Mareferensiya ya Kabukhu ka Mitsonkhano ka Moyo Wathu na Utumiki
7-13 MAIO
CUMA CA M’FALA LA MULUNGU | MARKO 7-8
“Tenga Muti Wako Wakuzunzidwira Ndipo Unditewere Nthawe Zense”
(Marko 8:34) Ndipo iye adacemera thimu la wanthuwo pabodzi na anyakupfunza wace ndipo adawauza kuti: “Munthu ali-wense akafuna kunditewera, abzirambe yekha acitenga muti wace wakuzunzidwira ndipo anditewere nthawe zense.
Nfundo yakuthumizira pa Mar 8:34 mu nwtsty
abzirambe yekha: Ayai “kusiya m’mbuyo bzinthu bzense bzomwe ambafuna.” Bzimwebzi bzimbathandauza kulamba bzakufuna bzace bza munthuyo ayai kupereka unthu bwace bwense kwa Mulungu. Mafala ya Cigerego yomwe yasanduliziridwa kuti ‘abzirambe yekha’ yangathandauzembo “iye an’funika kulewa kuti nee kwa iye yekha.” Thandauzoli ndakuthemera, thangwe kucita bzimwebzi kumbaphatanidza kusiya bzakufuna bzathu na bzikhumbo bzathu. (2Wak 5:14, 15) Mafala ya Cigirego mabodzi-bodziya yadaphatisidwambo basa na Marko pomwe adalewa bza kulamba Jezu komwe Pedru angadadzakucita.—Mar 14:30, 31, 72.
w92 1/8 tsa. 17 ndi. 14
Kodi Munkuthamanga Tani pa Mapici Yakuti Mukagumane Moyo?
14‘Omwe an’funa kunditewera,’ adalewa tenepo Jezu Kristu kwa ateweri na wanthu winango omwe akhadakonkhana, ‘abzirambe yekha (ayai, “iye an’funika kulewa kuti ‘nee’ kwa iye yekha,” Charles B. Williams) acitenga muti wace wakuzunzidwira ndipo anditewere nthawe zense.’ (Marko 8:34) Tikabvuma mcemo umweyu, tin’funika kukhala wakukonzeka kucita bzimwebzo ‘nthawe zense,’ sikuti thangwe rakuti pana cinthu cakupambulika cakufunikira kubzimana, koma thangwe rakuti kusaya kukhala wakuzindikira kwa mphindi ibodzi kungacitise kuluza bzinthu bzabwino bzamuyaya bzakutsogolo. Kukula mwauzimu kumbacitika pang’ono na pan’ono, tsono tikasaya kukhala tceru tingaluze uzimubo!
(Marko 8:35-37) Pakuti omwe an’funa kupulumusa moyo wace, an’dzauluza, koma ule omwe an’luza moyo wace thangwe ra ine ayai thangwe ra bzipsa bzabwino an’dzaupulumusa. 36 Kulewa cadidi, kodi pana phindu lanyi munthu kukhala na bzinthu bzense bza m’dzikoli koma aciluza moyo wace? 37 N’ciyani maka-maka comwe munthu angapereke kuti apulumuse moyo wace?
(Marko 8:38) Pakuti omwe an’cita nane manyazi, pabodzi na mafala yangu m’badwo uno wa upombo na wa pikado, Mwana wa munthu an’dzacitambo naye manyazi akadzafika mu umbiri bwa Baba wace, pabodzi na wanjo wakucena.”
Kufufudza Cuma Cauzimu
(Marko 7:5-8) Tenepo, Afarizeu na anembiwo adamubvunza kuti: “Thangwe ranyi anyakupfunza wanuwa ankubvera lini mwambo wa abereki wathu, iwo ambadya cakudya, ne kusamba m’manja?” 6 Iye adawauza kuti: “Zaiya adaleweratu bza imwepo wacinyengomwe, ninga momwe bzidanembedwa kuti: ‘Wanthuwa ambandondilemekeza na miromo yokha, tsono mitima yawo iri kutali na inepano. 7 Ankundobonera kundinamata, pakuti ankupfunzisa malamulo ya wanthu.’ 8 Munkusiya pa mbali cakutonga ca Mulungu, muciphatisisa mwambo wa wanthu.”
