Thangwe Ranyi Bzinthu Bzakuipa Bzimbacitika Ndipo Thangwe Ranyi Wanthu Ambabonera?

Pakacitika bzinthu bzakuipa, timbabzibvunza kuti: “Thangwe ranyi bzimwebzi bzacitika?” Timbakomedwa kwene-kwene kudziwa kuti Bibliya lina mtawiro wa mbvunzo umweyu.

1. Kodi n’ciyani comwe Sathani adacita kuti bzinthu bzakuipa bziyambe kucitika m’dzikoli?

Sathani Dyabu adapandukira Mulungu. Ndipo thangwe ra kufuna kutonga anzace, iye adapumpsa Adamu na Eva kuti apandukirembo Mulungu. Iye adacita bzimwebzi mwa kunamiza Eva. (Genesesi 3:1-5) Na gunkha limweri Sathani adacitisa Eva kukumbuka kuti Yahova akhafuna lini kuti Evayo akhale na bzinthu bzabwino. Iye adalewambo kuti wanthu angakhale wakukondwa akasaya kubvera Mulungu. Sathani adalewa gunkha lakuyamba pomwe adauza Eva kuti angadafa lini. Ndipopa Bibliya limbalewa kuti Sathani “ngwakunama ndipo ni baba wakunama.” — Juwau 8:44.

2. Kodi Adamu na Eva adasankhula kucita ciyani?

Yahova adapasa Adamu na Eva bzinthu bzentse bzakufunikira. Iye adawauza kuti adye bzisapo bza miti yentse yomwe ikhali mu Edeni kupambula muti m’bodzi. (Genesesi 2:15-17) Tsono iwo adasirira kudya cisapo ca muti omwe adawaletsayo. Eva “adatca cisapo ca mutiyo, acidya.” Ndipo mwamuna wace, Adamu, “adadyambo.” (Genesesi 3:6) Na tenepo wentse awiri alibe kubvera Mulungu. Pakuti Adamu na Eva akhali wakulungama, bzikhali bzakukwanisika kwa iwo kucita bzomwe mpsabwino. Koma iwo adasankhula kuleka kubvera Mulungu, pomwe iwo adacita bzimwebzi adacita pikado ndipo adalamba kuti Mulungu ambawauze bzakucita. Bzomwe iwo adacitabzi bzidawakolomolera mabvuto mazinji. — Genesesi 3:16-19.

3. Thangwe ranyi ifepano timbabonerambo na bzomwe Adamu na Eva adacita?

Pomwe Adamu na Eva adaphonya, iwo adakhala wakusaya kulungama ndipo kusaya kulungama kwawoko kudayambukirambo wana wawo wentse. Pakulewa bza Adamu, Bibliya limbati: “Thangwe ra munthu m’bodzi pikado idapita m’dziko, ndipo pikadoyo idabweresa infa, tenepo infayo idafikira wanthu wentse.” — Aroma 5:12.

Ifepano timbabonera thangwe ra mabvuto yakusiyana-siyana. Nthawe zinango timbabonera thangwe ra bzinthu bzakuipa bzomwe timbacita. Nthawe zinango timbabonera thangwe ra bzinthu bzakuipa bzomwe winango ambacita. Ndipo nthawe zinango timbabonera thangwe ra kukhala pa mbuto na pa nthawe yakuphonyeka. — Werengani Mpalizi 9:11..

FUFUDZANI BZINANGO

4. Omwe ambacitisa kuti tibonere

Wanthu azinji ambakhulupira kuti Mulungu ni omwe akutonga dzikoli. Kodi bzimwebzi n’cadidi? Onani VIDIYO.

VIDIYO: Kodi Mbani Akutonga Dzikoli? (1:24)

Werengani Tiyago 1:13 na 1 Juwau 5:19, ndipo mukamala cezeranani mbvunzo wakutewerayu:

• Kodi Mulungu ndiye ambacitisa kuti tibonere?

5. Onani bzomwe bzikucitika na utongi bwa Sathani

VIDIYO: Thangwe Ranyi Mulungu Ambalekerera Kuti Wanthu Abonere? — Cipande (3:07)

Werengani Genesesi 3:1-6, ndipo mukamala cezeranani mibvunzo ikutewerayi:

• Kodi Sathani adamunamiza ciyani Eva? — Onani vesi 4 na 5.

• Kodi n’ciyani comwe Sathani adalewa comwe cidawonesa ninga kuti Yahova ambabisira wanthu cinthu cinango?

• Kodi Sathani adalatiza tani kuti wanthu an’funikira lini kutongedwa na Yahova kuti akhale wakukondwa?

