Mbasankhulani Axamwali Wanu Mwanzeru

Mpsabwino kukhala na axamwali kuti timbapfatse nawo pa nthawe zabwino, nakuti ambatilimbikise pa nthawe zakunesa. Tsono Bibliya limbaticenjezambo kuti ni wanthu lini wentse omwe angakhale axamwali wabwino. Kodi mungasankhule tani axamwali wabwino? Mbaticezeraneni mibvunzo yakutsogoloyi.

1. Kodi axamwali omwe timbasankhula angaticitise kucita ciyani?

Kawiri-kawiri ifepano timbatewezera makhalidwe yabwino ayai yakuipa ya wanthu omwe timbamala nawo nthawe izinji, napo bzicikhala kuti ni pa mbuto yakucezera ya pa interneti. Bibliya limbati: “Omwe an’famba na wanthu wanzeru, an’dzakhalambo wanzeru; koma omwe an’cita bzinthu na apsiru, [ayai wale omwe ambafuna lini Yahova] bzin’dzamumalira kuipa.” (Mimwani 13:20) Axamwali omwe ambafuna Yahova na kumunamata angakuthandizeni kupitiriza kukhala pa uxamwali na Yahovayo na kusankhulambo bzinthu mwanzeru. Tsono axamwali omwe ambafuna lini Yahova angaticitise kufunduka kwa Yahovayo. Ndipopa Bibliya limbatilimbikisa kusankhula axamwali mwanzeru! Axamwali wathu akakhala ni wanthu omwe ambafuna Mulungu, tentse timbagumana phindu. Mwa njira imweyi timbakwanisa “kumbalimbikisana na kumbapasana mphanvu.” — 1 Atesalonika 5:11.

2. Kodi Yahova ambabva tani na momwe mumbasankhulira axamwali wanu?

Yahova ambasankhula bwino axamwali wace. Pakuti “Iye ambafuna munthu wakulungama.” (Mimwani 3:32) Kodi Yahova angabve tani ifepano tikasankhula kukhala pa uxamwali na munthu omwe ambamutumikira lini? Iye angasuname kwene-kwene! (Werengani Tiyago 4:4.) Tsono tikatcenkha kucita uxamwali na wanthu wakuipa ticisankhula axamwali omwe ambafuna Yahova, iye an’dzakomedwa nafe. — Salimo 15:1-4.

FUFUDZANI BZINANGO

3. Mpholeni na axamwali wakuipa

Wanthu omwe ambafuna lini Mulungu na mitemo yace ni axamwali wakuipa. Onani VIDIYO, ndipo mukamala cezeranani mbvunzo wakutewerayu.

VIDIYO: Mbatcenkhani Axamwali Wakuipa (6:17)

• Kodi tingayambe tani kubverana na wanthu wakuipa mwakusaya kuzindikira?

Werengani 1 Akolinto 15:33, ndipo mukamala cezeranani mibvunzo ikutewerayi:

• Kodi ni wanthu aponi omwe angakhale axamwali wakuipa kwa imwepo? Thangwe ranyi?

Werengani Salimo 119:63, ndipo mukamala cezeranani mbvunzo wakutewerayu:

• Kodi n’ciyani cingalatize kuti munthuyu ni xamwali wabwino?

4. Axamwali wathu an’funika lini kukhala wakundendemerana na ifepano

Bibliya limbalewa bza Davide na Jonatani omwe akhali wa mtundu wa Jirayeri wakale-kale. Jonatani akhali mwana wa mambo ndipo akhali mkulu kwene-kwene kuposa Davide, napo bzikhali tenepo awiriwo akhali pa uxamwali bwa ponda ndipondembo. Werengani 1 Samuweri 18:1, ndipo mukamala cezeranani mbvunzo wakutewerayu:

• Thangwe ranyi axamwali wathu an’funika lini kukhala wa msinkhu ubodzi-bodzi na ifepano?

Werengani Aroma 1:11, 12, ndipo mukamala cezeranani mbvunzo wakutewerayu:

• Kodi axamwali omwe ambafuna Yahova ambalimbikisana tani?

Mu vidiyoyi, onani momwe tswaka linango lidagumanira axamwali komwe iye akhadikhirira lini. Onani VIDIYO, ndipo mukamala cezeranani mibvunzo ikutewerayi.