Mibvunzo Yakucokera kwa Anyakuwerenga
Thangwe ranyi kusamba m’manja ikhali nkhani ikulu kwa anyamadulanthaka wa Jezu?
Nkhani yakusamba m’manjayi ikhali cinthu cibodzi mwa bzinthu bzizinji bzomwe anyamadulanthaka wa Jezu akhatsutsa iye pabodzi na anyakupfunza wace. Cakutonga ca Mozeji cidafotokoza bzomwe bzingadacitisa kuti munthu akhale wakupswipa, mwa ciratizo, matenda yakucoka mulopa ku mbuto zakubisika, mapere, kukhuya nkhawa ayai cirombo cakufa. Cakutonga cidaperekambo malango ya bzomwe munthu ali-wense akhafunika kucita kuti akhale pomwe wakucena. Malangoyo yakhalewa bza kupereka nsembe, kusamba na kufula ayai kuwaza mulopa.—Mwambo makapitulo 11-15; Mirewengo kapitulo 19.
Apfunzisi Wacijuda, wakudziwikambo ninga arabi, adathumizira mitemo yawo pa bzakutonga bzimwebzi. Bukhu linango lidalewa kuti apfunzisiwo adakonza ayai kuthumizira nfundo zizinji pa bzinthu bzomwe bzingadacitisa munthu kukhala wakupswipa na momwe angadacitisira winango kukhala wakupswipambo. Iwo adakonzambo mitemo pakulewa bza mtundu wa bzombo bzomwe bzingadacitisa na bzomwe bzingadacitisa lini munthu kukhala wakupswipa pabodzi na miyambo yomwe wanthu akhafunika kuteweza kuti akhale pomwe wakucena.
Anyamadulanthaka wa Jezu adamubvunza kuti: ‘Thangwe ranyi anyakupfunza wanuwa ankubvera lini mwambo wa abereki wathu, iwo ambadya cakudya, ne kusamba m’manja?’ (Marko 7:5) Pamwepa Afarizeu akhathandauza lini buya la cairo, ayai kusamba m’manja anati kudya. Afarizeu akhadakonza mtemo wakuti munthu akanati kudya, akhafunika kuthira madzi manja yace ninga mwambo. Bukhu lomwe lafotokozedwa padzaululi lidathumizira pomwe kuti apfunzisiwo “adacezeranambo bza bzombo bzomwe bzikhafunika kuphatisidwa basa pa kuthira madziyo, madzi yakuthemera, munthu omwe akhafunika kuthira madziyo pabodzi na kuwanda kwa manja yomwe madziyo yangadakwana.”
Kodi Jezu adacita tani na malamulo yensene yakuthumiziraya yomwe yadaperekedwa na wanthu? Iye adauza Ajuda omwe akhali atsogoleri wa bzipembedzo kuti: ‘Zaiya adaleweratu bza imwepo wacinyengomwe, ninga momwe bzidanembedwa kuti: “Wanthuwa ambandondilemekeza na miromo yokha, tsono mitima yawo iri kutali na inepano [Yahova]. Iwo ankundobonera kundinamata, pakuti ankupfunzisa malamulo ya wanthu.” Munkusiya pa mbali cakutonga ca Mulungu, muciphatisisa mwambo wa wanthu.’—Marko 7:6-8.
(Marko 7:32-35) Kumweko, adamubweresera munthu omwe akhali nkhuthu omwe akhanesekambo kulewalewa. Iwo adamukumbira kuti aikhe boko lace pa munthuyo. 33 Ndipo iye adatenga munthuyo aciyenda naye pambali, patali na thimu la wanthuwo. Ndipo adaikha bzala bzace m’makutu mwa munthuyo, ndipo pambuyo pakupsipa mata, iye adakhuya lirime lace. 34 Ndipo adadjiguma kudzulu acipuma mwakucosa mphuwe izinji aciti kwa iye: “Efata,” kuthandauza kuti “Funguka.” 35 Tenepo, makutu ya munthuyo yadafunguka, ndipo lirime lace lidatsudzuka aciyambiratu kulewalewa bwino-bwino.
