Nkhani ikulu yomwe imbafotokozedwa m’Bibliya imbalewa bza Umambo bwa Mulungu. Yahova an’dzaphatisa basa Umambobu kuti an’dzakwanirise bzomwe akhafuna pakuyamba pomwe adalenga dziko la pantsi. Kodi Umambo n’ciyani? Kodi timbabziwa tani kuti Umambobo bukutonga kale? Kodi Umambobo bwacita kale ciyani? Ndipo bun’dzacita ciyani kutsogoloku? Mu pfunziro lino na lakutsogolo tiniwona mitawiro ya mibvunzoyi.

1. Kodi Umambo bwa Mulungu n’ciyani ndipo Mambo wace ni mbani?

Umambo ni boma lomwe lidakhazikisidwa na Yahova Mulungu. Ndipo Mambo wa Umambobo ni Jezu Kristu ndipo akutonga kudzulu. (Mateu 4:17; Juwau 18:36) Pakulewa bza Jezu, Bibliya limbati: “Iye an’dzatonga . . . mpaka kale-kale.” (Luka 1:32, 33) Pakuti Jezu ni Mambo wa Umambo bwa Mulungu, iye an’dzatonga dziko lentse la pantsi.

2. Kodi mbani omwe an’dzatonga pabodzi na Jezu?

Jezu an’dzatonga lini yekha. Iye an’dzatonga pabodzi na wanthu wakucokera ku “dzinza liri-lentse, cirewedwe ciri-centse, mtundu uli-wentse . . . ndipo iwo an’dzakhala amambo acidzatonga dziko la pantsi.” (Apokalipse 5:9, 10) Kodi mbangasi omwe an’dzatonga pabodzi na Kristu? Kuyambira pomwe Jezu adabwera pa dziko la pantsi, Akristau azinji akukhala ateweri wace. Kodi ni wentse omwe an’dzatonga naye? Ne, koma ni Akristau wakukwana 144 000 okha basi. (Werengani Apokalipse 14:1-4.) Ndipo Akristau wentse omwe an’dzayenda lini kudzulu an’dzakhala mzika za Umambobo pa dziko la pantsi pano. — Salimo 37:29.

3. Thangwe ranyi boma la Mulungu ndabwino kwene-kwene kuposa maboma ya wanthu?

Napo atongi wa maboma ya wanthu ambayezera kucita bzinthu bzabwino, iwo ambakwanisa lini kucita cinthu ciri-centse comwe ambafuna thangwe alibe mphanvu. Ndipo atongi winango omwe ambadzapita nkhankha yawo ambakhala wanthu omwe ambafuna kuti bzentse bzikhale bzawo ndipo ambakhala alibe basa na wanthu omwe akuwatonga. Tsono Jezu omwe ni Mtongi wa Umambo bwa Mulungu, an’dzapitidwa lini nkhankha na munthu ali-wentse. Thangwe Mulungu “an’dzakhazikisa umambo bomwe cipo bucidzapfudzidwa.” (Daniyeli 2:44) Jezu an’dzatonga dziko lentse la pantsi, ndipo iye an’dzacitira wanthu wentse bzabwino sikuti kucita kunyang’ana nkhope. Iye ngwalufoyi, wakudeka mtima na wacirungamo ndipo an’dzapfunzisa wanthu kuti adzalatizembo makhalidwe yamweya kuna anzawo. — Werengani Zaiya 11:9.

4. Boma lamphanvu kwene-kwene lin’dzatonga dziko lentse la pantsi

Jezu Kristu ngwamphanvu kwene-kwene kuposa mtongi ali-wentse. Werengani Mateu 28:18, ndipo mukamala cezeranani mbvunzo wakutewerayu:

• Kodi n’kusiyana kuponi komwe kulipo pakati pa mphanvu za Jezu na za atongi wa wanthu?

