Kutomera kale-kale, Mboni za Yahova zimbadziwika na mapfunziso yomwe zimbatambira kwa Mulungu. Mapfunziro yakupambulika, yambaperekedwa kwa womwe wambamala nthawe yawo yense pa basa lakupalizira Umambo kuti iwo wakwanise ‘kucita mwakukwana utumiki bwawo.’​—2 Timotio 4:5.

Xikola ya Apainiya. Kuphampha kwa gole lakuyamba la upainiya bwa nthawe zense, m’bale ayai mpfumakazi angabzinembese ku xikola ya nsiku zitanthatu yomwe imbacitikira mu Nyumba ya Umambo ya m’dera lace. Cakulinga ca xikolayo, ni kuthandiza apainiya kufenderera Yahova, kucita bwino pa mbali zense za utumiki bwawo, na kupitiriza kukhulupirika pa basali.

Xikola ya Apalizi wa Umambo. Imweyi ni xikola yomwe imbamala minyezi miwiri, yomwe idakonzedwa kuti ipfunzise apainiya wakuzolowera basali, womwe wangafune kucoka komwe wambakhala, wacikatumikira kuli-kwense komwe kufunikire thandizo. Mwakutewezera Jezu Kristu, omwe akhali Mpalizi mkululetu wakukhala pansi pano, iwo wambalewambo kuti, ‘Ndiri pano ine! Nditumizeni!’ (Zaiya 6:8: Juwau 7:29) Kwa iwo, kufulukira ku mbuto zinango kumbathandauza kubvuma kukhala na moyo wakusaya bzinthu bzizinji. Cikhalidwe, nyengo na cakudya ca komwe wambayendako, bzimbasiyaniratu na bzomwe iwo wakhadazolowera. Ndipo bzingafunikembo kupfunza cirewedwe cinango. Xikolayi imbathandiza mabanja pabodzi na abale na mpfumakazi womwe wali lini m’banja, wa magole 23 mpaka 65 yakubadwa kuti wakuze makhalidwe yauzimu yakufunikira mu utumiki bwawobo pabodzi na luso lomwe lingacitise kuti waphatisidwe basa na Yahova pabodzi na gulu lace.

Xikola ya Bibliya ya Gileyade. M’Ciheberi, fala lakuti ‘Gileyade’ limbathandauza ‘Mudu wa umboni.’ Kuyambira pomwe xikola ya Gileyade idafungulidwa mu 1943, anyakupfunza 8.000 wadatumizidwa kuti wakacitire umboni ‘kumalekezero ya dziko la pansi’ ninga amisiyonario. (Mabasa 13:47) Pomwe anyakupfunza wakuyamba wa Gileyade wadafika ku dziko la Peru, kumweko kukhalibe gwere na libodzilo. Tsono lero yalipo magwere yakupitirira 1.000. Pomwe amisiyonario wadayamba kutumikira mu dziko la Japão, m’dzikomo mukhana Mboni za Yahova zakusaya kupitirira 10. Tsono lero ziripo Mboni zakupitirira 200.000. Mapfunziso ya Gileyade yomwe yambamala minyezi mixanuyo, yambaphatikizambo kupfunza Fala la Mulungu mwakukwana bwino. Wale womwe wankutumikira ninga apainiya wakupambulika ayai womwe wankutumikira kale ninga amisiyonario, na womwe wankutumikira ku mthambi ayai pa basa lakuyenda-yenda, wambacemeredwa ku xikolayi kuti wakapfunzisidwe momwe wangakhazikisire na kulimbisa basa lathu la pa dziko lense la pansi.

• Kodi Xikola ya Apainiya ina cakulinga ciponi?

• Kodi Xikola ya Apalizi wa Umambo idakonzedwera yani?

M’gulu lathu, ifepano tiribe atsogoleri womwe wambalipiridwa. Mbuto mwace, ninga momwe bzikhacitikira pomwe gwere la Wakristau lidandoyamba, anyakunyang’anira wakuthemera wambalatidwa kuti ‘wauuse gwere la Mulungu.’ (Mabasa 20:28) Akulu amwewa mba amuna wakukhwima mwauzimu womwe wambatsogolera gwere na kuusa, ‘sikuti mwakucita kukakamizidwa, koma mwakufunisisa, sikutimbo thangwe ra kufuna kugumana phindu pa ciri-cense, koma na mtima wense.’ (1 Pedru 5:1-3) Kodi iwo wambaticitira mabasa yaponi?