VIDIYO: Citani Uxamwali na Wanthu wa Misinkhu Yakusiya-siyana (5:06)

• Mu vidiyoyi, thangwe ranyi abereki wa Akil akhacita thupo na axamwali wace wa ku xikola?

• Kodi n’ciyani comwe cidacitisa Akil kuyamba kucita ntsantsa na anzace wa ku xikola?

• Kodi iye adakwanisa tani kukunda kupswoma komwe akhabva?

5. Kodi mungakhale tani na axamwali wabwino?

VIDIYO: Kodi Xamwali wa Wacadidi Nguponi? (4:14)

Werengani Mimwani 18:24 na 27:17, ndipo mukamala cezeranani mibvunzo ikutewerayi:

• Kodi axamwali wacadidi ambathandizana tani?

• Kodi imwepo munawo axamwali wabwino ninga amwewa? Penu ne, n’ciyani comwe mungacite kuti mukhalembo na axamwali wacadidi?

Werengani Afilipi 2:4, ndipo mukamala cezeranani mbvunzo wakutewerayu:

• Kuti mukhale na axamwali wabwino, imwepo mun’funikambo kukhala xamwali wabwino. Kodi mungacite tani bzimwebzi?

KODI MWAPFUNZA CIYANI?

Tikasankhula bwino axamwali wathu, timbakondwesa Yahova ndipo ifepanombo timbagumana phindu.

Mibvunzo yakubwerezera

• Thangwe ranyi momwe timbasankhulira axamwali wathu n’kwakufunika kwa Yahova?

• Mba axamwali aponi omwe tin’funika kuwatcenkha?

• Kodi mungakhale tani pa uxamwali bwakulimba na wanthu omwe ambafuna Yahova?

ONANI POMWE IBZI

Onani momwe axamwali wabwino angatithandizire pa nthawe ya mabvuto.

“Khalani pa Uxamwali Bwakulimba na Akristau Anzanu Cimaliziro ca Dzikoli Cikanati Kufika” (Ntsanza ya Mulindiri ya Novembro, 2019)

Onani bzinthu bzomwe mungacite kuti musankhule axamwali wabwino.

“Kodi Axamwali Wabwino Ningawagumane Kuponi? (Mayankho a Zimene Achinyamata Amafunsa, Buku Loyamba, msolo 8)

Kodi n’ciyani comwe mun’funika kudziwa mukakhala muna axamwali pa mbuto zakucezera za pa interneti?

Khalani Wakusamala Pomwe Mukuphatisa Basa Mbuto Zakucezera za pa Interneti (4:12)

Kuti muwone bzomwe bzidacitisa munthu munango kuwona penu axamwali omwe akhanawo mbabwino, werengani nkhani yakuti: “Ndikhafunisisa Kugumana Pai.”

“Bibliya Limbacinja Moyo wa Wanthu” (Ntsanza ya Mulindiri ya 1 Abril, 2012)

1. Kodi tin’funika kukumbukira ciyani pomwe tikusankhula masenzeka?

Kodi mumbafuna kucita ciyani pa nthawe yakupuma? Wanthu winango ambaphatisa basa nthawe yawo yakupuma kuti awerenge mabukhu, kubvesera nyimbo, kuwona mavidiyo ayai kuwona bzinango pa interneti. Wanthu winango ambafuna kuzunga, kutcula ayai kucita masenzeka manango. Bziribe basa masenzeka yomwe tingasankhule koma tin’funika kutsimikiza kuti masenzekayo ‘ngakubvumizika kwa Mbuya.’ (Aefezo 5:10) Mpsakufunika kucita bzimwebzi thangwe masenzeka mazinji ntsiku zino yambalatiza bzinthu bzomwe Yahova ambabziwenga ninga kumenyana ayai kuphana, kucita malume ya pa mphasa kwakusaya kubvumizika na kukhulupira bza mizimu. (Werengani Salimo 11:5.) Kodi n’ciyani comwe cingatithandize kusankhula masenzeka mwanzeru?

Ifepano tikasankhula axamwali omwe ambafuna Yahova, iwo an’dzatithandiza kufunambo Yahova na kumbasankhula masenzeka mwanzeru. Ninga momwe tidawonera mu pfunziro la m’mbuyomu, munthu “omwe an’famba na wanthu wanzeru, an’dzakhalambo wanzeru.” Tsono tikambacita uxamwali na wanthu omwe ambabvera lini mitemo ya Mulungu, ‘bzin’dzatimalira kuipa.’ — Mimwani 13:20.