Mareferensiya ya Kabukhu ka Mitsonkhano ka Moyo Wathu na Utumiki
3-9 JUNHO
CUMA CA M’FALA LA MULUNGU | WAGALATA 4-6
“Nkhani Yakuyezezera Yomwe ina Thandauzo kwa Ifepano”
(Wagalata 4:24, 25) Bzinthu bzimwebzi bzina thandauzo lakuyezezera; thangwe azikazi awiriwa ankuimira mipangano miwiri, mpangano wa pa Phiri la Sinai omwe umbabereka wana kuti akhale akapolo. Mpangano umweyu ni Hagari. 25 Tsapano Hagari umweyu ambathandauza Sinai, Phiri la ku Arabia, ndipo nsiku zino ankundendemerana na Jeruzalemu, pakuti iye ali pa ukapolo pabodzi na wana wace.
it-1 tsa. 1018 ndi. 2
Hagari
Mwakubverana na mpostolo Paulo, Hagari wakuyezezera akhaimira mtundu wa Ajirayeri wakuthupi omwe ukhali pa mpangano na Yahova thangwe mpangano wa cakutonga omwe udakhazikisidwa pa Phiri la Sinai, mpangano omwe udabereka ‘wana wa ukapolo.’ Thangwe ra pikado, mtunduyu ulibe kukwanirisa mpangano umweyu. Tenepo Ajirayeri alibe kukhala wanthu wa ufulu, koma adawonedwa ninga wa pikado na wakuthemera infa, mwa njira imweyi iwo akhali akapolo. (Ju 8:34; War 8:1-3) Jeruzalemu wa nthawe ya Paulo akhaimira Hagari, ndipo likulu la mzindayu likhaimira Jirayeri wakuthupi. Iye akhali kapolo pabodzi na wana wace. Tenepo Akristau wakusankhulidwa na mzimu ni wana wa ‘Jeruzalemu wakudzulu’ omwe ambaimira mkazi wakuyezezera wa Mulungu. Jeruzalemu umweyu akundendemera na Sara, mkazi wa ufulu omwe alibe kukhala kapolo. Tsono ninga Izaki omwe akhazunzidwa na Jimayeri, wana wa ‘Jeruzalemu wakudzulu,’ omwe adatsudzulidwa na Mwana, akhazunzidwa na wana wa Jeruzalemu wa ukapolo. Na tenepo Hagari na mwana wace Jimayeri adathamangisidwa, bzomwe bzikuimira kulambidwa kwa Jirayeri wakuthupi na Yahova.—Wag 4:21-31; onanimbo Juwau 8:31-40.
(Wagalata 4:26, 27) Koma Jeruzalemu wakudzulu ni mfulu ndipo ni mai wathu. 27 Pakuti bzidanembedwa: “Kondwa iwe mkazi ngomwa omwe umbabereka lini mwana; kuwa mwakukondwa iwe mkazi omwe ukanati kubva bzakuwawa bza pakubereka, thangwe wana wa mkazi wakusiyidwa mbazinji kuposa wana wa mkazi omwe ana mwamuna wace.”
(Wagalata 4:28-31) Imwepo abale, ndimwe mbeu yakupiciridwa ninga momwe Izaki akhaliri. 29 Koma ninga momwe bzikhaliri pa nthawe imweyire, kuti wakubadwa ninga momwe wanthu wense ambabadwira adayamba kuzunza wakubadwa na mzimu, ni momwembo bziriri nsiku zino. 30 Tenepo, kodi Bzinembo bzimbati ciyani? “Thamangisani kapolo wacikaziyu na mwanaceyu, thangwe mwana wa kapoloyu an’dzatambira lini utaka pabodzi na mwana wa mkazi wa ufulu.” 31 Tenepo abale, ndife lini wana wa kapolo wacikazi koma wana wa mkazi wa ufulu.
Kufufudza Cuma Cauzimu
(Wagalata 4:6) Tsapano, pakuti ndimwe wana wace, Mulunguyo watumiza mzimu wa Mwanace m’mitima mwathu, ndipo mzimuyo umbakuwa kuti: “Abba, Baba!”
(Wagalata 6:17) Kuyambira tsapano, aleke kugumanika munthu wakundiboneresa, thangwe thupi languli lina bzipsazi bza cizindikiro cakuti ndine kapolo wa Jezu.
