1. Kodi axamwali omwe timbasankhula angaticitise kucita ciyani?

Kawiri-kawiri ifepano timbatewezera makhalidwe yabwino ayai yakuipa ya wanthu omwe timbamala nawo nthawe izinji, napo bzicikhala kuti ni pa mbuto yakucezera ya pa interneti. Bibliya limbati: “Omwe an’famba na wanthu wanzeru, an’dzakhalambo wanzeru; koma omwe an’cita bzinthu na apsiru, [ayai wale omwe ambafuna lini Yahova] bzin’dzamumalira kuipa.” (Mimwani 13:20) Axamwali omwe ambafuna Yahova na kumunamata angakuthandizeni kupitiriza kukhala pa uxamwali na Yahovayo na kusankhulambo bzinthu mwanzeru. Tsono axamwali omwe ambafuna lini Yahova angaticitise kufunduka kwa Yahovayo. Ndipopa Bibliya limbatilimbikisa kusankhula axamwali mwanzeru! Axamwali wathu akakhala ni wanthu omwe ambafuna Mulungu, tentse timbagumana phindu. Mwa njira imweyi timbakwanisa “kumbalimbikisana na kumbapasana mphanvu.” — 1 Atesalonika 5:11.

Pomwe Yahova adatilenga, iye adatipasa mphaso yabwino kwene-kwene yomwe ni kulewalewa. Kodi iye anabzo basa na momwe timbaphatisira basa mphaso imweyi? Inde anabzo basa! (Werengani Tiyago 1:26.) Tsono tingacite tani kuti Yahova ambakomedwe na momwe timbaphatisira basa mphasoyi?

1. Kodi tingaphatise tani bwino basa mphaso yakulewalewa?

Bibliya limbalewa kuti tin’funika kupitiriza “kumbalimbikisana na kumbapasana mphanvu.” (1 Atesalonika 5:11) Kodi alipo munthu omwe imwepo mukumukumbukira kuti akufunika kulimbikisidwa? Kodi mungacite ciyani kuti mumutsangalaze? Mulatizeni kuti iye ni munthu wakufunika kwene-kwene kwa imwepo. Pinango mungamuuze bzomwe mumbadekedwa nabzo kwa iye. Kodi mukukumbukira vesi lomwe mungaphatise basa kuti mulimbikise munthu omwe mukumudziwa? Yalipo mavesi mazinji yomwe imwepo mungasankhule kuti muyaphatise basa. Kumbukiranimbo kuti kalewedwe kanu kangalimbikise kwene-kwene winango. Ndipopa nthawe zentse mbayezerani kulewalewa mwakudeka mtima na mwakuderekha. — Mimwani 15:1.

2. Kodi tin’funika kutcenkha kulewalewa mafala yaponi?

Bibliya limbalewa kuti: “Mafala yali-yentse yakubvunda yaleke kucoka pamulomo panu.” (Werengani Aefezo 4:29.) Bzimwebzi bzikuthandauza kuti tin’funika lini kumbalewa mafala yakuipa, yakutukwana ayai mafala yomwe yakulatiza kusaya kudeka mtima yomwe yangacitise munthu munango kusaya kubzibva bwino. Tin’funikambo kutcenkha magunkha na kusinjirira winango. — Werengani Mimwani 16:28.

3. Kodi n’ciyani comwe cingatithandize kuti timbalewe mafala yakulimbikisa?

Bzomwe ifepano timbalewalewa bzimbalatiza bzomwe bziri mu mtima mwathu. (Luka 6:45) Ifepano tin’funika kumbakumbukira bzinthu bzabwino ninga bzakulungama, bzakucena, bzakufunidwa na bzakutumbizidwa. (Afilipi 4:8) Kuti tikwanise kucita bzimwebzi, tin’funika kumbasankhula bwino masenzeka na axamwali wathu. (Mimwani 13:20) Bzimwebzi bzimbatithandiza kuti timbakumbuke tikanati kulewalewa. Kumbukirani momwe wanthu winango angabvere na mafala yanu. Bibliya limbati: “Alipo munthu omwe ambalewalewa mwakusaya kukumbuka ninga kulasa kwa mphanga, tsono lirime la wanthu wanzeru limbalimbikisa.” — Mimwani 12:18.

