Wanthu azinji ambatsudzuka lini kulewalewa nkhani za malume ya pa mphasa. Tsono Bibliya limbalewa nkhani ya malume ya pa mphasa mwakusaya kubisa na mwa ulemu. Bzomwe limbalewabzo bzimbatipasa phindu. Bzimwebzi mpsakubveka, thangwe Yahova ndiye mulengi wathu ndipo iye ambadziwa bzomwe mpsabwino kwa ifepano. Iye ambatiuza bzomwe tin’funika kucita kuti timukondwese na bzomwe bzingatithandize kuti tikhale wakukondwa mpaka muyaya.

1. Kodi Yahova ambaiwona tani nkhani ya malume ya pa mphasa?

Malume ya pa mphasa ni mphaso yakucokera kwa Yahova. Iye ambafuna kuti wanthu wakulowolana ambapfatse na makonzedwe yamweya. Mphaso imweyi imbacitisa lini kuti wanthu wakulowolana akhale na wana basi, koma imbacitisambo kuti iwo ambafunane. Ndipopa Fala la Mulungu limbalewa kuti: “Kondwa na mkazi wa pa utswaka bwako.” (Mimwani 5:18, 19) Yahova ambafuna kuti anyakulowolana akhale wakukhulupirika kwa mwanzawo wa m’banja, ndipopa Mkristau an’funika lini kucita malume ya pa mphasa na munthu omwe alibe kulowolana naye. — Werengani Ahebereu 13:4.

2. Kodi upombo ayai uputa n’ciyani?

Bibliya limbatiuza kuti “wale omwe ambacita upombo ayai uputa . . . an’dzapita lini mu Umambo bwa Mulungu.” (1 Akolinto 6:9, 10) Fala la Cigerego lomwe lidaphatisidwa basa m’Bibliya pakulewa bza upombo ayai uputa ni porneya. Falali li yakuphatanidza (1) kucita malume ya pa mphasaa kwa wanthu wakusaya kulowolana, (2) amuna ayai akazi okha-okha kucita malume ya pa mphasa na (3) kucita malume ya pa mphasa na bzirombo. ‘Tikambatcenkha upombo ayai uputa,’ timbakondwesa Yahova ndipo timbagumanambo phindu. — 1 Atesalonika 4:3.

FUFUDZANI BZINANGO

3. Thawani upombo ayai uputa

Zuze omwe akhali munthu wakukhulupirika, adalamba kucita upombo na mkazi wa Potifari. Werengani Genesesi 39:1-12, ndipo mukamala cezeranani mibvunzo ikutewerayi:

• N’ciyani cidacitisa Zuze kuthawa? — Onani vesi 9.

• Kodi mukukumbuka kuti Zuze adacita bzinthu mwanzeru? Thangwe ranyi?

VIDIYO: Thawani Upombo Ayai Uputa (5:06)

Yahova an’funa kuti tentsenefe tileke kumbacita upombo ayai uputa. Werengani 1 Akolinto 6:18, ndipo mukamala cezeranani mibvunzo ikutewerayi:

• Kodi ni bzinthu bziponi bzomwe bzingacitise munthu kucita upombo ayai uputa?

• Kodi mungatcenkhe tani upombo ayai uputa?

4. Imwepo mungakunde mayezo

VIDIYO: Kundani Mayezo mwa Kuwerenga Bibliya (3:02)

• Kodi n’ciyani comwe m’bale wa mu vidiyoyi wacita, pomwe wazindikira kuti makumbukidwe yace na bzicito bzace bzingadamucitisa kukhala wakusaya kukhulupirika kwa mkazace?

Nthawe zinango napo Akristau wakukhulupirika an’funikambo kucita nyongo kuti akunde makumbukidwe yakuipa. Kodi n’ciyani comwe cingakuthandizeni kupitiriza kutcenkha kumbakumbuka bzinthu bza upombo ayai uputa? Werengani Afilipi 4:8, ndipo mukamala cezeranani mibvunzo ikutewerayi:

• Kodi ni bzinthu bziponi bzomwe tin’funika kumbakumbukira?

• Kodi kuwerenga Bibliya na kucita bzinthu bzizinji pa kutumikira Yahova bzingatithandize tani kutcenkha kucita pikado?

