Kodi Kusaya Kupitira Nkhani za m’Dziko Kumbathandauza Ciyani?

Jezu adauza ateweri wace kuti akhafunika lini kucita “mbali ya dziko.” (Juwau 15:19) Bzimwebzi bzimbathandauza kusaya kupitira nkhani za ndale na nkhondo. Tsono kulewa cadidi, bziribe kupusa kusaya kupitira nkhani za m’dziko. Pinango tingasekedwe thangwe ra bzimwebzi. Kodi tingakhale tani wakukhulupirika kwa Yahova Mulungu ticisaya kupitira nkhani za m’dziko?

1. Kodi Akristau wacadidi ambawona tani atongi wa m’dziko?

Akristau ambalemekeza atongi. Ifepano timbacita bzomwe Jezu adalewa kuti: “Perekani kwa Seza bzinthu bza Seza.” Bzimwebzi bzikuthandauza kuti ifepano timbabvera malamulo ya m’dziko lathu, ninga lamulo la kupagali mtsonkho. (Marko 12:17) Bibliya limbapfunzisa kuti atongi alipo thangwe Yahova abvuma kuti iwo atonge. (Aroma 13:1) Tenepo timbazindikira ugo bwakutonga bomwe boma linabo. Tsono timbazindikirambo kuti iwo alibe mphanvu kuposa Mulungu. Timbadziwa kuti ni Umambo bwa Mulungu bokha bomwe bun’dzamalisa mabvuto yentse ya wanthu.

2 Kodi tingalatize tani kuti timbapitira lini nkhani za m’dziko?

Ninga Jezu, ifepano timbapitira lini nkhani za ndale. Pomwe wanthu adawona cibodzi pa bzakudabwisa bzomwe Jezu adacita, iwo adayezera kumuikha kuti akhale mambo, tsono iye adalamba. (Juwau 6:15) Thangwe ranyi? Thangwe iye adadzalewa kuti: “Umambo bwangu bumbacita lini mbali ya dziko.” (Juwau 18:36) Pakuti ndife anyakupfunza wa Jezu, timbalatiza kuti timbapitira lini nkhani za m’dziko mu njira zakusiyana-siyana. Mwa ciratizo, ifepano timbayenda lini ku nkhondo. (Werengani Mika 4:3.) Ifepano timbalemekeza bzizindikiro bzentse bza m’dziko ninga bandera, tsono timbabzinamata lini. (1 Juwau 5:21) Ndipo timbawenga lini ne timbathandizira lini cipani ciri-centse ca ndale. Zimwezi ni njira zinango zomwe timbalatizira kuti ndife wakukhulupirika ku Umambo bwa Mulungu.

FUFUDZANI BZINANGO

3. Akristau wacadidi ambapitira lini nkhani za m’dziko

Jezu na ateweri wace ni ciratizo cabwino pa nkhani imweyi. Werengani Aroma 13:1, 5-7 na 1 Pedru 2:13, 14. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi Ambapitira Lini Nkhani za m’Dziko — Mbali 1 (4:28)

• Thangwe ranyi tin’funika kulemekeza atongi wa dziko?

• Kodi ni njira zinango ziponi zomwe tingalatize kuti timbawabvera?

Pa nthawe za nkhondo, mitundu inango imbalewa kuti imbapitira lini nkhani za m’dziko koma iyo imbathandizira mbali zentse za omwe akumenya nkhondowo. Kodi kusaya kupitira nkhani za m’dziko kumbathandauza ciyani? Werengani Juwau 17:16. Mukamala, onani VIDIYO ndipo cezeranani mbvunzo wakutewerayu.

VIDIYO: Akristau Wacadidi Ambapitira Lini Nkhani za m’Dziko — Mbali 2 (3:11)

• Kodi kusaya kupitira nkhani za m’dziko kumbathandauza ciyani?

Kodi tingacite tani atongi akatiuza kuti ticite bzinthu bzomwe bzikupitana na malamulo ya Mulungu? Werengani Mabasa 5:28, 29. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi Ambapitira Lini Nkhani za m’Dziko — Mbali 3 (1:18)

• Kodi malamulo ya wanthu yakapitana na malamulo ya Mulungu, tin’funika kubvera malamulo ya mbani?

• Kodi mukukwanisa kukumbukira cinthu ciri-centse comwe cingacitise Mkristau kuleka kubvera atongi?

4. Lekani kupitira nkhani za m’dziko m’bzicito na m’makumbukidwe mwanu

Werengani 1 Juwau 5:21. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi An’funika Kukhwimika — Kuti Apitirize Kusaya Kupitira Nkhani za Ndale (2:49)

• Mu vidiyoyi, thangwe ranyi Ayenge adasankhula kusaya kucita mbali ya cipani ayai kucita bzinthu bzinango ninga kunamata bandera?