Maboma ya wanthu yambacinja-cinja ndipo boma liri-lentse limbatonga mkati mwa malire yace. Tsono tani pakulewa bza Umambo bwa Mulungu? Werengani Daniyeli 7:14, ndipo mukamala cezeranani mibvunzo ikutewerayi:

• Thangwe ranyi mpsakudekeza kudziwa kuti Umambo bwa Mulungu “bun’dzapfudzidwa lini”?

• Thangwe ranyi mpsakudekeza kudziwa kuti Umambobo bun’dzatonga dziko lentse la pantsi?

5. Maboma ya wanthu yangakwanise lini kumalisa mabvuto yathu

Thangwe ranyi Umambo bwa Mulungu bun’dzapfudza maboma ya wanthu? Onani VIDIYO, ndipo mukamala cezeranani mbvunzo wakutewerayu.

VIDIYO: Kodi Umambo bwa Mulungu n’Ciyani? — Cipande (1:41)

• Kodi n’ciyani comwe cacitika na utongi bwa wanthu?

Werengani Mpalizi 8:9, ndipo mukamala cezeranani mbvunzo wakutewerayu:

• Kodi imwepo mumbakumba kuti Umambo bwa Mulungu bungapfudze maboma ya wanthu? Thangwe ranyi?

6. Umambo bwa Mulungu buna atongi omwe ambatibvesesa

Pakuti mambo wathu Jezu adakhala na moyo pa dziko la pantsi pano, iye “[angatibvesese] bzakuphonya bzathu.” (Ahebereu 4:15) Yahova adasankhula amuna na akazi wakukhulupirika wakukwana 144 000 omwe an’dzakatonga pabodzi na Jezu, iwo ni wanthu wakucokera ku “dzinza liri-lentse, cirewedwe ciri-centse, mtundu uli-wentse na dziko liri-lentse.” — Apokalipse 5:9.

• Kodi mwakomedwa kudziwa kuti Jezu pabodzi na omwe an’katonga naye kudzulu adakhalambo pa dziko la pantsi pano? Thangwe ranyi?

7. Umambo bwa Mulungu buna malamulo yabwino kwene-kwene kuposa malamulo ya wanthu

Maboma ya wanthu yambakonza malamulo yacikumbuka kuti yanibweresa phindu na kukhotcerera wanthu wa m’dziko lawo. Ndipo Umambo bwa Mulungu bunayombo malamulo yomwe mzika zace zin’funika kuyateweza. Werengani 1 Akolinto 6:9-11, ndipo mukamala cezeranani mibvunzo ikutewerayi:

• Kodi imwepo mukukumbuka kuti bzinthu bzin’dzakhala tani wanthu wentse akadzateweza malamulo ya Mulungu?a

• Kodi imwepo mukukumbuka kuti Yahova ambafuna kuti mzika za Umambobu ziteweze malamuloya? Thangwe ranyi?

• Kodi n’ciyani comwe cikulatiza kuti wanthu omwe ambabvera lini malamuloya angacinje? — Onani vesi 11.

KODI MWAPFUNZA CIYANI?

Umambo bwa Mulungu ni boma lakudzulu ndipo lin’dzatonga dziko lentse la pantsi.

Mibvunzo yakubwerezera

• Kodi mbani omwe an’dzatonga mu Umambo bwa Mulungu?

• Thangwe ranyi Umambo bwa Mulungu n’bwamphanvu kwene-kwene kuposa bwa wanthu?

• Kodi Yahova ambafuna kuti mzika za Umambobo zicite ciyani?

ONANI POMWE IBZI

Onani bzomwe Jezu adapfunzisa kuti Umambo buli kuponi.

“Kodi Umambo bwa Mulungu ni Cinthu Comwe Ciri mu Mtima Mwathu?”(Nkhani ya pa jw.org)

Thangwe ranyi Mboni za Yahova zimbakhulupira Umambo bwa Mulungu mʼmbuto mwa kukhulupira mautongi ya wanthu?

Kukhulupira Umambo bwa Mulungu (1:43)

Onani bzomwe Bibliya limbalewa pa nkhani ya wanthu wakukwana 144 000 omwe Yahova adawasankhula kuti akatonge pabodzi na Jezu.

