BIBLIYOTEKA YA PA INTERNETI ya Watchtower
Watchtower
BIBLIYOTEKA YA PA INTERNETI
Cinyungwe
  • BIBLIYA
  • MABUKHU
  • MITSONKHANO
  • Imwepo Mungakhale Xamwali wa Yahova
    Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
    • 5. Kodi Yahova ambafuna kuti axamwali wace acite ciyani?

      Ifepano timbafuna kuti axamwali wathu ambaticitire bzinthu bzabwino.

      • Kodi imwepo mumbafuna kuti axamwali wanu akucitireni bzinthu bziponi?

      Werengani 1 Juwau 5:3, ndipo mukamala cezeranani mbvunzo wakutewerayu:

      • Kodi Yahova ambafuna kuti axamwali wace ambacite ciyani?

      Kuti timbabvere Yahova, tin’funika kucinja makhalidwe yathu. Werengani Zaiya 48:17, 18, ndipo mukamala cezeranani mbvunzo wakutewerayu:

      • Thangwe ranyi Yahova ambafuna kuti axamwali wace acinje?

      Munthu wa bzakumanga-manga ana kapaseti m’manja kuti apase mwanzace omwe ambaphata naye basa.

      Xamwali wabwino angatikumbuse bzinthu bzomwe bzingatikhotcerere na kutibweresera phindu. Yahova ambacitambo bzibodzi-bodzibzi kuna axamwali wace

  • Imwepo Mungakhale Xamwali wa Yahova
    Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
  • Kodi Tingalatize Tani Kuti Timbafuna Yahova?
    Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
    • Pfunziro34. Munthu omwe ali mu mzinda akunyang’anisa kudzulu.

      PFUNZIRO 34

      Kodi Tingalatize Tani Kuti Timbafuna Yahova?

      Kodi mumbafuna kwene-kwene Mulungu kuposa pomwe mukhanati kuyamba kupfunza Bibliya? Kodi mun’funa kupitiriza kulimbikisa uxamwali bwanu na iye? Penu n’tenepo, dziwani kuti Yahova akawona kuti lufoyi lanu kwa iye likukula iye an’dzakufunani kwene-kwene na kukusamalirani. Kodi mungamulatize tani kuti mumbamufuna?

      1. Kodi timbalatiza tani kuti timbafuna Yahova?

      Timbalatiza kuti timbafuna Yahova mwa kumbamubvera. (Werengani 1 Juwau 5:3.) Iye ambangingimiza lini munthu ali-wentse kuti amubvere. M’mbuto mwace iye ambapasa munthu ali-wentse ufulu bwakusankhula kumubvera ayai ne. Thangwe ranyi? Yahova an’funa kuti ifepano timbamubvere “na mtima wentse.” (Aroma 6:17) Bzimwebzi bzikuthandauza kuti, iye an’funa kuti timbamubvere sikuti thangwe tin’funika kumubverako, koma thangwe rakuti timbamufuna. Mbali 3 na 4 za bukhu lino zakonzedwa kuti zikuthandizeni kulatiza lufoyi lanu kwa Yahova mwa kucita bzomwe iye ambakomedwa nabzo mucitcenkha bzomwe ambawenga.

      2. Thangwe ranyi mpsakunesa kulatiza lufoyi lathu kuna Yahova?

      “Nyakulungama ambagumana na matsoka mazinji.” (Salimo 34:19) Tentsenefe tikulimbana na kuperewera kwathu. Ndipo timbagumanambo na mabvuto ya cuma, kusaya cirungamo na mabvuto yanango. Tikambagumana na mabvuto ninga yamweya, nthawe zinango bzimbakhala bzakunesa kucita bzomwe Yahova ambatikumbira kuti ticite. Bziri tenepo thangwe rakuti kucita bzinthu bzakuphonyeka bzimbakhala bzakupusa kusiyana na kubvera Yahova. Tsono mukakhala wakukhulupirika pakucita bzomwe Yahova ambakuuzani kuti mucite, mun’dzalatiza kuti mumbamufuna kuposa cinthu ciri-centse. Ndipo mun’dzalatiza kuti ndimwe wakukhulupirika kwa iye. Iye an’dzakhalambo wakukhulupirika kwa imwepo. Ndipo iye cipo acidzakusiyani. — Werengani Salimo 4:3.

