Maswaka​—Kodi Mun’dzauphatisa Tani Basa Moyo Wanu?

“DIKUFUNA kukhala na moyo wa phindu kwene-kwene.” Adalewa tenepoyo mtsikana winango. Imwepombo mukufuna kukhala na moyo ubodzi-bodziyo. Tsono kodi mungacite tani kuti bzinthu bzikufambireni “bwino” pa moyo? Majornal, bzikasi bzakumwazira nkhani na adziwi napo apfunzisi wanu angakuuzeni kuti njira yabwino yakukwanisira bzimwebzi ndiyo kukhala na kobiri zizinji ayai kukhala na mapfunziro yapadzulu—mucikhala na mbiri!

Koma Bibliya limbacenjeza maswaka kuti kulinga kugumana phindu lakuthupi, ‘kumbakhala ninga kuthamangisa mphepo.’ (Mpalizi 4:4) Koma, ni maswaka mang’ono-ng’ono yokha yomwe yambakwanisadi kukhala na cuma na mbiri. Ndipo kawiri-kawiri omwe ambakwanisawo ambakhala lini wakukondwa pa moyo. Tswaka linango la ku Grã-Bretânha lomwe lidacita mapfunziro ya padzulu lidalewa kuti: “Bzidakhala ninga kaxa yomwe iribe bzinthu. Ukanyang’anisa mkatimo, uniwona lini cinthu.” N’cadidi kuti basa lingakubweresereni kobiri na kukhala wakulemekezeka. Tsono bzimwebzi bzingakupaseni lini ‘bzakusaya bzanu bzauzimu.’ (Mateu 5:3) Kuthumizira pamwepo, pa 1 Juwau 2:17 pambalewa kuti ‘dziko linkuyenda.’ Napo bzinthu bzikufambireni mu dzikoli, tsono dziwani kuti bzin’khalisa lini.

Bukhu la Mpalizi 12:1 limbalimbisa maswaka kuti: ‘Kumbukira mlengi wako Mkululetu mu nsiku zomwe ukali tswaka.’ Inde, njira yabwino ya kuphatisa basa moyo wanu ndiyo kutumikira Yahova Mulungu. Tsono cakutoma mun’funika kukhala munthu wakuthemera kutumikira Mulungu. Kodi mungacite tani bzimwebzi? Ndipo kodi kuphatisa basa moyo wanu pa kutumikira Mulungu kumbaphatanidza kucita ciyani?

Bzomwe Mungacite kuti Mukhale Mboni ya Yahova

Cakutoma, imwepo mun’funika kukulisa cikhumbo canu cakufuna kutumikira Mulungu—ndipo cikhumboco sikuti cimbandobwera cokha, napo abereki wanu acikhala wakristau. Imwepo pamwekha mun’funika kukhala pa uxamwali na Yahova. “Mpembo umbathandiza munthu payekha kukhala pa uxamwali na Yahova,” Adalewa tenepoyo mtsikana winango.—Psalymo 62:8; Tiyago 4:8.

Pa Waroma 12:2 pambafotokoza mbali inango yomwe mun’funika kucita. Pambalewa kuti: ‘Muzindikire bzomwe Mulungu an’funa, bzomwe n’bzabwino, bzakubvumizika na bzakulungamiratu.’ Kodi mudapenukira kale pa bzinthu bzomwe mudapfunzisidwa? Penu bziri tenepoyo, tewezani bzomwe Bibliya limbalewa, mwa ‘kuzindikira bzomwe Mulungu akufuna’ ndipo mun’dzaona mwekha kuti n’bzacadidi! Fufudzani mwekha. Werengani Bibliya na mabukhu yakufotokoza bza m’Bibliya. Kupfunza bza Mulungu kumbafuna lini kuti mukhale na nzeru kwene-kwene. Khalani na nthawe yakukumbukira bwino bzomwe mwawerenga bzicikupitani bwino mu mtima wanu wakundendemezera. Bzimwebzi bzin’dzacitisa kuti lufoyi lanu kwa Mulungu likule.—Psalymo 1:2, 3.

Mbali yaciwiri, yezerani nthawe zinango kuuza anzanu wa ku xikola bzomwe mwapfunzabzo. Patsogolo pace yambani kupalizira nyumba na nyumba. Nthawe zinango imwepo mungagumane na anzanu wa ku xikola pomwe mun’kupalizira, ndipo pakuyamba mungacite manyazi. Tsono Bibliya limbatiuza kuti tileke kumbacita ‘manyazi na bzipsa bzabwino.’ (Waroma 1:16) Imwepo mun’kubweresa mafala ya moyo na cidikhiro! Na tenepo palibe thangwe lakucitira manyazi.