14-20 MAIO
CUMA CA M’FALA LA MULUNGU | MARKO 9-10
“Matsomphenya Yomwe Yambalimbisa Cikhulupiro”
(Marko 9:1) Ndipo iye adawauza pomwe kuti: “N’cadidi ndikukuuzani, pana winango mwa omwe adaima panowa omwe an’dzalawidza lini infa ne napang’onopo, kufikira atawona cakuyamba Umambo bwa Mulungu butabwera na mphanvu zace.”
(Marko 9:2-6) Patapita nsiku zitanthatu, Jezu adatenga Pedru, Tiyago na Juwau, aciyenda nawo ku phiri litali. Ndipo iye adasandulika pamaso pawo; 3 ndipo bzakubvala bzace bzidayetima, bzicicena kwene-kwene kuposa momwe nyakufula ali-wense wa pa dziko la pansi angacenesere bzakubvala. 4 Ndipo adawonekerambo kwa iwo Eliya na Mozeji, ndipo akhambaceza na Jezu. 5 Tenepo Pedru adauza Jezuyo kuti: “Rabi, bziri bwino kuti ifepano tikhale kuno. Tin’konza tendi zitatu, ibodzi yanu, ibodzi ya Mozeji ndipo ibodzi ya Eliya.” 6 Kulewa cadidi, Pedru akhadziwa lini bzomwe angadacita, thangwe rakuti anyakupfunzawo akhacita mantha kwene-kwene.
(Marko 9:7) Pamwepo kudacita mtambo uciwampsinkha, ndipo mu mtambomo mudabveka fala lomwe lidati: “Uyu ni Mwana wangu, wakufunidwa. Mbamubverani.”
Nfundo yakuthumizira pa Mar 9:7 mu nwtsty
fala: Bumwebu ni ulendo bwaciwiri pa maulendo matatu, yomwe Yahova caiyeyo adalewalewa kwa wanthu, ndipo falali limbagumanika m’mabukhu ya Mateu, Marko, Luka na Juwau.—Onani nfundo zakuthumizira pa Marko 1:11; Juwau 12:28.
Kufufudza Cuma Cauzimu
(Marko 10:6-9) Tsono, kuyambira paciyambi ca cirengedwe ‘Iye adawalenga mwamuna na mkazi. 7 Pa thangwe limweri mwamuna an’dzasiya baba wace na mai wace, 8 ndipo awiriwo an’dzakhala thupi libodzi,’ tenepo iwo ni awiri lini pomwe, koma thupi libodzi. 9 Tenepo comwe Mulungu wacimanga pabodzi, munthu aleke kucirekanisa.”
(Marko 10:17, 18) Pomwe Jezu akhacoka, mwamuna munango adamuthamangira, ndipo adagodama pamaso pace, acimubvunza kuti: “Mpfunzisi Wabwino, kodi n’ciyani comwe ndin’funika kucita kuti ndidzatambire moyo wakusaya kumala?” 18 Jezu adati kwa munthuyo: “Thangwe ranyi unkundicemera wabwino? Palibe wabwino, koma Mulungu yekha.
Nfundo zakuthumizira pa Mar 10:17, 18 mu nwtsty
Mpfunzisi Wabwino: Wanthu akhaphatisa basa mafala yakuti ‘Mpfunzisi Wabwino’ ninga madzina ya udindo, ndipo madzina ya maudindoya yakhaphatisidwa basa pakufuna kupasa mbiri atsogoleri wa bzipembedzo wa mu nthawe imweyire. Napo Jezu akhabvuma kucemeredwa “Mpfunzisi” na “Mbuya” (Ju 13:13), koma iye akhapereka mbiri yense kwa Baba wace.