      FUFUDZANI BZINANGO

      Pfunzani thangwe ranyi Yahova ambakomedwa imwepo mukamubvera na bzomwe bzingakuthandizeni kucita bzimwebzo.

      3. Sathani ambakunamizirani

      Mwakubverana na bukhu la Djobi, Sathani adanamizira Djobi na wanthu wentse omwe an’funa kutumikira Yahova. Werengani Djobi 1:1, 6–2:10, ndipo mukamala cezeranani mibvunzo ikutewerayi:

      • Mwakubverana na bzomwe Sathani adalewa, thangwe ranyi Djobi akhabvera Yahova? — Onani Djobi 1:9-11.

      • Kodi Sathani adanamizira ciyani wanthu wentse kuphatanidzambo imwepo? — Onani Djobi 2:4.

      Werengani Djobi 27:5b, ndipo mukamala cezeranani mbvunzo wakutewerayu:

      • Kodi Djobi adalatiza tani kuti akhafunadi Yahova?

      Sathani akutsutsana na Yahova. Iye akhagaza kukhulupirika kwa Djobi, omwe thupi lace lentse likhana bzironda na mpfumakazi yomwe ikutumikira Yahova ntsiku zino.

      Djobi adalatiza lufoyi lace kwa Yahova mwa kupitiriza kukhala wakukhulupirika kwa iye

      Timbalatiza lufoyi lathu kwa Yahova mwa kupitiriza kukhala wakukhulupirika kwa iye

      4. Kondwesani mtima wa Yahova

      Werengani Mimwani 27:11, ndipo mukamala cezeranani mibvunzo ikutewerayi:

      • Kodi Yahova ambabva tani imwepo mukambacita bzinthu mwanzeru na kumbamubvera? Thangwe ranyi?

      5. Imwepo mungakhale wakukhulupirika kwa Yahova

      Lufoyi lathu kwa Yahova limbaticitisa kuuza winango bza iye. Kukhulupirika kwathu kumbaticitisa kufuna kumubvera napo kuti nthawe zinango bzingakhale bzakunesa kucita bzimwebzo. Onani VIDIYO, ndipo mukamala cezeranani mibvunzo ikutewerayi.

      VIDIYO: Mbapalizirani Mwakukhwimika Napo Mukutsutsidwa (5:09)

      • Kodi mumbawona kuti mpsakunesa kuuza wanthu winango bza Yahova?

      • Mu vidiyoyi, n’ciyani comwe cathandiza Grayson kumalisa mantha yace?

      Bzimbakhala bzakusaya kunesa kukhala wakukhulupirika kwa Yahova tikambafuna bzomwe iye ambafuna na kuwenga bzomwe iye ambawenga. Werengani Salimo 97:10, ndipo mukamala cezeranani mibvunzo ikutewerayi:

      • Mwakubverana na bzomwe imwepo mwapfunza, kodi ni bzinthu bziponi bzomwe Yahova ambafuna? Ndipo ni bzinthu bziponi bzomwe iye ambawenga?

      • Kodi mungapfunze tani kufuna bzomwe mpsabwino na kuwenga bzomwe mpsakuipa?

      6. Timbagumana phindu tikambabvera Yahova

      Kubvera Yahova nthawe zentse n’kwabwino. Werengani Zaiya 48:17, 18, ndipo mukamala cezeranani mibvunzo ikutewerayi:

      • Kodi imwepo mukukumbuka kuti tingakhulupire kuti nthawe zentse Yahova ambadziwa bzomwe mpsabwino kwa ifepano? Thangwe ranyi?

      • Kodi bzinthu bzomwe mwapfunza m’Bibliya pakulewa bza Yahova, bzakuthandizani tani?

      WANTHU WINANGO AMBALEWA KUTI: “Bzomwe nimbacita Mulungu alibe nabzo basa.”

      • Kodi ni cinembo ciponi comwe mungaphatise basa kuti mulatize kuti bzakucita bzathu Yahova anabzo basa?

      KODI MWAPFUNZA CIYANI?

      Timbalatiza kuti timbafuna Yahova tikambamubvera na kupitiriza kukhala wakukhulupirika kwa iye napo tigumane na bzineso.

      Mibvunzo yakubwerezera

      • Kodi mwapfunza ciyani na ciratizo ca Djobi?

