Mbaphatisani Basa Mabukhu Yathu Mwanzeru

Jezu adati ‘Mwatambira fovolo, perekanimbo fovolo.’ (Mat 10:8) Ifepano timbatewera mwapafupi malango yamweya mwa kuleka kumbakumbira wanthu kobiri pakufuna kuwapasa Bibliya ayai mabukhu yathu. (2Wak 2:17) Koma iyo yana cadidi cakucokera m’Fala la Mulungu, ndipo pambacitidwa nyongo ikulu kwene-kwene kuti mabukhu yathu yadindidwe na kutumizidwa m’magwere pa dziko lense la pansi. Ndipopa, tin’funika kumbatenga kokha mabukhu yomwe tinkufunikira.

Pomwe tinkugawira mabukhu yathu kwa wanthu mu upalizi bwa padeca, tin’funika kukhala wakusamala kwene-kwene. (Mat 7:6) M’mbuto mwa kundopasa ali-wense omwe ankupita na njira, mbacitani nyongo yakutoma mwaceza na munthuyo kuti muwone penu iye angafune kuwerenga mabukhu yathu ayai ne. Kodi mungakwanise kutawira mibvunzo yomwe iri pa kwadruyi? Bzikakunesani kuzindikira penu munthuyo ankufunadi revistayo ayai ne, bzingakhale bwino kundomupasa katsamba. Tsono akakumbira revista ayai bukhu, tingamupase.—Mim 3:27, 28.