Palibe wabwino, koma Mulungu yekha: Jezu akhadziwa kuti Yahova yekha ndiye akhali munthu wabwino kuposa ali-wense, ndipo ninga mtongi mkululetu, iye ana ugo bwakukhazikisa malamulo ya comwe n’cabwino na cakuipa. Mwa kudya cisapo ca muti wakudziwisa cabwino na cakuipa, Adamu na Eva adalatiza kuti akhafuna kubzisankhulira okha bzomwe mpsabwino. Mwakusiyana na iwo, Jezu mwakubzicepswa adasiya kuti Babace akhazikise mitemo ya comwe n’cabwino. Yahova adalatiza ndipo adakhazikisa bzomwe mpsabwino mwa kupereka mitemo yomwe imbagumanika m’Fala lace.—Mar 10:19.
21-27 MAIO
CUMA CA M’FALA LA MULUNGU | MARKO 11-12
“Mkaziyu Wathusa Bzizinji Kuposa Wense”
(Marko 12:41, 42) Ndipo Jezu adakhala pansi, mwakunyang’anizana na thungwa la cuma, ndipo akhawona momwe thimu la wanthu likhaikhira kobiri m’thungwalo. Ndipo anyakudala azinji akhambaikha m’mwemo kobiri zawo zizinji. 42 Tsono adabwera mkazi munango mansiwa wakusauka, ndipo adaikha tukobiri tuwiri twakucepa mphanvu.
Nfundo zakuthumizira pa Mar 12:41, 42 mu nwtsty
thungwa la cuma: Mwakubverana na mabukhu yakale ya Ajuda, mathungwa ayai makaxa yakhana mulomo ninga wa cimbututu. Wanthu akhambaikha m’mwemo bzakupereka bza mtundu wakusiyana-siyana. Mafala ya Cigirego yomwe yaphatisidwa basa pa vesiri, yambagumanikambo pa Juwau 8:20, yomwe yadasanduliziridwa kuti ‘mbuto ya bzakupereka.’ Bzinkuwoneka kuti mafalaya yankulewa bza mbuto yomwe ikhali mu Bwalo la Akazi. (Onani nfundo yakuthumizira pa Mateu 27:6 na Kabuku Kothandiza Kuphunzira Mawu a Mulungu pa msolo 15.) Mwakubverana na bzakunembedwa bza arabi, mathungwa yakucitira bzakupereka yakukwana 13 yakhambaikhidwa m’mbuto zakusiyana-siyana kuzungulira bwalo lensero. Ndipo wanthu winango ambakhulupira kuti mu templo mukhana cipinda comwe cikhana thungwa likulu lomwe akhakakhuthulira bzakupereka bzense bzomwe bzikhaikhidwa m’mathungwa mang’ono-mang’ono yale.
tukobiri tuwiri: Thandauzo lace cairo “lepitoni ziwiri.” Fala lacigirego lakuti le·ptonʹ limbathandauza kacinthu kang’ono-g’ono. Lepitoni ikhali kobiri ya ngwingwingwi yakusaya mphanvu kwene-kwene, mwakuti kobiri ibodzi ya dinario ikhaimira lepitoni zakukwana 128. Bzinkuwoneka kuti Ajirayeri akhaphatisa basa kobiri ya lepitoni yomwe ikhali ya mkuwa.—Onani mu Kabuku Kothandiza Kuphunzira Mawu a Mulungu, pa msolo 18.
twakucepa mphanvu: Thandauzo lace cairo: “tomwe ni tukobiri twa kwadrante.” Fala la Cigirego ko·dranʹtes (lakucokera ku Cilatini quadrans) limbathandauza kobiri ya mkuwa ya ku Roma yomwe ikhaimira madinario 64. Pa vesiri, Marko omwe adanemba bukhuli adaphatisa basa kobiri ya Aroma kuti afotokoze mphanvu ya kobiri yomwe Ajuda akhaiphatisa basa kawiri-kawiri. Onani nfundo yakuthumizira pa Mateu 27:6 na mu Kabuku Kothandiza Kuphunzira Mawu a Mulungu, pa msolo 18.
