Kukulisa Luso Lathu mu Utumiki—Kuyambisa Kucezerana pa Kucita Upalizi Bwakusaya Kulinganizidwa
Thangwe Ranyi Mpsakufunika: Tikambapalizira nyumba na nyumba, kawiri-kawiri timbagumana lini wanthu azinji pamuyi. Na tenepo tingaceze nawo mu xapa, pomwe tinkudikhirira kuwonana na dotolo m’cipinda, nthawe za kupuma basa ayai ku xikola na mbali zinango. N’kufuna kwa Yahova kuti wanthu wensene waugumane mpata wakubva mafala ya Umambo. (1 Tim. 2:3, 4) Kawiri-kawiri, pa kupalizira, tin’funika kukhala na ciyambi cabwino ca kucezerana.
Momwe Mungacitire:
• Khalani wakuzindikira. Kodi munthuyo ankuwoneka wakutsudzuka na wakufunisisa kuceza? Kodi mpatayo unkubvumira kucezerana mwakutsudzuka? Wapalizi winango ambayamba kunyang’anisa m’maso mwa munthuyo ndipo acimwetukira. Munthuyo akamwetukirambo, iwo tsapano ambayamba kucezerana.
• Lewalewani mwacigwatho, citani mpembo na mumtima penu munkusaya bzakulewalewa.—Neh. 2:4; Mab. 4:29.
• Yambani na mafala yali-yense ninga yakumusana. Jezu alibe kundoyamba kucezerana na mkazi Msamariya mwa kulewa bza Umambo. (Ju. 4:7) Nthawe zinango kucezerana kungayambisidwe mwa mafala yakutenda ninga yakuti: “Wana wanu mbakupfunzisika!” Kucita mibvunzo ni njira inango yakuyambisira kucezerana ninga kuti: “Mudawonambo notisiya dzulo usiku?”
• Kuyambira pomwe kucezerana kwayambika, nyang’anani mpata wakuyambira bzipsa bzabwino, tsono lekani kufulumiza. Lekererani kuti nkhaniyo ibveke mwacibadwa. Pinango mungalewe nfundo yomwe ingacitise munthuyo kufunisisa na kukhala wakukonzeka kucita mibvunzo. Mwaciratizo, penu macezayo nja m’banja, mungalewe kuti: “Ndidagumana malango yabwino ya momwe tingalerere wana.” Penu munkuceza bza notisiya, mungalewe kuti, “Tsapanopapa ndidakondwa na kuwerenga nkhani zabwino za kucinja kwa bzinthu.” Lekani kutaya mtima penu nkhaniyo inkumala munati kupereka umboni.
• Khalani na tumatsamba ayai tumabukhu tomwe mungapereke kwa ali-wense womwe an’funisisa kudziwa bzizinji.
Yezerani Kucita Bzimwebzi Mkati mwa Mwezi Wathunthu:
• Mu mdzinga uli-wense yezerani kuyambisa nkhani na cikhumbo ca kucita upalizi bwakusaya kulinganizika.