      • Kodi mungalatize tani kuti mumbafuna Yahova?

      • Kodi n’ciyani cin’dzakuthandizani kupitiriza kukhala wakukhulupirika kwa Yahova?

      Citani ibzi

      ONANI POMWE IBZI

      Onani momwe mungakhalire wakukhulupirika kwa Yahova na m’gwere.

      “Kwa Munthu Wakukhulupirika Mun’dzamucitirambo Bzinthu Mwakukhulupirika” (16:49)

      Pfunzani bzinthu bzizinji bzomwe Sathani adalewa pa kunamizira wanthu.

      “Djobi Adapitiriza Kutumikira Mulungu na Mtima Wakusaya Kugawanika” (Kodi m’Bibliya Muna Nkhani Ziponi? mbali 6)

      Onani momwe wana angalatizire lufoyi lawo kwa Yahova.

      Mbakondwesani Yahova (8:16)

      Kodi mwana omwe akuyezedwa na anzace angakhale tani wakukhulupirika kwa Mulungu?

      Lekani Kumbabvuma Kupumpsidwa na Anzanu! (3:59)

  • Kodi Tingacite Tani Bzinthu Mwanzeru?
    Khalani na Moyo Wakukondwa Mpaka Kale-kale!—Bukhu Lomwe Lingakuthandizeni Kubvesesa Bibliya
    • Pfunziro 35. Mwamuna akufufudza mbuto zakugulira karo mu webisaite pomwe ali pabodzi na mkazi na wana.

      PFUNZIRO 35

      Kodi Tingacite Tani Bzinthu Mwanzeru?

      Tentsenefe timbafunika kusankhula bzakucita. Pa bzizinji bzomwe tingasankhulebzo bzingakhale bzabwino ayai bzakuipa kwa ifepano na kwa Yahova. Mwa ciratizo, tin’funika kusankhula komwe tingakakhale, bzomwe tingacite pa moyo wathu penu tinilowola ayai tinilowodwa. Tikacita bzinthu mwanzeru, tin’dzakhala wakukondwa ticikondwesambo Yahova.

      1. Kodi mungaphatise tani basa Bibliya kuti mumbacite bzinthu mwanzeru?

      Mukanati kucita cinthu ciri-centse, mbapembani kwa Yahova kuti akuthandizeni ndipo fufudzani m’Bibliya kuti muwone momwe iye ambaiwonera nkhaniyo. (Werengani Mimwani 2:3-6.) Pa nkhani zinango, Yahova ambaperekeratu lamulo lakusaya kunesa kubvesesa. Bzikakhala bziri tenepo, kubvera lamulolo cingakhale cinthu canzeru kucita.

      Tsono tani penu palibe lamulo lomwe likuleweratu bzomwe mun’funika kucita? Yahova an’dzapitiriza kukutsogolerani “mu njira yomwe mun’funika kufamba.” (Zaiya 48:17) Kodi iye an’dzacita tani bzimwebzo? Pana mitemo yomwe ingakutsogolereni. Mitemo ya m’Bibliya ni cadidi comwe cimbatilatiza makumbukidwe ya Mulungu na momwe iye ambabvera. Kawiri-kawiri timbadziwa momwe Yahova ambabvera tikambawerenga m’Bibliya nkhani yomwe idacitika kale. Tikadziwa momwe Yahova ambabvera pa nkhani zakusiyana-siyana, tin’dzakwanisa kucita bzinthu bzomwe bzimbamukondwesa.

      2. Kodi n’ciyani comwe mun’funika kukumbukira pomwe mukanati kucita cinthu ciri-centse?

      Bibliya limbati: “Nyakucenjera ambawona bwino komwe akuyenda.” (Mimwani 14:15) Bzimwebzi bzikuthandauza kuti pomwe tikanati kucita cinthu ciri-centse, tin’funika kukhala na nthawe ya kukumbukira bzomwe tin’funa kucitabzo. Pomwe mukukumbukirapo mbabzibvunzani kuti: ‘Kodi ni mitemo iponi ya m’Bibliya yomwe ningaiphatise basa? Kodi ni mtemo uponi omwe ungandithandize kukhala na mtendere wa mu mtima? Kodi wanthu winango angabziwone tani bzomwe ningasankhulebzo? Cakufunika pa bzentse, kodi Yahova an’dzakomedwa nabzo?’ — Deuteronomiyo 32:29.