Werengani Mpalizi 8:9, ndipo mukamala cezeranani mbvunzo wakutewerayu:

• Pakuti dzikoli likutongedwa lini na Yahova, n’ciyani comwe cikucitika?

1. Adamu na Eva akhali wakulungama ndipo adakhala m’Paraizo. Tsono iwo adabvera Sathani ndipo adapandukira Yahova

2. Thangwe ra kupanduka kwa Adamu na Eva, dziko la pantsi lidadzala na pikado, mabvuto ndipo infa idathumizirika

3. Yahova an’dzamalisa pikado, kubonera na infa. Bzimwebzi bzikadzacitika wanthu an’dzakhala wakulungama m’Paraizo

6. Yahova ambatithandiza tikabonera

Kodi Mulungu ambatithandiza tikabonera? Onani bzomwe Mambo Davide na mpostolo Pedru adanemba. Werengani Salimo 31:7 na 1 Pedru 5:7, ndipo mukamala cezeranani mbvunzo wakutewerayu:

• Kodi imwepo mukubzibva tani thangwe ra kudziwa kuti Yahova ambawona ndipo ambatithandiza tikabonera?

KODI MWAPFUNZA CIYANI?

Sathani Dyabu pabodzi na Adamu na Eva ndiwo adacitisa kuti wanthufe tibonere. Yahova ambacita nafe thupo tikabonera ndipo tsapanopapa animalisa mabvuto yentse.

Mibvunzo yakubwerezera

• Kodi ni gunkha liponi lomwe Sathani Dyabu adauza Eva?

• Thangwe ranyi kupanduka kwa Adamu na Eva kudatikolomolera mabvuto?

• Kodi timbadziwa tani kuti Yahova ambatithandiza tikabonera?

ONANI POMWE IBZI

Onani bzomwe Bibliya limbalewa pakulewa bza pikado.

“Kodi Pikado n’Ciyani?” (Nkhani ya pa jw.org)

Werengani kuti mudziwe bzinango bzomwe Sathani adalewa mu Edeni.

“Thangwe Ranyi Mulungu Ambalekerera Kuti Wanthufe Tibonere?” (Ntsanza ya Mulindiri ya 1 Janeiro, 2014)

Onani mtawiro wa mbvunzo wakunesa.

“Thangwe Ranyi Mulungu Adalekerera Kuti Wanthu Azinji Aphedwe mu Utongi bwa Nazi ku Alemanha?” (Nkhani ya pa jw.org)

Onani bzomwe munthu munango adapfunza na mabvuto yomwe yadamucitikira.

Nimbabzibva Lini Pomwe Kuti Ndiri Ndekha (5:09)

Timbaphonya, timbabonera ndipo timbafa thangwe rakuti wanthu wakuyambirira Adamu na Eva, alibe kubvera Mulungu.a Koma tinaco cidikhiro. Yahova adakonza njira ya kutipulumusira kutemberero la pikado na infa mwakuphatisa basa Mwana wace, Jezu Kristu. Bibliya limbapfunzisa kuti infa ya Jezu idatilombola. Cakulombolera ni pereso yomwe imbapagalidwi kuti munthu atsudzulidwe. Pereso yomwe Jezu adapagali ikhali moyo wace wakulungama. (Werengani Mateu 20:28.) Pomwe Jezu mwa kufuna kwace adabwera pa dziko la pantsi kudzapereka moyo wace, iye adatipasa mwayi wakukhala na bzinthu bzentse bzomwe Adamu na Eva adaluza. Jezu adalatizambo kuti iye na Yahova ambatifuna kwene-kwene. Pfunziro lino lin’tithandiza kuthumizira kutenda kwathu infa ya Jezu.

1. Kodi infa ya Jezu imbatithandiza tani ntsiku zino?

Pakuti ndife wanthu wa pikado, timbacita bzinthu bzizinji bzomwe bzimbakondwesa lini Yahova. Tsono tikakungula pikado zathuzo, ticikumbira kuti Yahova atilekerere mwakuphatisa basa ntsembe ya Jezu Kristu na kucita nyongo yakuti tireke kubwerezera bzomwe taphonyabzo, tin’dzakhala pa uxamwali bwakulimba na Mulungu. (1 Juwau 2:1) Bibliya limbati: “Kristu, munthu wakulungama, adafera pikado za wanthu wakusaya kulungama kabodzi kokha mpaka kale-kale na cakulinga cakuti awatsogolere kwa Mulungu.” — 1 Pedru 3:18.