• Kodi mukuwona kuti iye adacita bzinthu mwanzeru?

Kodi ni bzinthu bzinango bziponi bzomwe bzingayeze kukhulupirika kwathu pa kusaya kupitira nkhani za m’dziko? Onani VIDIYO, ndipo mukamala cezeranani mibvunzo ikutewerayi.

VIDIYO: Bzomwe Tapfunza mu Ntsanza ya Mulindiri — Pitirizani Kukhala Wakusaya Kupitira Nkhani za Ndale m’Dziko Lakugawanikali (5:16)

• Kodi tingacite tani kuti tileke kupitira nkhani za m’dziko penu tikuwona mathimu yakumenya bola ayai wanthu akucita mapici yakuthamanga?

• Kodi tingapitirize tani kusaya kupitira nkhani za m’dziko napo kuti bzomwe cipani cinango casankhula kucita bzikutiwawa ayai bzinʼtipasa phindu?

• Kodi bzinthu bzomwe timbabva mu notisiya na wanthu omwe timbakhala nawo bzingayeze tani kukhulupirika kwathu?

KODI MWAPFUNZA CIYANI?

Akristau ambacita nyongo kuti aleke kupitira nkhani za m’dziko m’makumbukidwe, m’mafala na m’bzicito.

Mibvunzo yakubwerezera

• Kodi n’ciyani comwe tin’funika kupereka kwa atongi?

• Thangwe ranyi tin’funika kupitiriza kusaya kupitira nkhani za ndale?

• Kodi ni bzinthu bziponi bzomwe bzingayeze kukhulupirika kwathu pa kusaya kupitira nkhani za m’dziko?

ONANI POMWE IBZI

Kodi ni nyongo iponi yomwe pinango tingafunike kucita kuti tisaye kupitira nkhani za m’dziko?

Yahova Cipo Acidzatisiya (3:14)

Kodi n’ciyani comwe mabanja yangacite kuti yakonzekere bzinthu bzomwe bzingayeze kusaya kwawo kupitira nkhani za m’dziko?

Pitirizani Kuleka Kupitira Bzinthu bza m’Dziko pa Cakucitika Ciri-centse (4:25)

Thangwe ranyi tingalewe kuti kukhotcerera dziko lathu ni cinthu lini cikulu pakundendemezera na kubzipereka kwathu kwa Mulungu?

“Bzinthu Bzentse Mpsakukwanisika na Mulungu” (5:19)

Onani momwe mungatcenkhere kupitira nkhani za m’dziko pomwe mukunyang’ana basa.

“Ali-wentse An’dzanyamula Mtolo Wace” (Ntsanza ya Mulindiri ya 15 Março, 2006)

Ziwande ntsiku ayai zicepe, Mkristau ali-wentse an’dzazunzidwa. Kodi imwepo mumbacita thupo na nkhani imweyi?

1. Thangwe ranyi ifepano timbadziwa kuti tin’dzazunzidwa?

Bibliya limbati: “Wentse omwe an’funa kukhala na moyo wakubzipereka kwa Mulungu mwakubverana na Kristu Jezu, an’dzagumanambo na mabvuto.” (2 Timotio 3:12) Jezu adazunzidwa thangwe iye akhacita lini mbali ya dziko la Sathaniri. Ifepano timbacitambo lini mbali ya dzikoli, ndipopa timbadabwa lini tikambazunzidwa na maboma ya m’dzikoli pabodzi na magereja yakunama. — Juwau 15:18, 19.

2. Kodi tingakonzekere tani pomwe tikanati tazunzidwa?

Ifepano tin’funika kulimbisa cikhulupiro cathu kwa Yahova kuyambira tsapano. Mbapembani kwa iye ndipo mbawerengani Fala lace ntsiku zentse. Mbayendani ku mitsonkhano yentse ya gwere. Kucita bzimwebzi kun’dzakuthandizani kulimbisa cikhulupiro canu comwe cin’dzakucitisani kupirira mabvuto yomwe mungadzagumane nayo, napo yacicokera kwa adzinza wanu. Mpostolo Paulo, omwe akhazunzidwa kawiri-kawiri adanemba kuti: “Yahova ni mthandizi wangu, nin’dzagopa lini cinthu.” — Ahebereu 13:6.

Kupalizira kawiri-kawiri kumbatithandizambo kukhala wakukhwimika. Kupalizira kumbatithandiza kuthemba Yahova na kuleka kumbagopa wanthu. (Mimwani 29:25) Imwepo mukakhwimika kuti mupalizire ntsiku zino, bzin’dzakunesani lini kupalizira napo boma likadzaletsa basa lathu. — 1 Atesalonika 2:2.