5. Mitemo ya Yahova imbatipasa phindu

VIDIYO: Mbakumbukani Bwino (9:31)

• Kodi tswaka lomwe lalewedwa mu cinemboci lidabziikha tani pa mayezo yakucita pikado? — Onani Mimwani 7:8, 9.

• Mwakubverana na Mimwani 7:23, 26, kucita upombo ayai uputa kungatibweresere mabvuto mazinji. Kodi tin’dzatcenkha mabvuto yaponi tikapitiriza kukhala na makhalidwe yakucena?

• Kodi kukhala na makhalidwe yakucena kun’dzatithandiza tani kukhala na moyo wakukondwa mpaka muyaya?

Wanthu winango ambakumbuka kuti Mulungu ngwakuuma mtima thangwe ambaletsa kulowolana kwa amuna ayai akazi okha-okha. Tsono Yahova, ni Mulungu wa lufoyi ndipo ambafuna kuti munthu ali-wentse akondwe na moyo mpaka muyaya. Kuti bzimwebzi bzikwanisike tin’funika kumbacita bzinthu mwakubverana na mitemo yace. Werengani 1 Akolinto 6:9-11, ndipo mukamala cezeranani mbvunzo wakutewerayu:

• Kodi Mulungu ambawona kuti amuna ayai akazi omwe ambacita malume ya pa mphasa okha-okha, ndiwo basi omwe ambacita bzakuipa?

Kuti tikondwese Mulungu tentsenefe tin’funika kucinja bzinthu bzinango. Kodi kucinjako kuna phindu? Werengani Salimo 19:8, 11, ndipo mukamala cezeranani mibvunzo ikutewerayi:

• Kodi mitemo ya Yahova yakulewa bza makhalidwe yabwino, njakuthandiza? Penu munti inde thangwe ranyi? Penu munti ne thangwe ranyi?

KODI MWAPFUNZA CIYANI?

Kucita malume ya pa mphasa ni mphaso yomwe Yahova adapasa mwamuna na mkazi wakulowolana.

Mibvunzo yakubwerezera

• Kodi upombo ayai uputa bumbaphatanidza ciyani?

• Kodi n’ciyani cingatithandize kutcenkha upombo ayai uputa?

• Kodi timbagumana phindu liponi tikateweza mitemo yakulewa bza makhalidwe yabwino ya Yahova?

ONANI POMWE IBZI

Onani thangwe ranyi Mulungu ambafuna kuti mwamuna na mkazi omwe akufuna kukhala pabodzi cakuyamba akanembese ku boma.

“Kodi Bibliya Limbalewa Ciyani pa Nkhani ya Mwamuna na Mkazi Kukhala Pabodzi uko Alibe Kulowolana?” (Nkhani ya pa jw.org)

Napo Bibliya limbalewa kuti kucita malume ya pa mphasa kwa amuna ayai akazi okha-okha n’kwakuphonyeka, onani kuti thangwe ranyi bzimwebzi bzin’funa lini kulewa kuti tin’funika kuwawenga wanthu omwe ambacita bzimwebzi.

“Kodi Kucita Malume ya pa Mphasa kwa Amuna Ayai Akazi Okha-okha n’Kwakuphonyeka?” (Nkhani ya pa jw.org)

Pfunzani kuti mudziwe momwe malamulo ya Mulungu yakulewa bza malume ya pa mphasa yambatikhotcererera.

“Kodi Wanthu Akakhala Akucita Malume ya pa Mphasa m’Kamwa Ambakhala Akucitadi Malume ya pa Mphasa?” (Nkhani ya pa jw.org)

Werengani nkhani yakuti “Iwo Adacita Nande Bzinthu mwa Ulemu” kuti muwone bzomwe bzidacitisa munthu munango omwe akhacita malume ya pa mphasa na amuna anzace kucinja kuti akondwese Mulungu.

“Bibliya Limbacinja Moyo wa Wanthu” (Ntsanza ya Mulindiri ya 1 Abril, 2011)

Wanthu winango ambakumbuka kuti munthu angakhale lini wakukondwa akasaya kulowola ayai kulowodwa. Tsono ni wanthu lini wentse omwe ali pa banja mbakukondwa ndipo ni wanthu lini wentse omwe ali lini pa banja omwe mbakukondwa lini. Bibliya limbalewa kuti kukhala khowa na kulowola ni mphaso zakucokera kwa Mulungu.