(Marko 12:43) Tenepo iye adacemera anyakupfunza wace aciwauza kuti: “Ndinkukuuzani kuti, mkazi mansiwa wakusaukayu waikha bzizinji kuposa wense omwe aikha bzakupereka bzawo m’thungwa la cuma.
w97 15/10 matsa. 16-17 ndi. 16-17
Yahova Ambakomedwa Tikamutumikira na Mtima Wense
16Pa Nisani 11 Jezu adakhala nsiku yense mu templo. M’mwemo utongi bwace budatsutsidwa ndipo iye adatawira mwakubveka bwino mibvunzo yakunesa yakulewa bza kukhomesa mitsonkho, cilamuso na nkhani zinango. Iye adatsimula anembi na Afarizeu thangwe rakuti ‘akhambakhabvula nyumba za akazi mansiwa.’ (Marko 12:40) Tenepo, Jezu adakhala pansi, ndipo mwakusaya kupenukira akhali m’Bwalo la akazi lomwe mwakubverana na mwambo wa Ajuda mukhagumanika mathungwa ya cuma yakukwana 13 yakuthusira bzakupereka. Jezu adakhala nthawe izinji, acimbawona wanthu omwe akhacita bzakupereka bzawo. Pakhabwera wanthu azinji, pinango winango akhali wakubziwonesera kuti mbakulungama na wanthu wakubzibva. (Ndendemezerani na Mateu 6:2.) Jezu adakhala tceru kunyang’ana mkazi munango. Tsono munthu ali-wense akhawona lini cinthu cacilendo kwa mkaziyo ne na mphaso yace. Koma Jezu omwe akhakwanisa kudziwa bza mu mtima mwa munthu, adadziwa kuti mkaziyo akhali ‘mansiwa na wakusauka.’ Ndipo adadziwambo kuwanda kwa mphaso yace, yomwe ikhali ‘tukobiri tuwiri twakusaya mphanvu.’—Marko 12:41, 42.
17Jezu adacemera anyakupfunza wace, thangwe akhafuna kuti iwo akhale wakuyambirira kuzindikira pfunziro lomwe akhafuna kuwapfunzisa. ‘Mkazi mansiwa wakusaukayu waikha bzizinji kuposa wense omwe aikha bzakupereka bzawo m’thungwa la cuma’ adalewa tenepo Jezu. Ninga momwe Jezu adawonera, mkaziyo adathusa kobiri zizinji kuposa zomwe wense adathusa. Mkaziyo adapereka ‘bzense bzomwe akhanabzo’—tukobiri twace twense tomwe akhanato. Mwa kucita bzimwebzi, iye adathemba Yahova kuti angadamusamalira. Tenepo, munthu omwe adakhala ciratizo ca kupasa Mulungu, akhali munthu wakusauka ndipo akhana mphaso yakucepa. Koma pamaso pa Mulungu mphasoyo ikhali yapadzulu kwene-kwene!—Marko 12:43, 44; Tiyago 1:27.
(Marko 12:44) Pakuti wensenewa aikha bzomwe atapa pa bzizinji bzomwe anabzo, tsono mkaziyu, mwakusauka kwace, waikha zense zomwe akhanazo, zense zomwe zingadamuthandiza pa moyo wace.”
w97 15/10 tsa. 17 ndi. 17
Yahova Ambakomedwa na Utumiki bwa Mtima Wense
17Jezu adacemera anyakupfunza wace, thangwe akhafuna kuti iwo akhale wakuyambirira kuzindikira pfunziro lomwe akhafuna kuwapfunzisa. ‘Mkazi mansiwa wakusaukayu waikha bzizinji kuposa wense omwe aikha bzakupereka bzawo m’thungwa la cuma’ adalewa tenepo Jezu. Ninga momwe Jezu adawonera, mkaziyo adathusa kobiri zizinji kuposa zomwe wense adathusa. Mkaziyo adapereka ‘bzense bzomwe akhanabzo’—tukobiri twace twense tomwe akhanato. Mwa kucita bzimwebzi, iye adathemba Yahova kuti angadamusamalira. Tenepo, munthu omwe adakhala ciratizo ca kupasa Mulungu, akhali munthu wakusauka ndipo akhana mphaso yakucepa. Koma pamaso pa Mulungu mphasoyo ikhali yapadzulu kwene-kwene!—Marko 12:43, 44; Tiyago 1:27.
w87 1/12 tsa. 30 ndi. 1
Kodi Mumbapereka Nsembe Zanu na Mtima Wense?
