4, 5. (a) Kodi n’ciyani comwe cidacitikira nyakunyang’anira wa m’there la Jezu? (b) Kodi Jezu adauza anyakupfunza wace kucita ciyani?

⁴ Werengani Luka 16:1-9.a Tin’funika kumbakumbukira kwene-kwene bza there la Jezu lakulewa bza Nyakunyang’anira wakusaya kulungamali. Nyakunyang’anirayu adaimbidwa mulandu wakuti akhadzonga cuma ca mbuya wace, ndipo mbuyayo adamuuza kuti animucosa basa.b (Onani mafala ya m’nyansi.) Tsono Nyakunyang’anirayu adacita bzinthu ‘mwanzeru.’ Anati kucoka basalo, iye adacita uxamwali na wanthu omwe angadadzamuthandiza kutsogolo. Pakufotokoza thereli, cakulinga ca Jezu cikhali lini cakuti anyakupfunza wace ambacite bzinthu mwakusaya cirungamo kuti bzinthu bziwafambire bwino ninga momwe wanthu azinji ambacitira, koma iye akhafuna kuwapfunzisa cinthu cinango cakufunika kwene-kwene.

⁵ Jezu akhadziwa kuti anyakupfunza wace angadagumana na bzineso bzizinji m’dziko lakusaya cirungamoli, ninga momwe bzidacitikira na Nyakunyang’anirayu, omwe adagumana na mabvuto mwadzidzidzi. Ndipopa iye adawauza kuti: ‘Khalani na axamwali mwa kuphatisa basa cuma cakusaya kulungamaco.’ Thangwe ranyi? Kuti cumaco cikadzamala, axamwali wale, omwe ni Yahova pabodzi na Jezu, ‘adzawatambire m’mbuto zakukhala kwa muyaya.’ Kodi n’ciyani comwe tingapfunze na there la Jezuli?

6. Kodi n’ciyani cimbalatiza kuti Mulungu akhafuna lini kuti wanthu ambagumane cuma mwa dyera?

⁶ Napo kuti Jezu alibe kufotokoza thangwe race adacemera bzinthu bzakuthupi kuti ‘cuma cakusaya kulungama,’ Bibliya limbalatiziratu padeca kuti Mulungu ambafuna lini kuti munthu ambalinge kobiri zizinji. Mwa ciratizo, pomwe Adamu na Eva akhali mu zunde la Edeni, Yahova adawapasa bzinthu bzizinji kwene-kwene pa moyo wawo. (Ciyambo 2:15, 16) Ndipo pomwe Mulungu adapasa mzimu wace wakucena anyakudzozedwa, ‘palibe omwe akhalewa kuti bzinthu bzomwe akhanabzo bzikhali bzace yekha, koma akhagawana bzinthubzo na winango.’ (Mabasa 4:32) Mpolofeta Zaiya adalewa kuti in’dzafika nthawe yomwe wanthu wense an’dzapfatsa na bzinthu bzabwino bzomwe dziko lin’dzapereka. (Zaiya 25:6-9; 65:21, 22) Tsono pakudikhirira nthawe imweyo, ateweri za Jezu an’funika ‘kumbacita bzinthu mwa nzeru.’ Iwo an’funika kuphatisa basa mwa nzeru cuma cakusaya kulungama ca m’dzikoli kuti akwanise kubzisamalira, koma nthawe ibodzi-bodziyo acimbakondwesa Mulungu.

7. Kodi ni malango yaponi yomwe Jezu adapereka pa Luka 16:10-13?

⁷ Werengani Luka 16:10-13.c Nyakunyang’anira wakulewadwa mu there la Jezuyu, adacita uxamwali na wanthu kuti abzigumanire phindu. Tsono, kodi ndibzo bzomwe Jezu akhafuna kuti ateweri wace acitembo pomwe adawauza kuti akhale na axamwali kudzulu? Nee, koma iye akhafuna kuti tibvesese nfundo yakuti momwe timbaphatisira basa cuma cathu cakusaya kulungama, bzingalatize penu ndifedi wakukhulupirika kwa Mulungu ayai ne. Kodi tingacite tani bzimwebzi?