3.Thangwe ranyi Mboni za Yahova zimbatewezera lufoyi la Jezu?

Jezu akhafuna kwene-kwene anyakupfunza wace ndipo kwa iye akhali ninga abale wace caiwo. (Werengani Marko 3:35.) Mpsibodzi-bodzimbo, Mboni za Yahova ziri ninga banja libodzi la pa dziko lentse la pantsi. Ndipopa timbacemerana m’bale na mpfumakazi. (Filimoni 1, 2) Timbabverambo lamulo lakuti: “Funani abale wanu wentse.” (1 Pedru 2:17) Mboni za Yahova zimbalatiza lufoyi limweri mu njira zakusiyana-siyana, mwa kuthandiza Mboni zinzawo pa dziko lentse la pantsi pa nthawe yomwe zikufunikira thandizo.

6. Ubatizo bumbathandauza kucita mbali m’banja la Yahova

Tikabatizidwa timbacita mbali ya banja la Yahova la pa dziko lentse la pantsi. Napo timbakhala ku mbuto zakusiyana-siyana ndipo makhalidwe yathu njakusiyanambo, tentsene timbakhulupira ndipo timbatewezera malamulo mabodzi-bodzi. Werengani Salimo 25:14 na 1 Pedru 2:17, ndipo mukamala cezeranani mbvunzo wakutewerayu:

• Munthu akabatizidwa, kodi n’ciyani comwe cimbacitika na uxamwali bwace na Yahova na wale omwe ambamunamatambo?

Tikakhala tiri pakati pa abale wathu, timbabzibva ninga momwe adabvera Mambo Davide, iye adati: “Mpsabwino, ndipo mpsakudekeza Abale kukhala pabodzi mwakuphatana!” (Salimo 133:1) Ciphatano cathu cimbandobwerambo lini tenepoyo. Ali-wentse wa ifepano tin’funika kucita nyongo kuti tikhale wakuphatana.

1. N’ciyani cimbadabwisa mu gulu la Yahova?

Imwepo mucikatsonkhana ku dziko linango, mun’kabzibva kuti muli pamui, napo kuti mumbadziwa lini cirewedwe ca kumweko. Thangwe ranyi? Thangwe timbapfunza Bibliya mwakuphatisa basa mabukhu mabodzi-bodzi pa dziko lentse la pantsi. Ndipo ifepano timbacita nyongo ya kulatizana lufoyi cairo. Bziribe basa komwe timbakhala, tentsenefe “timbacemera dzina la Yahova, ticimutumikira mwakuphatana.” — Zefaniya 3:9.

2. Kodi n’ciyani comwe mungacite kuti mulimbikise ciphatano?

“Mbafunanani na mtima wentse.” (1 Pedru 1:22) Kodi mungacite tani bzimwebzi? Lekani kumbandowona bzakuphonya bza winango, koma mbakhalani tceru kuti muwone makhalidwe yawo yabwino. M’mbuto mwa kumbandoceza na wanthu omwe ambafuna bzomwe imwepo mumbafunambo, yezerani kudziwa abale omwe ambafuna bzinthu bzakusiyana na imwepo. Ifepano tin’funika kucita nyongo kuti timalise tsankhulo. — Werengani 1 Pedru 2:17.a

3. Kodi n’ciyani comwe mungacite mukaphonyerana na Mkristau mwanzanu?

Ifepano ndife wakuphatana, koma ndifembo wakuperewera. Nthawe zinango tingakalipisane. Tenepo, Bibliya limbatiuza kuti: “Pitirizani . . . kulekererana na mtima wentse,” limbalewambo kuti: “Ninga momwe Yahova adakulekererani na mtima wentse, imwepo mucitembo bzibodzi-bodzibzo.” (Werengani Akolose 3:13.) Ifepano takalipisa Yahova mwakubwereza-bwereza, ndipo iye ambatilekerera. Tenepo iye ambafuna kuti ifepanombo timbalekerere abale wathu. Mukazindikira kuti mwakalipisa munthu munango, yambani ndimwepo kucita ciri-centse kuti mukhazikise mtendere. — Werengani Mateu 5:23, 24.b

FUFUDZANI BZINANGO

4. Kundani tsankhulo

Tin’funika kulatiza lufoyi kwa abale wathu wentse. Tsono bzingakhale lini bzakupusa kufuna munthu omwe tikuwona kuti ngwakusiyana na ifepano. N’ciyani cingatithandize? Werengani Mabasa 10:34, 35, ndipo mukamala cezeranani mibvunzo ikutewerayi:

• Yahova ambabvuma wanthu wa mtundu uli-wentse kuti akhale Mboni zace. Kodi bzimwebzi bzikukucitisani kuwona tani wanthu omwe mbakusiyana na imwepo?