3. Kodi timbagumana phindu liponi tikambapirira mazunzo?

Kulewa cadidi, ifepano timbakomedwa lini tikazunzidwa, koma tikapirira mazunzoyo, cikhulupiro cathu cimbalimba kwene-kwene. Ifepano timbakhala pa uxamwali bwakulimba na Yahova tikambawona iye akutithandiza pa nthawe yomwe bzinthu bzatineseratu. (Werengani Tiyago 1:2-4.) Yahova bzimbamuwawa kwene-kwene tikambazunzidwa, tsono ambakomedwa akatiwona tikupirira. Bibliya limbalewa kuti: “Penu mun’pirira mabvuto thangwe ra kucita bzabwino, Mulungu ambakomedwa na bzimwebzi.” (1 Pedru 2:20) Tikapitiriza kukhala wakukhulupirika kwa Yahova, iye an’dzatipasa moyo wamuyaya m’dziko lipsa. Ndipo wentse omwe an’dzakhala m’dzikolo an’dzatumikira Yahova ndipo palibe omwe an’dzawazunza pomwe. — Mateu 24:13.

FUFUDZANI BZINANGO

4. Imwepo mungapirire adzinza wanu akakuzunzani

Jezu ambadziwa kuti adzinza wathu winango ambafuna lini kuti titumikire Yahova. Werengani Mateu 10:34-36, ndipo mukamala cezeranani mbvunzo wakutewerayu:

• Kodi adzinza angacite ciyani m’bale wawo akayamba kutumikira Yahova?

VIDIYO: Yahova Ambatisamalira (5:13)

• Kodi n’ciyani comwe mungacite penu wadzinza ayai xamwali wanu akuyeza kukutazisani kutumikira Yahova?

Werengani Salimo 27:10 na Marko 10:29, 30. Mukamala cezeranani mbvunzo wakutewerayu:

• Kodi mafala ya m’mavesiya yangakuthandizeni tani penu wadzinza ayai xamwali wanu akukuuzani kuti musiye kutumikira Yahova?

5. Pitirizani kunamata Yahova napo mukuzunzidwa

VIDIYO: Khalani Wakukhimika Napo Mukuzunzidwa (6:27)

• Kodi ciratizo comwe mwawona mu vidiyoyi cakulimbikisani tani?

Werengani Mabasa 5:27-29 na Ahebereu 10:24, 25. Mukamala cezeranani mbvunzo wakutewerayu:

• Thangwe ranyi kupitiriza kunamata Yahova n’kwakufunika kwene-kwene napo boma licitiletsa kupalizira na kutsonkhana?

6. Yahova an’dzakuthandizani kupirira

VIDIYO: Yahova An’dzandipasa Mphanvu (3:40)

• Mu vidiyoyi, kodi n’ciyani cidathandiza Mbonizi kuti zipirire?

Werengani Aroma 8:35, 37-39 na Afilipi 4:13. Mukamala cezeranani mbvunzo wakutewerayu:

• Kodi mafala ya m’mavesiya yakuthandizani tani kuwona kuti mungapirire mazunzo?

Werengani Mateu 5:10-12, ndipo mukamala cezeranani mbvunzo wakutewerayu:

• Thangwe ranyi imwepo mungakomedwe napo mukazunzidwa?

KODI MWAPFUNZA CIYANI?

Yahova ambawona nyongo yomwe timbacita pomwe tikumutumikira napo tikuzunzidwa. Na thandizo lace ifepano tingapirire!

Mibvunzo yakubwerezera

• Thangwe ranyi Akristau ambadziwa kuti an’dzazunzidwa?

• Kodi n’ciyani comwe mun’funika kucita kuti mudzakwanise kupirira mukadzazunzidwa?

• Kodi n’ciyani comwe cingakuthandizeni kuwona kuti mungakwanise kupirira napo mukuzunzidwa?

ONANI POMWE IBZI

Onani tswaka lomwe likufotokoza momwe Yahova adamuthandizira kupirira pomwe akhali m’kawoko thangwe ra kusaya kupitira nkhani za ndale.

Kupirira pa Nthawe ya Mazunzo (2:34)

Onani bzomwe bzidathandiza banja linango kutumikira Yahova mwakukhulupirika magole mazinji napo likhazunzidwa.

Tidatumikira Yahova pa Nthawe Yakunesa (7:11)

Onani momwe mungakhalire wakukhwimika mukazunzidwa.

“Khalani Wakukonzeka Kulimbana na Mazunzo”(Ntsanza ya Mulindiri ya Julho, 2019)

Kodi tingacite tani kuti tikhale pa mtendere na adzinza wathu ticikhalambo wakukhulupirika kwa Yahova?

“Cadidi Cimbabweresa ‘Sikuti Mtendere, Koma Mphanga’” (Ntsanza ya Mulindiri ya Outubro, 2017)