Iwo wambatisamalira na kutikhotcerera. Akulu wambatsogolera na kukhotcerera gwere mwauzimu. Pakuzindikira kuti Mulungu adawakhulupira pakuwapasa basa lakufunikali, akuluwo wambaponderera lini wanthu wawo, koma wambathandiza kuti bziwafambire bwino, wacikondwa. (2 Wakolinto 1:24) Ninga momwe m’busa ambalimbikira kusamalira bira m’bodzi na m’bodzi pa yekha, akuluwo wambayezerambo kudziwa wense wa m’gwere, m’bodzi na m’bodzi pa yekha.​—Mimwani 27:23.

Iwo wambatipfunzisa momwe tingacitire kufuna kwa Mulungu. Pa mdzinga uli-wense, akulu wambatsogolera mitsonkhano ya gwere kuti walimbise cikhulupiro cathu. (Mabasa 15:32) Amuna wakubziperekawa wambatsogolerambo basa lakupalizira, mwakuphata basa nafe pabodzi na mwa kutipfunzisa njira zakusiyana-siyana zakucitira utumiki bwathu.

Iwo wambalimbisa munthu m’bodzi na m’bodzi pa yekha. Pakufuna kutithandiza kukhotcerera uxamwali bwathu na Yahova, akulu womwe wambakhala pafupi nafe, wangatizungire kumui kwathu ayai wangaceze nafe ku Nyumba ya Umambo kuti watipase thandizo na mtsangalazo wakucokera m’Bibliya.​—Tiyago 5:14, 15.

Kusiya kutumikira m’gwere, akulu wazinji wambaphatambo basa lakunembedwa ndipo wana mabanja yawo yomwe yambafunambo nthawe na thandizo lawo. Abale womwe wambaphata basa mwakulimbawa, wan’funikira ulemu bwathu.​—1 Watesalonika 5:12, 13.

• Kodi akulu wa m’gwere wambacita mabasa yaponi?

• Kodi akulu wambatisamalira tani m’bodzi na m’bodzi pa yekha?

Bibliya limbalewa bza mathimu mawiri ya amuna Wacikristau womwe wambasamalira maudindo m’gwere, womwe ni anyakunyang’anira na atumiki wakuthandiza.’ (Wafiripo 1:1) M’gwere liri-lense, mumbagumanika amuna wazinji womwe wambatumikira ninga anyakunyang’anira na atumiki wakuthandiza. Kodi njaponi mabasa yomwe atumiki wakuthandiza wambacita kuti tikhale na phindu?

Iwo wambathandiza bungwe la akulu. Atumiki wakuthandiza mba amuna womwe wali pa uxamwali bwa kulimba na Mulungu ndipo mbanthu wakukhulupirika na wakuzindikira, winango ni alumbwana, ndipo winango ni akulu-akulu. Iwo wambaphata mabasa ya nsiku na nsiku yakufunika kwene-kwene yomwe yambaphatidwa na manja, ndipo wambayacita mwakulinganizidwa bwino m’gweremo. Bzimwebzo bzimbathandiza kuti akulu watanganidwe na udindo bwa kupfunzisa na kuusa.

Iwo wambacita mabasa yakufunika. Atumiki winango wakuthandiza wambalatidwa kuti wambatambire wanthu womwe wambabwera pa mitsonkhano. Winango wambaphata basa na mtcini wakukuizira mafala, basa la kugawanisa mabukhu, kunemba kupita na kucoka kwa kobiri na kulata mbuto zomwe abale wa m’gwere wangakapalizire. Iwo wambathandizambo kusamalira Nyumba ya Umambo. Iwo wangakumbiredwe na Akulu kuti wathandize mkhalamba. Pa mabasa yali-yense yomwe atumiki wakuthandiza wangapasidwe, momwe iwo wambacitira na mtima wense, kumbawabweresera ulemu kwa wense m’gwere.​—1 Timotio 3:13.

Iwo wambapereka ciratizo cabwino ninga amuna Wacikristau. Atumiki wakuthandiza wambasankhulidwa thangwe ra makhalidwe yawo yauzimu yabwino. Pakufotokoza nkhani zawo pa mitsonkhano, iwo wambalimbisa cikhulupiro cathu. Mwakutsogolera basa lakupalizira, iwo wambatithandiza kuphata basalo na nyongo. Thangwe ra mzimu wawo wakuthandizana na akulu, iwo wambakhazikisa cikondweso na ciphatano. (Wayefezo 4:16) Na kupita kwa nthawe, amuna wazinji wambadzathemerambo kuti watumikire ninga akulu.

• Kodi atumiki wakuthandiza mbanthu wa mtundu wanyi?

• Kodi atumiki wambathandiza tani gwere kufamba bwino?