12. Kodi 1 Pedru 3:18, 22, ambatithandiza tani kudziwa kuti kulamusidwa kwa Jezu kudakhala kwakupambulika kuposa kwa wale omwe adalamusidwa bzimwebzi bzikanati kucitika?

¹² Mpostolo Paulo akhadziwa kuti ‘Kristu adalamusidwa kwa anyakufa.’ Kulamusidwa kumweku, kudakhala kwakupambulika kwene-kwene kuposa kwa wanthu omwe adalamusidwa bzimwebzi bzikanati kucitika, thangwe wanthuwo na kupita kwa nthawe adadzafa pomwe. Paulo adalewa kuti Jezu akhali ‘cisapo cakuyambirira ca wale omwe adagona mu infa.’ Thangwe ranyi Jezu akhali wakuyambirira? Thangwe rakuti iye adakhala munthu wakuyambirira kulamusidwa na thupi ninga la uzimu, ndipo pa wanthu wentse iye adakhala wakuyambirira kuyenda kudzulu.—1 Wakolinto 15:20; Mabasa 26:23; Werengani 1 Pedru 3:18, 22.d

16. Kodi Paulo akhathandauza ciyani pomwe adalewa kuti Jezu ‘ni cisapo’ cakuyambirira?

¹⁶ Paulo adanemba kuti Kristu adalamusidwa ninga ‘cisapo cakuyambirira kwa wale omwe adagona mu infa.’ Kumbukirani kuti wanthu winango ninga Lazaro, adalamusidwa acikhala pomwe na moyo pano pa dziko la pantsi. Tsono Jezu adakhala munthu wakuyambirira kulamusidwa kwa anyakufa ninga mzimu, ndipo adatambira moyo wakusaya kumala. Iye adandendemezeredwa na bzisapo bzakuyambirira bzomwe Ajirayeri akhabzipereka kuna Mulungu. Na mafala yakuti Jezu ninga ‘cisapo’ cakuyambirira, Paulo akhathandauza kuti pambuyo pakulamusidwa kwa Jezu, Akristau winango angadadzalamusidwambo acikakhala kudzulu. Apostolo pabodzi na wanthu winango ‘mwa kuphatana na Kristu,’ angadatewera Jezu. Iwo angadalamusidwa kwa anyakufa mwa njira ibodzi-bodzi ninga momwe bzidacitikira na Jezu.