“Kodi ni Mbani Omwe An’dzayenda Kudzulu?” (Nkhani ya pa jw.org)

Kodi n’ciyani comwe cidatsangalaza mkazi munango m’kawoko kudziwa kuti ni Mulungu yekha omwe an’dzabweresa cirungamo pa dziko?

“Ndidadzadziwa Omwe Angamalise Kusaya Cirungamo” (Mukani! wa Novembro, 2011)

Jezu adauza ateweri wace kuti akhafunika lini kucita “mbali ya dziko.” (Juwau 15:19) Bzimwebzi bzimbathandauza kusaya kupitira nkhani za ndale na nkhondo. Tsono kulewa cadidi, bziribe kupusa kusaya kupitira nkhani za m’dziko. Pinango tingasekedwe thangwe ra bzimwebzi. Kodi tingakhale tani wakukhulupirika kwa Yahova Mulungu ticisaya kupitira nkhani za m’dziko?

1. Kodi Akristau wacadidi ambawona tani atongi wa m’dziko?

Akristau ambalemekeza atongi. Ifepano timbacita bzomwe Jezu adalewa kuti: “Perekani kwa Seza bzinthu bza Seza.” Bzimwebzi bzikuthandauza kuti ifepano timbabvera malamulo ya m’dziko lathu, ninga lamulo la kupagali mtsonkho. (Marko 12:17) Bibliya limbapfunzisa kuti atongi alipo thangwe Yahova abvuma kuti iwo atonge. (Aroma 13:1) Tenepo timbazindikira ugo bwakutonga bomwe boma linabo. Tsono timbazindikirambo kuti iwo alibe mphanvu kuposa Mulungu. Timbadziwa kuti ni Umambo bwa Mulungu bokha bomwe bun’dzamalisa mabvuto yentse ya wanthu.

2 Kodi tingalatize tani kuti timbapitira lini nkhani za m’dziko?

Ninga Jezu, ifepano timbapitira lini nkhani za ndale. Pomwe wanthu adawona cibodzi pa bzakudabwisa bzomwe Jezu adacita, iwo adayezera kumuikha kuti akhale mambo, tsono iye adalamba. (Juwau 6:15) Thangwe ranyi? Thangwe iye adadzalewa kuti: “Umambo bwangu bumbacita lini mbali ya dziko.” (Juwau 18:36) Pakuti ndife anyakupfunza wa Jezu, timbalatiza kuti timbapitira lini nkhani za m’dziko mu njira zakusiyana-siyana. Mwa ciratizo, ifepano timbayenda lini ku nkhondo. (Werengani Mika 4:3.) Ifepano timbalemekeza bzizindikiro bzentse bza m’dziko ninga bandera, tsono timbabzinamata lini. (1 Juwau 5:21) Ndipo timbawenga lini ne timbathandizira lini cipani ciri-centse ca ndale. Zimwezi ni njira zinango zomwe timbalatizira kuti ndife wakukhulupirika ku Umambo bwa Mulungu.

FUFUDZANI BZINANGO

3. Akristau wacadidi ambapitira lini nkhani za m’dziko

Jezu na ateweri wace ni ciratizo cabwino pa nkhani imweyi. Werengani Aroma 13:1, 5-7 na 1 Pedru 2:13, 14. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi Ambapitira Lini Nkhani za m’Dziko — Mbali 1 (4:28)

• Thangwe ranyi tin’funika kulemekeza atongi wa dziko?

• Kodi ni njira zinango ziponi zomwe tingalatize kuti timbawabvera?

Pa nthawe za nkhondo, mitundu inango imbalewa kuti imbapitira lini nkhani za m’dziko koma iyo imbathandizira mbali zentse za omwe akumenya nkhondowo. Kodi kusaya kupitira nkhani za m’dziko kumbathandauza ciyani? Werengani Juwau 17:16. Mukamala, onani VIDIYO ndipo cezeranani mbvunzo wakutewerayu.

