Mareferentsiya ya Kabukhu ka Mitsonkhano ka Moyo Wathu na Utumiki
4-10 JANEIRO
CUMA CA M’FALA LA MULUNGU | MWAMBO 18–19
“Mbakhalani Wakucena M’makhalidwe”
Momwe Imwepo Mungabzikhotcererere ku Msampha wa Sathani
Pambuyo pa Yahova kulewa bzicito bzense bzakuipa bzomwe bzikhacitidwa na wanthu winango wale, iye adauza Ajirayeri kuti: ‘Lekani kukacita bzinthu bzomwe wanthu wa ku dziko la Kanani ambacita, komwe ndinkukuyendesani. . . . Dzikolo ndakupswipa, ndipo ndin’dzalibweresera cirango thangwe ra kuphonya kwawo.’ Kwa Yahova omwe ni Mulungu wakucena wa Ajirayeri, bzicito bza wanthu wale bzikhali bzakunyansa kwene-kwene, mwakuti bzikhadapswipizambo dziko lawolo.—Mwam. 18:3,25.
w17.02 tsa. 20 ndi. 13
Yahova Akhatsogolera Wanthu Wace
Atsogoleri wa mitundu inango akhatsogolera wanthu wawo mwakuphatisa basa nzeru za wanthu wakuperewera. Mwa ciratizo, atsogoleri wa Akanani na wanthu wawo akhambacita bzinthu bzakuipa kwene-kwene, ninga kugonana pacibale, kugonana amuna okha-okha, kugona bzirombo, kupereka wana ninga nsembe na kunamata bzifanikiso. (Mwambo 18:6, 21-25) Atsogoleri wa ku Babulo na wa ku Edjipito akhalibe mitemo yakundendemerana na ya wanthu wa Mulungu pa nkhani ya khonkho. (Mirewengo 19:13) Tenepo, wanthu wa Mulungu akhawona momwe atsogoleri wawo wakukhulupirika akhawalimbisira kuti acitise kuti kunamata kwawo kupitirize kukhala kwakucena. Akhawalimbisambo kuti akhale wakucena mwakuthupi acimbatcenkha kucita bzinthu bza upombo. Bzimwebzi bzinkulatiziratu kuti Yahova ndiye akhawatsogolera.
11-17 JANEIRO
CUMA CA M’FALA LA MULUNGU | MWAMBO 20-21
“Yahova Adapambula Wanthu Wace”
it-1 tsa. 1199
Utaka
Ni cinthu ciri-centse comwe cimbadzaperedwa kuna munthu munango omwe ana ugo bwakucitambira, mwenekaciro cinthuco akadzafa; ayai cinthu ciri-centse comwe mwana ambacitambira kwa abereki wace. Fala la Cihebereu lomwe laphatisidwa basa pamwepa ni na·chalʹ (na·chalahʹ). Bzimwebzi bzimbaphatanidza kutambira ayai kupereka utaka ayai cinthu cinango ciri centse, kawiri-kawiri na cakulinga cakuti munthuyo, apite m’mbuto mwathu. (Mirew 26:55; Zakiy 46:18) Fala lakuti ya·rashʹ nthawe zinango limbaphatisidwa basa pakulewa bza “nyakupita m’mbuto omwe an’dzatambira utaka,” tsono iro limbaphatisidwambo basa kawiri-kawiri pakulewa bza “kupita m’mbuto” napo icikhala kuti ni nkhani lini yakulewa bza utaka. (Ciy 15:3; Mwam 20:24) Falali limbathandauzambo “kupamba; kuthota” likakhala likulewa bza acikunda. (Bzak 2:12; 31:3) Fala la Cigerego lakuti kleʹros, limbasanduliziridwambo kuti utaka.—Mat 27:35; Mab 1:17; 26:18.