      Yahova anabo ugo bwakutiuza bzomwe mpsabwino na bzomwe mpsakuipa. Tikadziwa bwino malamulo ya Yahova ticitsimikiza kucita bzinthu mwakubverana na malamuloyo, tin’dzapfunzisa mtima wathu. Mtima omwe ukulewedwa pamwepayu ni unthu bwathu bwamkati bomwe bumbatithandiza kudziwa cinthu cabwino na cakuipa. (Aroma 2:14, 15) Tikapfunzisa bwino mtima wathu un’dzatithandiza kucita bzinthu mwanzeru.

      FUFUDZANI BZINANGO

      Pfunzani momwe mitemo ya m’Bibliya na mtima wathu bzingatithandizire kumbacita bzinthu mwanzeru.

      3. Bvumani kuti Bibliya likutsogolereni

      Kodi mitemo ya m’Bibliya ingatithandize tani pomwe tikufuna kucita bzinthu? Onani VIDIYO, ndipo mukamala cezeranani mibvunzo ikutewerayi.

      VIDIYO: Mbaphatisani Basa Mitemo ya m’Bibliya Kuti Ikutsogolereni (5:54)

      • Kodi ufulu bwa kusankhula n’ciyani?

      • Thangwe ranyi Yahova adatipasa ufulu bwa kusankhula?

      • N’ciyani comwe Yahova watipasa kuti cimbatithandize kuphatisa bwino basa ufulu bwathu bwa kusankhula?

      Kuti muwone ciratizo cibodzi ca mtemo wa m’Bibliya, werengani Aefezo 5:15, 16. Ndipo mukamala onani momwe mungaphatisire “bwino basa nthawe yanu” . . .

      • pomwe mukuwerenga Bibliya ntsiku zentse.

      • kuti mukhale mwamuna ayai mkazi wabwino, m’bereki wabwino na mwana wabwino.

      • kuti mumbagumanike pa mitsonkhano ya gwere.

      4. Pfunzisani mtima wanu kuti mumbacite bzinthu mwanzeru

      Bzimbakhala bzakupusa kucita bzinthu pakakhala kuti pana lamulo lomwe likuleweratu bzomwe tingacite. Tsono tani pakakhala kuti palibe lamulolo? Onani VIDIYO, ndipo mukamala cezeranani mbvunzo wakutewerayu.

      VIDIYO: “Pitirizani Kukhala na Cikumbu-mtima Cabwino” (5:13)

      • Mu vidiyoyi, kodi n’ciyani comwe mpfumakaziyi yacita kuti ipfunzise mtima wace na kucita bzinthu mwanzeru kuti ikondwese Yahova?

      Thangwe ranyi tin’funika lini kubvunza winango bzomwe iwo angadacita bzingadakhala kuti akugumana na bvuto ninga lathulo? Werengani Ahebereu 5:14, ndipo mukamala cezeranani mibvunzo ikutewerayi:

      • Napo bziciwoneka ninga mpsakupusa kukumbira winango kuti atiuze bzakucita, tsono n’ciyani comwe ali-wentse an’funika kusiyanisa?

      • Kodi n’ciyani comwe cingakuthandizeni kupfunzisa mtima wanu na kumbacita bzinthu mwanzeru?

      Munthu akufambisa karo mu mseu. Ndipo patsogolo pace pana GPS yomwe ikumuthandiza kudziwa komwe an’funika kuyenda.

      Ninga mapa, mtima wathu umbatithandiza kusankhula bzomwe tin’funa kucita pa moyo wathu

      5. Mbalemekezani bzomwe winango ambacita

      Wanthu wakusiyana angacitembo bzinthu mwakusiyana. Kodi tingalemekeze tani bzomwe winango angacite? Onani bzakucitika bziwiri:

      Cakucitika cakuyamba: mpfumakazi yomwe imbafuna kubvala kalasau pa kucita mabasa yakusiyana-siyana yafulukira ku gwere komwe kuna mpfumakazi zomwe zimbakomedwa lini kuwona mpfumakazi zidabvala makalasau.

