Tsapanopapa Yahova animalisa mabvuto yentse yomwe tikugumana nayo ntsiku zino mwakuphatisa basa Umambo bwace. Mafala yamweya njabwino kwene-kwene ndipo munthu ali-wentse an’funikira kuyabva. Jezu akhafuna kuti ateweri wace apalizire mafalaya munthu ali-wentse. (Mateu 28:19, 20) Kodi Mboni za Yahova zimbalatiza tani kuti zimbabvera mafala ya Jezuya?

1.Kodi cinembo ca Mateu 24:14 cikukwanirisidwa tani ntsiku zino?

Jezu adalewa kuti: “Mafala yabwino ya Umambo, yan’dzapaliziridwa pa dziko lentse la pantsi.” (Mateu 24:14) Mboni za Yahova zikupalizira basa lakufunikali mwakukondwa. Ifepano tikupalizira mafala yabwinoya pa dziko lentse la pantsi m’bzirewedwe bzakupitirira 1000. Kuti basa limweri licitike pambafunika nyongo na kulinganiza bwino. Ndipo bzingadakhala kuti Yahova akuthandizira lini, basali lingadafamba lini.

2.Kodi ni nyongo iponi yomwe timbacita kuti tipalizire wanthu?

Timbapalizira kuli-kwentse komwe timbagumana wanthu. Ninga momwe akhacitira Akristau wa magole dzana yakutoma, ifepanombo timbapalizira “nyumba na nyumba.” (Mabasa 5:42) Njira imweyi imbaticitisa kuti tipalizire wanthu azinji gole liri-lentse. Pakuti wanthu ambagumanika lini nthawe zentse m’mii mwawo, ifepano timbapalizira mbuto zinango zomwe zimbagumanika wanthu. Ndipo timbanyang’ana mipata yakusiyana-siyana kuti tiuze wanthu bza Yahova na bzomwe iye akufuna.

3.Kodi mbani omwe an’funika kupalizira mafala yabwino?

Akristau wentse wacadidi an’funika kupalizira mafala yabwino kuna wanthu winango. Ndipopa timbawona basali kukhala lakufunika kwene-kwene. Ifepano timbapalizira na nyongo mwakubverana na momwe bzinthu bziriri pa moyo wathu thangwe timbadziwa kuti bzimwebzi bzingapulumuse wanthu. (Werengani 1 Timotio 4:16.) Pomwe tikuphata basa limweri timbapagalidwi lini, thangwe Bibliya limbalewa kuti: “Mudatambira fovolo, perekanimbo fovolo.” (Mateu 10:7, 8) Tsono ni wanthu lini wentse omwe ambabvuma mafala yomwe timbapalizira. Napo bziri tenepo timbapitiriza kupalizira thangwe ni mbali yakunamata kwathu ndipo timbakondwesa Yahova.

FUFUDZANI BZINANGO

4. Timbaphata basa na nyongo kuti tigumane wanthu wentse

VIDIYO: Kupalizira ‘Mpaka Kumalekezero ya Dziko la Pantsi’ (7:33)

• Kodi n’ciyani comwe cimbakudabwisani na nyongo yomwe Mboni za Yahova zimbacita kuti zipalizire?

Werengani Mateu 22:39 na Aroma 10:13-15, ndipo mukamala cezeranani mibvunzo ikutewerayi:

• Kodi basa lathu la kupalizira limbalatiza tani kuti timbafuna wanthu winango?

• Kodi Yahova ambawawona tani wale omwe ambapalizira mafala yabwino? — Onani vesi 15.

5. Ndife anyabasa anzace wa Mulungu

Momwe basa lathu lakupalizira likufambira bzimbalatiza kuti Yahova ndiye akutsogolera basali. Mwa ciratizo, ku dziko la Nova Zelândia m’bale Paulo adagumana na mkazi munango pomwe akhapalizira mui na mui nthawe ya kumaulo. Tsono kumacibese kwa ntsikuyo, mkaziyo akhadapemba kwa Mulungu mwa kuphatisa basa dzina la Yahova, acimukumbira kuti munthu amupfuwire mtedwe. M’bale Paulo adalewa kuti: “Patandopita maora matatu (kucokera pomwe mkaziyo adacita mpembo) ine ndidafika pamui pa mkaziyo.”

Werengani 1 Akolinto 3:9, ndipo mukamala cezeranani mbvunzo wakutewerayu:

• Kodi ciratizo ca m’bale Paulo cikulatiza tani kuti Yahova akutsogolera basa lathu lakupalizira?

Werengani Mabasa 1:8, ndipo mukamala cezeranani mbvunzo wakutewerayu:

• Thangwe ranyi timbafunikira thandizo la Yahova kuti tikwanise basa lathu lakupalizira?

Kodi mukhadziwa?