10-16 JUNHO
CUMA CA M’FALA LA MULUNGU | WAYEFEZO 1-3
“Yahova Ambanyang’anira Mabasa Yace”
(Wayefezo 1:8, 9) Iye adatipasa kudeka mtima kukulu mwa nzeru zense na kuzindikira kwense 9 mwakuti adatizimbulira cinsinsi cakupambulika ca kufuna kwace. Cinsinsico n’cakubverana na bzakudekera mwenekaciroyo na bzomwe adafuna mu mtima mwace,
it-2 tsa. 837 ndi. 4
Cinsinsi Cakupambulika
Umambo bwa Mesiya. Bzomwe Paulo adanemba bzimbalatiza padeca kuzimbulidwa kwa cinsinsi cakupambulika cakulewa bza Kristu. Pa Wayefezo 1:9-11, Paulo ankulewa momwe Mulungu mwakufuna kwace ankudziwisira ‘cinsinsi cakupambulika,’ ndipo adati: ‘Mwakuti adatizimbulira cinsinsi cakupambulika ca kufuna kwace. Cinsinsico n’cakubverana na bzakudekera mwenekaciroyo na bzomwe adafuna mu mtima mwace, kuti adzanyang’anire bzinthu ikadzamala nyengo yense ya nthawe zakuikhidwiratu, komwe n’kukonkhanisa pomwe bzinthu bzense pabodzi mwa Kristu, bzinthu bzakudzulu na bza pa dziko lapansi, inde kubzikonkhanisa pomwe mwa iye. Mwakuphatana na iye, tidaikhidwa kukhala anyakudzatambira utaka, pakuti adatisankhula mwa kufuna kwace ndipo iye ambacita bzinthu mwakubverana na kufuna kwaceko.’ Cinsinsi cakupambulikaci cimbaphatanidza boma ayai Umambo bwa Mulungu bomwe bun’dzatongedwa na Mesiya. ‘Bzinthu bzakudzulu’ bzomwe Paulo adabzilewa ni nzika za Umambo bwa kudzulu zomwe zin’dzatonga pabodzi na Kristu. ‘Bzinthu bza pa dziko la pansi,’ ni wanthu omwe an’dzotongedwa na Umambobu. Jezu adalatiza kuti cinsinsi cakupambulika cinkubverana na Umambo pomwe adauza anyakupfunza wace kuti: ‘Imwepo mudapasidwa cinsinsi cakupambulika ca Umambo bwa Mulungu.’—Mar 4:11.
(Wayefezo 1:10) kuti adzanyang’anire bzinthu ikadzamala nyengo yense ya nthawe zakuikhidwiratu, komwe n’kukonkhanisa pomwe bzinthu bzense pabodzi mwa Kristu, bzinthu bzakudzulu na bza pa dziko lapansi, inde kubzikonkhanisa pomwe mwa iye.
Kufufudza Cuma Cauzimu
(Wayefezo 3:13) Tenepo, ndikukukumbirani kuti muleke kubwerera m’mbuyo pakuwona kubonera komwe ndinkugumana nako thangwe ra imwepo, pakuti kunkuthandauza umbiri kwa imwepo.
(Wayefezo 3:19) pabodzi na kulidziwambo bwino lufoyi la Kristu lomwe limbaposa kudziwa bzinthu bzense, kuti mudzazidwe na makhalidwe yense yomwe Mulungu ambapasa.
17-23 JUNHO
CUMA CA M’FALA LA MULUNGU | WAYEFEZO 4-6
“Bvalani Bzifuzo Bzense bza Nkhondo Bzakucokera kwa Mulungu”
(Wayefezo 6:11-13) Bvalani bzifuzo bzense bza nkhondo bzakucokera kwa Mulungu kuti mukwanise kulimba pa mapumpso ya Dyabu; 12 Thangwe tinkumenyana sikuti na wanthu wa thupi la mulopa na mnonfu, koma na maboma, na utongi, na atongi wa dziko lense wa m’mdimayu, na mphanvu ya mizimu yakuipa m’mbuto za kudzulu. 13 Ndipopa, bvalani bzifuzo bzanu bzense bza nkhondo bzakucokera kwa Mulungu kuti muleke kudzakundidwa pa nsiku yakuipa, ndipo mutamala kucita bzense bwino-bwino, mudzakwanise kulimba.