it-1 tsa. 317 ndi. 2
Mbalame
Pomwe cigumula ca madzi cidamala, Nowa adapereka ntsembe ‘mbalame zakucena’ pabodzi na bzirombo bzinango. (Ciy 8:18-20) Pambuyo pa bzimwebzi, Mulungu adabvumiza wanthu kuyamba kudya mbalame, kupambula molopa. (Ciy 9:1-4; ndendemezerani na Mwambo 7:26; 17:13.) Kucena kwa mbalame zinango mu ntsiku zimwezire kukhambawoneka thangwe ra umboni bwakucokera kwa Mulungu, bomwe bukhambalatiza kuti mbalameyo yabvumidwa ninga ntsembe; ndipo palibe mbuto iri yentse m’Bibliya yomwe imbalatiza kuti mu nthawe imweyire pakhana mbalame zakusankhulidwa kuti zidyedwe ayai zomwe zikhawonedwa kuti n’zakupswipa mpaka pomwe padakhazikisdwa Cakutonga ca Mozeji. (Mwam 11:13-19, 46, 47; 20:25; Bzak 14:11-20) Bzinthu bzomwe bzikhambacitisa mbalame kuwonedwa ‘yakupswipa’ mwakubverana na mwambo, bzimbalewedwa lini m’Bibliya. Koma zizinji mwa mbalame zomwe zikhawonedwa kukhala zakupswipa ni zomwe zimbadya nyama, koma zikhali lini zentse. (Onani POUPA.) Koma bzimwebzi bzidadzamala pomwe padakhazikisidwa mpangano upsa, mwakubverana na matsomphenya yomwe Mulungu adalatiza Pedru.—Mab 10:9-15.
Cuma Cauzimu
it-1 tsa. 563
Kubziceka-ceka
Lamulo la Mulungu likhaletseratu kubziceka-ceka m’thupi thangwe ra munthu wakufa. (Mwam 19:28; 21:5; Bzak 14:1) Thangwe ndakuti Ajirayeri akhali wanthu wakucena na mtundu wakupambulika kwa Yahova. (Bzak 14:2) Ndipopa Ajirayeri akhafunika kutcenkha kucita cinthu ciri-centse cakubverana na kunamata bzifanikiso. Kusunama kwakunyanyira kumweku mwakumbacita kubziceka-ceka, kukhali lini kwakuthemera, maka-maka kwa mtundu omwe ukhambadziwa momwe anyakufa aliri na cidikhiro comwe iwo anaco. (Dan 12:13; Waheb 11:19) Kuthumizira bzimwebzi, lamulo lakuletsa kubziceka-ceka lingadathandiza Ajirayeri kulemekeza thupi lomwe lidalengedwa na Mulungu.
18-24 JANEIRO
CUMA CA M’FALA LA MULUNGU | MWAMBO 22–23
“Thandauzo la Bzikondweso Bzomwe Ajirayeri Akhambacita”
it-1 matsa. 826-827
Cikondweso ca Pau Zakusaya Cakufufumisa
Ntsiku yakuyamba ya cikondweso ca Mikate Yakusaya Cakufufumisa, ikhali ntsiku ya mtsonkhano wakufunika kwene-kwene, ndipo ikhalimbo ntsiku ya sabudu. Pa ntsiku yaciwiri, yomwe ikhali ntsiku ya 16 ya mwezi wa Nisani, wanthu akhambayendesa kuna wantsembe msumbu wa sevada yakuyamba kubvunidwa yomwe ikhayamba kukhuma ku Palestina. Pomwe cikondwesoci cikanati kucitika, palibe omwe akhafunika kuphatisa basa ufa bupsa, kudya pau ayai mbeu zakukazinga za bzinthu bzipsa bzomwe bzabvunidwa m’munda. Wantsembeyo akhambapereka bzinthu bzakuyambirira bza m’mundabzi kwa Yahova mwakuyezerera, ndipo akhambacita bzimwebzi mwa kubziyendesa uku na uku, pa nthawe ibodzi-bodziyo akupereka ntsembe ya bira wa gole libodzi ninga ntsembe yakutentha pabodzi na mbeu zakufewesedwa na azeite na ntsembe ya bzakumwa. (Mwam 23:6-14) Pakhalibe lamulo lomwe likhalewa kuti bzinthu bzinango bza m’mundabzo ayai ufa bwace bzikhafunika kutenthedwa, ninga momwe wantsembe akhambadzacitira. Kuthimizira pa ntsembe yomwe ikhambaperedwa na wentseyi, pakhana makondzedwe ya kuti banja liri-lentse ayai munthu ali-wentse payekha ambapereke ntsembe zakutenda pa nthawe ya cikondwesoyi.—Kuf 23:19; Bzak 26:1, 2; onani pa msolo wakuti PRIMÍCIAS.