Pa mitsonkhano ya pakati pa mdzinga, timbapfunzisidwa momwe tingapalizirire. Penu imwepo mudagumanika kale pa mtsonkhano ninga umweyu, kodi mapfunziso yomwe mudabva mudayawona tani?

6. Timbabvera lamulo la Mulungu lakupalizira

M’magole dzana yakutoma, anyakutsutsa adayezera kuletsa kupalizira ateweri wa Jezu. Ndipo Akristau wakuyambirira adakhotcerera ugo bwawo bwa kupalizira mwa “kukhazikisa mwa lamulo mafala yabwino.” (Afilipi 1:7) Mboni za Yahova zikucitambo bzibodzi-bodzi ntsiku zino.a

VIDIYO: Kukhotcerera mwa Lamulo Mafala Yabwino (2: 28)

Werengani Mabasa 5: 27-42, ndipo mukamala cezeranani mbvunzo wakutewerayu:

• Thangwe ranyi tin’dzaleka lini kupalizira? — Onani vesi 29, 38 na 39. Mulungu ndiye mwenekaciro wa basa lakupalizira ndipo ndiye akulitsogolera. Ndipopa Mboni za Yahova zimbafunikira lini kucita kukumbira boma kuti liwabvumize kupalizira mafala yabwino.

KODI MWAPFUNZA CIYANI?

Jezu adapfunzisa ateweri wace kuti apalizire mafala yabwino wanthu wa mitundu yentse. Yahova akuthandiza wanthu wace kuti acite basa limweri.

Mibvunzo yakubwerezera

• Kodi bzikukwanisika tani kuti mafala yabwino yapaliziridwe pa dziko lentse la pantsi?

• Kodi basa lathu lakupalizira limbalatiza tani kuti timbafuna wanthu winango?

• Kodi imwepo mukukumbuka kuti basa lakupalizira limbabweresa cikondweso? Thangwe ranyi?

ONANI POMWE IBZI

Onani momwe Mboni za Yahova zimbapalizirira wanthu m’mizinda ikulu-ikulu.

Kupalizira ku Mbuto Komwe Kumbagumanika Wanthu Azinji ku Paris (5:11)

Kodi Mboni za Yahova zimbacita tani kuti zipalizire wanthu omwe athawa kwawo?

Kuthandiza Omwe Athawa Kwawo Kumalisa Nyota ya Uzimu (5:59)

Bvunzani munthu munango kuti akufotokozereni thangwe ranyi iye ambakomedwa na kupalizira.

Nimbakomedwa na Basa Lomwe Ndidasankhula (6: 29)

Pfunzani bzinthu bzakufunika bzomwe nyumba yakutongera mirandu idalewa bzomwe bzidacitisa kuti basa lakupalizira limbacitike mwakusaya kunesa.

“Olalikira Ufumu Anayamba Kupititsa Milandu Yawo Kukhoti” (Ufumu wa Mulungu Ukulamulira, msolo 13)

Jezu adalewa kuti Akristau an’funika kubatizidwa. (Werengani Mateu 28:19, 20.) Tsono kodi ubatizo n’ciyani? Ndipo n’ciyani comwe munthu an’funika kucita kuti abatizidwe?

1. Kodi ubatizo n’ciyani?

Fala lakuti “ubatizo” limbacokera ku Cigerego ndipo limbathandauza “kumiza” m’madzi. Pomwe Jezu akhabatizidwa mu Mkulo wa Joridano thupi lace lentse lidamizidwa ndipo patsogolo pace “adanuka m’madzimo.” (Marko 1:9, 10) Mwakundendemerana na Jezu, Akristau wacadidi akambabatizidwa iwo ambamizidwa m’madzi thupi lentse.

2. Kodi munthu ambalatiza ciyani akakhala akubatizidwa?

Pomwe munthu akubatizidwa ambakhala akulatiza kuti wabzipereka kwa Yahova Mulungu. Kodi munthu ambabzipereka tani? Pomwe akanati kubatizidwa munthuyo ambacita mpembo payekha kumuuza Yahova kuti akufuna kumutumikira kwa moyo wace wentse. Iye ambamuuza Yahova kuti an’dzatumikira iye yekha basi ndipo an’dzaikha pa mbuto yakuyamba kufuna kwa Yahovayo. Munthuyo ambasankhula “kubziramba yekha na . . . kupitiriza kucita” bzomwe Jezu ambapfunzisa na kutewezera ciratizo cace. (Mateu 16:24) Kubzipereka na kubatizidwa kumbacitisa munthuyo kukhala pa uxamwali bwakulimba na Yahova pabodzi na Akristau anzace.

