PFUNZIRO 7
Kulewa Bzinthu Bzacadidi
Luka 1:3
BZOMWE MUNGACITE: Perekani umboni bwacadidi kuti buthandize abveseri wanu kufika pa kubvesesa cadidi ca nkhani yomwe munkuceza nawoyo.
MOMWE MUNGACITIRE:
Fufudzani, muciphatisa basa umboni bwacadidi. Bzomwe mun’fotokoza bzin’funika kucokera m’Fala la Mulungu, ndipo bzikakwanisika, mungacite kuwerengeratu m’Bibliyamo. Mukafuna kulewa bzinthu bzakubverana na siyensiya, notícia, ayai cakucitika cinango, tsimikizirani pakana nthawe kuti mafala yomwe mun’funa kulewayo njacadididi.
Phatisani Basa Bwino Umboni Mwafufudzabo. Mbafotokozani bzinembo mwakubverana na momwe Bibliya limbapfunzisira, pabodzi na momwe bzimbafotokozedwera m’mabukhu ya ‘kapolo wakukhulupirika na wanzeru.’ (Mat. 24:45) Mukaphatisa basa mabukhu manango, fotokozani ninga momwe bzidanembedwera m’mabukhumo, m’mbuto mwa kucinja thandauzo la bzomwe mnembiyo akhafuna kulewa.
Kumbukani pabodzi na abveseriwo mwakuphatisa basa umboni munabobo. Mukamala kuwerenga vesi ayai kulewa mafala yomwe mwafufudza, citani mbvunzo mwakusamala ayai perekani ciratizo kuti muthandize abveseri wanuwo kufika pakudziwa wokha cadidi ca nkhaniyo.