Thandauzo lace. Kudya pau zakusaya cakufufumisa mu nthawe imweyire, kukhabverana na malango yomwe Mozeji adapasidwa na Yahova yomwe yambagumanika pa cinembo ca Kufuluka 12:14-20, yomwe yambaphatanidza lamulo lakugumanika pa vesi 19 lakuti: ‘M’nyumba zanu muleke kugumanika cakufufumisa kwa ntsiku 7.’ Pau zakusaya cakufufumisa zomwe zimbalewedwa pa Bzakutonga 16:3 zimbacemeredwa kuti pau za mtsautso. Bzimwebzi bzikhambakumbusa Ajuda gole liri-lentse bza kacokedwe kawo mwa kamfulumize ku Edjipito (pomwe alibe kukhala na nthawe yakuti afufumise pau zawo [Kuf. 12:34]). Ndipo bzikhambawakumbusambo bza mkhalidwe wawo wa matsautso na wa ukapolo bomwe Yahova akhadawatsudzula, ninga momwe Yahovayo akhadalewera kuti: ‘Kuti iwepo umbakumbukire pa moyo wako wentse bza ntsiku yomwe udacoka m’dziko la Edjipito.’ Kutsudzulidwa kwawo ninga mtundu na kuzindikira kuti Yahova ndiye omwe adawapulumusa, ndibzo bziwadacitisa kukhazikisa cikondweso cakuyambirira pa bzikondweso bzitatu yakufunika kwene-kwene bzomwe Ajirayeriwo akhambacita gole liri-lentse.—Bzak 16:16.
it-2 tsa. 598 ndi. 2
Pentekosite
Pa cikondweso ca Pentekosite, tirigo yakuyambirira kubvunidwa ikhambakonzedwa mwakusiyana na momwe sevada ikhambakonzedwera. Mbali ziwiri za magawo 10 ya efa (4.4 L) ya ufa bwa tirigo bomwe bukhana cakufufumisa bukhafunika kuphikidwa pau ziwiri. ‘Mun’funika kubweresa bzimwebzi kucokera kumui kwanu’, bzomwe bzikulatiza kuti zikhafunika kukhala pau zomwe iwo akhambadya ntsiku zentse sikuti ninga zomwe akhambaziphatisa basa pa bzinthu bzakupambulika. (Mwam. 23:17) Zikhambabweresedwa pabodzi na ntsembe zakutentha na ntsembe za pikado. Ndipo akhambabweresambo mabira mawiri ninga ntsembe ya wentse. Wantsembe akhambayendesa uku na uku pau na mabira pamaso pa Yahova ndipo akhambacita bzimwebzi mwa kusanzika manja yace pa pauzo na nthindi za nyama ya mabirayo, ndipo akhambaziyendesa uku na uku pa kufuna kulatiza kuti bzikhaperekedwa kwa Yahova. Pambuyo pa kuperekedwa kwa Yahova, bzikhambadzakhala bza wantsembe, na cakulinga cakuti adye ninga ntsembe ya wentse.—Mwam. 23:18-20.
Cuma Cauzimu
Pitirizani Kukhala Wakukhulupirika!
Kodi atumiki wa Mulungu ambalatiza tani kuti mbakukhulupirika? Mwa kumbafuna Yahova na mtima wense, ndipopa nthawe zense bzakucita bzawo bzimbamukondwesa. M’Bibliya, fala lakuti ‘kukhulupirika’ m’Cihebereu limbathandauza kucita bzinthu na mtima wense. Mwa ciratizo, Ajirayeri akhapereka bzifuwo kwa Yahova ninga nsembe, ndipo cakutonga cikhalewa kuti cifuwo cikhafunika lini kukhala cakulemala. (Mwam. 22:21, 22) Wanthu wa Mulungu akhabvumizidwa lini kupereka cifuwo comwe catcoka mwendo, cagwatika khutu, ayai cakusaya maso; ne kupereka cifuwo cakuduwala. Yahova akhafuna cifuwo cakusaya kulemala. (Malak 1:6-9) Bzimwebzi bzikutithandiza kubvesesa thangwe race Yahova ambafuna kuti atumiki wace akhale wakukhulupirika. Mwa ciratizo, ifepano tingagule lini cisapo comwe cidabvunda mbali ibodzi, ne kugula bukhu lomwe liribe matsamba manango. Koma timbafuna kugula cinthu comwe ciri bwino. Tenepo, Yahova ambafuna kuti timbamufune na kukhala wakukhulupirika kwa iye. Bzimwebzi bzinkulatiza kuti ifepano tin’funika kumbacita bzinthu na mtima wathu wense.