FUFUDZANI BZINANGO

4. Mbacitani mphole pakulewalewa

Tentsenefe nthawe zinango timbalewa mafala yomwe patsogolo pace timbadzakhumbula nayo. (Tiyago 3:2) Werengani Agalatiya 5:22, 23, ndipo mukamala cezeranani mbvunzo wakutewerayu:

• Kodi makhalidwe yomwe yafotokozedwa m’mavesiya yangakuthandizeni tani pakulewalewa?

Werengani 1 Akolinto 15:33, ndipo mukamala cezeranani mbvunzo wakutewerayu:

• Kodi axamwali wathu na masenzeka yomwe timbacita bzingadzonge tani kalalewedwe kathu?

Werengani Mpalizi 3:1, 7, ndipo mukamala cezeranani mbvunzo wakutewerayu:

• Kodi ni nthawe iponi yomwe tin’funika kunyamala?

5. Mbalewani bzinthu bzabwino bzomwe winango ambacita

VIDIYO: Mbalewalewani Mafala Yomwe Ngabwino “Kuti Yalimbikise” Winango (4:07)

• Mu vidiyoyi, thangwe ranyi m’baleyu akhafunika kucinja momwe akhalewalewera na anzace?

• Kodi n’ciyani comwe iye adacita kuti acinje?

Werengani Mpalizi 7:16, ndipo mukamala cezeranani mbvunzo wakutewerayu:

• Kodi tin’funika kucita ciyani yakatibwerera makumbukidwe yakuipa yakufuna kulewa kuipa munthu munango?

Werengani Mpalizi 7:21, 22, ndipo mukamala cezeranani mbvunzo wakutewerayu:

• Kodi mavesiya yangakuthandizeni tani kuleka kukalipa mukabva munthu munango akukulewani kuipa?

6. Khalani wakudeka mtima pomwe mukulewalewa na adzinza wanu

VIDIYO: Lufoyi na Ulemu Bzimbacitisa Kuti Mabanja Yakhale Yakuphatana (3:08)

• Kodi n’ciyani cingakuthandizeni kuti mumbalewelewe mwakudeka mtima na adzinza wanu?

Werengani Aefezo 4:31, 32, ndipo mukamala cezeranani mbvunzo wakutewerayu:

• Kodi mungalewelewe tani na adzinza wanu mafala yakuwalimbikisa?

Yahova adatiuza momwe ambabvera na Mwana wace, Jezu. Werengani Mateu 17:5, ndipo mukamala cezeranani mbvunzo wakutewerayu:

• Kodi mungatewezere tani Yahova mukambalewalewa na adzinza wanu?

KODI MWAPFUNZA CIYANI?

Bzomwe tingalewe bzingathandize ayai bzingakalipise winango. Tin’funika kukumbuka bzomwe tingalewe, nthawe yomwe tingalewe na momwe tingalewere.

Mibvunzo yakubwerezera

• Kodi mungaphatise tani basa mafala yanu kuti muthandize winango?

• Kodi mun’funika kutcenkha kumbalewa mafala yaponi?

• Kodi n’ciyani comwe cingatithandize kuti timbalewe mafala yabwino na yakulimbikisa?

ONANI POMWE IBZI

Kodi n’ciyani cingatithandize kuti timbalewe mafala yabwino?

Mbalewani Mafala Yabwino (8:04)

Onani bzomwe bzingakuthandizeni kutcenkha kulewalewa mafala yakuipa.

“Kodi Kulewa Mafala Yakutukwana n’Kwakuipa?” (Nkhani ya pa jw.org)

Onani momwe mungatcenkhere kulewa kuipa wanthu winango.

Kodi Tingatcenkhe Tani Magunkha? (2:36)

Onani momwe Yahova adathandizira mwamuna munango kusiya kumbalewa mafala yakuipa.

“Ndidayamba Kukumbukira bza Moyo Wangu” (Ntsanza ya Mulindiri ya 1 Agosto, 2013)