3. Kodi n’ciyani comwe munthu an’funika kucita kuti abatizidwe?

Kuti mubatizidwe mun’funika kumbapfunza bza Yahova na kukulisa cikhulupiro canu kuna iye. (Werengani Ahebereu 11:6.) Imwepo mun’dzamufuna kwene-kwene Yahova mukakhala na cidziwiso caico pakulewa bza iye na kukulisa cikhulupiro canu. Ndipo mun’dzafuna kuuzambo winango bza iye na kuteweza malamulo yace. (2 Timotio 4:2; 1 Juwau 5:3) Munthu omwe ambafamba “mwakuthemera ninga momwe Yahova akufunira kuti amukondwese,” ambabzipereka kwa Mulungu acibatizidwa. — Akolose 1:9, 10.a

FUFUDZANI BZINANGO

4. Bzomwe tingapfunze na ubatizo bwa Jezu

Werengani Mateu 3:13-17 kuti mupfunze bzinango bza ubatizo bwa Jezu. Mukamala cezeranani mibvunzo ikutewerayi:

• Kodi Jezu pomwe adabatizidwa akhali mwana?

• Kodi Jezu adabatizidwa tani? Kodi iye adandowaziridwa madzi?

Jezu adayamba kuphata basa lomwe Mulungu adamupasa pomwe adabatizidwa. Werengani Luka 3:21-23 na Juwau 6:38, ndipo mukamala cezeranani mbvunzo wakutewerayu:

• Pomwe Jezu adamala kubatizidwa, kodi ni basa liponi lomwe iye adaikha pa mbuto yakuyamba pa moyo wace?

5. Ubatizo ni cinthu cakufunika kwene-kwene

Nkhani ya kubzipereka kwa Mulungu na kubatizidwa, pakuyamba ingawoneke ninga kuti njakusaya basa. Tsono imwepo mukapfunza bzizinji bza Yahova mun’dzawona kufunika kwa kubatizidwa. Kuti muwone wanthu winango omwe adacitambo bzimwebzi, onani VIDIYO.

VIDIYO: Kulisani Uxamwali Bwanu na Yahova (1:11)

Werengani Juwau 17:3 na Tiyago 1:5, ndipo mukamala cezeranani mbvunzo wakutewerayu:

• Kodi n’ciyani comwe cingathandize munthu kufika pakubatizidwa?

1. Timbabzipereka kwa Yahova mwakumuuza mu mpembo kuti tin’dzamutumikira kwa moyo wathu wentse

2. Pa ntsiku yathu ya ubatizo timbalatiza kwa wanthu wentse kuti tabzipereka kwa Mulungu

6. Ubatizo bumbathandauza kucita mbali m’banja la Yahova

Tikabatizidwa timbacita mbali ya banja la Yahova la pa dziko lentse la pantsi. Napo timbakhala ku mbuto zakusiyana-siyana ndipo makhalidwe yathu njakusiyanambo, tentsene timbakhulupira ndipo timbatewezera malamulo mabodzi-bodzi. Werengani Salimo 25:14 na 1 Pedru 2:17, ndipo mukamala cezeranani mbvunzo wakutewerayu:

• Munthu akabatizidwa, kodi n’ciyani comwe cimbacitika na uxamwali bwace na Yahova na wale omwe ambamunamatambo?

KODI MWAPFUNZA CIYANI?

Jezu adapfunzisa kuti Akristau an’funika kubatizidwa. Kuti munthu abatizidwe an’funika kulimbisa cikhulupiro cace kwa Yahova, kuteweza malamulo yace na kubzipereka kwa Yahovayo.

Mibvunzo yakubwerezera

• Kodi ubatizo n’ciyani ndipo thangwe ranyi n’bwakufunika?

• Kodi munthu ambabzipereka tani kwa Mulungu ndipo ubatizo bumbalatiza ciyani?

• Kodi n’ciyani comwe munthu an’funika kucita pomwe akanati kubzipereka kwa Mulungu na kubatizidwa?

ONANI POMWE IBZI

Pfunzani kuti mudziwe kuti ubatizo n’ciyani.

“Kodi Ubatizo n’Ciyani?” (Nkhani ya pa jw.org)

Onani bzinthu bzomwe munthu angacite kuti abatizidwe.

“Lufoyi na Kutenda Yahova Bzin’dzakucitisani Kufika pa Kubatizidwa” (Ntsanza ya Mulindiri ya Março, 2020)

Werengani kuti muwone bzomwe munthu munango adacita kuti abatizidwe.

“Akhafuna Kuti Ndizindikire Ndekha Kuti Cadidi n’Ciponi” (Ntsanza ya Mulindiri ya 1 Fevereiro, 2013)

Onani thangwe ranyi ubatizo n’bwakufunika kwene-kwene ndipo mungacite ciyani kuti mukonzekere ubatizobo.

“Kodi Nin’funika Kubatizidwa?” (Mayankho a Zimene Achinyamata Amafunsa, Buku Lachiwiri, msolo 37)