25-31 JANEIRO
CUMA CA M’FALA LA MULUNGU | MWAMBO 24–25
“Gole la Ufulu na Kupulumusidwa Kwathu”
it-1 tsa. 871
Ufulu
Mulungu wa Ufulu. Yahova ni Mulungu wa ufulu. Iye adatsudzula mtundu wa Jirayeri pa ukapolo ku Edjipito. Yahovayo adawauza kuti penu angadabvera malamulo yace iwo angadalangidwa lini. (Bzak 15:4, 5) Davide adalewa kuti wanthu omwe akhakhala m’ntsanza za ku Jeruzalemu akhafunika ‘kukhala wakusamala.’ (Psal 122:6, 7) Tsono Lamulo likhambathandiza wanthu omwe akhali wakusauka; iro likhalewa kuti munthu angasaukiratu, angadabzigulisa na cakulinga cakuti akwanise kusamalira banja lace. Tsono Lamuloli likhambapasa ufulu munthuyo kuti atsudzulidwe ku ukapolo bwace mu gole laci 7. (Kuf 21:2) M’gole la ufulu (lomwe likhambacitika m’gole la ci 50 liri-lentse), wanthu wentse wa m’dzikomo akhambasekerera. Munthu ali-wentse akhambatsudzulidwa pa ukapolo bwace, ndipombo munthu ali-wentse akhambabwezeredwa utaka bwace.—Mwam 25:10-19.
it-1 tsa. 1200 ndi. 2
Utaka
Pakuti mbuto iri-yentse ikhambakhala ya banja libodzi-bodziro kwa mibadwo na mibadwo, iyo ikhambafunika lini kugulisidwa. Tsono iyo ikhambalugalisidwi mwakubverana na kuwanda kwa cakudya comwe cingadabvunidwa; mwa njira imweyi, bzikhakwanisika kukhazikisa pereso yace mwakubverana na magole yomwe yangadapita mpaka pa gole la ufulu lakutewera lace kufika, lomwe likhali gole lakuti bzinthu bzentse bzikhabwezedwa kwa mwenekaciro, bzingadakhala kuti bzikhanati kulomboledwa. (Mwam 25:13, 15, 23, 24) Lamulo limweri likhambaphatanidza nyumba zomwe zikhali m’mizinda yomwe ikhalibe litsito zomwe zikhambawonedwa ninga mbali ya minda. Tsono Pakulewa bza nyumba yomwe ikhali mu mzinda wa litsito, ikhambafunika kulomboledwa pambuyo pa kupita gole libodzi kucokera pa nthawe yomwe ikhagulisidwa; ingadasaya kulomboledwa pambuyo pa gole libodzi, iyo ikhambakhaliratu ya omwe agulayo. Tsono pakulewa bza nyumba zomwe zikhali m’mizinda ya Alevi, zingadalomboledwa pa nthawe iri-yentse, ndipo nthawe yakuilombolayo ikhalibe malire; bzikhali tenepo thangwe rakuti Alevi akhalibe utaka bwa mbuto.—Mwam 25:29-34.
it-2 matsa. 122-123
Gole la Ufulu
Pomwe ajirayeri akhabvera lamulo lakulewa bza gole la ufulu akhacitisa kuti wanthu winango aleke kusaukiratu na kuti winango aleke kukhala wakudala kwene-kwe, ninga momwe bzimbacitikira ntsiku zino. Phindu la kuteweza malamuloya, likhalimbisa mtundu wentse, thangwe palibe omwe angadabonereratu ndipo palibe omwe angadasayiratu cakucita thangwe ra kusauka, koma ali-wentse angadathandizira na luso lace kuti mtundu wentse ukhale bwino. Pomwe Ajirayeri akhabvera malango, Yahova akhasimba bzinthu bza m’minda mwawo ndipo iwo akhapfatsa na boma lakulungamiratu, akhakhala na bzinthu bzizinji, bzomwe bzikhakwanisika kokha thangwe ra kunamata kwa cadidi.—Zai 33:22.