Tingapfunze bzinthu bzizinji pa cakucitikaci. Koma cakufunika n’cakuti tense tina mwayi wakuthandizira kunamata kwakucena mwa kumbapereka bzinthu bzathu bzakuthupi. Comwe cakufunika kwa Yahova si kumupasa cinthu comwe n’cakusaya basa kwa ifepano, koma cinthu cakufunika kwene-kwene. Mwa njira inango, kodi timbapereka bzinthu bzomwe timbabzifuna lini? Ayai timbapereka msembe zathu na mtima wense?
Kufufudza Cuma Cauzimu
(Marko 11:17) Ndipo iye adayamba kuwapfunzisa mwa kuwauza kuti: “Kodi bziribe kunembedwa kuti, ‘Nyumba yangu in’dzacemeredwa nyumba yakupembera mitundu yense’? Koma imwepo mwaisandusa mphako ya akapondo.”
Nfundo yakuthumizira pa Mar 11:17 mu nwtsty
nyumba yakupembera mitundu yense: Mavanjedyo matatuya yadaphatisa basa mafala ya pa Zaiya 56:7, koma ni Marko yekha omwe adaphatanidza mafala yakuti ‘mitundu yense [wanthu].’ (Mat 21:13; Lu 19:46) Templo ya ku Jeruzalemu ingadakhala m’mbuto yomwe Ajirayeri na wanthu omwe akhali lini Ajirayeri angadakanamata na kupemba kwa Yahova. (1Wam 8:41-43) Ndipopa Jezu adatsutsa bzomwe Ajuda akhacita, thangwe iwo akhacitira malonda m’nyumbayi aciisandusa mphako ya akapondo. Bzomwe Ajuda akhacitabzi, bzikhatazisa wanthu wa mitundu yense kuyenda ku nyumba ya Yahova kuti akapfunze bza iye.
(Marko 11:27, 28) Ndipo iwo adafika pomwe ku Jeruzalemu. Tsono pomwe iye akhafamba-famba mu templo, akulu-akulu wa ansembe, anembi na akulu adayenda komwe kukhana iyeko, 28 ndipo adamubvunza kuti: “Kodi ugo bwakucita bzimwebzi mudabutenga kuponi? Ayai mbani omwe adakupasani ugo bwakucita bzinthu bzimwebzi?”
28 MAIO–3 JUNHO
CUMA CA M’FALA LA MULUNGU | MARKO 13-14
“Tcenkhani Kugwa mu Msampha Wakugopa Wanthu”
(Marko 14:29) Koma Pedru adamuuza kuti: “Napo wense acigwa, inepano cipo ndicidzagwa.”
(Marko 14:31) Koma iye adapitiriza kungingimira kulewa kuti: “Napo bzicimbafunika kufa namwe pabodzi, cipo ndicidzakulambani.” Anyakupfunza wace winango wale adalewambo bzibodzi-bodzibzo.
(Marko 14:50) Ndipo anyakupfunza wace wense adathawa acimusiya yekha.
(Marko 14:47) Ndipo m’bodzi mwa omwe akhali pamwepowo adasolola mphanga yace, acitema nayo mtumiki wa mkulu wa ansembe, acimugwata khutu.
(Marko 14:54) Tsono Pedru, akhambamutewera na patali, mpaka kufika mkati mwa bwalo la mkulu wa ansembe; ndipo adakakhala pabodzi na anyabasa wa m’nyumbamo acimbawotha moto.