      Werengani Aroma 15:1 na 1 Akolinto 10:23, 24, ndipo mukamala cezeranani mibvunzo ikutewerayi:

      • Mwakubverana na mavesiya, kodi n’ciyani comwe mpfumakaziyi ingacite? Kodi n’ciyani comwe mungacite mukakhala muli pabodzi na munthu omwe ambawona kuti cinthu cinango n’cakuphonyeka koma kwa imwepo n’cakuphonyeka lini?

      Cakucitika caciwiri: M’bale akudziwa kuti Bibliya limbaletsa lini kumwa pangʼono, tsono iye wawona kuti bziri bwino kundolekeratu na kumwako. Tsono iye wacemeredwa kumui kwa m’bale munango kuti akadye pabodzi ndipo kumweko akuwona abale winango akumwa.

      Werengani Mpalizi 7:16 na Aroma 14:1, 10, ndipo mukamala cezeranani mibvunzo ikutewerayi:

      • Mwakubverana na mavesiya, kodi n’ciyani comwe m’baleyu an’funika kucita? Kodi n’ciyani comwe mungacite mukawona munthu akucita cinthu comwe imwepo mungacite lini?

      Kodi n’ciyani comwe mungacite kuti mumbacite bzinthu mwanzeru?

      Mkazi akupemba.

      1. Pembani kwa Yahova kuti akuthandizeni momwe mungacitire bzinthu mwanzeru. — Tiyago 1:5.

      Mkazi m’bodzi-bodziyo akufufudza mwakuphatisa basa Bibliya, mabukhu yathu na komputador.

      2. Fufudzani m’Bibliya na m’mabukhu yathu kuti mugumane mitemo yomwe ingakuthandizeni pa nkhaniyo. Ndipo mungabvunzembo Akristau wakukhwima mwauzimu.

      Mkazi m’bodzi-bodziyo akukumbukira bzomwe awerengabzo.

      3. Kumbukirani momwe winango angawonere bzomwe mukusankhula na momwe imwepo mungagumanire phindu na bzomwe mwasankhulabzo.

      WANTHU WINANGO AMBALEWA KUTI: “Una ufulu bwakucita bzomwe un’funa. Bzomwe munthu munango ambakumbuka bziribe basa.”

      • Thangwe ranyi tin’funika kukumbukira momwe Mulungu ambabvera pabodzi na wanthu winango?

      KODI MWAPFUNZA CIYANI?

      Timbacita bzinthu mwanzeru tikadziwa momwe Yahova ambabvera na nkhaniyo ticiwonambo penu bzomwe tin’citabzo bzinithandiza ayai kusunamisa wanthu winango.

      Mibvunzo yakubwerezera

      • Kodi mungacite tani bzinthu bzomwe bzingakondwese Yahova?

      • Kodi n’ciyani comwe cingakuthandizeni kupfunzisa mtima wanu?

      • Kodi tingalemekeze tani bzomwe winango angacite?

      Citani ibzi

      ONANI POMWE IBZI

      Kodi mungacite tani bzinthu bzomwe bzingalimbikise uxamwali bwanu na Mulungu?

      “Citani Bzinthu Bzomwe Bzingalemekeze Mulungu”(Ntsanza ya Mulindiri ya 15 Abril, 2011)

      Pfunzani bzinthu bzizinji bza momwe Yahova ambaperekera malango.

      Yahova Ambatsogolera Wanthu Wace (9:50)

      Onani bzomwe bzidathandiza mwamuna munango kucita bzinthu bzomwe bzikhali bzakunesa kwene-kwene.

      Na Yahova, Bzinthu Bzabwino Mpsakutsimikizirika (5:46)

      Pfunzani momwe mungakondwesere Yahova napo kuti iye alibe kupereka lamulo lomwe likuleweratu bzomwe mungacite.

      “Kodi Nthawe Zentse Mumbafunikira Lamulo la m’Bibliya?”(Ntsanza ya Mulindiri ya 1 Dezembro, 2003)

Mabukhu ya Cinyungwe (2008-2025)
Bulani
Pitani
  • Cinyungwe
  • Tumizani
  • Bzomwe mumbafuna
  • Copyright © 2025 Watch Tower Bible and Tract Society of Pennsylvania
  • Mitemo Yomwe Mun'funika Kuteweza
  • Mtemo Wacintsintsi
  • Privacy Settings
  • JW.ORG
  • Pitani
Tumizani