1. Kodi ndiponi phindu la kukhala khowa?

Bibliya limbati: “Ule omwe an’pita m’banja wacita bwino, tsono ule omwe an’pita lini m’banjamo, wacita bwino kwene-kwene.” (Werengani 1 Akolinto 7:32, 33, 38.) Thangwe ranyi tingalewe kuti omwe an’pita lini m’banja acita “bwino kwene-kwene”? Thangwe ndakuti Mkristau omwe ali lini pa banja an’dzafunikira lini kunyang’ana bzakufunika kwa mkazi ayai mwamuna wace. Ndipopa ambakhala na ufulu buzinji. Winango wa iwo akwanisa kucita bzizinji pakutumikira Yahova, ninga kuyenda kukapalizira m’madziko manango. Ndipo cinthu cakufunika kwene-kwene n’cakuti iwo angamale nthawe izinji akulimbisa uxamwali bwawo na Yahova.

2. Kodi wanthu omwe adalowolana ambagumana phindu liponi akanembesa malowozi yawo ku boma?

Kulowola ayai kulowodwa kuna phindu lace ninga momwe bziliri na kukhala khowa. Bibliya limbalewa kuti “awiri ambaposa m’bodzi.” (Mpalizi 4:9) Ndipo bzimbakwanisika maka-maka kwa Akristau omwe ambateweza bzomwe Bibliya limbapfunzisa m’banja mwawo. Wanthu omwe ambanembesa malowozi yawo ambalumbira kuti an’dzafunana, an’dzalemekezana ndipo an’dzakhala pabodzi moyo wawo wentse. Thangwe ra bzimwebzi, iwo ambawona kuti mbakukhotcerereka kusiyana na wanthu omwe ambandokhala pabodzi uko alibe kunembesa malowozi yawo ku boma. Ndipo wana wawo ambakhalambo wakukhotcerereka.

3. Kodi Yahova ambayawona tani Malowozi?

Pomwe Yahova adayambisa malowozi yakuyamba, iye adati: “Mwamuna an’dzasiya baba wace na mai wace, acidzaphatana na mkazace, ndipo awiriwo an’dzakhala thupi libodzi.” (Genesesi 2:24) Yahova ambafuna kuti mkazi na mwamuna ambafunane na kubverana kwene-kwene pa moyo wawo wentse. Iye ambabvumiza wanthu kulambana m’bodzi wa iwo akacita upombo ayai uputa. Bzimwebzi bzikacitika, Yahova adapasa omwe aphonyeredwayo ufulu bwakumalisa banjalo.a (Mateu 19:9) Yahova ambabvumiza lini Akristau kupalika. — 1 Timotio 3:2.

FUFUDZANI BZINANGO

4. Phatisani basa bwino mphaso ya kukhala khowa

Jezu akhawona kuti kukhala khowa ni mphaso. (Mateu 19:11, 12) Werengani Mateu 4:23, ndipo mukamala cezeranani mbvunzo wakutewerayu:

• Kodi Jezu adaphatisa tani basa mphaso ya kukhala khowa kuti atumikire Baba wace na kuthandiza wanthu?

Akristau omwe akanati kupita m‘banja angakomedwe kwene-kwene akaphatisa basa nthawe imweyi ninga momwe Jezu adacitira. Onani VIDIYO, ndipo mukamala cezeranani mbvunzo wakutewerayu

VIDIYO: Abale Wakukhulupirika Omwe Ali Lini pa Banja (3:11)

• N’ciyani comwe Mkristau angacite kuti acite bzizinji pomwe akanati kulowola ayai kulowodwa?

Kodi mukhadziwa?

Bibliya limbalewa lini kuti munthu an’funika kulowola ayai kulowodwa na magole mangasi. Tsono iro limbalewa kuti munthu an’funika kuyamba kukula kuti alowole ayai alowodwe bwino. Thangwe akakhala mwana cikhumbo cakufuna kucita malume ya pa mphasa cimbakhala ca mphanvu ndipo cingamutazise kucita bzinthu mwanzeru. — 1 Akolinto 7:36.

