Jezu Adatsimula Afarizeu

Anembi na Afarizeu pomwe akhalewa kuti Jezu akhacosa lini madimonyo na mphanvu ya mzimu wa Mulungu, iwo akhanyoza mzimu wakucena. Kodi bzomwe akhacitabzo bzikhalatiza kuti iwo akhali ku mbali ya Mulungu ayai ya Sathani? Jezu adalewa kuti: ‘Wanthumwe mumbacitisa muti pabodzi na bzisapo bzace kukhala bza bwino, ayai mumbabvundisa muti na bzisapo bzace, thangwe muti umbadziwika na bzisapo bzace.’—Mateu 12:33.

Mbuupsiru kulewa kuti Jezu akhakwanisa kucosa madimonyo thangwe akhatumikira Sathani. Jezu adalewa mwakubveka bwino pa nkhani yace ya pa Phiri kuti penu muti umbabala bzisapo bza bwino, muti umweyo ngwa bwino sikuti ngwakubvunda. Tsono, kodi bzomwe Afarizeu adalewa pakunyoza Jezu, bzidalatiza ciyani kwa iwo? Bzidalatiza kuti iwo akhali wakuipa. Jezu adawauza kuti: ‘Wana wa bzinyoka imwe, kodi mungalewe tani mafala yabwino pomwe ndimwe wakuipa? Pakuti pa mulomo pambalewa bzomwe bzadzala mu mtima.’—Mateu 7:16, 17; 12:34.

Bzomwe timbalewalewa bzimbalatiza bzommwe bziri mu mtima mwathu, ndipo tin’dzayeruzidwa na bzomwe timbalewalewabzo. Ndipopa Jezu adalewa kuti: ‘Ndinkukuuzani kuti pa Nsiku ya Ciyeruzo, wanthu an’dzatawira mulandu pa mafala yali-yense yakusaya basa yomwe iwo adalewalewa. Pakuti na mafala yako un’dzayeruzidwa kuti ndiwe wakulungama, ndipo na mafala yako un’dzayeruzidwambo kuti ndiwe wakuphonya.’—Mateu 12:36, 37.

Napo kuti Jezu adacita bzakudabwisa bzizinji, anembi na Afarizeu akhafuna kuti iye acite bzakudabwisa bzinango. Iwo adamuuza kuti: ‘Mpfunzisi, tin’funa kuti mutiwonese cizindikiro.’ Penu iwo adamuwona Jezu ankucita bzakudabwisa bzizinji ayai ne, koma pakhana umboni bwapadeca bwakulatiza kuti Jezu adacita bzakudabwisa bzizinji. Tenepo, Jezu adawauza kuti: ‘M’badwo wakuipa na wa upombo unkufunisisa kuwona cizindikiro. Tsono un’dzapasidwa lini cizindikiro ciri-cense koma cizindikiro ca mpolofeta Djona cokha.’—Mateu 12:38, 39.

Jezu adafotokoza thandauzo la mafala yamweya. Iye adati: ‘Ninga momwe Djona adakhalira m’mimba mwa cinsomba cikulu kwa nsiku zitatu, masikati na usiku, Mwana wa munthu an’dzakhalambo mu mtima wa dziko la pansi kwa nsiku zitatu, masikati na usiku.’ Djona adakhudyulidwa na cinsomba cikulu, koma patsogolo pace adadzacoka ninga kuti adalamusidwa kwa anyakufa. Jezu akhaleweratu kuti iye angadadzafa, acidzalamusidwa pa nsiku ya citatu. Pomwe bzimwebzi bzidadzacitika, atsogoleri wacijuda alibe kubvuma bza ‘cizindikiro ca Djona’ iwo adalamba kukungula na kucinja. (Mateu 27:63-66; 28:12-15) Koma ‘wanthu wa ku Ninive,’ adakungula pomwe Djona adawapalizira. Tenepo, iwo an’dzayeruza mbadwo umweyu. Ndipo Jezu adalewa kuti ciratizo ca mkazi wa mambo wa ku Xeba cin’dzawayeruzambo. Iye akhafuna kudziwa bza nzeru za Salomau ndipo adadabwa. Tenepo Jezu adalewa kuti: ‘Ali pano munthu munango wakuposa Salomau.’—Mateu 12:40-42.

Jezu adandendemeza mbadwo wakuipayu na munthu omwe mzimu wakuipa wacoka mu mtima mwace. (Mateu 12:45) Pakuti munthuyo alibe kuikha bzinthu bza bwino mu mtima mwace, mzimu wakuipayo umbabweresa pomwe mizimu yakukwana minomwe yakuipa kwene-kwene kuposa iye, ndipo imbakhazikika mu mtima mwa munthuyo. Mwakundendemerana na mtundu wa Jirayeri, iwo udacenesedwa ucicinja ninga munthu omwe mzimu wakuipa udacoka mu mtima mwace. Koma mtunduyo udalamba apolofeta wa Mulungu ndipo udalambambo Jezu omwe bzikhawonekeratu kuti iye akhatsogoleredwa na mzimu wa Mulungu. Bzimwebzi bzidalatiziratu kuti mtunduyo ukhadaipa kwene-kwene kuposa momwe ukhaliri pakuyamba.

Pomwe Jezu akhalewalewa, mayi wace na abale wace adafika, aciima kumbuyo kwa thimu la wanthu. Wanthu winango omwe akhali pafupi na iye adamuuza kuti: ‘Mai wanu na azibale wanu ali panjapa, ndipo an’funa kuwonana namwe.’ Jezu adawalatiza kuti iye akhafuna kwene-kwene anyakupfunza wace, ninga abale wace caiwo, mpfumakazi zace na mai wace. Iye adafuthula boko lace acilata anyakupfunza wace, ndipo adalewa kuti: ‘Mai wangu na abale wangu mbawa omwe ambabva mafala ya Mulungu aciyacita.’ (Luka 8:20, 21) Bzimwebzi bzidalatiza kuti napo Jezu akhabverana kwene-kwene na abale wace, koma ubale bomwe bukhalipo na anyakupfunza wace bukhali bwakufunika kwene-kwene. Mpsakudekeza kwene-kwene kukhala na mbverano pabodzi na abale wathu wauzimu, maka-maka pomwe wanthu ankutipenukira, ankutinyoza ayai ankunyoza mabasa yomwe timbacita.