1-7 FEVEREIRO
CUMA CA M’FALA LA MULUNGU | MWAMBO 26-27
“Bzomwe Tingacite kuti Tisimbidwe na Yahova”
it-1 tsa. 223 ndi. 3
Kudabwa kwa mantha
Wanthu wa Mulungu akhadabwa na kugopa Mozeji (Ciheb., moh·raʼʹ), thangwe ra momwe Yahova akhacitira bzinthu na Mozejiyo, na momwe akhamuphatisira basa. (Bzak 34:10, 12; Kuf 19:9) Wale omwe akhakhulipira Mozeji akhalemekeza utongi bwace. Ndipo akhakhulupirambo kuti Yahova akhalewalewa mwakuphatisa basa Mozeji. Ajirayeri akhafunika kugopa mbuto yakupambulika ya Yahova. (Mwam 19:30; 26:2) Bzimwebzi, bzikhathandauza kuti iwo akhafunika kulemekeza mbuto yakupambulika, acimbamunata mu njira yomwe iye ambafuna na kuteweza malamulo yace.
w91 1/3 17 ndi. 10
Bvumani Kuti ‘Mtendere wa Mulungu’ Ukhotcerere Mtima Wanu
Yahova adauza Ajirayeri kuti: ‘Mukapitiriza kubvera malango yangu na kuteweza malamulo yangu, nin’dzakubvumbisirani nvula pa nthawe yakuthemera. Mataka yan’dzacosa phoso ndipo miti in’dzabereka bzisapo. Nin’dzakupasani mtendere m’dzikolo mwakuti mun’dzagona mwakusaya kugopa cinthu ciri-centse. Nin’dzakukhotcererani ku bzirombo bza mthengo ndipo mphanga ya nkhondo in’dzapita lini mu dziko lanu. Nin’dzafamba pakati panu, ndicidzakhala Mulungu wanu ndipo imwepo mun’dzakhala wanthu wangu.’ (Mwambo 26:3, 4, 6, 12) Ajirayeri angadapfatsa na mtendere thangwe ra kukhotcereredwa kwa anyamadulanthaka wawo, angadakhala na bzinthu bzizinji na uxamwali bwakulimba na Yahova. Tsono kuti akhale na bzisimbo bentsebzi, iwo akhafunika kubvera mitemo ya Yahova.—Psal 119:165.
Cuma Cauzimu
it-2 tsa. 617
Matenda
Thangwe ra Kusaya Kubvera Lamulo la Mulungu. Ajirayeri adacenjezedwa kuti angadaleka kukoya mpangano omwe Mulungu akhadacita na iwo, iye angadawatumizira matenda pakati pawo. (Mwam 26:14-16, 23-25; Bzak 28:15, 21, 22) N’cadidi kuti nthawe zinango, Yahova adaboneresa wanthu winango na matenda, ninga pomwe adaduwalisa mapere Miriyamu, Uziya na Gehazi. (Mirew 12:10; 2Nkha 26:16-21; 2Wam 5:25-27) Tsono, bzikuwoneka kuti kazinji-kazinji, matenda yakhabwera thangwe ra kuperewera na thangwe ra bzinthu bzakuipa bzomwe munthu ayai mtundu ukhacita. Iwo akhabvuna bzomwe akhadabzala ndipo mathupi yawo yakhabonera thangwe ra bzinthu bzakuipa bzomwe iwo akhadacita. —Wag 6:7, 8
8-14 FEVEREIRO
CUMA CA M’FALA LA MULUNGU | MIREWENGO 1-2
“Yahova Ambalinganiza Wanthu Wace”
w94 12/1 tsa. 9 ndi. 4
Momwe Tinganamatire Yahova mu Njira Yakuthemera pa Moyo Wathu
Penu imwepo mungadanya’anisa tsasa la Ajirayeri na m’dzaulu, kodi mungadawona ciyani? Mungadawona mifolo ya matendi mazinji yakulinganizidwa, ndipo m’matendimo muna wanthu pafupi-fupi mamidyau matatu. Wanthuwo akhadagawidwa m’magulu ya madzinza matatu-matatu ku mbali zentse zinai. Mungadanyang’anisa na pafupi, mungadawona tumagulu tunango twa wanthu tuli pakati pa tsasalo. Tumagulu tunai tumwetu, tukhali mabanja ya dzinza la Levi. Pakati pa tsasalo pakhana nyumba yakupambulika yomwe ikhali pa mbuto yakukhukutidzidwa na nguwo. Imweyi ikhali tendi la mkonkhano lakumangidwa na Ajirayeri waluso, mwakubverana bzomwe Yahova akhadalewa.—Mirewengo 1:52, 53; 2:3, 10, 17, 18, 25; Kufuluka 35:10.