(Marko 14:66-72) Tsono pomwe Pedru akhali m’phompho mwa bwalo la mkati, adabwera m’bodzi mwa anyabasa wacitsikana wa mkulu wa ansembe. 67 Ndipo atawona Pedru akuwotha moto, adamunyang’anisisa, aciti: “Iwepo ukhafambambo pabodzi na Jezu m’Nazaletiyu.” 68 Koma iye adalamba, mwa kulewa kuti: “Ndimbamudziwa lini munthu umweyu, ndipo ndin’kubvesesa lini bzomwe unkulewabzi.” Tenepo iye adacoka panja, aciyenda kukakhala pacipata ca bwalolo. 69 Ndipo nyabasa mtsikana adamuwona aciyamba pomwe kuuza omwe akhali pamwepowo kuti: “Uyu ni m’bodzi wawo.” 70 Tsono iye adalamba pomwe. Ndipo patapita mphindi zing’ono-ng’ono, wanthu omwe akhali pamwepowo adauza Pedru kuti: “N’cadidi, iwepo ndiwe m’bodzi wawo. Ndipo ndiwe m’Galileya.” 71 Koma iye adayamba na kubzitemberera acilumbira kuti: “Munthu omwe munkulewayo inepano ndimbamudziwa lini!” 72 Pa nthawe ibodzi-bodziyo, congwe adalira pomwe kaciwiri. Tenepo Pedru adakumbukira mafala yomwe Jezu akhadamuuza, yakuti: “Congwe akanati kulira kaciwiri, un’dzandilamba katatu kense.” Ndipo mwa kubzibvera nsisi iye adayamba kulira.
it-3 tsa. 211 ndi. 5
Pedru
Mwakuthandizidwa na apostolo winango omwe akhatewera Jezu ku nyumba ya mkulu wa ansembe, Pedru ndiye omwe adapita mpaka mkati bwa bwalo la nyumbayo. (Ju 18:15, 16) Tsono Pedru alibe kundokhala payekha-yekha, koma iye adayenda kukawotha moto. Motoyo ukhamubvunika bzomwe bzidacitisa kuti wanthu winango amuzindikire, ndipo kupenukirako kudathumizirika thangwe kalalewedwe kace kakhali kacigalileya. Pomwe wanthu adauza Pedru kuti iye akhafamba na Jezu, iye adalamba katatu kense kuti akhamudziwa lini Jezuyo na pang’onopo, ndipo pomwe akhamulamba kacitatu iye adacita kulumbira na kubzitemberera. Ndipo mu mzindamo congwe adalira kaciwiri, Jezu ‘adazungunuka acing’anisa Pedru.’ Tenepo, Pedruyo adacoka pamwepo ndipo mwakubzibvera nsisi na mwakuwawidwa mtima iye adayamba kulira. (Mat 26:69-75; Mar 14:66-72; Lu 22:54-62; Ju 18:17, 18; onani GALO, CANTO DO; JURAMENTO mu bukhu la Estudo Perspicaz das Escrituras.) Na tenepo udatawiridwa mkumbiro wa Jezu wakuti cikhulupiro cace cireke kumala, ndipo cikhulupiro ca Pedruyo ciribedi kutepa kwa nthawe zense.—Lu 22:31, 32.
Kufufudza Cuma Cauzimu
(Marko 14:51, 52) Ndipo mulumbwana winango omwe akhadandofunika nguwo yokha, adayamba kumutewera na pafupi, ndipo wanthu adayezera kumuphata, 52 tsono iye adalekera nguwoyo acithawa pezi.
(Marko 14:60-62) Tenepo mkulu wa ansembe adamuka pakati pawo acibvunza Jezu kuti: “Kodi ulibe cakutawira ciri-cense? Kodi mpsacadidi bzomwe wanthuwa ankulewabzi?” 61 Tsono iye adandonyamala, alibe kutawira ciri-cense. Ndipo mkulu wa ansembeyo adamubvunza pomwe kuti: “Kodi iwepo ndiwe Kristu, Mwana wa Wakusimbidwayo?” 62 Jezu adatawira kuti: “Inde ndine! Ndipo imwepo mun’dzawona Mwana wa munthu adakhala ku boko la madidi lamphanvu, ndipo mun’dzamuwonambo ankubwera m’mitambo yakudzulu.”