Lokoterani Mipata Yanu kuti Muthumizire Utumiki bwanu!
1. Tinkupfunza ciyani na ciratizo ca Davide?
1 Mambo Davide ni munthu omwe alibe kulekerera kuti bzakucitika pa moyo wace bzimutazise kutumikira Mulungu. Mwaciratizo, Davide adafuna kumanga nyumba ya Yahova. Pomwe adaletsedwa, Davide adacinja makumbukidwe yace ndipo adathandiza kukonzekera bzinthu kuti Salomau adzamange tempwlo. (1 Wam. 8:17-19; 1 Nkha. 29:3-9) M’mbuto mwa kumbandokumbukira bzomwe bzatazika, Davide adapitiriza kunyang’ana bzomwe angadakwanisa kucitabzo. Kodi tingatewezere tani ciratizo ca Davide pomwe tinkunyang’ana njira zakumwazira mafala ya Umambo?
2. Kodi tingabzipende tani tekha?
2 Citani Bzomwe Mungakwanise: Azinji ambacepesa bzakucita pa moyo wawo kuti acite upainiya bwakuthandiza ayai upainiya bwakukhazikika. (Mat. 6:22) Kodi mungacitembo nawo? Mwa kucita mpembo kuti muwonesese momwe moyo wanu uliri, mungawone kuti ‘msuwo ukulu wa basa’ wakufungukirani. Penu bziri tenepo, lokoterani mpatayu!—1 Wak. 16:8, 9.
3. Kodi mungagumane phindu na mpata wa utumiki uponi, napo penu moyo wanu ungakubvumizeni lini kucita upainiya?
3 Penu bzingakwanisike lini pa moyo wanu kucita upainiya? Lekani kuyebwa mpata winango womwe ulipo kuna imwepo. Mwa ciratizo, penu basa lanu lakunembedwa mumbacitira pabodzi na wanthu wakusaya kukhulupira, mun’sairanyi kunyang’ana mpata kuti muwapalizire? Ayai penu munkulimbana na matenda, kodi mungagumane phindu na mpata wakupalizira womwe ankukusamalirani? Kumbukirani kuti, kuna wale womwe mpsakuneseratu kuyenda mu utumiki thangwe ra kukalamba ayai matenda makulu, pana makonzedwe yakuti wangapereke mphindi 15 ninga maora ya utumiki bwawo bwakumunda. Pakunemba maora yanu ya mwezi ya basa la utumiki, tsimikizani kuti mwanemba nthawe yomwe mwamala munkucita upalizi bwakusaya kulinganizidwa na kunembambo bukhu lomwe mudagawira kuphatanidza na tumatsamba tomwe mudapereka na mcemo wa Cikumbuso na mcemo wa mtsonkhano wacigawo. Imwepo mungadabwe kuwona kuthumizirika kwa nthawe yomwe imbawoneka ninga n’tumipata tung’ono-ng’ono!
4. Kodi mwatsimikiza kucita ciyani?
4 Bziribe basa penu moyo wathu uli tani, bwerani tiphatisise mpata uli-wense kuti timwaze bzipsa bzabwino. Tin’dzatsangalazidwa kudziwa kuti tinkucita ciri-cense comwe tingakwanise thangwe ra Umambo.—Marko 14:8; Luka 21:2-4.