PFUNZIRO 1

Mafala Yabwino Yakuyambisira Nkhani

Mabasa 17:22

BZOMWE MUNGACITE: Mafala yanu yakuyambirira yan’funika kucitisa abveseri kufunisisa kutetekera, kulatiza nkhani yomwe mun’funa kuceza nawo, na kulatizambo momwe nkhaniyo ingawathandizire.

MOMWE MUNGACITIRE:

Kuti abveseri afunisise kutetekera. Sankhulani mbvunzo, bzakucitika pa moyo wa munthu, ayai notisiya iri-yense yomwe ingacitise kuti abveseri afunisise kutetekera.

Kumbukirani bwino-bwino pakana nthawe nkhani yomwe inkucitisa thupo abveseri wanu ayai yomwe ingawadekere, ndipo iphatiseni basa ninga mafala yanu yakuyambisira nkhani.
Kuti mulatize nkhani yomwe mun’funa kuceza na wanthu. Tsimikizirani kuti mafala yanu yakuyambirira yankulatiziratu bwino-bwino nkhani yomwe mun’funa kuceza na abveseri wanu, pabodzi na cakulinga cace.
Kuti mulatize momwe nkhaniyo ingathandizire abveseriwo. Mungacinje mafala yanu yakuyamba kuti yabverane na bzakusaya bza abveseri wanu. Iwo an’funika kubvesesa momwe nkhaniyo ingawathandizire pa moyo wawo.

Pomwe munkukonzekera nkhani yanu, mbabzibvunzani kuti: ‘Kodi abale wa m’gwere mwangu ankugumana na mabvuto yaponi?’ Patsogolo pace, bveranisani mafala yanu yakuyambirira na bzakusaya bzawobzo.