• Lekani Kubvuma Cinthu Ciri-Centse Cikutaziseni Kutewera Jezu
    Ntsanza ya Mulindiri (yakupfunza)—2021 | Maio

    • (3) JEZU ALIBE KUTEWEZERA MIYAMBO YA ADJUDA

      Wanthu azinji adalamba Jezu thangwe ra alibe kutewezera miyambo ya Adjuda. Kodi bzinthu bzibodzi-bodzibzi bzimbaticitikirambo tani ntsiku zino? (Onani ndime 13)h

      13. Kodi n’ciyani comwe cidacitisa kuti wanthu azinji alambe Jezu?

      13 Mu nthawe ya Jezu, anyakupfunza wa Juwau Batista akhadabwa thangwe ra kuwona anyakupfunza wa Jezu akucita lini jejum. Jezu adalewa kuti iwo akhalibe mathangwe yakucitira jejum pomwe iye akhana moyo. (Mateu 9:14-17) Napo bzikhali tenepo, Afarizi na anyamadulanthaka wace winango, adamupasa mulandu thangwe rakuti iye akhateweza lini miyambo yawo. Iwo adakalipa kwene-kwene pomwe Jezuyo adapoza munthu pa ntsiku ya Sabudu. (Marko 3:1-6; Juwau 9:16) Ndipo iwo akhalewa mwakucita kusamwa kuti akhalemekeza ntsiku ya Sabudu; tsono okha-okhawo akhawona kuti bziribe mulandu kucita malonda mu templo pa ntsikuyo. Tsono pomwe Jezu adawatsimula kuti thangwe ranyi akhacita bzimwebzo, iwo adakalipa. (Mateu 21:12, 13, 15) Ndipo wale omwe Jezu adawapalizira mu sinagoga ya ku Nazaleti, adakalipa kwene-kwene pomwe Jezuyo adaphatisa basa bziratizo bza moyo wa Ajirayeri kuti awalatize kuti iwo akhali wanthu wakubzifuna kwene-kwene na wakusaya cikhulupiro. (Luka 4:16, 25-30) Wanthu azinji adalamba Jezu thangwe rakuti Jezuyo alibe kucita bzinthu bzomwe iwo akhadikhirira kuti iye angadacita.—Mateu 11:16-19.

      14. Thangwe ranyi Jezu adatsimula miyambo ya wanthu yomwe ikhabverana lini na Bzinembo?

      14 Kodi Bzinembo bzimbalewa ciyani? Mwakuphatisa basa mpolofeta wace Zaiya, Yahova adalewa kuti: ‘Wanthu awa ambafendera kwa ine na pamulomo pawo, ndipo ambandilemekeza na miromo yawo basi, koma mtima wawo uli kutali na ine; Ndipo kundinamata kwawo kumbacokera pa miyambo ya wanthu, yomwe iwo adapfunzisidwa.’ (Zaiya 29:13) Jezu akhana ugo bwa kutsimula wanthu omwe akhacita miyambo yomwe ikhabverana lini na Bzinembo. Wale omwe akhakumbuka kuti malamulo na miyambo ya wanthu mpsakufunika kuposa Bzinembo, akhalamba Yahova na ule omwe adamutuma ninga Mesiya.

  • Lekani Kubvuma Cinthu Ciri-Centse Cikutaziseni Kutewera Jezu
    Ntsanza ya Mulindiri (yakupfunza)—2021 | Maio

    • (4) JEZU ALIBE KUCINJA UTONGI PA NTHAWE IMWEYIRE

      Wanthu azinji adalamba Jezu thangwe ra alibe kucinja utongi pa nthawe imweyire. Kodi bzinthu bzibodzi-bodzibzi bzimbaticitikirambo tani ntsiku zino? (Onani ndime 17)i

      17. Kodi wanthu azinji akhadikhirira kuti Jezu angadawacitira ciyani?

      17 Mu nthawe ya Jezu wanthu winango akhafuna kuti iye acinje utongi pa nthawe imweyire. Iwo akhadikhira kuti Mesiya angadadzawatsudzula ku utongi bwa Aroma bomwe bukhawapundiza. Tsono pomwe iwo adayeza kumusankhula kuti akhale Mambo, iye adalamba. (Juwau 6:14, 15) Antsembe na wanthu winango akhana mantha yakuti penu Jezu angadacinja utongi, Aroma angadatengera antsembewo ugo bomwe akhanabo. Thangwe ra thupo lawoli Adjuda azinji adalamba Jezu.

      18. Kodi ni mapolofesiya yaponi ya m’Bibliya yakulewa bza Mesiya yomwe wanthu azinji akhalibe nayo basa?

      18 Kodi Bzinembo bzimbalewa ciyani? Napo kuti mapolofesiya mazinji yakhadaleweratu kuti Mesiya angadadzakhala nyakukunda pa nkhondo, mapolofesiya manango yadalatiza kuti cakuyamba iye akhafunika kufera pikado zathu. (Zaiya 53:9, 12) Tsono thangwe ranyi iwo akhana makumbukidwe yakuipa pakulewa bza Mesiya? Wanthu azinji mu nthawe ya Jezu akhalibe nabzo basa bza kufuna kudziwa bza mapolofesiya yomwe yakhalewa kuti Jezu angadacinja lini bzinthu pa nthawe imweyire.—Juwau 6:26, 27.