VIDIYO: Akristau Wacadidi Ambapitira Lini Nkhani za m’Dziko — Mbali 2 (3:11)

• Kodi kusaya kupitira nkhani za m’dziko kumbathandauza ciyani?

Kodi tingacite tani atongi akatiuza kuti ticite bzinthu bzomwe bzikupitana na malamulo ya Mulungu? Werengani Mabasa 5:28, 29. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi Ambapitira Lini Nkhani za m’Dziko — Mbali 3 (1:18)

• Kodi malamulo ya wanthu yakapitana na malamulo ya Mulungu, tin’funika kubvera malamulo ya mbani?

• Kodi mukukwanisa kukumbukira cinthu ciri-centse comwe cingacitise Mkristau kuleka kubvera atongi?

4. Lekani kupitira nkhani za m’dziko m’bzicito na m’makumbukidwe mwanu

Werengani 1 Juwau 5:21. Mukamala, onani VIDIYO ndipo cezeranani mibvunzo ikutewerayi.

VIDIYO: Akristau Wacadidi An’funika Kukhwimika — Kuti Apitirize Kusaya Kupitira Nkhani za Ndale (2:49)

• Mu vidiyoyi, thangwe ranyi Ayenge adasankhula kusaya kucita mbali ya cipani ayai kucita bzinthu bzinango ninga kunamata bandera?

• Kodi mukuwona kuti iye adacita bzinthu mwanzeru?

Kodi ni bzinthu bzinango bziponi bzomwe bzingayeze kukhulupirika kwathu pa kusaya kupitira nkhani za m’dziko? Onani VIDIYO, ndipo mukamala cezeranani mibvunzo ikutewerayi.

VIDIYO: Bzomwe Tapfunza mu Ntsanza ya Mulindiri — Pitirizani Kukhala Wakusaya Kupitira Nkhani za Ndale m’Dziko Lakugawanikali (5:16)

• Kodi tingacite tani kuti tileke kupitira nkhani za m’dziko penu tikuwona mathimu yakumenya bola ayai wanthu akucita mapici yakuthamanga?

• Kodi tingapitirize tani kusaya kupitira nkhani za m’dziko napo kuti bzomwe cipani cinango casankhula kucita bzikutiwawa ayai bzinʼtipasa phindu?

• Kodi bzinthu bzomwe timbabva mu notisiya na wanthu omwe timbakhala nawo bzingayeze tani kukhulupirika kwathu?

KODI MWAPFUNZA CIYANI?

Akristau ambacita nyongo kuti aleke kupitira nkhani za m’dziko m’makumbukidwe, m’mafala na m’bzicito.

Mibvunzo yakubwerezera

• Kodi n’ciyani comwe tin’funika kupereka kwa atongi?

• Thangwe ranyi tin’funika kupitiriza kusaya kupitira nkhani za ndale?

• Kodi ni bzinthu bziponi bzomwe bzingayeze kukhulupirika kwathu pa kusaya kupitira nkhani za m’dziko?

ONANI POMWE IBZI

Kodi ni nyongo iponi yomwe pinango tingafunike kucita kuti tisaye kupitira nkhani za m’dziko?

Yahova Cipo Acidzatisiya (3:14)

Kodi n’ciyani comwe mabanja yangacite kuti yakonzekere bzinthu bzomwe bzingayeze kusaya kwawo kupitira nkhani za m’dziko?

Pitirizani Kuleka Kupitira Bzinthu bza m’Dziko pa Cakucitika Ciri-centse (4:25)

Thangwe ranyi tingalewe kuti kukhotcerera dziko lathu ni cinthu lini cikulu pakundendemezera na kubzipereka kwathu kwa Mulungu?

“Bzinthu Bzentse Mpsakukwanisika na Mulungu” (5:19)

Onani momwe mungatcenkhere kupitira nkhani za m’dziko pomwe mukunyang’ana basa.

“Ali-wentse An’dzanyamula Mtolo Wace” (Ntsanza ya Mulindiri ya 15 Março, 2006)