5. Sankhulani bwino munthu wakulowolana naye

Kusankhula munthu kuti mulowolane naye ni cibodzi mwa bzinthu bzakufunika kwene-kwene comwe mun’funika kucita. Werengani Mateu 19:4-6, 9, ndipo mukamala cezeranani mbvunzo wakutewerayu:

• Thangwe ranyi Mkristau an’funika kukumbuka bwino pomwe akanati kulowola ayai kulowodwa?

Bibliya lingakuthandizeni kudziwa makhalidwe yomwe munthu omwe mungalowolane naye an’funika kukhala nayo. Cakufunika kwene-kwene ni kunyang’ana munthu omwe ambafuna Yahova.b Werengani 1 Akolinto 7:39 na 2 Akolinto 6:14, ndipo mukamala cezeranani mibvunzo ikutewerayi:

• Thangwe ranyi tin’funika kulowola ayai kulowodwa na Mkristau mwanzathu basi?

• Kodi mukuwona kuti Yahova angabve tani tikalowola ayai tikalowodwa na munthu omwe ambamutumikira lini?

6. Lemekezani malowozi ninga momwe Yahova ambacitira

Kale-kale Ajirayeri winango akhalamba azikazawo thangwe akhafuna kulowola atsikana. Werengani Malakiya 2:13, 14, 16, ndipo mukamala cezeranani mbvunzo wakutewerayu:

• Thangwe ranyi Yahova ambaipidwa na wanthu omwe ambalambana pa mathangwe yakusaya kubveseseka?

Onani VIDIYO, ndipo mukamala cezeranani mbvunzo wakutewerayu.

VIDIYO: Malowozi ni Uxamwali Bwakusaya Kumala (4:30)

• Penu mudalowola ayai mudalowodwa na munthu omwe ambanamata lini Yahova, kodi mungacite tani kuti mukhale na banja labwino?

7. Phatisani basa mitemo ya Yahova m’banja mwanu

VIDIYO: Imwepo Mungadziwe Bzomwe Yahova Ambapfunzisa pa Nkhani ya Malowozi (4:14)

Werengani Ahebereu 13:4, ndipo mukamala cezeranani mibvunzo ikutewerayi:

• Kodi mukuwona kuti mitemo ya Yahova pa nkhani ya banja njakupusa kuiteweza? Penu munti inde, thangwe ranyi? Ndipo penu munti ne thangwe ranyi?

Yahova ambafuna kuti Akristau akanembese malowozi ku boma ndipo akalambana akapfudzise, thangwe ndibzo bzomwe malamulo ya madziko mazinji yambalewa. Werengani Tito 3:1, ndipo mukamala cezeranani mbvunzo wakutewerayu:

• Penu muli pa banja, kodi mudanembesa malowozi yanu ku boma?

KODI MWAPFUNZA CIYANI?

Kukhala khowa na kukhala na banja bzentse mpsabwino. Ndipo omwe ali pa banja na omwe ali lini pa banja wentse angakomedwe na moyo akateweza bzomwe Yahova akufuna.

Mibvunzo yakubwerezera

• Kodi n’ciyani comwe munthu angacite akanati kulowola ayai kulowodwa?

• Thangwe ranyi Bibliya limbalewa kuti Mkristau an’funka kulowolana na Mkristau mwanzace?

• Kodi ndiponi thangwe la m’Bibliya lomwe limbabvumiza kuti wanthu wakulowolana alambane?

ONANI POMWE IBZI

Kodi kulowodwa “mwa Mbuya” kumbathandauza ciyani?

“Mibvunzo Yakucokera kwa Anyakuwerenga” (Ntsanza ya Mulindiri ya 1 Julho, 2004)

Onani vidiyo ziwiri zomwe zingakuthandizeni kucita bzinthu mwanzeru pa nkhani ya kukhala pa umakhadzi na malowozi.

Kukonzekera Malowozi (17:05)

Onani kuti thangwe ranyi m’bale akuwona kuti bzomwe Yahova adamupasa mpsabwino kwene-kwene kuposa bzomwe iye adasiya.

Ndikhakumbuka Kuti Iye Angadapfunzambo Cadidi (1:56)

Kodi n’ciyani comwe munthu an’funika kukumbukira akafuna kulambana na mwanzace ayai kupumirana?

“Mbalemekezani ‘Comwe Mulungu Wacimanga Pabodzi’” (Ntsanza ya Mulindiri ya Dezembro, 2018)