it-1 tsa. 397 ndi. 4
Tsasa
Tsasa la Ajirayeri likhali likulu kwene-kwene. Pomwe adacita kanembera adawona kuti pakhana amuna omwe angadayenda ku khondo wakukwana 603,550, kupambula akazi, wana, acikulire na wanthu akulemala, alevi wakukwana 22,000 na wanthu wa mitundu inango. Ndipo wentse pabodzi pinango akhalipo 3,000,000 ayai kuposa.(Kuf 12:38, 44; Mirew 3:21-34, 39) Bzikudziwika lini bwino-bwino kuti tsasa la Ajirayeri likhadakula tani, ndipo pana makumbukidwe yakusiyana-siyana pakulewa bza nkhani imweyi. Pomwe adamanga tsasa lawo pafupi na mzinda wa Jeriko mu cigwa ca Moabe, bzimbafotokozedwa kuti iro likhayambira ‘Bete-Jesimoti mpaka ku Abeli-sitimu.’—Mirew 33:49.
Cuma Cauzimu
it-2 tsa. 764
Kanembera
Kawiri-kawiri kukhali kunemba dzina, m’badwe, dzinza na banja lomwe munthu acokera. Kanemberayu akhaphatanidza bzizinji kuposa kundonembesa dzina ayai kulewenga misolo ya mabanja. Kanembera omwe ambafotokozedwa m’Bibliya akhacitika na bzakulinga bzakusiyanasiyana, ninga kukhoma mtsonkho, kusankhula amuna kuti akacite basa la ucikunda, ayai (kwa alevi omwe akhadasankhulidwa) pa kusankhula omwe anicita mabasa pa mbuto yakupambulika.
15-21 FEVEREIRO
CUMA CA M’FALA LA MULUNGU | MIREWENGO 3-4
“Basa Lomwe Alevi Akhacita”
it-2 tsa. 683 ndi. 3
Wantsembe
Mu Mpangano wa Cakutonga. Pomwe Ajirayeri akhali pa ukapolo ku Edjipito, Yahova adacenesa wana wacimuna wakuyamba kubadwa wa Ajirayeriwo, pa nthawe yomwe adapha wana wakuyamba kubadwa wa ku Edjipito na tsoka lacikhumi. (Kuf 12:29; Mirew 3:13) Thangwe ra bzimwebzi, wana wakuyamba kubadwawa akhali wa Yahova ndipo adasankhulidwa kuti acite utumiki bwakupambulika. Mulungu angadasankhula wana wentse wakuyamba kubadwa wa Ajirayeri kuti akhale wantsembe na alindiri pa tendi la mkonkhano. Tsono, kukhali kufuna kwace kusankhula kutenga wana wentse wacimuna wa dzinza la Levi kuti acite basa limweri. Ndipopa, adalekerera kuti wana wacimuna wa dzinza la Levi apite m’mbuto mwa wana wentse wakuyamba kubadwa wa madzinza 12 (kuphatanidzambo mbadwe za wana awiri wa Zuze omwe ni Efraimu na Manase, omwe akhalewengedwambo ninga madzinza mawiri). Kanembera omwe adacitidwa, adalatiza kuti pakhana wana wakuyamba kubadwa wa mwezi m’bodzi mpaka kutsogolo wakukwana 273 omwe akhali lini alevi. Mbogo imweyi, ikhali ikulu kuposa wana wacimuna wa dzinza la Levi, tenepo, Mulungu adalewa kuti wanawa, an’funika kulomboledwa mwakulipira masiklo maxanu ($11) pa ali-wentse. Kobiriyo ikhafunika kuperekedwa kwa Aroni na wana wace. (Mirew 3:11-16, 40-51) Pomwe kobiri zimwezi zikhanati kuperekedwa, Yahova akhadasankhula kale wana wacimuna wa banja la Aroni kuti akhale wantsembe wa Jirayeri.—Mirew 1:1; 3:6-10.