• Kodi ni mtundu uponi wa tsankhulo omwe ulipo kwanuko omwe mun’funika kuutcenkha?

Werengani 2 Akolinto 6:11-13, ndipo mukamala cezeranani mbvunzo wakutewerayu:

• Kodi mungapfunze tani kufuna abale na mpfumakazi zentse omwe mbakusiyana na imwepo?

5. Lekererani na mtima wentse ndipo khazikisani mtendere

Yahova ambatilekerera na mtima wentse napo kuti iye ambaphonya lini kuti ifepano timulekererembo. Werengani Salimo 86:5, ndipo mukamala cezeranani mibvunzo ikutewerayi:

• Kodi Yahova ambalekerera mpaka paponi?

• Thangwe ranyi imwepo mumbatenda kulekerera kwa Yahova?

• Kodi ni bzinthu bziponi bzomwe bzingaticitise kutazira kubverana na wanthu winango?

Kodi tingatewezere tani Yahova ticipitiriza kukhala wakuphatana na abale pabodzi na mpfumakazi zathu? Werengani Mimwani 19:11, ndipo mukamala cezeranani mbvunzo wakutewerayu:

• Kodi munthu munango akakuphonyerani ayai kukukalipisani, n’ciyani comwe mungacite kuti nkhaniyo ileke kukula?

Nthawe zinango timbaphonyera winango. Bzimwebzi bzikacitika, n’ciyani comwe tingacite? Onani VIDIYO, ndipo mukamala cezeranani mbvunzo wakutewerayu.

VIDIYO: Kukhazikisa Mtendere Kumbabweresa Bzisimbo (6:01)

• Mu vidiyoyi, n’ciyani comwe mpfumakaziyi yacita kuti ikhazikise mtendere?

6. Mbawonani makhalidwe yabwino ya abale na mpfumakazi

Tikambamala nthawe itali na abale pabodzi na mpfumakazi zathu, timbafika pa kudziwa makhalidwe yawo yabwino na kuwofoka kwawo. Kodi tingakwanise tani kumbawona makhalidwe yawo yabwino? Onani VIDIYO, ndipo mukamala cezeranani mbvunzo wakutewerayu.

VIDIYO: Mbawonani Bzinthu Mwakuthemera! (5:10)

• Kodi n’ciyani cingakuthandizeni kuti mumbakwanise kuwona makhalidwe yabwino ya abale na mpfumakazi?

Yahova ambanyang’anisa makhalidwe yathu yabwino. Werengani 2 Nkhani 16:9a, ndipo mukamala cezeranani mbvunzo wakutewerayu:

• Kodi mumbabva tani mukadziwa kuti Yahova ambanyang’anisa makhadwe yanu yabwino?

KODI MWAPFUNZA CIYANI?

Imwepo mungathandizire ciphatano m’gwere mwa kumbalekerera na kulatiza lufoyi kwa abale na mpfumakazi.

Mibvunzo yakubwerezera

• Kodi imwepo mungakunde tani tsankhulo?

• Kodi n’ciyani comwe mungacite mukakhala mwaphonyerana na Mkristau mwanzanu?

• Thangwe ranyi imwepo mukufuna kutewezera ciratizo ca Yahova cakulekerera winango?

ONANI POMWE IBZI

Pfunzani momwe ciratizo ca Jezu cingakuthandizireni kutcenkha kumbawona kuipa winango.

Cosa Mtanda Omwe Uli m’Diso Mwako (6:56)

Kodi tin’funikira kupepesa napo tikuwona kuti tiribe kuphonya cinthu?

“Kupepesa Kumbathandiza Kuti Tikhazikise Mtendere” (Ntsanza ya Mulindiri ya 1 Novembro, 2002)

Onani bzomwe bzidathandiza wanthu winango kucita bzinthu mwakusaya tsankhulo.

Lekani Kuyeruza Winango Thangwe ra Mawonekedwe Yawo (5:06)

Onani momwe mungamalisire kusaya kubvesesana na munthu pomwe bzimwebzi bzikanati kudzonga mtendere m’gwere.

“Kumalisa Kusaya Kubvesesana na Mzimu wa Lufoyi” (Ntsanza ya Mulindiri ya Maio, 2016)