1 Dezembro, 2003)