it-2 tsa. 241
Alevi
Mabasa. Dzinza la Levi likhana mabanja matatu, yakucokera kwa wana atatu wa Levi, omwe ni: Jerisoni, Kohati na Merari. (Ciy 46:11; 1Nkha 6:1, 16) Liri-lentse mwa mabanja matatuya, lidatambira mbuto yace ya kukhala pafupi na tendi la mkonkhano mu dambo. Aroni omwe akhali wa m’banja la Kohati pabodzi na wana wace, adamanga matendi yawo kutsogolo kwa tendi la mkonkhano, ku mbali ya kumbabvadzuwa. Alevi winango wa m’banja la Kohati adamanga matendi yawo mbali ya kummwera (sul) Ajerisoni akhali ku mbali ya kumadokero ndipo Amerari akhadamanga kumbali ya ku Kumpoto (Norte). (Mirew 3:23, 29, 35, 38) Kulongedza, kutsudzula na kutakula bzinthu bzomwe akhakonzera tendi la mkonkhano, likhali basa la Alevi. Ikafika nthawe yakuti afuluke kuti ayende m’mbuto inango, Aroni na wana wace akhacosa cinguwo comwe cikhagwata Cipinda Cakucena na Cipinda Cakucenesesa ndipo akhafunikiza thungwa la mpangano, maguwa ya ntsembe na bzombo bzinango bzakupambulika. Akohati ndiwo omwe akhatakula bzinthu bzimwebzi. Ajerisoni akhatakula nguwo za mu tendi la mkonkhamo, bzakumpsinkhira, nguwo za mu bwalo, nguwo za msuwo wa tendi la mkonkhano na bzingwe bza tendilo (bzikuwoneka kuti bzikhali bzingwe bza tendi cairolo). Ndipo Amerari akhasamalira mabatente ayai ma aro, midjirikiro, mipiringidzo, miti na bzingwe bza tendi, (bzingwe bzomwe bzikhaphatisidwa basa mu bwalo la tendi la mkonkhano).—Mirew 1:50, 51; 3:25, 26, 30, 31, 36, 37; 4:4-33; 7:5-9.
it-2 tsa. 241
Alevi
Mu nthawe za Mozeji, mlevi akhayamba kucita mabasa yace akapfitsa magole 30. Mabasayo yakhali kutakula bzinthu bzomwe akhamangira tendi la mkonkhano na bzombo bzace pomwe akhafuluka. (Mirew 4:46-49) Mabasa manango yangadacitidwa na munthu wa magole 25 mpaka kutsogolo, koma bzikuwoneka kuti yakhali lini mabasa makulu-makulu ninga la kutakula bzinthu bzakumangira tendi la mkonkhano. (Mirew 8:24) Mu ntsiku za mambo Davide, mlevi angadayamba kutumikira na magole 20. Thangwe Davide adalewa kuti tendi la mkonkhano (lomwe lingadapitidwa m’mbuto na templo), lingadacinjidwa lini pomwe kuti liyende ku mbuto inango. Alevi akhatumikira mpaka kupfitsa magole 50 yakubadwa. (Mirew 8:25, 26; 1Nkha 23:24-26; onani msolo wakuti IDADE, ERA.) Alevi akhafunika kudziwa bwino Cakutonga, thangwe akhacemeredwa kuti adzawerengere wanthu na kuwapfunzisa cakutongaco.—1Nkha 15:27; 2Nkha 5:12; 17:7-9; Neh 8:7-9.