Tsapano, penu wabereki wanu ni Wakristau, imwepo pinango mungafune kuwaperekeza pa basa limweri. Tsono, kodi mungakwanise kucita bzizinji kuposa kundoima pa msuwo mudanyamala mucipereka marevista na tumatsamba? Kodi mungakwanise kulewalewa mwekha mwa kuphatisa basa Bibliya kuti mupfunzise mweneciro nyumba? Penu mun’kwanisa lini, kumbirani thandizo kuna wabereki wanu ayai kwa wanthu wakukhwima mwauzimu wa m’gwere lanu. Cikhale cikhumbo canu kukhala mpalizi wakusaya kubatizidwa wa bzipsa bzabwino!

Na kupita kwa nthawe, bzin’dzakucitisani kubzipereka—mucipicira kwa Mulungu kuti mun’dzamutumikira mpaka kale-kale. (Waroma 12:1) Tsono, kubzipereka si nkhani yakundobzicitira mwekha. Mulungu an’funa kuti ali-wense ‘adziwise padeca cikhulupiro cace kuti apulumuke.’ (Waroma 10:10) Panthawe ya batismo, mun’dzatawira mwakukuwa bza cikhulupiro canu. Patsogolo pace mun’dzabatizidwa m’madzi. (Mateu 28:19, 20) Kulewa cadidi, batismo ni cinthu cakufunika kwene-kwene. Tsono lekani kubwerera m’mbuyo pakugopa kuti mungadzaphonye kutsogolo. Mukakhulupira Mulungu, iye an’dzakupasani ‘mphanvu yakuposa yacibadwa’ kuti mukwanise kukhala wakulimba.—2 Wakolinto 4:7; 1 Pedru 5:10.

Pambuyo pakubatizidwa, mun’dzakhala m’bodzi wa Mboni za Yahova. (Zaiya 43:10) Bzimwebzi bzin’dzacinjiratu momwe mun’dzauphatisira basa moyo wanu. Kubzipereka kumbaphatanidza ‘kubzilamba wekha.’ (Mateu 16:24) Pinango mungafunike kusiya bzikhumbo na bzakulinga bzinango ‘muciikha pakutoma Umambo bwa Mulungu.’ (Mateu 6:33) Kubzipereka na batismo kumbapereka mipata yakucita bzizinji. Mbationeni inango mwa mipatayo.

Mipata Yakutumikira Mulungu kwa Nthawe Zense

● Upainiya ni mpata winango. Mpainiya ni mpalizi wakubatizidwa waciratizo cabwino omwe adacita makonzedwe yakumbamala mwezi uli-wense nthawe 70 ayai kupitirira, zakupalizira bzipsa bzabwino. Kumala nthawe zizinji pa mwezi mu utumiki bwa kumunda kun’dzakuthandizani kukulisa luso lanu lakupalizira na kupfunzisa. Apainiya wazinji wambagumana cikondweso mwa kuthandiza wapfunzi wawo wa Bibliya kukhala Mboni zakubatizidwa. Kodi ni basa linango liponi lomwe lingatitsangalaze kuposa limweri?

Kuti akwanise kubzithandiza, apainiya azinji ambaphata basa lomwe lina nthawe yakucepa. Azinji ambakonzekereratu utumikibu mwa kupfunza basa ku xikola ayai mwakuthandizidwa na abereki wawo. Penu imwepo na abereki wanu mukuona kuti bzingakhale bzakuthandiza kuti mucite mapfunziro yapadzulu pambuyo pa kumaliza kupfunza ku xikola, onesesani kuti cikhumbo canu cileke kukhala cakugumana kobiri zizinji, koma basalo likuthandizeni kucita utumiki bwanu ndipo pinango mucitumikira ninga mtumiki wa nthawe zense.

Na tenepo, cikhumbo cikulu ca mpainiya ni basa lini lace lakulipiridwa pa mwezi, koma utumiki bwace—kuthandiza winango kuti wagumane moyo! Thangwe ranyi mun’saya kukhumba kucita upainiya? Upainiya bumbakupasani mwai winango. Mwaciratizo, apainiya winango ambayenda ku madera komwe kunkufunika kwene-kwene apalizi wa Umambo. Winango ambapfunza cirewedwe cakunja ndipo acitumikira mu gwere la mu dera lawo lomwe limbaphatisa basa cirewedweco ayai kukatumikira mu madziko ya kunja. Inde, kucita upainiya n’kwa phindudi pamoyo!