Maswaka—Limbanani na Sathani
MPOSTOLO Paulo adandendemezera Akristau na acikunda. Ifepano tinkumenya nkhondo, ndipo tinkulimbana na anyamadulanthaka caiwo! Tsono anyamadulanthakawo si wanthu ninga ife, koma ni Sathani pabodzi na madimonyo yace. Iwo ankumenya nkhondo kuyambira kale-kale, ndipo tsapano iwo ni axaxa. Ndipopa, tingawone ninga kuti tingakwanise lini kukunda nkhondoyo, maka-maka kwa wale omwe ni maswaka. Tsono, kodi n’cadidi kuti maswaka yangakwanise lini kukunda nkhondo imweyi? Ne. Iwo angakwanise, ndipo ankukunda kale! Kodi n’ciyani comwe cimbawathandiza? Iwo ambapasidwa mphanvu na Yahova. Ndipo, ninga acikunda wakupfunzisidwa bwino, maswakayo ‘yambabvala bzifuzo bzense bza nkhondo bzakucokera kwa Mulungu’ bzomwe bzimbawathandiza kukhala wakukonzeka bwino kuti amenye nkhondoyo.—Werengani Wayefezo 6:10-12.
(Wayefezo 6:14, 15) Tenepo, khalani wakulimba, mucimanga bwino cadidi m’ciuno mwanu, mucibvala cakukhotcerera pa cifuwa ca cirungamo, 15 ndipo mubvale nsapato ku nzayo zanu kuti mukhale wakukonzeka kuyenda kukapalizira bzipsa bzabwino bza mtendere.
w18.05 matsa. 22-23 ndi. 4, 7, 10
Maswaka—Limbanani na Sathani
Mwakundendemerana na bande la acikundali, cadidi comwe timbapfunza m’Fala la Mulungu cimbatikhotcerera ku bzipfunziso bzakunama. (Ju. 8:31, 32; 1 Ju. 4:1) Ndipo tikambafuna cadidi ca m’Fala la Mulungu, bzimbakhala bzakusaya kunesa kuteweza mitemo ya Mulungu ayai kubvala cakubvala ‘cakukhotcerera pa cifuwa’ pathu. (Psal. 111:7, 8; 1 Ju. 5:3) Ndipo, tikambabvesesa bwino cadidico, bzimbatinesa lini kucikhotcerera kwa wale omwe ambatitsutsa.—1 Pe. 3:15.
Mitemo yakulungama ya Yahova imbandendemezeredwa na cakukhotcerera pa cifuwaci, thangwe iyo imbakhotcerera ‘mtima’ wathu, ayai unthu bwathu bwa mkati. (Mim. 4:23) Ndipo palibe m’cikunda omwe angadacinjanisa cakubvala ca citsulo cakulimba cakukhotcerera cifuwa cace na cinango cakusaya kulimba. Mpsibodzi-bodzimbo na ifepano, tingacinjanise lini mitemo yakulungama ya Yahova na nzeru zathu, pakuti ifepano tiribe nzeru zakukwanira kuti tikwanise kukhotcerera mtima wathu. (Mim. 3:5, 6) Ndipopa, nthawe zense tin’funika kumbapenda ‘cakukhotcerera pa cifuwa’ pathu kuti tiwone penu cinkupitiriza kukhotcerera bwino mtima wathu.
Nsapato zomwe acikunda wa ku Roma akhabvala, zikhawathandiza kukunda nkhondo. Tsono nsapato zakundendemezera zomwe ifepano timbabvala, zimbatithandiza ‘kuyenda kukapalizira bzipsa bzabwino bza mtendere.’ (Zai. 52:7; War. 10:15) Napo bziri tenepo, nthawe zinango timbafunika kukhwimika kuti tikwanise kupalizira. Onani bzomwe adalewa Bo, mulumbwana wa magole 20 yakubadwa. Iye adati: “Ndikhana manyazi, ndipo ndikhambacita mantha kupalizira anzangu wa ku xikola. Tsapano ndikambakumbukira, ndimbawona kuti ndikhalibe mathangwe yakucitira bzimwebzi, ndipo ndimbakomedwa kwene-kwene kupalizira anzangu.”