22-28 FEVEREIRO
CUMA CA M’FALA LA MULUNGU | MIREWENGO 5-6
“Kodi Imwepo Mungatewezere Tani Anazireu?”
it-2 tsa. 477
Anazireu
Omwe akhalumbira kukhala anazireu, akhafunika kutcenkha kucita bzinthu bzitatu ibzi: (1) Kumwa ciri-centse cakuledzeresa, ndipo akhafunika lini kudya ciri-centse cakucokera ku muti wa mpesa, napo cicikhala ciwisi, cakukhuma ayai cakuuma, ne kumwa madzi ya cisapo cace. (2) Kugwata tsisi la mu msolo mwawo. (3) Kukhuya munthu wakufa, napo acikhala pai, mai, m’bale wawo wacimuna ayai wacikazi.—Mirew 6:1-7.
Malumbiro Yakupambulika. Omwe akhacita lumbiro limweri akhafunika kukhala na moyo ninga nazireu [kuthandauza wakubzipereka, kubzipambula] wa Yahova, ndipo akhafunika lini kucita bzimwebzi kuti abziwonesere kwa wanthu thangwe ra kubzipereka kwaceko. M’mbuto mwace, iye akhakhala ‘wakucena kwa Yahova ntsiku zentse za unazireu bwace.’—Mirew 6:2, 8; ndendemezerani na Ciy 49:26.
Tenepo, bzomwe Yahova adauza anazireu bzikhana thandauzo lakupambulika pa kunamata Yahovayo. Wantsembe akhabvumizidwa lini kukhuya munthu wakufa, thangwe ra udindo bwawo bwakupambulika, napo acikhala m’bale wawo. Mpsibodzibodzimbo na anazireu, iwo akhafunika lini kukhuya munthu wakufa. Mkulu wa antsembe na wantsembe winango, akhabvumizidwa lini kumwa vinyu ayai bzakumwa bzinago bzakuledzeresa, pakucita utumiki bwawo kwa Yahova, thangwe ra udindo bukulu bomwe iwo akhanabo.—Mwam 10:8-11; 21:10, 11.
Kuthumizira bzimwebzi, nazireu akhafunika (Ciheb., na·zirʹ) kukhala ‘wakucena mwa kusiya tsisi lace likule.’ Cimweci, cikhali cizindikiro cakuti wanthu adziwe kuti umweyu ni nazireu wakucena. (Mirew 6:5) Fala lacihebereu lakuti na·zirʹ likhaphatisidwambo basa pakulewa bza muti wa mpesa omwe akhalibe kugwatidwa mithawi yace mu gole lacinomwe ayai mu gole la ufulu. (Mwam 25:5, 11). Mpsakudabwisa kuti kacirata ka oro komwe kakhali pa mkuma wa mkulu wa antsembe, komwe kakhadanembedwa kuti: ‘Kucena ni kwa Yahova,’ kakhacemeredwa kuti ‘cizindikiro cakupambulika ca kubzipereka’ [Ciheb., neʹzer, lakucokera ku fala libodzibodzi lakuti na·zirʹ]. Kuf 39:30, 31) Mpsibodzibodzimbo na cinthu comwe wa mambo wa Jirayeri akhabvala mu msolo ayai korowa ikhacemeredwambo kuti neʹzer . (2Sam 1:10; 2Wam 11:12; onani COROA; DEDICAÇÃO). Mpostolo Paulo, adalewa kuti tsisi litali la mkazi, limbapita mbuto mwa duku. Tsisiro limbakumbusa mkaziyo kuti ana udindo bwakusiyana na bomwe mwamuna anabo. Ndipo iye an’funika kukumbukira kuti an’funikira kubvera makonzedwe ya Mulungu. Bzomwe Yahova akhafuna kuti anazireu acite, ninga kuleka kugwata tsisi, kuleka kumwa vinyu na kufunika kwa kukhala wakucena bzikhakumbusa nazireu wakubzipereka kufunika kwa kubzimana na kubvera na mtima wentse kufuna kwa Yahova.—1Wak 11:2-16; onani CABELO; COBERTURA PARA A CABEÇA; NATUREZA.