2. Kodi infa ya Jezu in’dzatithandiza tani kutsogolo?

Yahova adatumiza Jezu kuti adzapereke moyo wace wakulungama “kuti ali-wentse omwe an’khulupira [Jezuyo] aleke kudzaphedwa, koma adzakhale na moyo wakusaya kumala.” (Juwau 3:16) Thangwe ra bzomwe Jezu adacita, mwakusaya kucedwa Yahova an’dzacosa bzinthu bzentse bzomwe bzidabwera thangwe ra kusaya kubvera kwa Adamu. Bzimwebzi bzikuthandauza kuti tikakhulupira ntsembe ya Jezu Kristu, tin’dzakhala na mwayi wakukhala na moyo wakukondwa m’paraizo pa dziko la pantsi pano. — Zaiya 65:21-23.

FUFUDZANI BZINANGO

3. Infa ya Jezu imbatitsudzula ku pikado na infa

VIDIYO: Thangwe Ranyi Jezu Adafa? — Mbali 1 (2:01)

• Kodi Adamu adaluza mwayi uponi thangwe ra kusaya kubvera Mulungu?

Werengani Aroma 5:12, ndipo mukamala cezeranani mbvunzo wakutewerayu:

• Kodi pikado ya Adamu idatokonya tani moyo wanu?

Werengani Juwau 3:16, ndipo mukamala cezeranani mbvunzo wakutewerayu:

• Thangwe ranyi Yahova adatumiza Mwana wace pa dziko la pantsi?

1. Adamu akhali munthu wakulungama omwe alibe kubvera Mulungu ndipo adacitisa wanthu kukhala na pikado acimbafa

2. Jezu akhali munthu wakulungama omwe adabvera Mulungu acicitisa wanthu kukhala na mwayi wakudzakhala na moyo wakulungama na wakusaya kumala

4. Wanthu wentse ambagumana phindu thangwe ra infa ya Jezu

VIDIYO: Thangwe Ranyi Jezu Adafa? — Mbali 2 (2:00)

• Kodi infa ya munthu m’bodzi ingathandize tani wanthu wentse?

Werengani 1 Timotio 2:5, 6, ndipo mukamala cezeranani mbvunzo wakutewerayu:

• Adamu akhali munthu wakulungama omwe adacitisa wanthu kukhala na pikado. Jezu akhalimbo munthu wakulungama. Kodi iye adapereka tani “cakulombolera” mwakuthemera?

5. Cakulombolera ni mphaso yomwe Yahova adakupasani

Axamwali wa Yahova ambawona cakulombolera kuti ni mphaso yomwe Yahova adawapasa. Mwa ciratizo, werengani Agalatiya 2:20, ndipo mukamala cezeranani mbvunzo wakutewerayu:

• Kodi mpostolo Paulo adalatiza tani kuti akhawona cakulombolera kuti ni mphaso?

Pomwe Adamu adacita pikado, iye na wana wace wentse adapasidwa nyathwa ya infa. Tsono Yahova adatumiza Mwana wace kudzatifera kuti tikhale na mwayi wakudzakhala na moyo wakusaya kumala.

Pomwe mukuwerenga mavesi yakuteweraya, kumbukirani momwe Yahova akhabvera pomwe Mwana wace akhaboneresedwa. Werengani Juwau 19:1-7, 16-18, ndipo mukamala cezeranani mbvunzo wakutewerayu:

• Kodi imwepo mumbabva tani thangwe ra bzomwe Yahova na Jezu adakucitirani?

KODI MWAPFUNZA CIYANI?

Infa ya Jezu imbacitisa Yahova kulekerera pikado zathu ndipo imbatipasambo mwayi wakudzakhala na moyo wakusaya kumala.

Mibvunzo yakubwereza

• Thangwe ranyi Jezu Adafa?

• Kodi moyo wakulungama wa Jezu udakhala tani cakulombolera cakuthemera?

• Kodi mumbagumana phindu liponi thangwe ra infa ya Jezu?

ONANI POMWE IBZI

Pfunzani thangwe race moyo wakulungama wa Jezu umbacemeredwa cakulombolera.

“Kodi Ntsembe ya Jezu ‘Imbalombola Tani Wanthu Azinji’?” (Nkhani ya pa jw.org)

Onani bzomwe tin’funika kucita kuti tidzapulumusidwe.

“Kodi Jezu Ambatipulumusa Tani? (Nkhani ya pa jw.org)

Kodi Yahova angalekerere napo pikado zikulu-zikulu?

“Kutawira Mibvunzo ya m’Bibliya” (Ntsanza ya Mulindiri ya 1 Maio, 2013)

Onani momwe kupfunza bza ntsembe ya Kristu kudathandizira mwamuna munango omwe akhaboneresedwa na makumbukidwe yakuipa.

“Ndine Lini Pomwe Munthu wa Ciwembo”(Nkhani ya pa jw.org)