(Wayefezo 6:16, 17) Kuposa bzense, tengani mkhotco mkulu wa cikhulupiro omwe mun’dzathimisira misewe yakugaka ya nyakuipayo. 17 Ndipo ibvumenimbo kapaseti ya cipulumuso pabodzi na mphanga ya mzimu, yomwe ni fala la Mulungu.
w18.05 matsa. 25-26 ndi. 13, 16, 20
Maswaka—Limbanani na Sathani
Kodi ni misewe iponi ‘yakugaka’ yomwe Sathani angakuthusireni? Pinango iye angakupumpseni mwakuphatisa basa magunkha yakulewa bza Yahova. Sathani ambafuna kuti imwepo mumbakumbuke kuti Yahova ambakufunani lini, nakuti palibe omwe anamwe basa. Bzimwebzi ndibzo bzomwe bzidacitikira Ida, mtsikana wa magole 19 yakubadwa. Iye adati: “Kawiri-kawiri ndikhawona ninga kuti Yahova ali lini pafupi nane, nakuti iye ambafuna lini kukhala Xamwali wangu.” Kodi n’ciyani comwe iye ambacita yakambamubwerera makumbukidweya? Iye adalewa kuti: “Mitsonkhano imbalimbisa kwene-kwene cikhulupiro cangu. Ndikhayenda ku mitsonkhanoko, koma ndikhapereka lini mitawiro, thangwe ndikhakumbuka kuti palibe munthu omwe angadatetekera bzomwe ndingadalewabzo. Koma tsapano, ndimbakonzekera mitsonkhano, ndipo ndimbacita nyongo yakupereka mitawiro maulendo mawiri ayai matatu. Kupereka mitawiroko kumbandinesa, koma pambuyo pace ndimbabzibva bwino, ndipo abale na mpfumakazi ambandilimbisa kwene-kwene. Ndipo ndimbabwerera ku mui ndicimbadziwa kuti Yahova ambandifunadi.”
Ninga momwe kapaseti ikhambakhotcererera msolo wa acikunda, ‘cidikhiro cathu ca cipulumuso’ cimbakhotcererambo makumbukidwe yathu. (1 Wat. 5:8; Mim. 3:21) Cidikhiro cimbatithandiza kumbakumbukira bzinthu bzakutsogolo bzomwe Mulungu ambatipicira, ticileka kutaya mtima thangwe ra mabvuto yomwe timbagumana nayo. (Psal. 27:1, 14; Mab. 24:15) Tsono, kuti cidikhiroco cimbatikhotcerere bwino, cin’funika kukhala caico kwa ifepano. Ndipo tin’funika kumbacita kubvala ‘kapaseti’ yathu ya cipulumuso mu msolo, sikuti kuinyamulira m’manja!
Yahova adatipasa Fala lace, Bibliya, ndipo mpostolo Paulo adandendemezera Fala la Mulungu na mphanga. Tenepo, kuti tikwanise kumbakhotcerera cikhulupiro cathu ayai kuti timbalungamize makumbukidwe yathu, ifepano tin’funika kumbaphatisa basa Fala la Mulunguli mwaluso. (2 Wak. 10:4, 5; 2 Tim. 2:15) Kodi tingathumizire tani luso lathu pakuphatisa basa Fala la Mulungu? Sebastian omwe ana magole 21 yakubadwa adati: “Ndikambawerenga kapitulo iri-yense ya m’Bibliya, inepano ndimbasankhula vesi lomwe landidekera. Ndikamala, ndimbatsonkhanisa mavesi yenseyo pabodzi, ndiciyanemba pa ndandanda ya mavesi yangu yomwe ndimbayafuna.” Kucita bzimwebzi, kumbathandiza Sebastian kubvesesa momwe Yahova ambakumbukira. Daniel adalewambo kuti: “Ndikambawerenga Bibliya, ndimbasankhula mavesi manango yomwe ndinkuwona kuti yangakathandize wanthu mu utumiki bwakumunda. Ndipo ndimbawona kuti wanthuwo ambakomedwa kwene-kwene, akambawona momwe ifepano timbafunira Bibliya pabodzi na nyongo yathu yomwe timbacita yakufuna kuwathandiza.”