● Xikola ya Apalizi wa Umambo ni mpata ubodzi wa utumiki. Minyezi miwiri idalinganizidwa kuti apfunzisidwe apainiya omwe atumikira kwa nthawe itali ndipo ankufunisisa kukatumikira komwe kunkufunikira thandizo. Mwa kutewezera Mpalizi mkulu omwe adatumikira kale padziko, Jezu Kristu, iwo ambalewa kuti: N’diripano ine! N’ditumizeni! (Zaiya 6:8; Juwau 7:29) Kuyenda kutali na muyi bzingafune kuzolowera mikhalidwe ya komwe ankakhalako. Cikhalidwe, nyengo, bzakudya bzingasiyaniretu na bzomwe akhadazolowera kwawo. Pinango bzingafunike kupfunza cirewedwe cipsa. Xikolayi imbathandiza abale makhowa na mpfumakazi zomwe zikanati kulowodwa pabodzi na mabanja, acikhala wanthu wa magole 23 mpaka 65, kuti akulise mikhalidwe yauzimu yomwe inkafunikira komwe ankatumikirako na maluso yomwe yankawacitisa kuti aphatisidwe basa mwakukwana na Yahova na gulu lace.

● Utumiki bwa pa Beteli bumbaphatanidza kutumikira mwakubzipereka ku ibodzi mwa nthambi za Mboni za Yahova. Winango wa m’banja la Beteli ambatumikira pa basa lakudinda mabukhu yakuthandizira Bibliya. Winango wambapasidwa mabasa ninga, kukonza mbuto zakudzongeka za nyumba, kukonza bzinthu bzakuphatisira basa bza pa Beteli ayai kusamalira banja la Beteli. Mabasa yense njakufunika kwene-kwene pa kutumikira Yahova. Kuthumizira bzimwebzi, wanthu womwe wali ku Beteli, wambakondwa pakudziwa kuti bzense bzomwe iwo wambacita bzimbathandiza gulu likulu la abale wawo, kuzungulira dziko lense la pansi.

Nthawe zinango abale womwe ana maluso yakupambulika wambacemeredwa kuti watumikire ku Beteli. Tsono, azinji ambapfunzisidwa akandofika. Womwe ali ku Beteli ambatumikira lini kuti agumane bzinthu bzakuthupi koma ambakondwa na makonzedwe ya cakudya, pakukhala, na thandizo lakucepa la kobiri kuti akwanise kubzisamalira. Tswaka libodzi lam’banja la Beteli lidalewa bza utumiki bwace kuti: “Mpsakudekeza kwene-kwene! N’cadidi kuti nsiku iri-yense ina bzineso bzace, tsono ndimbatambira bzisimbo bzizinji thangwe ra kutumikira kuno.”

● Utumiki bwa cimango bumbathandiza ali-wense kuphata basa la kumanga nyumba za nthambi na Nyumba za Umambo. Atumiki wa cimango, ninga momwe ambacemeredwera, ambathandiza pa basa limweri. Imweyi ni njira inango ya basa lakupambulika, yakundendemerana na basa la womwe wadamanga tempwlo ya Salomau. (1 Wamambo 8:13-18) Makonzedwe yakusamalira atumiki wacimango ni mabodzi-bodzi na ya m’mabanja ya Beteli. N’cikondweso cikulu kwene-kwene comwe abale na mpfumakazi ambakhala naco pakutumikira pa mtundu umweyu wa basa la kutumbiza Yahova!

Tumikirani Yahova na Moyo Wense

Kutumikira Yahova ni njira yabwino kwene-kwene yakuphatisira basa moyo wanu. Mun’sairanyi kukhala na cikhumbo cakutumikira Mulungu kwa nthawe zense? Cezeranani bza utumiki bwa nthawe zense na abereki wanu, akulu wanu wa gwere na nyakunyang’anira wanu wa dera. Penu muna cikhumbo ca kutumikira pa Beteli ayai kuyenda ku Xikola ya Apalizi wa Umambo, mungagumanike ku ntsonkhano omwe umbacitika pa mitsonkhano ya cigawo.

N’cadidi kuti si wense womwe wangakwanise kucita utumiki bwa nthawe zense. Nthawe zinango matenda, kunesa kwa kobiri na udindo bwa m’banja bzingatazise winango kucita bzizinji. Na tenepo, wakristau wense wakubzipereka wan’funika kubvera mtemo wa m’Bibliya wakuti: ‘Umbafune Yahova Mulugu wako na mtima wako wense na moyo wako wense ndipo na nzeru zako zense.’ (Mateu 22:37) Yahova akufuna kuti mucite bzabwino bzomwe mungakwanise penu bzingakwanisike pa moyo wanu. Bziribe basa kuti moyo wanu uli tani, ikhani kutumikira Yahova kukhala cinthu cakutoma pamoyo wanu. Khalani na bzikhumbo bzakutumikira Mulungu. Inde, ‘kumbukira Mlengi wako pomwe ukali tswaka’ ndipo mun’dzasimbidwa mpaka kale-kale mukacita bzimwebzi!