Kufufudza Cuma Cauzimu
(Wayefezo 4:30) Ndipo, lekani kumbasunamisa mzimu wakucena wa Mulungu, omwe mwaikhidwa cizindikiro cace ca nsiku ya kudzatsudzulidwa na cakulombolera.
it-1 tsa. 1128 ndi. 3
Ucenu
Mzimu Wakucena. Ni mphanvu ayai mzimu omwe Yahova ambauphatisa basa kuti akwanirise cakulinga cace nthawe zense. Mzimuyo ngwakucena na wakupambulika ndipo Mulungu ambauphatisa basa bwino kwene-kwene. N’thangwe race umbacemeredwa ‘mzimu wakucena’ na ‘mzimu wa ucenu.’ (Psal 51:11; Lu 11:13; War 1:4; Wayef 1:13) Mzimu wakucena omwe umbaphata basa mwa munthu, ni mpanvu yakupambulika yomwe imbacitisa munthuyo kucita bzinthu bzakucena. Bzicito bzense bzakupswipa ayai bzakuphonyeka ‘bzimbasunamisa’ mzimuyu. (Wayef 4:30) Napo kuti mzimuyu ni munthu lini, iwo umbalatiza unthu bwakucena bwa Mulungu, ndipopa ‘tingausunamise.’ Kucita pikado iri-yense kumbathimisa ‘moto wa mzimuyu.’ (1Wat 5:19) Ndipo kupitiriza kucita pikadoyo kungacitise kuti mzimu wakucena wa Mulungu ‘usuname’ ayai bzingacitise kuti tikhale anyamadulanthaka wa Mulungu thangwe ra kumupandukira. (Zai 63:10) Omwe ambasunamisa mzimu wakucena, angafike pa kuunyoza, ndipo Jezu adalewa kuti pikado imweyi in’dzalekereredwa lini, ne mu nthawe ino ne ya mtsogolo.—Mat 12:31, 32; Mar 3:28-30; onani pomwe padanemba kuti ESPIRITO.
(Wayefezo 5:5) Pakuti nfundo imweyi mukuidziwa ndipo munkuibvesesa bwino kuti: munthu wakucita unzazi ayai wakupswipa ayai wa umbombo, komwe ni kunamata bzifanikiso, an’dzapita lini mu Umambo bwa Kristu na Mulungu.
it-1 tsa. 1006 ndi. 2
Umbombo
Bumbawonekera M’bzicito bza Munthu. Umbombo bumbawonekera pa bzakucitika bzomwe bzimbalatiza cikhumbo cakuipa ca munthuyo. Nyakunemba Bibliya Tiyago ambatiuza kuti cikhumboco cikakula, cimbabala pikado. (Tiy 1:14, 15) Munthu wa umbombo, ambawoneka na bzicito bzace. Ndipo mpostolo Paulo adalewa kuti umbombo ni kunamata bzifanikiso. (Wayef 5:5) Munthu wa umbombo, ambawona bzikhumbo bzace ninga mulungu wace aciikha bzimwebzo pa mbuto yakuyamba kuposa kunamata Mulengi.—War 1:24, 25.
24-30 JUNHO
CUMA CA M’FALA LA MULUNGU | WAFIRIPO 1-4
“Lekani Kumbacita Thupo na Cinthu Ciri-cense”
(Wafiripo 4:6) Lekani kumbacita thupo na cinthu ciri-cense, koma pa ciri-cense na mpembo na kudandaulira pabodzi na kutenda, bzakukumbira bzanu bzidziwike kuna Mulungu;
w17.08 tsa. 12 ndi 10
‘Mtendere wa Mulungu . . . Umbaposa Makumbukidwe Yense’
Kodi n’ciyani comwe cingatithandize kuleka kucita ‘thupo na cinthu ciri-cense’ ticikhala na ‘mtendere wa Mulungu’? Mafala ya Paulo yomwe adanembera abale wa ku Firipoya, yambalatiza kuti tikambakhala na thupo thangwe ra bvuto linango, mankhwala yace ni mpembo. Na tenepo, tikambakhala na thupo, tin’funika kumbapemba. (Werengani 1 Pedru 5:6, 7.) Mukapemba kwa Yahova, mbakhalani wakutsimikiza kuti iye ankuthandizani. Mbamutendani nthawe zense pa cisimbo ciri-cense comwe iye wakupasani. Ndipo lekani kuyebwa kuti Yahova ‘angakwanise kucita bzinthu bzikulu kwene-kwene kuposa bzense bzomwe timbakumbira ayai kukumbuka.’—Wayefezo 3:20.
(Wafiripo 4:7) ndipo mtendere wa Mulungu, omwe umbaposa makumbukidwe yense un’dzakoya mitima yanu pabodzi na luso lanu lakukumbuka mwa Kristu Jezu.
‘Mtendere wa Mulungu . . . Umbaposa Makumbukidwe Yense’
Kodi n’ciyani comwe abale wa ku Firipo adakumbukira pomwe akhawerenga tsamba lomwe Paulo akhadawanembera? Mwakusaya kupenukira, azinji wa iwo adakumbukira bzomwe bzikhadacitikira Paulo na Sila na momwe Yahova adawathandizira mwakusaya kudikhirika. Kodi n’ciyani comwe Paulo akhawalimbisa mu tsambamo? Iye akhawalimbisa kuti aleke kucita thupo ndipo ambapembe. Ndipo akhawalimbisambo kuti angadadzapasidwa ‘mtendere wa Mulungu, omwe umbaposa makumbukidwe yense.’ Kodi mafalaya yambathandauza ciyani? Mu ma Bibliya manango, mafalaya yadasanduliziridwa kuti “umbaposa maloto yathu yense” ayai “umbaposa bzakulinga bzense bza munthu.” Tenepo Paulo akhafuna kulewa kuti ‘mtendere wa Mulungu’ ngwabwino kwene-kwene kuposa momwe tingakumbukirire. Nthawe zinango tingadziwe lini bzomwe tingacite pa mabvuto yathu, koma Yahova ambadziwa. Ndipo iye angacite bzinthu bzomwe tikhabzidikhirira lini.—Werengani 2 Pedru 2:9.
‘Mtendere wa Mulungu . . . Umbaposa Makumbukidwe Yense’
Kodi n’ciyani cimbacitika tikatambira ‘mtendere wa Mulungu, omwe umbaposa makumbukidwe yense’? Bibliya limbalewa kuti mtendereyo ‘un’dzasunga’ mitima yathu pabodzi na makumbukidwe yathu. (Wafiripo 4:7) Fala lakuti ‘kusunga’ ni fala lomwe likhaphatisidwa basa pakulewa bza thimu la acikunda lomwe likhasankhulidwa kuti limbalindire mzinda unango. Wanthu omwe akhakhala ku Firipo akhalindiridwa na thimu limweri. Wanthuwo akhagona bwino-bwino usiku thangwe akhadziwa kuti mzinda wawo ukhalindiridwa. Mwakundendemerana na bzimwebzi, tikambakhala na ‘mtendere wa Mulungu,’ timbacita lini thupo ndipo mitima yathu pabodzi na makumbukidwe yathu bzimbakhala pa mbuto. Timbadziwa kuti Yahova ambatisamalira ndipo ambafuna kuti bzinthu bzimbatifambire bwino. (1 Pedru 5:10) Ndipo bzimwebzi bzimbatikhotcerera kuti tileke kumbakhala na thupo ayai kutaya mtima.
Kufufudza Cuma Cauzimu
(Wafiripo 2:17) Napo ndikubzipereka ninga nsembe yacakumwa, yomwe ikuthiridwa pa nsembe na pa basa la kutumikira wanthu mwa kutsogoledwa na cikhulupiro, ndine wakukondwa ndipo ndinkukodwambo na imwe mwense.
it-2 tsa. 528 ndi. 5
Bzakupereka
Nsembe za cakumwa. Nsembe za cakumwa zikhambaperekedwa pabodzi na bzakupereka bzinango, maka-maka pambuyo pa Ajirayeri kukhala kwa nthawe izinji ku Dziko Lakupiciridwa. (Mirew 15:2, 5, 8-10) Pakhaperekedwa vinyu (“cakumwa cakuledzeresa”) ndipo iyo akhambaitsanulira pa mphatso. (Mirew 28:7, 14; onanimbo Kufuluka 30:9; Mirewengo 15:10.) Mpostolo Paulo adanembera Akristau wa ku Firipo kuti: ‘Ndikubzipereka ninga nsembe yacakumwa, yomwe ikuthiridwa pa nsembe na pa basa la kutumikira wanthu mwa kutsogoledwa na cikhulupiro, ndine wakukondwa.’ Pa vesiri, iye adaphatisa basa mafala yakuyezezera yakuti nsembe yacakumwa, kuthandauza kuti iye akhali wakukonzeka kuthandiza Akristau anzace. (Waf 2:17) Pomwe akhadasala pang’ono kuphedwa iye adanembera Timotio kuti: ‘Pakuti inepano ndinkubzipereka kale ninga nsembe yacakumwa, ndipo nthawe yakuti nditsudzuke iri pafupi.’—2Tim 4:6.
(Wafiripo 3:11) Ndacita bzimwebzi kuti ndiwone penu bzin’dzakwanisika kudzalamusidwambo pa kumuka kwa anyakufa komwe kun’citika mwakusaya kucedwa.